“အမျိုးသားညီညွတ်ရေးအစိုးရ (NUG) ၏ တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA) အပေါ် မူဝါဒ သဘောထားထုတ်ပြန်ချက်”

“အမျိုးသားညီညွတ်ရေးအစိုးရ (NUG) ၏ တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA) အပေါ် မူဝါဒ သဘောထားထုတ်ပြန်ချက်”

ပြည်ထောင်စုသမ္မတမြန်မာနိုင်ငံတော်အမျိုးသားညီညွတ်ရေးအစိုးရhttps://nugmyanmar.org၂၀၂၃ ခုနှစ်၊ အောက်တိုဘာလ ၃၁ ရက်ကြေညာချက်အမှတ် (၁၀/၂၀၂၃)“အမျိုးသားညီညွတ်ရေးအစိုးရ (NUG) ၏ တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA) အပေါ် မူဝါဒ သဘောထားထုတ်ပြန်ချက်”အမျိုးသားညီညွတ်ရေးအစိုးရ (NUG) သည် တစ်နိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA) နှင့်စပ်လျဉ်း၍  မူဝါဒသဘောထားကို ၂၀၂၁၊ ဒီဇင်ဘာလ (၂၁) ရက်နေ့တွင် ကျင်းပခဲ့သော ‘‘အစိုးရအဖွဲ့ အစည်းအဝေး’’ တွင် ချမှတ်နိုင်ခဲ့ပါသည်။ ယခုအခါ မတရားအာဏာသိမ်းရန် ကြိုးပမ်းနေသော အကြမ်းဖက် စစ်ကောင်စီက NCA စာချုပ်ကိုအသုံးချ၍ နိုင်ငံရေးထွက်ပေါက်ရှာရန် ကြိုးပမ်းမှုများ ဆောင်ရွက်နေခြင်း ကြောင့်သော်လည်းကောင်း၊ နိုင်ငံတကာအဖွဲ့အစည်းတချို့က NCA စာချုပ်အရ ဖွဲ့စည်းခဲ့သော ‘‘ပူးတွဲစောင့် ကြည့်ရေးကော်မတီ’’ (JMC) ကို အသုံးချ၍ လူသားချင်းစာနာထောက်ထားရေးအကူအညီများကို အကြမ်းဖက် စစ်ကောင်စီနှင့် ပူးပေါင်းပြီး ဆောင်ရွက်ရန် ကြိုးပမ်းမှုများရှိနေခြင်းကြောင့်သော်လည်းကောင်း အမျိုးသားညီညွတ်ရေး အစိုးရ (NUG) ၏ မူဝါဒသဘောထားကို အများပြည်သူ သိရှိနားလည်နိုင်စေရန် အောက်ပါအတိုင်းထုတ်ပြန် ကြေညာအပ်ပါသည်။(၁) တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA) သည် ပြည်ထောင်စု သမ္မတ မြန်မာနိုင်ငံတော်အစိုးရနှင့် တိုင်းရင်းသားလက်နက်ကိုင် တော်လှန်ရေးအဖွဲ့အစည်းများအကြား ချုပ်ဆိုထားသော စာချုပ်ဖြစ်သည်။ အကြမ်းဖက် စစ်တပ်နှင့် ချုပ်ဆိုထားသောစာချုပ်မဟုတ်ပါ။(၂) အကြမ်းဖက် စစ်တပ်သည် အာဏာသိမ်းရုံမျှဖြင့် အစိုးရတရပ် ဖြစ်မလာပါ။ မတရား အာဏာသိမ်းရန် ကြိုးပမ်းနေသော အကြမ်းဖက်စစ်ကောင်စီကို ပြည်ထောင်စုမြန်မာနိုင်ငံရှိ တိုင်းရင်းသား လူမျိုးအားလုံးနှင့် ပြည်သူ လူထုတရပ်လုံးကသော်လည်းကောင်း၊ နိုင်ငံတကာကသော် လည်းကောင်း အစိုးရအဖြစ် အသိအမှတ် ပြုခြင်း လုံးဝမရှိပါ။(၃) ယနေ့အချိန်တွင် ပြည်ထောင်စုသမ္မတမြန်မာနိုင်ငံနှင့် ပြည်သူလူထုကို ကိုယ်စားပြုသော တရားဝင် အစိုးရမှာ အမျိုးသားညီညွတ်ရေးအစိုးရသာဖြစ်သည်။(၄) NCA စာချုပ်သည် အကြမ်းဖက် စစ်တပ်နှင့်ချုပ်ဆိုထားသော စာချုပ်မဟုတ်ခြင်းနှင့် မတရား အာဏာသိမ်းရန် ကြိုးပမ်းနေသော အကြမ်းဖက် စစ်ကောင်စီသည် တရားဝင် အစိုးရ မဟုတ်ခြင်းတို့ကြောင့် NCA စာချုပ်ကို အကောင်အထည်ဖော်ရန် အကြမ်းဖက် စစ်ကောင်စီတွင် တာဝန်လည်း မရှိ၊ လုပ်ပိုင်ခွင့်လည်းမရှိပါ။(၅) NCA စာချုပ်တွင် လက်မှတ်ရေးထိုးသည့် တိုင်းရင်းသား လက်နက်ကိုင် တော်လှန်ရေး အဖွဲ့အစည်းများ၏ ငြိမ်းချမ်းရေးလုပ်ငန်းစဉ် ဦးဆောင်အဖွဲ့ (PPST) ကလည်း ‘‘အာဏာသိမ်း စစ်ကောင်စီနှင့် နိုင်ငံရေး တွေ့ဆုံဆွေးနွေး ညှိနှိုင်းမှုများကို ရပ်ဆိုင်းထားကြောင်း’’ ၂၀၂၁၊ ဖေဖော် ဝါရီလ (၂၀) ရက်နေ့တွင် ထုတ်ပြန်ကြေညာခဲ့ပြီးဖြစ်ပါသည်။ ထို့အပြင် NCA စာချုပ်ကို လက်မှတ်ရေးထိုးခဲ့ကြသော မြန်မာနိုင်ငံလုံးဆိုင်ရာ ကျောင်းသားများဒီမိုကရက်တစ်တပ်ဦး (ABSDF)၊ ချင်းအမျိုးသားတပ်ဦး (CNF) နှင့် ကရင်အမျိုးသားအစည်းအရုံး (KNU- Karen National Union)၊ တို့က ၂၀၂၃ ခုနှစ် အောက်တိုဘာလ (၁၂) ရက်နေ့တွင် ‘‘စစ်အာဏာသိမ်းခြင်းသည် NCA အခြေခံမူနှင့် ရည်ရွယ်ချက်များကို ဖျက်ဆီးခြင်း ဖြစ်သလို ၂၀၀၈ ဖွဲ့စည်းပုံအခြေခံဥပဒေကိုလည်း ပျက်ပြယ်စေသည့်အတွက် NCA ကို အခြေခံသည့် လုပ်ငန်းစဉ်နှင့် ဆွေးနွေးပွဲ လမ်းကြောင်းများ ရပ်တန့်သွားခဲ့ပြီးဖြစ်သည်’’ ဟု ထုတ်ပြန်ကြေညာခဲ့သည်။(၆) အမျိုးသားညီညွတ်ရေးအတိုင်ပင်ခံကောင်စီ (NUCC) အတွင်း ညှိနှိုင်းဆွေးနွေး သဘော တူညီချက်အရ ‘‘ပြည်ထောင်စုလွှတ်တော် ကိုယ်စားပြုကော်မတီ’’ (CRPH) က ၂၀၀၈ ဖွဲ့စည်းပုံ အခြေခံဥပဒေကို ဖျက်သိမ်းကြောင်း ကြေညာခဲ့ပါသည်။ ထို့ကြောင့် ၂၀၀၈ ဖွဲ့စည်းပုံ အခြေခံဥပဒေကို ‘‘ပြင်ဆင်ခြင်း၊ ဖြည့်စွက်ခြင်းနှင့် ပယ်ဖျက်ခြင်း’’ ပြုလုပ်ရန် ဟူသော ရည်ရွယ်ချက်ဖြင့် ချုပ်ဆိုထားသော NCA အရ ဆောင်ရွက်ခဲ့သည့် နိုင်ငံရေး ဆွေးနွေးပွဲ အဆင့်ဆင့်သည် အလိုအလျောက် ဦးတည်ချက်ပျောက်၍ အဓိပ္ပာယ်လည်း ကင်းမဲ့သွားကြပါသည်။ (၇) NCA စာချုပ်ကို အခြေခံ၍ ရေးဆွဲထားသော ‘‘နိုင်ငံရေးဆွေးနွေးမှုဆိုင်ရာမူဘောင်’’ နှင့် နိုင်ငံရေး ဆွေးနွေးပွဲယန္တရားများဖြစ်သည့် JICM၊ UPDJC နှင့် JMC တို့သည်လည်း ဦးတည်ချက်ပျောက်ကာ အကြမ်းဖက်စစ်ကောင်စီက အာဏာသိမ်းရန် ကြိုးပမ်းပြီးနောက်ပိုင်း အလိုအလျောက် ပျက်ပြယ် ရပ်တန့်သွားခဲ့ကြပါသည်။(၈) ယခုအခါ စစ်မှန်သော ဖက်ဒရယ်ဒီမိုကရေစီပြည်ထောင်စုတည်ဆောက်ရေးအတွက် လိုအပ်သော နိုင်ငံရေးအခြေခံမူများနှင့်လုပ်ငန်းစဉ်အဆင့်ဆင့်ကိုဖော်ထုတ်ရန် ဖက်ဒရယ်ဒီမိုကရေစီပဋိညာဉ်ကို ထုတ်ပြန်ပြီး၊ ယင်းတွင် ဖက်ဒရယ်ပြည်ထောင်စုတည်ဆောက်ရေးဆိုင်ရာ အခြေခံမူများနှင့် နိုင်ငံရေးလမ်းပြမြေပုံများကိုဖော်ပြထားပါသည်။ထို့ကြောင့်ဖက်ဒရယ်ပြည်ထောင်စုတည်ဆောက်ရေးသာမက နိုင်ငံရေးနှင့် ငြိမ်းချမ်းရေးလုပ်ငန်းစဉ်များကို ဖက်ဒရယ်ဒီမိုကရေစီပဋိညာဉ် အပေါ်တွင်သာ အခြေခံ၍ ဆောင်ရွက်ရမည်ဟု အမျိုးသားညီညွတ်ရေးအစိုးရက လေးနက်စွာ ခံယူထားပါသည်။(၉) အကြမ်းဖက်စစ်ကောင်စီသည် NCA ကို အသုံးချ၍ နိုင်ငံရေးထွက်ပေါက်ရှာရန် နိုင်ငံရေး အင်အားစုများအကြား သဘောထားကွဲလွဲမှုများ၊ ရှုပ်ထွေးမှုများဖြစ်လာစေရန် အကွက်ဆင် ဖန်တီးလျက်ရှိကြောင်း တွေ့ရှိပါသည်။ ထို့အပြင် NCA စာချုပ်ကို အခြေခံ၍ ဖွဲ့စည်းထားသော ‘‘ပူးတွဲစောင့်ကြည့်ရေးကော်မတီ’’ (JMC) ကို အသုံးချ၍ ‘‘လူသားချင်းစာနာ ထောက်ထားရေး အကူအညီများ’’ ပေးအပ်ခြင်း ကို ဆောင်ရွက်မည်ဟုလည်း ကြားသိရပါသည်။ ယင်းလုပ်ရပ် များသည် စစ်အာဏာရှင်စနစ် သက်ဆိုးရှည်ရေးကို ဦးတည်သည့် ဆောင်ရွက်ချက်များ ဖြစ်သောကြောင့် အသိအမှတ်ပြုလက်ခံမည်မဟုတ်ပါ။ NCA စာချုပ်ကို အကြောင်းပြု၍ အကြမ်းဖက်စစ်ကောင်စီနှင့် ပူးပေါင်းဆောင်ရွက်မည့်လုပ်ငန်းမှန်သမျှ ကိုလည်း အသိအမှတ်ပြုမည် မဟုတ်ပါ။(၁၀) ဖက်ဒရယ်ဒီမိုကရေစီပဋိညာဉ်ပါနိုင်ငံရေးလမ်းပြမြေပုံ၏ဦးတည်ချက်သည် Regime Change မဟုတ်၊ System Change ဖြစ်ပါသည်။ ထို့ကြောင့် စစ်အာဏာရှင်စနစ်အပါအဝင် အာဏာရှင် စနစ်မှန်သမျှ ပပျောက်ရေးနှင့် စစ်မှန်သောဖက်ဒရယ် ဒီမိုကရေစီပြည်ထောင်စု တည်ဆောက်ရေး စီမံချက်များကို ထိုလမ်းပြမြေပုံအတိုင်း တဆင့်ပြီးတဆင့် အကောင်အထည်ဖော် ဆောင်ရွက်မည်။(က) အကြမ်းဖက်စစ်ကောင်စီ၏ မတရားအာဏာသိမ်းရန် ကြိုးပမ်းမှုမှန်သမျှကို အပြီးသတ် ဖယ် ရှားမည်။(ခ) အသွင်ကူးပြောင်းရေးကာလ ဖွဲ့စည်းပုံအခြေခံဥပဒေကိုရေးဆွဲပြဋ္ဌာန်းပြီး ထိုဖွဲ့စည်းပုံ အခြေခံ ဥပဒေနှင့်အညီ အသွင်ကူးပြောင်းရေးကာလ အမျိုးသားညီညွတ်ရေးအစိုးရ (TNUG) ကို ဖွဲ့ စည်းမည်။ ပြည်နယ်/ ဖက်ဒရယ်ယူနစ်များ၏ အသွင် ကူးပြောင်းရေးကာလ အစိုးရများကို လည်း ဖွဲ့စည်းမည်။(ဂ) အသွင်ကူးပြောင်းရေးကာလတွင် အားလုံးပါဝင်သော ‘‘တိုင်းပြုပြည်ပြုညီလာခံ’’ ကို ခေါ်ယူ ကျင်းပပြီး အမြဲတမ်းကျင့်သုံးမည့် ဖက်ဒရယ်ပြည်ထောင်စု ဖွဲ့စည်းပုံအခြေခံ ဥပဒေကို ရေးဆွဲ ပြဋ္ဌာန်းမည်။(ဃ) အသွင်ကူးပြောင်းရေးကာလ ဖွဲ့စည်းပုံအခြေခံဥပဒေတွင်သော်လည်းကောင်း၊ အမြဲတမ်း ကျင့်သုံးမည့် ဖက်ဒရယ်ပြည်ထောင်စုဖွဲ့စည်းပုံအခြေခံဥပဒေတွင်သော်လည်းကောင်း၊ စစ် တပ်သည် နိုင်ငံရေးတွင် ပါဝင်ခြင်း အလျှင်းမရှိစေရဟူသော ‘‘မူ’’ ကို အခိုင်အမာ ပြဋ္ဌာန်းပေးရမည်။ လုံခြုံရေးဆိုင်ရာတပ်ဖွဲ့အားလုံးသည် အရပ်သားအစိုးရ၏ စီမံအုပ်ချုပ်မှု အောက်တွင် အပြည့်အဝထားရှိရမည်ဟူသော ‘‘Civilian Supremacy’’ ကို ပြဋ္ဌာန်း ကာကွယ်ရမည်။(င) အသွင်ကူးပြောင်းရေးကာလ တရားမျှတမှု (Transitional Justice) ကို ဖော်ဆောင်ပြီး၊ ပဋိပက္ခအတွင်း မတရားကျူးလွန်ခံရသူများအတွက် တရားမျှတမှုရရှိရေးကို ဖော်ဆောင် ရမည်။(စ) စစ်တပ်သည် နိုင်ငံရေးတွင် ပါဝင်ခြင်းမရှိစေရဟူသော ‘‘မူ’’ နှင့် လုံခြုံရေးဆိုင်ရာ တပ်ဖွဲ့အား လုံးသည် အရပ်သားအစိုးရ၏စီမံအုပ်ချုပ်မှုအောက်တွင် ထားရှိရမည်ဟူသော ‘‘မူ’’ တို့ကို အခြေခံ၍ ဖက်ဒရယ်ပြည်ထောင်စုတပ်မတော်ပေါ်ပေါက်ရေးကို ဦးတည်သည့် လုံခြုံရေး ဆိုင်ရာ ပြုပြင်ပြောင်းလဲရေးကို ဖော်ဆောင်ရမည်။(ဆ) အသွင်ကူးပြောင်းရေးကာလဆိုင်ရာအစီအမံများကို စနစ်တကျဖော်ဆောင်နိုင်ရေးအတွက် လိုအပ်သော နိုင်ငံတကာ အထောက်အကူများ ရရှိနိုင်ရေးအတွက် ဆောင်ရွက်ရမည်။အမျိုးသားညီညွတ်ရေးအစိုးရ

စစ်ကိုင်းတိုင်းဒေသကြီးလွှတ်တော်ကိုယ်စားပြုကော်မတီနှင့် ဖက်ဒရယ်ပြည်ထောင်စုရေးရာဝန်ကြီးဌာန ပြည်ထောင်စုဝန်ကြီး ဒေါက်တာလျန်မှုန်းဆာခေါင်းတို့ တွေ့ဆုံဆွေးနွေး

စစ်ကိုင်းတိုင်းဒေသကြီးလွှတ်တော်ကိုယ်စားပြုကော်မတီနှင့် ဖက်ဒရယ်ပြည်ထောင်စုရေးရာဝန်ကြီးဌာန ပြည်ထောင်စုဝန်ကြီး ဒေါက်တာလျန်မှုန်းဆာခေါင်းတို့ တွေ့ဆုံဆွေးနွေး

စစ်ကိုင်းတိုင်းဒေသကြီး လွှတ်တော် ကိုယ်စားပြုကော်မတီသည်ဖက်ဒရယ်ပြည်ထောင်စုရေးရာဝန်ကြီးဌာန ပြည်ထောင်စုဝန်ကြီး ဒေါက်တာလျန်မှုန်းဆာခေါင်းနှင့်  ၂၀၂၃ ခုနှစ်၊ အောက်တိုဘာလ ၃၀ရက်နေ့၊ ၁၈း၀၀ နာရိ အချိန်တွင် ဗီဒီယိုကွန်ဖရင့်မှတဆင့် တွေ့ဆုံဆွေးနွေးခဲ့ပါသည်။တွေ့ဆုံဆွေးနွေးပွဲတွင် စစ်ကိုင်းတိုင်းဒေသကြီးလွှတ်တော် ကိုယ်စားပြုကော်မတီ၏ ဥက္ကဌ ဦးမြင့်ထွေး နှင့် တိုင်းဒေသကြီးလွှတ်တော်ရေးရာကော်မတီများမှ တာဝန်ရှိသူများ၊ လွှတ်တော်ကိုယ်စားလှယ်များတက်ရောက်ခဲ့ကြပြီး ဝန်ကြီးဌာနဘက်မှလည်း ဒုတိယဝန်ကြီး၊အမြဲတမ်းအတွင်းဝန်များ၊တာဝန်ရှိသူများတက်ရောက်ခဲ့ကြပါသည်။တွေ့ဆုံပွဲတွင် ပြည်ထောင်စုဝန်ကြီးမှ ဝန်ကြီးဌာနမှ ဖက်ဒရယ်ရေးရာ လုပ်ငန်းဆောင်ရွက်ခဲ့မှုများ‌အခြေအနေနှင့်ဝန်ကြီးဌာန၏ ရှေ့လုပ်ငန်းစဥ်များ ကိုရှင်းလင်းပြောကြားခဲ့ပြီးစစ်ကိုင်းတိုင်းဒေသကြီးလွှတ်တော်ဥက္ကဌမှလည်း စစ်ကိုင်းတိုင်းဒေသကြီးလွှတ်တော်၏ ဆောင်ရွက်ပြီးစီးခဲ့သော လုပ်ငန်းစဉ်များနှင့် ဖက်ဒရယ်ရေးရာကိစ္စရပ်များကို ရှင်းလင်းပြောကြားခဲ့ပြီးနောက်တက်ရောက်လာသော လွှတ်တော်ကိုယ်စားလှယ်များမှလည်း အပြန်အလှန်ဆွေးနွေး ညှိနှိုင်းခဲ့ကြကာ ၂၁း၀၀ နာရီ တွင်အစည်းအဝေးအား ရုပ်သိမ်းခဲ့ပါသည်။

၃၄/၂၀၂၃ ကြိမ်မြောက် အစိုးရအဖွဲ့ အစည်းအဝေးတွင် ယာယီသမ္မတ ဒူဝါလရှီးလမှ ပြောကြားသည့် မိန့်ခွန်းကောက်နုတ်ချက်

၃၄/၂၀၂၃ ကြိမ်မြောက် အစိုးရအဖွဲ့ အစည်းအဝေးတွင် ယာယီသမ္မတ ဒူဝါလရှီးလမှ ပြောကြားသည့် မိန့်ခွန်းကောက်နုတ်ချက်

၂၀၂၃ ခုနှစ် အောက်တိုဘာလ ၃၁ ရက်အခုချိန်မှာ ကျွန်တော်တို့အားလုံး သိတဲ့အတိုင်း ညီနောင်မဟာမိတ် (၃) ဖွဲ့နဲ့အတူ မဟာမိတ်ပူးပေါင်းတပ်များက “၁၀၂၇ စစ်ဆင်ရေးကြီး” ကို မဟာဗျူဟာကျကျ ဆင်နွှဲနေပါတယ်။ ရက်တိုကာလအတွင်း ရရှိခဲ့တဲ့ အောင်မြင်မှုတွေကို ကျွန်တော့်အနေနဲ့ အလေးအနက်ထား ဂုဏ်ယူပါကြောင်းပြောလိုပါတယ်။ တိုက်ပွဲဝင်နေကြတဲ့ ညီနောင်မဟာမိတ် (၃) ဖွဲ့အပါအဝင် မဟာမိတ်တပ်ဖွဲ့များ အားလုံးနဲ့အတူ တတိုင်းပြည်လုံးက ရပ်တည်နေသလို ကျွန်တော်တို့ အမျိုးသားညီညွတ်ရေးအစိုးရ (NUG) ကလည်း တသားတည်းရပ်တည်နေပါကြောင်း အလေးအနက်ထား ပြောကြားလိုပါတယ်။ စွန့်လွှတ်ပေးဆပ်သွားကြတဲ့ သူရဲကောင်းများအားလုံးကို ကျွန်တော်တို့အားလုံး ထာဝရ အမှတ်ရစွာနဲ့ ဦးညွှတ်ဂုဏ်ပြုနေမှာဖြစ်ပါတယ်။ စွန့်လွှတ်ပေးဆပ်မှု တခုချင်းစီတိုင်း အလဟဿ ဖြစ်မသွားစေဘဲ ထိုက်တန်တဲ့ မျှော်ရည်ပန်းတိုင်ကို ရယူနိုင်ဖို့ ကျွန်တော်တို့အားလုံး အဆက်မပြတ် အားထုတ်နေကြရမှာ ဖြစ်ပါတယ်။ လူထုတရပ်လုံးအနေနဲ့လည်း တော်လှန်ရေးရဲဘော်တွေ ပိုမိုပြီး ခွန်အားတက်ကြွစေဖို့ ဆက်ပြီး အခိုင်အမာ အားပေးထောက်ခံသွားကြပါလို့ အထူးတိုက်တွန်း လိုပါတယ်။တော်လှန်ရေးနဲ့ပတ်သက်ပြီး လူထုရဲ့မျှော်လင့်ချက်နဲ့ စိတ်အားတက်ကြွမှုတွေဟာ စစ်ရေး စွမ်းဆောင်မှုတွေအပေါ် အများကြီး မူတည်ပါတယ်။ ဒါကြောင့် ကျွန်တော်တို့ဟာ မဟာမိတ် ဆက်ဆံရေး ဒီ့ထက်ပိုပြီး အားကောင်း ခိုင်မာစေဖို့နဲ့ နိုင်ငံတဝန်းမှာ မဟာဗျူဟာကျကျ ဟန်ချက် ညီစွာ “တသံတည်းညီ တချီတည်းရုန်း” ကြဖို့ ဆထက်တံပိုး အားထုတ်သွားရမှာ ဖြစ်ပါတယ်။မင်းအောင်လှိုင်နဲ့ ကိုယ်ကျိုးရှာ အကြမ်းဖက်စစ်တပ်၏ ဖျားယောင်းမှုတွင် မှိုင်းမိရုန်းကန်နေရသော တိုင်းချစ်ပြည်ချစ် စိတ်ဓါတ်ရှိသည့် ရဲဘော်ရဲဘက်များ၊ ပြည်သူ့စစ်များ၊ ပျူစောထီးများအနေဖြင့် အချိန်မလင့်မှီ ချက်ချင်း သက်ဆိုင်ရာတိုင်းရင်းသားလက်နက်ကိုင်တော်လှန်ရေးအဖွဲ့များနှင့်  PDFs များထံ လက်နက်ချလာရောက်ပူးပေါင်းကြဖို့ တိုက်တွန်းလိုပါတယ်။နွေဦးတော်လှန်ရေးရဲ့ လက်နက်ကိုင်တော်လှန်ရေးကဏ္ဍမှာ ကာကွယ်ရေးဝန်ကြီးဌာနဟာ အမျိုးသားညီညွတ်ရေးအစိုးရအဖွဲ့ထဲက အဓိက ဝန်ကြီးဌာနဖြစ်ပါတယ်။ ဒါကြောင့်လည်း လုပ်ငန်း တာဝန်တွေ ကြီးမားများပြားလှပါတယ်။ ဒီနေရာမှာ ကာကွယ်ရေးဝန်ကြီးဌာနရဲ့ စွမ်းဆောင် အောင်မြင်မှုတွေကို  ကျွန်တော့်အနေနဲ့ အသိအမှတ်ပြု ကျေးဇူးတင်ပါကြောင်း မှတ်မှတ်ရရ ပြောလို ပါတယ်။ တာဝန်ရှိသူ အဆင့်ဆင့်အနေနဲ့လည်း Code of Conduct (CoC) ကို အထူးကြပ်မတ်ပြီး ကိုယ်တိုင်လည်း လိုက်နာဆောင်ရွက်ကြဖို့ သတိပေးလိုပါတယ်။ အခုဆိုရင် တော်လှန်ရေးရဲဘော်တွေ စစ်မြေပြင်မှာ ထိုးစစ်ဆင်တာတွေ/ ဒရုန်းနဲ့တိုက်ခိုက်မှုတွေကနေ စစ်ရေးအောင်မြင်မှုအပေါ် အတော်လေး အထောက်အကူ ပြုလာနိုင်သလို ထုတ်လုပ်မှု အပိုင်းမှာလည်း အဆင့်မြင့်လာတာ တွေ့ရပါတယ်။ အားရဖို့လည်း ကောင်းပါတယ်။ ဒါပေမယ့်လည်း နည်းပညာဆိုတာက ရပ်တန့်နေတာမဟုတ်ပါဘူး။ ကျွန်တော်တို့ ပိုပြီး အာရုံစိုက် ကြိုးစားသွားရမှာ ဖြစ်ပါတယ်။ လက်နက်ထုတ်လုပ်မှုနဲ့ နည်းပညာ မြှင့်တင်မှု အပိုင်းဟာ တော်လှန်ရေး အောင်မြင်မှုကို အရှိန်မြှင့်ပေးမယ့် စွမ်းအင်လောင်စာဖြစ်ပါတယ်။ ဒါကို ပြည်သူလူထုက သိမြင်ပြီး ထောက်ပံ့လာအောင် သတင်းစကားပါးရမှာ ဖြစ်ပါတယ်။ကျွန်တော်တို့ တော်လှန်ရေးကို ဆင်နွှဲရာမှာ စဉ်ဆက်မပြတ် လက်ကိုင်ထားရမှာက ‘တော်လှန်ရင်း တည်ဆောက်၊ တည်ဆောက်ရင်း တော်လှန်’ ဆိုတဲ့ ခံယူလုပ်ဆောင်ချက်ဖြစ်ပါတယ်။ တည်ဆောက် တယ်ဆိုတဲ့နေရာမှာ လူ အင်အား၊ လက်နက်အင်အား၊ နည်းပညာနဲ့ စွမ်းရည်အပြင် စိတ်ဓာတ်နဲ့ ကျင့်ဝတ်စည်းကမ်းတွေကိုလည်း တည်ဆောက်ရပါမယ်။ တော်လှန်ရေးနဲ့ တည်ဆောက်ရေးကို ပိုပြီးတော့ ဟန်ချက်ညီညီ လုပ်ဆောင်ပြီး တော်လှန်ရေး အရှိန်ကို မြှင့်တင်ကြဖို့ တိုက်တွန်းပါတယ်။အရေးတော်ပုံမုချအောင်ရမည်

အမျိုးသားညီညွတ်ရေးအစိုးရ ၃၄ ကြိမ်မြောက် အစိုးရအဖွဲ့အစည်းဝေးပြုလုပ်

အမျိုးသားညီညွတ်ရေးအစိုးရ ၃၄ ကြိမ်မြောက် အစိုးရအဖွဲ့အစည်းဝေးပြုလုပ်

ညီနောင်မဟာမိတ် (၃) ဖွဲ့အပါအဝင် မဟာမိတ်တပ်ဖွဲ့များ အားလုံးနဲ့အတူ တတိုင်းပြည်လုံးက ရပ်တည်နေသလို အမျိုးသားညီညွတ်ရေးအစိုးရကလည်း တသားတည်းရပ်တည်နေတယ်လို့ ယာယီသမ္မတ ဒူဝါလရှီးလပြောကြားအောက်တိုဘာ ၃၁ ၊ ၂၀၂၃အမျိုးသားညီညွတ်ရေးအစိုးရရဲ့ ၃၄ ကြိမ်မြောက် အစိုးရအဖွဲ့အစည်းအဝေးကို ဒီနေ့မနက် ၁၀ နာရီမှာပြုလုပ် ခဲ့ကြ ပါတယ်။ အစည်းအဝေးကို ယာယီသမ္မတ ဒူဝါလရှီးလ၊ ပြည်ထောင်စုဝန်ကြီးချုပ် မန်းဝင်းခိုင်သန်းတို့ အပါအဝင် ပြည်ထောင်စုဝန်ကြီးတွေ၊ ဒုဝန်ကြီးတွေ တက်ရောက်ခဲ့ကြပါတယ်။အစည်းအဝေးမှာ ယာယီသမ္မတ ဒူဝါလရှီးလက အဖွင့်မိန့်ခွန်းပြောကြားခဲ့ပြီးနောက် ပြည်ထောင်စု ဝန်ကြီးချုပ်က မိန့်ခွန်း ပြောကြားခဲ့ပါတယ်။ယာယီသမ္မတ ဒူဝါလရှီးလက  “အခုချိန်မှာ ကျွန်တော်တို့အားလုံး သိတဲ့အတိုင်း ညီနောင်မဟာမိတ် (၃) ဖွဲ့နဲ့အတူ မဟာမိတ်ပူးပေါင်းတပ်များက “၁၀၂၇ စစ်ဆင်ရေးကြီး” ကို မဟာဗျူဟာကျကျ ဆင်နွှဲနေပါတယ်။ ရက်တိုကာလအတွင်း ရရှိခဲ့တဲ့ အောင်မြင်မှုတွေကို ကျွန်တော့်အနေနဲ့ အလေးအနက်ထား ဂုဏ်ယူပါကြောင်းပြောလိုပါတယ်။ တိုက်ပွဲဝင်နေကြတဲ့ ညီနောင်မဟာမိတ် (၃) ဖွဲ့အပါအဝင် မဟာမိတ်တပ်ဖွဲ့များ အားလုံးနဲ့အတူ တတိုင်းပြည်လုံးက ရပ်တည်နေသလို ကျွန်တော်တို့ အမျိုးသားညီညွတ်ရေးအစိုးရ (NUG) ကလည်း တသားတည်းရပ်တည်နေပါကြောင်း အလေးအနက်ထား ပြောကြားလိုပါတယ်။ စွန့်လွှတ်ပေးဆပ်သွားကြတဲ့ သူရဲကောင်းများအားလုံးကို ကျွန်တော်တို့အားလုံး ထာဝရ အမှတ်ရစွာနဲ့ ဦးညွှတ်ဂုဏ်ပြုနေမှာဖြစ်ပါတယ်။ စွန့်လွှတ်ပေးဆပ်မှု တခုချင်းစီတိုင်း အလဟဿ ဖြစ်မသွားစေဘဲ ထိုက်တန်တဲ့ မျှော်ရည်ပန်းတိုင်ကို ရယူနိုင်ဖို့ ကျွန်တော်တို့အားလုံး အဆက်မပြတ် အားထုတ်နေကြရမှာ ဖြစ်ပါတယ်။ လူထုတရပ်လုံးအနေနဲ့လည်း တော်လှန်ရေးရဲဘော်တွေ ပိုမိုပြီး ခွန်အားတက်ကြွစေဖို့ ဆက်ပြီး အခိုင်အမာ အားပေးထောက်ခံသွားကြပါလို့ အထူးတိုက်တွန်း လိုပါတယ်။ တော်လှန်ရေးနဲ့ပတ်သက်ပြီး လူထုရဲ့မျှော်လင့်ချက်နဲ့ စိတ်အားတက်ကြွမှုတွေဟာ စစ်ရေး စွမ်းဆောင်မှုတွေအပေါ် အများကြီး မူတည်ပါတယ်။ ဒါကြောင့် ကျွန်တော်တို့ဟာ မဟာမိတ် ဆက်ဆံရေး ဒီ့ထက်ပိုပြီး အားကောင်း ခိုင်မာစေဖို့နဲ့ နိုင်ငံတဝန်းမှာ မဟာဗျူဟာကျကျ ဟန်ချက် ညီစွာ “တသံတည်းညီ တချီတည်းရုန်း” ကြဖို့ ဆထက်တံပိုး အားထုတ်သွားရမှာ ဖြစ်ပါတယ်။” လို့ ပြောကြားပါတယ်။ဆက်လက်ပြီးတော့လည်း “မင်းအောင်လှိုင်နဲ့ ကိုယ်ကျိုးရှာ အကြမ်းဖက်စစ်တပ်၏ ဖျားယောင်းမှုတွင် မှိုင်းမိရုန်းကန်နေရသော တိုင်းချစ်ပြည်ချစ် စိတ်ဓါတ်ရှိသည့် ရဲဘော်ရဲဘက်များ၊ ပြည်သူ့စစ်များ၊ ပျူစောထီးများအနေဖြင့် အချိန်မလင့်မှီ ချက်ချင်း သက်ဆိုင်ရာတိုင်းရင်းသားလက်နက်ကိုင် တော်လှန်ရေးအဖွဲ့များနှင့်  PDFs များထံ လက်နက်ချလာရောက်ပူးပေါင်းကြဖို့ တိုက်တွန်းလိုပါတယ်။နွေဦးတော်လှန်ရေးရဲ့ လက်နက်ကိုင်တော်လှန်ရေးကဏ္ဍမှာ ကာကွယ်ရေးဝန်ကြီးဌာနဟာ အမျိုးသားညီညွတ်ရေးအစိုးရအဖွဲ့ထဲက အဓိက ဝန်ကြီးဌာနဖြစ်ပါတယ်။ ဒါကြောင့်လည်း လုပ်ငန်း တာဝန်တွေ ကြီးမားများပြားလှပါတယ်။ ဒီနေရာမှာ ကာကွယ်ရေးဝန်ကြီးဌာနရဲ့ စွမ်းဆောင် အောင်မြင်မှုတွေကို  ကျွန်တော့်အနေနဲ့ အသိအမှတ်ပြု ကျေးဇူးတင်ပါကြောင်း မှတ်မှတ်ရရ ပြောလို ပါတယ်။ တာဝန်ရှိသူ အဆင့်ဆင့်အနေနဲ့လည်း Code of Conduct (CoC) ကို အထူးကြပ်မတ်ပြီး ကိုယ်တိုင်လည်း လိုက်နာဆောင်ရွက်ကြဖို့ သတိပေးလိုပါတယ်။ အခုဆိုရင် တော်လှန်ရေးရဲဘော်တွေ စစ်မြေပြင်မှာ ထိုးစစ်ဆင်တာတွေ/ ဒရုန်းနဲ့တိုက်ခိုက်မှုတွေကနေ စစ်ရေးအောင်မြင်မှုအပေါ် အတော် လေး အထောက်အကူ ပြုလာနိုင်သလို ထုတ်လုပ်မှု အပိုင်းမှာလည်း အဆင့်မြင့်လာတာ တွေ့ရပါတယ်။ အားရဖို့လည်း ကောင်းပါတယ်။ ဒါပေမယ့်လည်း နည်းပညာဆိုတာက ရပ်တန့်နေတာမဟုတ်ပါဘူး။ ကျွန်တော်တို့ ပိုပြီး အာရုံစိုက် ကြိုးစားသွားရမှာ ဖြစ်ပါတယ်။ လက်နက်ထုတ်လုပ်မှုနဲ့ နည်းပညာ မြှင့်တင်မှု အပိုင်းဟာ တော်လှန်ရေး အောင်မြင်မှုကို အရှိန်မြှင့်ပေးမယ့် စွမ်းအင်လောင်စာဖြစ်ပါတယ်။ ဒါကို ပြည်သူလူထုက သိမြင်ပြီး ထောက်ပံ့လာအောင် သတင်းစကားပါးရမှာ ဖြစ်ပါတယ်။” လို့ ယာယီသမ္မတ ဒူဝါလရှီးလက ပြောပါတယ်။ဒါအပြင် တော်လှန်ရေးကာလမှာ ‘တော်လှန်ရင်း တည်ဆောက်၊ တည်ဆောက်ရင်း တော်လှန်’ ဆိုတဲ့ ခံယူချက်နဲ့ လုပ်ဆောင်ရမှာဖြစ်ကြောင်း၊ တည်ဆောက်တယ်ဆိုတဲ့နေရာမှာ လူအင်အား၊ လက်နက်အင်အား၊ နည်းပညာနဲ့ စွမ်းရည်အပြင် စိတ်ဓာတ်နဲ့ ကျင့်ဝတ်စည်းကမ်းတွေကိုလည်း တည်ဆောက်ရမှာဖြစ်ကြောင်းနဲ့ တော်လှန်ရေးနဲ့ တည်ဆောက်ရေးကို ပိုပြီးတော့ ဟန်ချက်ညီညီ လုပ်ဆောင်ပြီး တော်လှန်ရေး အရှိန်ကို မြှင့်တင်ကြဖို့အတွက်လည်း ယာယီသမ္မတက တိုက်တွန်း ပြောကြားခဲ့ပါတယ်။ ပြည်ထောင်စုဝန်ကြီးချုပ် မန်းဝင်းခိုင်သန်းက “ရက်ပေါင်း ၁၀၀၀ ပြည့်မြောက်ခဲ့ပြီဖြစ်တဲ့ ကျွန်တော်တို့ရဲ့ ပြည်သူ့တော်လှန်ရေးကြီးဟာ ခိုင်မာတဲ့စိတ်ဓာတ်များနဲ့အတူ အဆုံးသတ်အောင်ပွဲ အတွက် ယုံကြည်မှုအပြည့်နဲ့ ဆက်လက် အားကောင်းနေဆဲ ဖြစ်တာကြောင့် ဒီခရီး ဒီလမ်းကို မယိုင်မလဲ အတူလျှောက်လှမ်းခဲ့ကြသော ပြည်သူတရပ်လုံးကို လေးစားဦးညွှတ်ကြောင်း ဦးစွာပြောကြားလိုပါတယ်။ ယခုရက်ပိုင်းတွေအတွင်းမှာလည်း မဟာမိတ်များရဲ့ ၁၀၂၇ စစ်ဆင်ရေးအောင်မြင်မှုဟာ ပြည်သူတရပ်လုံးကို စိတ်အား အလွန်တက်ကြွစေခဲ့ပြီး ရှေ့ဆက်ကြရမယ့် အဆုံးသတ်တိုက်ပွဲ ခရီးအတွက်တော့ အတော့်ကို အင်အားရှိစေခဲ့တဲ့ အောင်မြင်မှုတွေပဲ ဖြစ်ပါတယ်။ စစ်ဆင်ရေး ကာလ ၄ ရက်အတွင်းမှာပင် စခန်းကြီး၊ စခန်းငယ်ပေါင်း ၅၇ ခုကျော် သိမ်းပိုက်နိုင်ခဲ့ပြီး အကြမ်းဖက် စစ်ကောင်စီတပ်သား ရာချီကျဆုံးကာ မြို့များကိုပါ ထိန်းချုပ် ဝိုင်းပတ်နိုင်ခဲ့တာ အားလုံးအသိပဲ ဖြစ်ပါတယ်။  ကျွန်တော်တို့ ပြည်သူ့တော်လှန်ရေးကြီးမှာ MNDAA, TNLA, AA တို့နဲ့အတူ နွေဦးတော်လှန်ရေးက မွေးထုတ်ပေးလိုက်တဲ့ တော်လှန်ရေးအင်အားစုတွေ ပူးပေါင်းစစ်ဆင်တယ် ဆိုတာဟာ ကျွန်တော်တို့ ပြည်သူတွေမျှော်လင့်ကြတဲ့ Symbolic လို့ပြောရမယ့် ကြီးမားတဲ့ မဟာမိတ်စုဖွဲ့မှုကို အပြောသက်သက်မဟုတ်၊ အလုပ်နဲ့သက်သေပြတာပဲ ဖြစ်ပါတယ်။ နိုင်ငံရေးအနေနဲ့ မဟာမိတ်တပ်မတော်များဟာ ပြည်သူလူထုရဲ့ တခဲနက် ထောက်ခံအားပေးမှုကို အလွန် တန်ဖိုးထားတယ်ဆိုတာလည်း ၎င်းတို့ထုတ်ပြန်ကြေငြာချက်မှာ အထင်းသား မြင်ရ ပါတယ်။ ဒါကြောင့် ကျွန်တော်တို့ အမျိုးသားညီညွတ်ရေးအစိုးရအနေနဲ့ ပြည်သူနဲ့အတူ နွေဦး တော်လှန်ရေးရဲ့ မဟာမိတ်တပ်ပေါင်းစုကို အဖက်ဖက်က ဝိုင်းဝန်းထောက်ခံအားပေး ဝန်းရံပေး ကြဖို့ အလွန်အရေးကြီးပါတယ်။ ယခုလို စုပေါင်းစစ်ဆင်ရေးတွေကနေတဆင့် အရှိန်အဟုန် တင်ကာ တစ်လှိုင်းပြီးတစ်လှိုင်း အကြမ်းဖက်စစ်ကောင်စီကို မိမိတို့ ဒေသအသီးသီးမှ ဝိုင်းဝန်း သုတ်သင်ကြပါက အောင်စည်အောင်မောင်းတီးနိုင်ဖို့ အခြေအနေဟာ များမကြာမီမှာ ရောက်ရှိ လာမှာဖြစ်ပါတယ်။ ဒီလိုအခြေအနေဟာ အလစ်အငိုက် ဖြစ်တောင့်ဖြစ်ခဲဖြစ်ပြီး ကျွန်တော်တို့ အားလုံး နိုင်ငံရေး၊ စစ်ရေး၊ မဟာမိတ်အရေးတို့ကို တက်ညီလက်ညီ ပူးပေါင်းဆောင်ရွက် သွားကြပါက မျှော်လင့်ထားတာထက် ပိုမိုလျင်မြန်စွာ ပြည်သူ့အောင်ပွဲကို ရရှိသွားနိုင်ပါကြောင်း အလေးအနက် ပြောကြားလိုပါတယ်။” လို့ ပြောကြားပါတယ်။ဆက်လက်ပြီးတော့လည်း “စစ်ကောင်စီဟာ ပြည်သူ့ထံက အာဏာလုခဲ့တဲ့ ရက်ပေါင်း ၁၀၀၀ အတွင်း အုပ်ချုပ်ရေး ကဏ္ဍဘက်လည်း ကောင်းစွာ စီမံအုပ်ချုပ်နိုင်ခြင်းမရှိ၊ စီးပွားရေးကဏ္ဍဘက်မှာလည်း အခြေခံ ပြည်သူတွေ ဒုက္ခအတိရောက်ရတဲ့အထိ ကမောက်ကမတွေဖြစ်နေပြီး နိုင်ငံခြားရေးကဏ္ဍ ဘက်မှာလည်း နိုင်ငံတကာ အစည်းအဝေးတစ်ခု တက်နိုင်ဖို့တောင် ကန့်ကွက်မှုတွေ ရင်ဆိုင်ရတဲ့အထိ ဘက်ပေါင်းစုံမှာ လဲပြိုနေတာ အားလုံးအသိပဲ ဖြစ်ပါတယ်။ အခုဆိုရင် သူတို့ရဲ့ တစ်ခုတည်းသော ထောက်တိုင်ဖြစ်တဲ့ စစ်ရေးကဏ္ဍဘက်မှာတောင် အခြေအနေတွေ အလွန် ဆိုးဝါးနေပြီမို့ ဒီအခြေအနေ အခွင့်ကောင်းကို ကျွန်တော်တို့ လက်မလွှတ်လိုက်ဘဲ ဆက်လက် အားကုန်ရုန်းကန်ကြရမှာ ဖြစ်ပါတယ်။ ဒီနေ့ဆိုရင် ကာကွယ်ရေးဝန်ကြီးဌာနကလည်း လတ်တလော စစ်ရေးအရှိန်မြှင့်တင်မှု အခြေအနေတွေ တင်ပြမှာဖြစ်လို့ စစ်ရေးအရှိန်မြှင့်တင်မှုရဲ့ နောက်ဆက်တွဲအဖြစ် လုပ်ဆောင် ကြရမယ့် ကဏ္ဍတွေအတွက်လည်း တပါတည်း ဝိုင်းဝန်းဆွေးနွေးပေးကြဖို့ တိုက်တွန်းလိုပါတယ်။ အခုဆိုရင် လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာန ဘက်မှလည်း မြောက်ပိုင်းက စစ်ရှောင်စာရင်းတွေ ရသလောက်စုစည်းနေပြီး ကူညီထောက်ပံ့မှု တွေ ပြုလုပ်နိုင်အောင် စီမံနေတယ်လို့ သိရပါတယ်။ အဲဒီအတွက်လည်း မြန်မြန်ဆန်ဆန်နဲ့ ပြည်သူကို ကူညီပေးနိုင်ဖို့ စီမံဆောင်ရွက်နေတဲ့ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနကိုလည်း ကျေးဇူးတင်ပါတယ်။ ကျန်းမာရေး ဝန်ကြီးဌာနအနေနဲ့လည်း ချိတ်ဆက်လာတဲ့ ကျန်းမာရေးစောင့်ရှောက်မှုုဆိုင်ရာ ကိစ္စတွေအတွက် အချိန်နဲ့တပြေးညီ လုပ်ဆောင်ဖို့ ကြိုးပမ်းနေတယ်လို့လည်း သိရတာကြောင့် စစ်ရှိန်မြင့်လာမှု နောက်မှာ လိုအပ်တဲ့ လိုအပ်ချက်အသီးသီးအတွက်၊ ကြိုတင်ပြင်ဆင်ရမယ့် ကဏ္ဍအသီးသီး အတွက် ဝန်ကြီးဌာနများအားလုံး ပူးပေါင်းဆောင်ရွက်ကြဖို့လည်း လိုအပ်မှာ ဖြစ်ပါတယ်။ ” လို့ ပြည်ထောင်စုဝန်ကြီးချုပ်က ပြောကြားခဲ့ပါ တယ်။ဒါ့အပြင် ရက်ပေါင်း ၁၀၀၀ ပြည့်ခဲ့သည်အထိ တော်လှန်ရေးတာဝန်တွေကို မိမိတို့တတ်နိုင်တဲ့ ကဏ္ဍဘက်မှ ပါဝင်ကာ တစ်ရက်မှမနားဘဲ တစိုက်မတ်မတ် ထမ်းဆောင် နေကြတဲ့ တော်လှန်ရေးရဲ ဘော်များအားလုံးကို အထူးလေးစားဂုဏ်ယူကြောင်း ၊ မကြာခင်မှာ အဆုံးသတ်အောင်ပွဲ တက်လှမ်းနိုင်တော့မယ်ဆိုတာ အပြည့်အဝ ယုံကြည်ကြောင်း ပြည်ထောင်စုဝန်ကြီးချုပ်က ပြောကြားခဲ့ပါ တယ်။အစည်းအဝေးမှာ ပြည်ထဲရေးနှင့် လူဝင်မှုကြီးကြပ်ရေးဝန်ကြီးဌာန ၊ ပြည်ထောင်စုဝန်ကြီး ဦးလွင်ကိုလတ်က နှစ်သောင်းကျပ်တန် တားဆီးရေးကြေညာချက် တင်ပြတာ ၊ ကာကွယ်ရေး ဝန်ကြီးဌာနက လက်တလောစစ်ရေးအရှိန်မြှင်တင်မှုတွေကို တင်ပြတာ ၊ ဖက်ဒရယ်ရေးရာဝန်ကြီးဌာနက NCA စာချုပ်နဲ့ ပတ်သတ်ပြီး အမျိုးသားညီညွတ်ရေး အစိုးရ ရဲ့ သဘောထားထုတ်ပြန်ကြေညာ ရန် တင်ပြတာ ၊ အမျိုးသမီး ၊ လူငယ်နှင့် ကလေးသူငယ်ရေးရာဝန်ကြီးဌာနက အမျိုးသားညီညွတ်ရေး အစိုးရရဲ့ “ကလေးသူငယ် အကာအကွယ်ပေးရေးမူဝါဒ” အကြောင်းတင်ပြတာ နဲ့ သမ္မတရုံးအတွင်းဝန် က Strategic Communication and Public Realtions Unit ဖွဲ့စည်းတာနဲ့ အဖွဲ့ဝင်များ အတည်ပြု နိုင်ရန် တင်ပြတာ အစရှိတဲ့ ကိစ္စရပ်တွေကို ဆွေးနွေးမှုတွေ ပြုလုပ်ခဲ့ပါတယ်။အဲဒီနောက် ပြည်ထောင်စု ဝန်ကြီးချုပ်က တင်ပြလာတာတွေကို ပြန်လည်ရှင်းလင်း ဆွေးနွေးပြီး ယာယီသမ္မတက နိဂုံးချုပ်အမှာ စကားပြောကြားကာ အစည်းအဝေးကို ရုပ်သိမ်းခဲ့ပါတယ်။

စစ်ကိုင်းတိုင်း၊ ဝန်းသိုမြို့နယ်၊ ဂျိုးတောင်ရွာမရွာရှိ စာသင်ကျောင်းဆောင်အား အကြမ်းဖက်စစ်တပ်က လက်နက်ကြီးဖြင့် ပစ်ခတ်ခဲ့မှု ဖြစ်စဉ်နှင့်ပတ်သက်သည့် ထုတ်ပြန်ကြေညာချက်

စစ်ကိုင်းတိုင်း၊ ဝန်းသိုမြို့နယ်၊ ဂျိုးတောင်ရွာမရွာရှိ စာသင်ကျောင်းဆောင်အား အကြမ်းဖက်စစ်တပ်က လက်နက်ကြီးဖြင့် ပစ်ခတ်ခဲ့မှု ဖြစ်စဉ်နှင့်ပတ်သက်သည့် ထုတ်ပြန်ကြေညာချက်

ပြည်ထောင်စုသမ္မတမြန်မာနိုင်ငံတော်အမျိုးသားညီညွတ်ရေးအစိုးရhttps://nugmyanmar.org"စစ်ကိုင်းတိုင်း၊ ဝန်းသိုမြို့နယ်၊ ဂျိုးတောင်ရွာမရွာရှိ စာသင်ကျောင်းဆောင်အား အကြမ်းဖက်စစ်တပ်က လက်နက်ကြီးဖြင့် ပစ်ခတ်ခဲ့မှု ဖြစ်စဉ်နှင့်ပတ်သက်သည့် ထုတ်ပြန်ကြေညာချက်"၂၀၂၃ ခုနှစ်၊ အောက်တိုဘာလ ၄ ရက်၁။ ၂၀၂၃ ခုနှစ်၊ စက်တင်ဘာလ (၂၇)ရက်နေ့၊ နေ့လည် (၁၂:၃၀) အချိန်တွင် စစ်ကိုင်းတိုင်း၊ ကောလင်းခရိုင်၊ ဝန်းသိုမြို့နယ် ဂျိုးတောင်ရွာမရွာ၊ ဘူတာစုရပ်ရှိ၊ ခန္တီဝံသာရာမကျောင်းတိုက်ကို ဝန်းသိုမြို့ပေါ်ရှိ အကြမ်းဖက်စစ်အုပ်စု တမခ-၃၃ လက်အောက်ခံ ခမရ-၁၂၀ အထိုင်တပ်မှ အကြမ်းဖက်စစ်သားများသည် တိုက်ပွဲဖြစ်ပွါးခြင်းမရှိဘဲ လက်နက်ကြီးဖြင့် ပစ်ခတ်တိုက်ခိုက်ခဲ့ရာ ဘုန်းတော်ကြီးကျောင်းနှင့် ကပ်လျက်ရှိ ကျေးရွာအခြေပြုပြည်သူ့ပညာရေး စာသင်ကျောင်းဆောင်၌ စာသင်ကြားနေသည့် ဆရာမ(၁)ဦး နှင့် ကလေးငယ်(၂၁)ဦး၊ စုစုပေါင်း (၂၂)ဦး လက်နက်ကြီးစများ ထိမှန်ဒဏ်ရာရရှိခဲ့ပါသည်။ ထိခိုက်ဒဏ်ရာရရှိခဲ့သော ကလေးငယ် (၂၁)ဦးတွင် အသက် (၇) နှစ်အရွယ် (၆) ဦး၊ အသက် (၈) နှစ်အရွယ် (၅) ဦး၊ အသက် (၁၀) နှစ်အရွယ် (၄) ဦး၊ အသက် (၁၁) နှစ်အရွယ် (၃) ဦး၊ အသက် (၁၂) နှစ်အရွယ် (၂) ဦး၊ အသက် (၁၄) နှစ်အရွယ် (၁) ဦး ပါဝင်ပြီး စုစုပေါင်းကလေးငယ် ကျား (၁၂) ဦး နှင့် မ (၉) ဦး ဖြစ်သည်ကို တွေ့ရှိရသည်။ ၂။ အမျိုးသားညီညွတ်ရေးအစိုးရအနေဖြင့် ယုံကြည်စိတ်ချရသော သတင်းများအပေါ် အခြေခံ၍ ပြုစုထားသော စာရင်းများအရ မင်းအောင်လှိုင်ဦးဆောင်သော အကြမ်းဖက်စစ်အုပ်စုသည် မတရားအာဏာသိမ်းယူခဲ့သည့် နေ့မှစ၍ ယနေ့အချိန်အထိ ကျူးလွန်ခဲ့သော အကြမ်းဖက်လုပ်ရပ်များကြောင့်  အသက် (၁၈) နှစ်အောက် ကလေးငယ် (၄၉၁) ဦး သေဆုံးခဲ့ရပြီး စာသင်ကျောင်းပေါင်း (၁၁၉) ကျောင်း ထိခိုက်ပျက်စီးခဲ့ရပါသည်။ အကြမ်းဖက်စစ်အုပ်စုသည် လေကြောင်းအသုံးပြု တိုက်ခိုက်ခြင်း၊ ဖျက်အားပြင်းလက်နက်ကြီးများ အသုံးပြုတိုက်ခိုက်ခြင်းတို့ကို ကျူးလွန်ခဲ့ကြပြီး စာရင်းဇယားများအရ ဖျက်အားပြင်းလက်နက်ကြီး အသုံးပြုတိုက်ခိုက်မှု (၂၃၅၁) ကြိမ်ရှိခဲ့သည်။၃။ အကြမ်းဖက်စစ်အုပ်စုသည် အာဆီယံအဖွဲ့၏ အချက် (၅) ချက်ပါ ဘုံသဘောတူညီချက် (5 Points Consensus) ၊ ကမ္ဘာ့ကုလသမဂ္ဂလုံခြုံရေးကောင်စီ၏ မြန်မာ့အရေးဆုံးဖြတ်ချက် အမှတ် ၂၆၆၉ (UN Security Council Resolution 2669) စသည်တို့ကို လုံးဝ လေးစားလိုက်နာမှုမရှိသည့်အပြင် ကလေးသူငယ်များကို သတ်ဖြတ်ခြင်း၊ ထိခိုက်ဒဏ်ရာရစေခြင်း နှင့် စာသင်ကျောင်းများကို ပစ်မှတ်ထားတိုက်ခိုက်ခြင်းတို့သည် နိုင်ငံတကာ လူ့အခွင့်အရေးနှင့်လူသားချင်းစာနာမှု ဥပဒေများနှင့်စာချုပ်စာတမ်းများ၊ အပြည်ပြည်ဆိုင်ရာနှင့် ဒေသဆိုင်ရာ လူ့အခွင့်အရေး သဘောတူစာချုပ်များ၊ ကလေးသူငယ်အခွင့်အရေးဆိုင်ရာ သဘောတူစာချုပ်၊ ဂျနီဗာသဘောတူစာချုပ်၊ Rome Statue တို့ကိုချိုးဖောက်ကာ စစ်ရာဇဝတ်မှုနှင့် လူသားမျိုးနွယ်စုအပေါ် ရာဇဝတ်မှုများကို ပြောင်ပြောင်တင်းတင်း ကျူးလွန်လျက်ရှိသည်ကို တွေ့ရှိရပါသည်။ အကြမ်းဖက်စစ်အုပ်စု၏ လုပ်ရပ်များသည် စစ်ရာဇဝတ်မှု၊ လူသားမျိုးနွယ်စုအပေါ်ကျူးလွန်သည့် ရာဇဝတ်မှုများမြောက်နေသည့်အတွက် လုံခြုံရေးကောင်စီအနေဖြင့် နိုင်ငံတကာရာဇဝတ်ခုံရုံးသို့ လွှဲပြောင်းပေးရန် ကုလသမဂ္ဂလူ့အခွင့်အရေးဆိုင်ရာ မဟာမင်းကြီးကိုယ်တိုင် တိုက်တွန်းခဲ့ပြီးဖြစ်ပါသည်။ ၄။ အမျိုးသားညီညွတ်ရေးအစိုးရအနေဖြင့် အဆိုပါကျူးလွန်မှုများတွင်ပါဝင်သော တာဝန်ရှိသူ၊ လက်ရောက်ကျူးလွန်သူ နှင့် အားပေးအားမြှောက်ပြုသူများအားလုံးကို ပြည်တွင်းတရားစီရင်ရေးစနစ်ဖြင့် ဖမ်းဆီးအရေးယူပြစ်ဒဏ်ချမှတ်နိုင်ရေး ဆောင်ရွက်သွားမည်ဖြစ်သလို ကုလသမဂ္ဂအဖွဲ့ဝင်နိုင်ငံများအနေဖြင့် လုံခြုံရေးကောင်စီ၏ မြန်မာ့အရေးဆုံးဖြတ်ချက်အမှတ် ၂၆၆၉ (UN Security Council Resolution 2669) ‌နောက်ဆက်တွဲအဖြစ် အကြမ်းဖက်စစ်အုပ်စုကို ပိုမိုထိရောက်သည့် စီးပွားရေးပိတ်ဆို့မှုများ၊ လေယာဥ်ဆီအပါအဝင် စစ်လက်နက်များတင်ပို့ရောင်းချမှုများအား ပိတ်ဆို့မှုတို့ပါဝင်သော ဆုံးဖြတ်ချက်သစ်နှင့် အရေးယူဆောင်ရွက်မှုများ ထွက်ပေါ်လာအောင် ဝိုင်းဝန်းလုပ်ဆောင်ပေးရန် အချိန်ကျရောက်နေပြီဖြစ်ပါသည်။ ထို့အပြင် အကြမ်းဖက်စစ်အုပ်စုအား အရေးယူနိုင်မည့် နိုင်ငံတကာ၊ ဒေသဆိုင်ရာနှင့် တစ်နိုင်ငံချင်းတရားစွဲဆိုအရေးယူရန်အတွက် ကြိုးပမ်းလုပ်ဆောင်ကြရန် တောင်းဆိုပါသည်။  အမျိုးသားညီညွတ်ရေးအစိုးရ

လူသားချင်းစာနာထောက်ထားမှုဆိုင်ရာ နှီးနှောဖလှယ်ပွဲသို့ အမျိုးသားညီညွတ်ရေးအစိုးရ၊ နိုင်ငံတော်ယာယီသမ္မတ ဒူဝါလရှီးလမှ တက်ရောက်အဖွင့်အမှာစကားပြောကြားခဲ့ခြင်း

လူသားချင်းစာနာထောက်ထားမှုဆိုင်ရာ နှီးနှောဖလှယ်ပွဲသို့ အမျိုးသားညီညွတ်ရေးအစိုးရ၊ နိုင်ငံတော်ယာယီသမ္မတ ဒူဝါလရှီးလမှ တက်ရောက်အဖွင့်အမှာစကားပြောကြားခဲ့ခြင်း

၂၀၂၃ ခုနှစ်၊ စက်တင်ဘာလ (၂၃) ရက်နေ့"ပြာပုံကြားက မြန်မာပြည်သူ စာနာမှုနဲ့ ဝိုင်းလို့ကူ” ဆိုသည့်ခေါင်းစဉ်ဖြင့် လူသားချင်းစာနာထောက်ထားမှုဆိုင်ရာ နှီးနှောဖလှယ်ပွဲကို ယနေ့ မြန်မာစံတော်ချိန်မွန်းတည့် (၁၂) နာရီတွင် ပြုလုပ်ကျင်းပခဲ့ပါသည်။လူသားချင်းစာနာထောက်ထားမှုဆိုင်ရာ နှီးနှောဖလှယ်ပွဲတွင် အမျိုးသားညီညွတ်ရေးအစိုးရ၊ နိုင်ငံတော်ယာယီသမ္မတ ဒူဝါလရှီးလမှ “အတိဒုက္ခခံစားနေရတဲ့ ပြာပုံကြားက ပြည်သူတွေက အမေ့လျော့ခံတွေ၊ ပစ်ပယ်ခံထားရသူတွေ မဟုတ်ဘူးဆိုတာကို ဒီနေ့ဆွေးနွေးပွဲက သက်သေပြနေပါတယ်။ နှီးနှောဖလှယ်ပွဲမှာ လူသားချင်းစာနာမှုဆိုင်ရာ အကျပ်အတည်း၊ အခက်အခဲတွေကို လက်တွေ့ကျကျ ထိထိရောက်ရောက် ဖြေရှင်းဆောင်ရွက်နိုင်မယ့် နည်းလမ်းတွေကို အတူပူးပေါင်းရှာဖွေနိုင်မယ်လို့ မျှော်လင့်ပါတယ်။ ပြည်တွင်းပြည်ပက လူသားချင်းစာနာမှုရှိတဲ့ အဖွဲ့အစည်းတွေ၊ လူပုဂ္ဂိုလ်တွေကို မြန်မာနိုင်ငံရဲ့ လူသားချင်းစာနာမှုဆိုင်ရာ အကျပ်အတည်းမှာ ဝိုင်းဝန်းပူးပေါင်းကူညီပေးကြဖို့ ထပ်မံတိုက်တွန်းလိုပါတယ်” ဟု မိန့်ခွန်းတွင် ပြောကြားခဲ့ပါသည်။အဆိုပါနှီးနှောဖလှယ်ပွဲသို့ အမျိုးသားညီညွတ်ရေးအစိုးရ၊ နိုင်ငံတော်ယာယီသမ္မတဒူဝါလရှီးလ၊ အမျိုးသားညီညွတ်ရေး အတိုင်ပင်ခံကောင်စီမှ တာဝန်ရှိသူများ၊ အမျိုးသားညီညွတ်ရေးအစိုးရအဖွဲ့ဝင်များ၊ ဖက်ဒရယ်ယူနစ်အသီးသီးနဲ့ တိုင်းရင်းသားတော်လှန်ရေးအင်အားစုများမှ ကိုယ်စားလှယ်ကြီးများ၊ အလှူရှင်နိုင်ငံများမှ ကိုယ်စားပြု တက်ရောက်ကြသူများ၊ ပြည်တွင်းပြည်ပ အစိုးရမဟုတ်သော အဖွဲ့အစည်းအသီးသီးမှ တာဝန်ရှိသူများ၊ ပြည်သူ့အုပ်ချုပ်ရေးအဖွဲ့ဝင်များနှင့် မြေပြင်သပိတ်အင်အားစုများအပါအဝင် လူဦးရေစုစုပေါင်း (၂၀၅) ဦး  တက်ရောက်ခဲ့ကြပါသည်။

လူသားချင်းစာနာထောက်ထားမှုဆိုင်ရာ နှီးနှောဖလှယ်ပွဲကြီး (Inclusive Humanitarian Conference Myanmar - 2023) ကျင်းပဆောင်ရွက်လျက်ရှိ

လူသားချင်းစာနာထောက်ထားမှုဆိုင်ရာ နှီးနှောဖလှယ်ပွဲကြီး (Inclusive Humanitarian Conference Myanmar - 2023) ကျင်းပဆောင်ရွက်လျက်ရှိ

၂၀၂၃ ခုနှစ်၊ စက်တင်ဘာ (၂၅) ရက်နေ့လူသားချင်း စာနာထောက်ထားမှုဆိုင်ရာ နှီးနှောဖလှယ်ပွဲကို “ပြာပုံကြားက မြန်မာပြည်သူ စာနာမှုနဲ့ ဝိုင်းလို့ကူ” ခေါင်းစဉ်ဖြင့် (၂၃.၉.၂၀၂၃) ရက်နေ့မှ (၂၆.၉.၂၀၂၃)ရက်နေ့အထိ Zoom Video Conferencing System ဖြင့် ကျင်းပလျက်ရှိပါသည်။ အဆိုပါ နှီးနှောဖလှယ်ပွဲကို မြန်မာနိုင်ငံတဝှမ်းရှိ သဘာဝဘေးအန္တရာယ်နှင့် လူကြောင့်ဖြစ်သော ဘေးအန္တရာယ်များကြောင့် ဘေးဒုက္ခခံစားနေရသော ပြည်သူများအား လူသားချင်းစာနာထောက်ထားမှုဆိုင်ရာ အကူအညီများပေးရာတွင် ဆက်စပ်နှီးနွယ်သည့် အဖွဲ့အစည်းများအကြား ညှိနှိုင်းဆွေးနွေးမှုများမှတဆင့် အများသဘောတူ လက်ခံနိုင်သည့် Position Paper (၁) ခု ထွက်ပေါ် လာစေရန်၊ ဆက်စပ်အဖွဲ့အစည်းများအကြား ကွန်ယက် ချိတ်ဆက်လက်တွဲဆောင်ရွက်မှု ပိုမိုအားကောင်းလာစေရန်၊ နိုင်ငံတကာလူသားချင်းစာနာမှု အကူအညီပေးသည့် အဖွဲ့အစည်းများနှင့် မြေပြင်တွင်လုပ်ငန်းများ အကောင်အထည်ဖော်နေသည့် အဖွဲ့အစည်းများအကြား အပြန်အလှန် နားလည်မှုနှင့်ယုံကြည်မှုများ တည်ဆောက်နိုင်ပြီး ပူးပေါင်းဆောင်ရွက်မှုများ တိုးမြှင့်နိုင်စေရန်နှင့် မြန်မာနိုင်ငံတွင်ဖြစ်ပေါ်နေသည့် လူသားချင်းစာနာထောက်ထားမှုဆိုင်ရာ အကျပ်အတည်းကို လက်တွေ့ကျကျ ဖြေရှင်းဆောင်ရွက်နိုင်မည့် နည်းလမ်းများ ဖော်ထုတ်ဆွေးနွေးနိုင်ရန် စသည့်ရည်ရွယ်ချက်များဖြင့် ကျင်းပလျက်ရှိပါသည်။အဆိုပါ နှီးနှောဖလှယ်ပွဲကို အမျိုးသားညီညွတ်ရေးအစိုးရ၊ လူသားစာနာဝန်ကြီးဌာနက အဖွဲ့ဝင်အဖြစ် ပါဝင်သော အမျိုးသားညီညွတ်ရေး အတိုင်ပင်ခံကောင်စီ (NUCC) ၏လူသားချင်းစာနာထောက်ထားမှု အကူအညီပေးရေးဆိုင်ရာ ပေါင်းစပ်ညှိနှိုင်းရေး ကော်မတီ (JCC-HA)၊ အထွေထွေသပိတ် ပေါင်းစပ်ညှိနှိုင်းရေးအင်အားစု (GSCB) နှင့် အခြားသောတော်လှန်ရေးအင်အားစုများ ပူးပေါင်း၍ ဆောင်ရွက်ခဲ့ခြင်း ဖြစ်ပါသည်။ နှီးနှောဖလှယ်ပွဲ (၄) ရက်တာကာလအတွင်း နိုင်ငံရေးအကျဉ်းသားများ၊ စစ်ဘေးရှောင် ပြည်သူများ၊ အကြမ်းမဖက်လူထုလှုပ်ရှားမှုတွင် ပါဝင်ခဲ့သူများနှင့် တော်လှန်ရေးကာလအတွင်း လက်နက်ကိုင် ပဋိပက္ခများကြောင့် ထိခိုက်/ကျဆုံး သူရဲကောင်းများဟူ၍ နေ့တနေ့ ခေါင်းစဉ်တစ်ခု ချင်းစီအလိုက် လူသားချင်းစာနာထောက်ထားမှုဆိုင်ရာ ကိစ္စရပ်များကို ဆွေးနွေးကြမည်ဖြစ်ပြီး နှီးနှောဖလှယ်ပွဲအတွင်း တင်ပြချက်မှုများနှင့် တက်ရောက်လာသူများ၏ အတွေ့အကြုံဆွေးနွေးချက်များ၊ အတွေးအမြင်များကို အခြေခံပြီး ထွက်ပေါ်လာသည့် မူဝါဒပိုင်းဆိုင်ရာ အကြံပြုချက်တွေကိုလည်း နိုင်ငံတကာက လူသားချင်း စာနာထောက်ထားမှုဆိုင်ရာ ဆုံးဖြတ်ချက်ချသူများနှင့် အလှူရှင်များထံမှ အကူအညီများ ထိရောက်စွာ ရရှိနိုင်ရေး နည်းလမ်းကောင်းတွေကို အဖြေရှာသွားကြမှာလည်း ဖြစ်ပါတယ်။သို့ဖြစ်ပါ၍ နှီးနှောဖလှယ်ပွဲ ပထမရက်တွင် အမျိုးသားညီညွတ်ရေးအစိုးရ၊ နိုင်ငံတော်ယာယီသမ္မတ ဒူဝါလရှီးလမှ “အတိဒုက္ခခံစားနေရတဲ့ ပြာပုံကြားက ပြည်သူတွေက အမေ့လျော့ခံတွေ၊ ပစ်ပယ်ခံထားရသူတွေ မဟုတ်ဘူးဆိုတာကို ဒီနေ့ဆွေးနွေးပွဲက သက်သေပြနေပါတယ်။ နှီးနှောဖလှယ်ပွဲမှာ လူသားချင်းစာနာမှုဆိုင်ရာ အကျပ်အတည်း၊ အခက်အခဲတွေကို လက်တွေ့ကျကျ ထိထိရောက်ရောက် ဖြေရှင်းဆောင်ရွက်နိုင်မယ့် နည်းလမ်းတွေကို အတူပူးပေါင်းရှာဖွေနိုင်မယ်လို့ မျှော်လင့်ပါတယ်။ ပြည်တွင်းပြည်ပက လူသားချင်း စာနာမှုရှိတဲ့ အဖွဲ့အစည်းတွေ၊ လူပုဂ္ဂိုလ်တွေကို မြန်မာနိုင်ငံရဲ့ လူသားချင်းစာနာမှုဆိုင်ရာ အကျပ်အတည်းမှာ ဝိုင်းဝန်းပူးပေါင်းကူညီပေးကြဖို့ ထပ်မံတိုက်တွန်းလိုပါတယ်” ဟု အဖွင့်မိန့်ခွန်းတွင် ပြောကြားခဲ့ပြီး ဖိတ်ကြားထားသည့် သက်ဆိုင်ရာ အမျိုးသားညီညွတ်ရေး အတိုင်ပင်ခံကောင်စီမှ တာဝန်ရှိသူများ၊ အမျိုးသား ညီညွတ်ရေးအစိုးရအဖွဲ့ဝင်များ၊ ဖက်ဒရယ်ယူနစ်အသီးသီးနှင့် တိုင်းရင်းသားတော်လှန်ရေး အင်အားစုများမှ ကိုယ်စားလှယ်ကြီးများ၊ အလှူရှင်နိုင်ငံများမှ ကိုယ်စားပြုကြသူများ၊ ပြည်တွင်းပြည်ပ အစိုးရမဟုတ်သော အဖွဲ့အစည်းအသီးသီးမှ တာဝန်ရှိသူများ၊ ကြားကာလဒေသန္တရပြည်သူ့အုပ်ချုပ်ရေးဖော်ဆောင်လျက်ရှိသည့် တိုင်းများမှ မြို့နယ်ပြည်သူ့အုပ်ချုပ်ရေး အဖွဲ့ဝင်များနှင့် မြေပြင်သပိတ် အင်အားစုများအပါအဝင် လူဦးရေ (၂၀၅) ဦး တက်ရောက်ခဲ့ပြီး၊ ဒုတိယရက်တွင်လည်း (၂၀၂)ဦးတတ်ရောက်ခဲ့ကြပါကြောင်း သတင်းထုတ်ပြန် အပ်ပါသည်။

မြန်မာနိုင်ငံအခြေအနေနှင့် စပ်လျဉ်းသည့် ထုတ်ပြန်ကြေညာချက်

မြန်မာနိုင်ငံအခြေအနေနှင့် စပ်လျဉ်းသည့် ထုတ်ပြန်ကြေညာချက်

ပြည်ထောင်စုသမ္မတမြန်မာနိုင်ငံတော်အမျိုးသားညီညွတ်ရေးအစိုးရhttps://nugmyanmar.orgမြန်မာနိုင်ငံအခြေအနေနှင့် စပ်လျဉ်းသည့် ထုတ်ပြန်ကြေညာချက်၂၀၂၃ ခုနှစ်၊ စက်တင်ဘာလ ၂၀ ရက်၁။ မြန်မာနိုင်ငံတွင် လက်နက်အားကိုး အဓမ္မ အာဏာသိမ်းယူရန် ကြိုးပမ်းနေသော အကြမ်းဖက်စစ်အုပ်စုကို ပြည်သူလူထုတရပ်လုံးက ရရာနည်းလမ်းမျိုးစုံဖြင့် ပြန်လည်ခုခံ တိုက်ပွဲဝင်လျက်ရှိပါသည်။ ဖက်ဒရယ်ဒီမိုကရေစီပဋိညာဉ်တွင် ပြဋ္ဌာန်းဖော်ပြထားသည့် “လွတ်လပ်မှု၊ တရားမျှတမှု၊ တန်းတူညီမျှမှုကို အာမခံပြီး ငြိမ်းချမ်းသည့် ဖက်ဒရယ် ဒီမိုကရေစီ ပြည်ထောင်စု တည်ဆောက်မည်” ဟူသော ပြည်ထောင်စု မျှော်ရည်ချက်အတိုင်း ပြည်သူအားလုံးက မမှိတ်မသုဉ် ရှေးရှု၊ ဦးတည်ချီတက်နေကြပါသည်။၂။ အာဏာသိမ်းရန် အဓမ္မ ကြံစည်ပြီးနောက် စစ်အုပ်စုသည် နိုင်ငံတော်သမ္မတ၊ နိုင်ငံတော်၏ အတိုင်ပင်ခံပုဂ္ဂိုလ်တို့အပါအဝင် ရွေးကောက်ခံ ပြည်သူ့ခေါင်းဆောင်များနှင့် တက်ကြွလှုပ်ရှားသူ အများအပြားကို အကြောင်းမဲ့ဖမ်းဆီး အကျဉ်းချထားပါသည်။ ထို့အပြင် စစ်အာဏာသိမ်းမှုနှင့် အာဏာရှင်စနစ်ကို ဆန့်ကျင်ကြောင်းကို ငြိမ်းချမ်းစွာ ဆန္ဒထုတ်ဖော် ပြသခဲ့သည့် ပြည်သူများကိုလည်း လူမဆန်သော နည်းလမ်းပေါင်းစုံဖြင့် ရက်ရက်စက်စက် သတ်ဖြတ်ခြင်း၊ ဖမ်းဆီးနှိပ်စက်ခြင်း၊ အကျဉ်းချခြင်းစသည့် အဓမ္မ အကြမ်းဖက်လုပ်ရပ်များစွာ ကျူးလွန်ဆောင်ရွက်လျက်ရှိပါသည်။ စစ်ကောင်စီ၏ လူမဆန်သော အကြမ်းဖက်မှု ဖြစ်ရပ် များတွင် ဆန္ဒပြသမားများ၏ ဦးခေါင်းကိုချိန်ရွယ်၍ စနိုက်ပါဖြင့် ပစ်ခတ်သတ်ဖြတ်ခြင်း၊ ဆန္ဒပြလူထုအတွင်း မော်တော်ကားဖြင့် အတင်းဝင်တိုက် ဖမ်းဆီးရုံသာမက သေကြေဒါဏ်ရာ ရစေခြင်း၊ ဆန္ဒပြပွဲခေါင်းဆောင်များကို ညဘက်တွင် နေအိမ်အတွင်း ဝင်ရောက်ဖမ်းဆီးပြီး တညလုံး ညှင်းပန်းနှိပ်စက်လျက် မနက်တွင်မိသားစုအား အလောင်းကိုပြန်ပေးခြင်း၊ အချို့ အလောင်း များကို လမ်းဘေးတွင် စွန့်ပစ်ထားခြင်း စသောဖြစ်ရပ်များပါဝင်သည်။၃။ ဖေဖော်ဝါရီ (၁) ရက်၊ ၂၀၂၁ ခုနှစ်မှ ဩဂုတ်လလယ် ၂၀၂၃ ခုနှစ်ထိ အချိန် (၂) နှစ်ခွဲအတွင်း မြန်မာနိုင်ငံတွင် အကြမ်းဖက်စစ်အုပ်စုက--အဓမ္မ ဖမ်းဆီးခဲ့သူ ဦးေရ (၂၄,၀၀၀) ကျော်-လက်ရှိ ဖမ်းဆီးထားသူ ဦးေရ (၁၉,၄၆၀) ဦး-အဓမ္မ သတ်ဖြတ်ခဲ့သူ ဦးေရ (၄,၀၇၈) ဦး-သေဒဏ်ချမှတ်ခံထားရသူ ဦးေရ (၁၄၆) ဦးထိ ရှိခဲ့ပြီဖြစ်သည်။၄။ ထို့အပြင် အာဏာသိမ်းစစ်အုပ်စုသည် တစ်နိုင်ငံလုံး နေရာအနှံ့အပြား၌ အရပ်သား ပြည်သူများအပေါ် အကြမ်းဖက်မှုမျိုးစုံကိုလည်း ကျူးလွန်ပြုကျင့်လျက်ရှိပါသည်။ ထို့သို့      စစ်အုပ်စု၏ အကြမ်းဖက်မှုမျိုးစုံအနက် ထင်ရှားပြီး အတွေ့ရများသည့် ပုံစံများမှာ အရပ်သား ပြည်သူနေ မြို့ရွာများကို မီးရှို့ဖျက်ဆီးခြင်း၊ ပြည်သူ့အိုးအိမ် ပစ္စည်းများကို လုယူခြင်း၊ ဖျက်ဆီးခြင်း၊ လေကြောင်းမှ ဗုံးကြဲခြင်း၊ ပြည်သူများကို အကြောင်းမဲ့ သတ်ဖြတ်ခြင်း၊ နှိပ်စက် ခြင်း၊ စစ်ကြောင်းများတွင် လူသားဒိုင်းသဖွယ် အသုံးချခြင်း၊ စားနပ်ရိက္ခာ ဆေးဝါး သတင်းနှင့် ဆက်သွယ်ရေး စသည်တို့ ဖြတ်တောက်ခြင်း စသည်တို့ဖြစ်သည်။၅။ ပြည်သူ့ခုခံတွန်းလှန်စစ် စတင်ချိန်မှ ယခုကာလထိ အာဏာသိမ်း စစ်အုပ်စု၏ အကြမ်းဖက်မှုများကြောင့်--ပျက်စီးခဲ့သည့် နေအိမ်ပေါင်း (၇၅,၀၀၀) ကျော်-သေဆုံးခဲ့သည့် အရပ်သားပြည်သူ (၄,၅၅၂) ဦး-ထိခိုက်ဒါဏ်ရာရခဲ့သည့် အရပ်သားပြည်သူ (၃,၉၂၆) ဦး-နေရပ်စွန့်ခွာထွက်ပြေးရသည့် ပြည်သူ (၁.၉ သန်း) ကျော် အထိရှိခဲ့ပြီဖြစ်သည်။၆။ အာဏာသိမ်းစစ်အုပ်စုသည် အရပ်သားပြည်သူများ နေထိုင်ရာ မြို့ရွာများကို စစ်ရေး ပစ်မှတ်သဖွယ် တမင်ရည်ရွယ်ချက်ရှိရှိ ပစ်မှတ်ထားပြီး လေကြောင်းမှတဆင့် တိုက်ခိုက်မှု များစွာလည်း ဆက်တိုက်ကျူးလွန်လျက်ရှိပါသည်။ လေကြောင်းတိုက်ခိုက်မှုဖြစ်စဥ်ပေါင်း (၁၂၆၁) ရှိခဲ့ပြီး ထိုသို့သော လေကြောင်းတိုက်ခိုက်မှု များကြောင့် ယခုချိန်ထိ--ပျက်စီးခဲ့သည့်နေအိမ်ပေါင်း (၁,၀၈၀) လုံး-သေဆုံးခဲ့သည့် အရပ်သားပြည်သူ (၅၄၁) ဦး-ထိခိုက်ဒါဏ်ရာရခဲ့သည့် အရပ်သားပြည်သူ (၄၃၃) ဦး-အရပ်သား သေဆုံးမှု (၆၀၇) ဦး-အရပ်သား ထိခိုက်ဒဏ်ရာရသူ (၆၅၁) ဦး -စာသင်ကျောင်းများ ထိခိုက်ပျက်စီးမှု (၃၉)​ ကျောင်း -ဆေးရုံ (၂၂) ရုံ-ဘာသာရေးအဆောက်အအုံ (၅၄) လုံးအထိ ရှိကြောင်းလည်း လေ့လာ တွေ့ရှိရပါသည်။ ၇။ အာဏာသိမ်းစစ်အုပ်စုသည် ၎င်းတို့ကိုယ်တိုင် တက်ရောက်သဘောတူညီခဲ့သော အာဆီယံအဖွဲ့၏ အချက် (၅) ချက်ပါ ဘုံသဘောတူညီချက် (5 Points Consensus) ၊ ကမ္ဘာ့ ကုလသမဂ္ဂအဖွဲ့ လုံခြုံရေးကောင်စီ၏ မြန်မာ့အရေး ဆုံးဖြတ်ချက်အမှတ် ၂၆၆၉ (UN Security Council Resolution 2669) စသည်တို့ကို လုံးဝ လေးစားလိုက်နာမှု မရှိဘဲ ပြည်သူ လူထုအပေါ် အကြမ်းဖက်လုပ်ရပ်များစွာကို ရည်ရွယ်ချက်ရှိရှိ ဆက်တိုက် ကျူးလွန်လျက် ရှိနေပါသည်။၈။ ယခုအခါ အာဏာသိမ်းစစ်အုပ်စု၏ အကြမ်းဖက်လုပ်ရပ်များကြောင့် မြန်မာလူထု တရပ်လုံးသည် လူမှုဘဝဘေးဒုက္ခမျိုးစုံ ရင်ဆိုင်ကြုံတွေ့နေရပါသည်။ မြန်မာနိုင်ငံ လူဦးရေ၏ သုံးပုံတစ်ပုံခန့်သည် လူသားချင်းစာနာမှုဆိုင်ရာ အရေးပေါ်အကူအညီများ လိုအပ်နေပါသည်။ ဤအခြေအနေတွင် မြန်မာနိုင်ငံအတွက် နိုင်ငံတကာ၏ လူသားချင်းစာနာမှုဆိုင်ရာ လှူဒါန်းကူညီမှု အများစုကို အကြမ်းဖက်စစ်အုပ်စုက ထိန်းချုပ်ကိုင်တွယ်နေခြင်း၊ အဆိုပါ အကူအညီများသည် အမှန်တကယ် လိုအပ်နေသည့် ပြည်သူများထံ မရောက်ရှိဘဲ စစ်အုပ်စုက လိုသလို စီမံခန့်ခွဲနေခြင်း၊ နိုင်ငံတကာမိသားစု၏ အကူအညီများစွာကို ဟန့်တားနှောက်ယှက် နေခြင်းတို့ ဆောင်ရွက်နေကြောင်း လေ့လာတွေ့ရှိရပါသည်။၉။ သို့ဖြစ်သောကြောင့် အကြမ်းဖက်မှု၊ စစ်ရာဇဝတ်မှု၊ လူသားမျိုးနွယ်ပေါ် ကျူးလွန်သည့် ရာဇဝတ်မှုပေါင်းများစွာကို ဆက်တိုက်ကျူးလွန်နေသည့်အပြင် မြန်မာလူထုအတွက် နိုင်ငံတကာ၏ လူသားချင်းစာနာမှုဆိုင်ရာ အကူအညီများကို ဖျက်ဆီး၊ ဟန့်တား၊ နှောက်ယှက် နေသော အာဏာသိမ်းအကြမ်းဖက်စစ်အုပ်စုကို အမျိုးသားညီညွတ်ရေး အစိုးရသည် ပြင်းထန်စွာ ဆန့်ကျင်ရှုံ့ချလိုက်သည်။ ၁၀။ အမျိုးသားညီညွတ်ရေးအစိုးရသည် အကြမ်းဖက် စစ်အုပ်စုကို တွန်းလှန်ရန်အတွက် ပြည်သူလူထု၏ သဘောထားဆန္ဒနှင့်အညီ “ပြည်သူ့ကာကွယ်ရေးတပ်မတော်” (PDF) ကို ဖွဲ့စည်းတည်ထောင်ကာ တရားမျှတသော ခုခံစစ်ကို ဆင်နွှဲလျက်ရှိပါသည်။ PDF တပ်မတော်၏ ပင်မတာဝန်တရပ်မှာ ပြည်သူ့အသက် အိုးအိမ်စည်းစိမ်ကို စောင့်ရှောက် ကာကွယ်ရန်ပင်ဖြစ်သည်။၁၁။ ပြည်သူ့ကြားမှ ပေါက်ဖွားလာသော PDF တပ်မတော်ကို အဆင့်ဆင့်သော အမိန့်ပေးကွပ်ကဲမှုစနစ် (Chain of Command) ခိုင်မာအားကောင်းသလို စစ်သည်တော် ကျင့်ဝတ်စည်းကမ်း (Code of Conduct) များလည်း ကောင်းမွန်မှန်ကန်သည့် တပ်မတော်တရပ် ဖြစ်ရေးအတွက် အမျိုးသားညီညွတ်ရေးအစိုးရနှင့် ပြည်သူနှင့်အတူ ကြိုးပမ်း ဆောင်ရွက်လျက်ရှိပါသည်။၁၂။ PDF တပ်မတော် အပါအဝင် အမျိုးသားညီညွတ်ရေးအစိုးရ၏ ကွပ်ကဲအုပ်ချုပ်မှု အောက်တွင်ရှိသော အဖွဲ့အစည်းနှင့် တာဝန်ရှိလူပုဂ္ဂိုလ်အားလုံးသည် မိမိပြည်သူလူထုအပေါ် အကြမ်းဖက်မှု၊ အနိုင်ကျင့်ဗိုလ်ကျမှုတို့ကို လုံးဝပြုကျင့်မည်မဟုတ်သလို အထက်ပါ အကြမ်းဖက်လုပ်ရပ်မှန်သမျှကိုလည်း အပြင်းအထန် ဆန့်ကျင်ရှု့ံချပါသည်။ PDF တပ်မတော်တွင် စစ်ရုံးချုပ်အဆင့်မှသည် တပ်ရင်း/စစ်ကြောင်းအဆင့်ထိ အဆင့်တိုင်းတွင် “ပြည်သူလူထု လုံခြုံရေး” ဟူသော ဌာန (သို့မဟုတ်) တာဝန်ခံကို ထည့်သွင်းဖွဲ့စည်းထားပြီး မိမိတို့ တပ်မတော်၏ စစ်ဖက်ဆိုင်ရာ ဆောင်ရွက်မှုအားလုံးတွင် အရပ်သားပြည်သူ ထိခိုက်မှု အနည်းဆုံးဖြစ်စေရေးအတွက် မျှော်မှန်းချက်ထား ဆောင်ရွက်လျက်ရှိပါသည်။၁၃။ ထို့အပြင် PDF တပ်မတော် အပါအဝင် အမျိုးသားညီညွတ်ရေးအစိုးရ၏ ကွပ်ကဲ အုပ်ချုပ်မှုအောက်တွင်ရှိသော အဖွဲ့အစည်းများသည် ပြည်သူလူထုအတွက် ဘေးအန္တရာယ် လုံခြုံမှုအစီအမံများ၊ စစ်အုပ်စု၏ လေကြောင်းရန်နှင့် လက်နက်ကြီးရန်စသည့် အန္တရာယ် များမှ ကာကွယ်နိုင်ရေး လိုအပ်သော စီစဉ်ဆောင်ရွက်မှုများကို အစွမ်းကုန် ချမှတ်ဆောင်ရွက် လျက်ရှိပါသည်။၁၄။ PDF တပ်မတော်အပါအဝင် ပြည်သူ့နွေဦးတော်လှန်ရေးတွင် လက်နက်စွဲကိုင် တိုက်ပွဲ ဝင်နေကြသော အင်အားစုအားလုံးသည် အပြည်ပြည်ဆိုင်ရာ လူသားချင်းစာနာမှုဆိုင်ရာ ဥပဒေ (International Humanitarian Law) ၊ ဂျီနီဗာ သဘောတူစာချုပ် (Geneva Convention) တို့နှင့် သတ်မှတ်ထားသော ကျင့်ဝတ်စံနှုန်းများကို အပြည့်အဝ လိုက်နာ ကျင့်သုံးရေးအတွက် ကြပ်မတ်ဆောင်ရွက်လျက် ရှိပါသည်။ အဆိုပါ ကျင့်ဝတ်စံနှုန်းများကို ကျူးလွန်ချိုးဖောက်သူများကိုလည်း ထိရောက်စွာ အပြစ်ပေး အရေးယူသည့် Zero Tolerance Policy မူဝါဒကို ကျင့်သုံးလျက်ရှိပါသည်။၁၅။ အမျိုးသားညီညွတ်ရေးအစိုးရသည် မိမိစိုးမိုးနယ်မြေများတွင် အရပ်ဖက် တရားစီရင် ရေးမဏ္ဍိုင်ကို စနစ်တကျဖော်ဆောင်၊ လည်ပတ်နေပြီဖြစ်ပါသည်။ ထို့ပြင် ကာကွယ်ရေး ဝန်ကြီးဌာနနှင့် PDF တပ်မတော်တို့တွင်လည်း အဆင့်ဆင့်သော စစ်ဖက်တရားစီရင်ရေး စနစ်ကို ဖော်ဆောင်နေပြီး တရားဥပဒေစိုးမိုးရေးကို ဦးတည်ဆောင်ရွက်လျက် ရှိပါသည်။၁၆။ သို့ဖြစ်သောကြောင့် ပြည်သူလူထုအပေါ် အကြမ်းဖက်မှုမျိုးစုံကို အချိန်နှင့်အမျှ ကျူးလွန်နေသော အာဏာသိမ်းစစ်အုပ်စုကို အမြန်ဆုံး ဖြုတ်ချနိုင်ရေးအတွက် အမျိုးသား ညီညွတ်ရေးအစိုးရသည် ပြည်သူနှင့်လက်တွဲကာ အစွမ်းကုန် ဆက်လက်ကြိုးပမ်းသွားမည် ဖြစ်ကြောင်း ထပ်လောင်းသံန္နိဋ္ဌာန် ပြုအပ်ပါသည်။ နိုင်ငံတကာ အသိုင်းအဝိုင်းအနေဖြင့် မြန်မာ့နွေဦးတော်လှန်ရေးအတွက် ယခုထက် ပိုမိုထိရောက်၍ လက်တွေ့ကျသော စစ်ရေး၊ နိုင်ငံရေး၊ စီးပွားရေး၊ သံတမန်ရေးရာ အကူအညီများ၊ ဝန်းရံအားပေး ကူညီမှုများ ပြုကြပါရန် လေးနက်စွာ တိုက်တွန်း ပန်ကြားအပ်ပါသည်။မှတ်ချက်။ ။ အပိုဒ် (၃)၊ အပိုဒ် (၅)၊ အပိုဒ် (၆)ပါ အချက်အလက်များကို AAPP အပါအဝင် ခိုင်လုံသော သတင်းအရင်းအမြစ်များနှင့် အမျိုးသားညီညွတ်ရေးအစိုးရ၏ မှတ်တမ်းများအရ သိရှိရပါသည်။အမျိုးသားညီညွတ်ရေးအစိုးရပြည်ထောင်စုသမ္မတမြန်မာနိုင်ငံတော်