ပြည်သူ့ညီလာခံဖွင့်ပွဲအခမ်းအနားတွင် အမျိုးသားညီညွတ်ရေးအစိုးရအဖွဲ့၊ ပြည်ထောင်စုဝန်ကြီးချုပ်မန်းဝင်းခိုင်သန်း ပြောကြားသည့်အဖွင့်အမှာစကား

ပြည်သူ့ညီလာခံဖွင့်ပွဲအခမ်းအနားတွင် အမျိုးသားညီညွတ်ရေးအစိုးရအဖွဲ့၊ ပြည်ထောင်စုဝန်ကြီးချုပ်မန်းဝင်းခိုင်သန်း ပြောကြားသည့်အဖွင့်အမှာစကား

လေးစားအပ်တဲ့ပြည်သူ့ညီလာခံသဘာပတိကြီးများ၊ ပြည်ထောင်စုသမ္မတမြန်မာနိုင်ငံတော် ယာယီသမ္မတကြီး၊ တိုင်းရင်းသားတော်လှန်ရေးအဖွဲ့အစည်းများမှ ခေါင်းဆောင်ကြီးများ၊ အမျိုးသားညီညွတ်ရေး အတိုင်ပင်ခံ ကောင်စီဝင်များ၊  ပြည်သူ့ညီလာခံကိုယ်စားလှယ်တော်များ၊ အထူးဖိတ်ကြားထားတဲ့ဧည့်သည်တော်များနှင့် လေ့လာသူများအားလုံး မဂ်လာပါလို့ ရှေးဦးစွာ နုတ်ခွန်းဆက်သအပ်ပါတယ်။ ယနေ့ကျင်းပပြုလုပ်တဲ့ ပြည်သူ့ညီလာခံဟာ ပြည်ထောင်စုမြန်မာနိုင်ငံရဲ့ ခေတ်သစ်နိုင်ငံရေးသမိုင်းမှာ အလွန် ထူးခြားလေးနက်ပြီး အရေးကြီးတဲ့ညီလာခံတစ်ရပ်ဖြစ်ပါတယ်။ စစ်အာဏာရှင်ကိုဖြုတ်ချပြီး ပြည်သူ့ဘဝလွတ် မြောက်ရေးနှင့် ဖက်ဒရယ်ဒီမိုကရေစီပြည်ထောင်စုတည်ဆောက်ရေးအတွက် နွေဦးတော်လှန်ရေး ပြည်သူ့ အင်အားစုများ၊ တိုင်းရင်းသားတော်လှန်ရေးအဖွဲ့အစည်းများ၊ ရွေးကောက်ခံလွှတ်တော်ကိုယ်စားလှယ်များ၊ မိတ်ဖက်နိုင်ငံရေးပါတီများနှင့် ပြည်နယ်/ ဖက်ဒရယ်ယူနစ်အတိုင်ပင်ခံကောင်စီများ လက်တွဲချိတ်ဆက်ပြီး ယခုလို ကျင်းပနိုင်ခြင်းအတွက် မိမိအနေဖြင့် များစွာဂုဏ်ယူဝမ်းမြောက်မိပါကြောင်းဖော်ပြလိုပါတယ်။ခက်ခဲကြမ်းတမ်းတဲ့ တော်လှန်ရေးကာလဖြစ်သော်လည်း တက်ရောက်ပါဝင်သင့် ပါဝင်လိုကြတဲ့အဖွဲ့အစည်း တွေ၊ အစုအဖွဲ့တွေ၊ လူပုဂ္ဂိုလ်တွေ များစွာကျန်ရှိနေအုန်းမှာဖြစ်ပေမယ့်၊ တတ်နိုင်သမျှ ပါဝင်သင့် ပါဝင်နိုင်တဲ့ အဖွဲ့အစည်းတွေ၊ အစုအဖွဲ့တွေ၊ လူပုဂ္ဂိုလ်တွေ တက်ရောက်ပါဝင်နိုင်အောင်ကြိုးစားဆောင်ရွက်ပေးခြင်း အတွက်လည်း မိမိအနေဖြင့် ဂုဏ်ပြုပါကြောင်းအလေးအနက်ဖော်ပြလိုပါတယ်။ လေးစားအပ်တဲ့ သဘာပတိများ၊ ယာယီသမ္မတကြီးနှင့် ခေါင်းဆောင်များခင်ဗျား - ၂၀၂၁ ခုနှစ် ဖေဖော်ဝါရီလ (၁) ရက်နေ့မှာ တပ်မတော်ဟာ ပြည်သူတွေရဲ့ လွတ်လပ်တဲ့ဆန္ဒသဘောထားနှင့် ဒီမိုကရေစီနည်းကျရွေးချယ်မှုကို ဆန့်ကျင်ပြီး၊ နိုင်ငံတော်အာဏာကို အတင်းအဓမ္မ ထပ်မံလုယူသိမ်းပိုက်လိုက် ပြန်ပါတယ်။ ဒီလိုပြုမူဆောင်ရွက်လိုက်ခြင်းဟာ စတင်ဖြစ်တည်ထွန်းသစ်စ ဖက်ဒရယ်အရေး၊ ဒီမိုကရေစီနှင့် လူ့အခွင့်အရေးတို့အပြင် စီးပွားရေးနှင့် ဒေသဖွံ့ဖြိုးရေးဆိုင်ရာ အခွင့်အလမ်းနှင့်မြော်လင့်ချက်များကို ရိုက်ချိုး ဖျက်ဆီးပစ်ရာရောက်စေခဲ့ပါတယ်။ ထို့အတူ စစ်တပ်ကြီးစိုးတဲ့နိုင်ငံရေး၊ စီးပွားရေးနှင့် အုပ်ချုပ်ရေးဆိုင်ရာ ယန္တရားများ ပြန်လည်အားကောင်းပြီး၊ တရားမျှတမှုနှင့် ငြိမ်းချမ်းရေး၊  ဒီမိုကရေစီနှင့်လူ့အခွင့်အရေးတို့ကို လျစ်လျူရှု မျက်ကွယ်ပြုတဲ့စနစ်ဆိုးကို ပြန်လည်အသက်သွင်းဖို့ကြိုးစားနေခြင်းလည်း ဖြစ်ပါတယ်။တပ်မတော်ရဲ့ တရားမဲ့ပြုမူဆောင်ရွက်မှုကို လက်မခံငြင်းဆန်ကြတဲ့ မြန်မာနိုင်ငံသူနိုင်ငံသားများဟာ စစ်အာဏာသိမ်းပြီး ရက်အနည်းငယ်အတွင်းမှာပဲ နိုင်ငံတဝှမ်းလုံးမှာ လမ်းပေါ်ကိုထွက်၊ ငြိမ်းချမ်းစွာကန့်ကွက် ဆန္ဒပြခဲ့ကြပါတယ်။ မြန်မာနိုင်ငံထဲမှာသာမက ကမ္ဘာအရပ်ရပ်မှာပါ တပ်မတော်က အာဏာသိမ်းတာကို လက်မခံကြောင်း ဆန္ဒထုတ်ဖော်ခဲ့ကြပါတယ်။ လမ်းပေါ်ကိုထွက်ပြီး ဆန္ဒထုတ်ဖော်ခဲ့ကြသူအရေအတွက်ဟာ ရာဂဏန်း၊ ထောင်ဂဏန်း မဟုတ်ပါဘူး။ နေ့စဥ် သောင်းဂဏန်း၊ သိန်းဂဏန်းနှင့် ကန့်ကွက်ဆန္ဒပြခဲ့ကြတာ ဖြစ်ပါတယ်။ အထူးသဖြင့် Generation Z လို့ခေါ်တဲ့လူငယ်မျိုးဆက်သစ်တွေက ဦးဆောင်ခဲ့ကြပါတယ်။ “စစ်တပ်ကအာဏာသိမ်းခြင်း အလိုမရှိ”၊ “ပြည်သူ့အာဏာ ပြည်သူ့ပြန်ပေး”၊ “ဖမ်းဆီးထားတဲ့ခေါင်းဆောင်များ ချက်ချင်းလွှတ်”၊ “လူငယ်တွေမှာ အနာဂတ်ရှိတယ်” အစရှိသည်ဖြင့် ရဲရင့်ပြတ်သားတဲ့ကြွေးကြော်မှုများနှင့် မျိုးဆက်သစ်လူငယ်များအပါအဝင်ပြည်သူတွေရဲ့ ငြိမ်းချမ်းစွာဆန္ဒထုတ်ဖော်ခဲ့ကြတဲ့သက်သေဟာ မြန်မာနိုင်ငံ အတွင်းမှာသာမက ကမ္ဘာ့အလယ်မှာပါ ထင်ရှားကျော်ကြားခဲ့ပါတယ်။ သို့ပေမယ့် အာဏာသိမ်းစစ်ကောင်စီ ကတော့ ယဥ်ကျေးတဲ့ပြည်သူများရဲ့ ငြိမ်းချမ်းစွာ ဆန္ဒထုတ်ဖော်ကန့်ကွက်မှုကို လျစ်လျုရှုပြီး၊ လူမဆန်တဲ့ ရက်စက်ကြမ်းကြုတ်မှုမျိုးစုံနှင့် လက်နက်မဲ့ပြည်သူတွေကို ရိုက်နှက်၊ ဖမ်းဆီး၊ သတ်ဖြတ်ခဲ့ပါတယ်။ လေးစားအပ်တဲ့ သဘာပတိများ၊ ယာယီသမ္မတကြီးနှင့် ခေါင်းဆောင်များခင်ဗျား - လာမယ့်ရက်အနည်းငယ်အတွင်း စစ်အာဏာသိမ်းမှုကာလ (၁၂) လပြည့်မြောက်တော့မှာဖြစ်ပါတယ်။ ဒီ (၁၂) လတာကာလအတွင်း အာဏာသိမ်းစစ်ကောင်စီဟာ နိုင်ငံတဝှမ်း ငြိမ်းချမ်းစွာ ဆန္ဒထုတ်ဖော်ကန့်ကွက်ကြတဲ့ လူငယ်တွေနှင့် ပြည်သူတွေကို သာလွန်အင်အားတွေနဲ့ အကြမ်းဖက်နှိမ်နင်းပြီး သူတို့ရဲ့ထိန်းချုပ်မှုအောက်မှာ ငြိမ်ဝပ်ပိပြားသွားစေဖို့ ကြိုးစားခဲ့ပါတယ်။ သို့ပေမယ့် လူငယ်တွေနှင့်ပြည်သူတွေရဲ့တရားမျှတမှုကို ချစ်မြတ်နိုး တဲ့စိတ်၊ လူ့အခွင့်အရေးကိုတန်ဖိုးထားပြီး လွတ်မြောက်လိုစိတ်တို့အပြင် ဖက်ဒရယ်ဒီမိုကရေစီပြည်ထောင်စုကို တည်ဆောက်လိုတဲ့ပြင်းပြတဲ့စိတ်အားထက်သန်မှုတို့ကို ဘယ်လိုမှ နှိပ်ကွပ်ချိုးဖျက်ဖို့ မဖြစ်နိုင်တော့ဘူးဆိုတာ ယခုအခါ စစ်ကောင်စီအနေနဲ့ မျက်ဝါးထင်ထင် သိမြင်ကြုံတွေ့နေရပြီဖြစ်ပါတယ်။   စစ်ကောင်စီအနေနဲ့ ယခုအချိန်အထိ လူငယ်တွေနဲ့ ပြည်သူတွေရဲ့ လိုလားမှုကို မသိကျိုးကျွံပြုလျစ်လျုရှုနေဆဲ ဖြစ်ပါတယ်။ နိုင်ငံသူနိုင်ငံသားတွေရဲ့လက်ထဲမှာရှိနေတဲ့ အချုပ်အခြာအာဏာကို မဆီမဆိုင်လုယူထားပြီး၊ သူတို့ကပဲ နိုင်ငံနှင့်ပြည်သူတွေရဲ့ကောင်းကျိုးအတွက် စေတနာစိတ်နှင့် အလုပ်လုပ်နေသလိုလို အသံကောင်း ဟစ်နေဆဲဖြစ်ပါတယ်။ ပြည်တွင်းမှာသာမက နိုင်ငံတကာမှာပါ သူတို့ကို လက်မခံ၊ အသိအမှတ်မပြုနေတော့ တာကို သိပင်သိငြားသော်လည်း၊ ပုလင်းတူဗူးဆို့နိုင်ငံအချို့ရဲ့ အကူအညီနှင့် ပြည်သူတွေကို ရက်စက်စွာပြုမူဖို့ ဆက်လက်ကြိုးစားနေဆဲဖြစ်ပါတယ်။ ဒီလိုဆောင်ရွက်နေတာဟာ သူတို့ကိုယ်သူတို့သာမက၊ နိုင်ငံနှင့်ပြည်သူ တွေကိုပါ အဆိုးဆုံးအခြေအနေသို့တွန်းပို့နေတယ်ဆိုတာ အတိအလင်းပြောကြားလိုပါတယ်။စစ်ကောင်စီအနေနဲ့ ပြည်နယ်၊ ပြည်မနေရာဒေသအသီးသီးမှာ သာလွန်အင်အားတွေနဲ့ ပြည်သူတွေကိုထိုးစစ် ဆင်တိုက်ခိုက်နေတာကို ချက်ချင်းရပ်တန့်ဖို့လိုပါတယ်။ နိုင်ငံတော်သမ္မတ၊ နိုင်ငံတော်၏အတိုင်ပင်ခံပုဂ္ဂိုလ်တို့ အပါအဝင် မတရားဖမ်းဆီးအကျဥ်းချထားတဲ့ ပြည်သူတစ်သောင်းကျော်ကို ခြွင်းချက်မရှိ အမြန်ဆုံး ပြန်လွှတ် ပေးဖို့လိုပါတယ်။ မိမိတို့နှင့်အလျဥ်းသက်ဆိုင်ခြင်း မရှိတဲ့ နိုင်ငံတော်အာဏာကို ချက်ချင်းစွန့်လွှတ်ပြီး အချုပ် အခြာအာဏာရဲ့မူလပိုင်ရှင်တွေဖြစ်တဲ့ပြည်သူထံ အမြန်ဆုံး ပြန်လည် လွှဲအပ်ဖို့လိုပါတယ်။ ဒီလိုမှ မဟုတ်ရင် တိုင်းရင်းသားပြည်သူတစ်ရပ်လုံးရဲ့ နည်းမျိုးစုံဖြင့် တိုက်ခိုက်ဖြိုချမှုကို ဆက်လက်ရင်ဆိုင်နေရမှာဖြစ်ကြောင်း သတိပေးလိုပါတယ်။လေးစားအပ်တဲ့ သဘာပတိများ၊ ယာယီသမ္မတကြီးနှင့် ခေါင်းဆောင်များခင်ဗျား - လက်ရှိ နွေဦးတော်လှန်ရေးဟာ ပြည်သူ့တော်လှန်ရေးဖြစ်ပါတယ်။ လူတစ်ဖွဲ့၊ လူတစ်စုရဲ့ အကျိုးစီးပွားကိုရယူ ဖို့ဆင်နွဲနေတဲ့တော်လှန်ရေး မဟုတ်ပါဘူး။ လူတစ်စု၊ လူတစ်ဖွဲ့က စေခိုင်းကြီးကြပ်တဲ့တော်လှန်ရေးလည်း မဟုတ်ပါဘူး။ နိုင်ငံသူနိုင်ငံသား ပြည်သူတစ်ရပ်လုံးရဲ့အကျိုးစီးပွားအတွက် ပြည်သူများကိုယ်တိုင် ဦးဆောင် ပါဝင်တဲ့တော်လှန်ရေးဖြစ်ပါတယ်။ နွေဦးတော်လှန်ရေးဟာ “ဓမ္မ” ကို ချစ်မြတ်နိုးပြီး “အဓမ္မ” ကိုငြင်းပယ်တဲ့ ပြည်သူတွေရဲ့ ရင်ထဲ အသည်းထဲကနေ ထွက်ပေါ်လာတဲ့ ကိုယ်ကျင့်တရားကောင်းမွန်မှုကနေ စီးဆင်းလာတာ ဖြစ်ပါတယ်။ ဒါကြောင့် ယခု ပြည်သူတွေဆင်နွဲနေတဲ့တော်လှန်ရေးဟာ မုချမသွေအောင်မြင်မှာဖြစ်ပါတယ်။လူ့ကျင့်ဝတ်ကင်းမဲ့ပြီး ရက်စက်ကြမ်းကြုတ်တဲ့ စစ်အာဏာရှင်ကိုဆန့်ကျင်တော်လှန်ရတာဖြစ်လို့ ခက်ခဲကြမ်း တမ်းမှုများ၊ ကြေမွထိခိုက်ရမှုများ၊ စိတ်မသာညီးတွားရမှုများ မလွဲမသွေရှိနေမှာပဲဖြစ်ပါတယ်။ သို့သော်လည်း စနစ်ဆိုးကို ခြေမွပြီး၊ စနစ်သစ်တစ်ခုကို တည်ဆောက်ကြရတာဖြစ်လို့ နာကျင်ရပေမယ့် ပန်းတိုင်ရောက်တဲ့ တစ်နေ့ မိမိတို့အားလုံး “သားဖွားတဲ့မိခင်ရဲ့ ပီတိ” လိုမျိုး ဂုဏ်ယူကျေနပ်နိုင်မှာဖြစ်ပါတယ်။ တစ်ချိန်တည်းမှာ ပဲ၊ ခက်ခဲကြမ်းတမ်းစွာ ခုခံတော်လှန်မှုပြုနေကြတဲ့ ပြည်သူ့ဘက်တော်သား တော်လှန်ရေးအင်အားစုများအနေ ဖြင့် “အဆိုးအားဖြင့် အရှုံးဘက်ကို မယိမ်းယိုင်သွားစေဘဲ၊ အကောင်းအားဖြင့် အဆိုးအညစ်များကို အနိုင်ယူဖို့” မိမိအနေနဲ့ ကြုံကြိုက်တုန်း တိုက်တွန်းနိုးဆော်လိုပါတယ်။တစ်ဆက်တည်းမှာပဲ နွေဦးတော်လှန်ရေးကာလ ယနေ့အထိ မဆုတ်မနစ်သော စိတ်ပိုင်းဖြတ်ကြံ့ခိုင်မှုများဖြင့် အကြံကောင်းဉာဏ်ကောင်းများသာမက၊ ငွေကြေးမှအစ အဘက်ဘက်မှ မနားမနေ ပံ့ပိုးကူညီတာဝန်ယူပေး ကြတဲ့ ကမ္ဘာ့နိုင်ငံအသီးသီးက မြန်မာပြည်သူပြည်သားများကိုလည်း အထူးကျေးဇူးတင်ရှိပါကြောင်း ဖော်ပြလို ပါတယ်။ (၁၂) တာကာလအတွင်း ပြည်သူတွေရရှိတဲ့အောင်မြင်မှုများဟာ နိုင်ငံတကာမှာရှိတဲ့ မြန်မာပြည်သူ ပြည်သားများနှင့် မြန်မာနိုင်ငံနှင့် မြန်မာပြည်သူတွေကိုချစ်ခင်တန်ဖိုးထားကြတဲ့ မိတ်ဆွေများရဲ့ကရုပြုမှုနှင့် အတူတကွရပ်တည်ပေးမှုများကြောင့်လည်း ဖြစ်ပါတယ်။ လေးစားအပ်တဲ့ သဘာပတိများ၊ ယာယီသမ္မတကြီးနှင့် ခေါင်းဆောင်များခင်ဗျား - မိမိတို့ အမျိုးသားညီညွတ်ရေးအစိုးရအဖွဲ့ရဲ့ရည်မှန်းချက်ကတော့ မြန်မာနိုင်ငံရဲ့အတိတ်နိုင်ငံရေးသမိုင်းအတွေ့ အကြုံနှင့်သင်ခန်းစာများအပေါ်အခြေခံပြီး၊ တိုင်းရင်းသားလူမျိုးများအားလုံးမြော်မှန်းတဲ့ ဖက်ဒရယ် ဒီမိုကရေစီ ပြည်ထောင်စုနိုင်ငံတစ်ခုကို တည်ထောင်နိုင်ဖို့ဖြစ်ပါတယ်။ ဒီလိုတည်ထောင်တဲ့နေရာမှာ တိုင်းရင်းသားလူမျိုး များအနေနဲ့ မိမိတို့ရဲ့ကိုယ်တိုင်ရွေးချယ်ဆုံးဖြတ်တဲ့ပုံစံနှင့်သဏ္ဍာန်ထဲကနေ ကိုယ်ပိုင်ပြဌာန်းနိုင်ခြင်း အပြည့် အဝရှိပြီး၊ လူမျိုးတစ်ခုခု၊ အစုအဖွဲ့တစ်ခုခုရဲ့ ထိန်းချုပ်မှုကင်းလွတ်ခြင်းရှိတဲ့ လွတ်လပ်မှု၊ တန်းတူမျှတမှု၊ ကြီးနိုင် ငယ်ညှင်းကင်းရှင်းမှုတို့နှင့်ပြည့်စုံတဲ့ လူ့အဖွဲ့အစည်းတစ်ရပ်ကို ထူထောင်ဖို့ဖြစ်ပါတယ်။ လက်ရှိနွေဦးတော်လှန်ရေးကာလမှာ နိုင်ငံရေးအရ အမျိုးသားညီညွတ်ရေးအတိုင်ပင်ခံကောင်စီမှာ “ဖက်ဒရယ် ဒီမိုကရေစီပဋိဉာဉ်”ရေးဆွဲခြင်းလုပ်ငန်းစဉ်အပါအဝင် ပြည်သူ့ဘက်တော်သားတော်လှန်ရေးအင်အားစုတွေ ကြားမှာ အလွန်အရေးကြီးတဲ့နိုင်ငံရေးအရ ပူးပေါင်းညှိနှိုင်းဆောင်ရွက်မှုတွေရှိနေပါတယ်။ ယခုပြုလုပ်မယ့် ပြည်သူ့ညီလာခံမှာ ပြန်လည်ညှိနှိုင်းပြုပြင်ထားတဲ့ “ဖက်ဒရယ်ဒီမိုကရေစီပဋိဉာဉ်” အတည်ပြုခြင်းအပါအဝင် နွေဦးတော်လှန်ရေးအောင်မြင်နိုင်ဖို့အတွက် အချက်အခြာကျတဲ့ ဆွေးနွေးညှိနှိုင်းမှုတွေပြုလုပ်ကြပါလိမ့်မယ်။ တစ်ဖက်မှာလည်း စစ်အာဏာသိမ်းထားတဲ့ ရက်တစ်ရက်တိုးလေလေ၊ ပြည်သူတွေခံရတဲ့ ဒုက္ခဆင်းရဲကြပ် တည်းမှုတွေကလည်း တစ်ရက်ပိုလေလေဖြစ်ပါတယ်။ ဒါကြောင့် ပြည်သူတွေအမြန်ဆုံးလွတ်မြောက်လုံခြုံဖို့ အတွက် စစ်အာဏာသိမ်းမှုကို အမြန်ဆုံးဖယ်ရှားနိုင်ဖို့ “ပြည်သူ့ဒုက္ခ အမြန်ဆုံးလွန်မြောက်နိုင်ရေး” ကိုမျက်ခြေ မပြတ် ရှေးရှူဆောင်ရွက်သွားကြရမှာဖြစ်ပါတယ်။ လေးစားအပ်တဲ့ သဘာပတိများ၊ ယာယီသမ္မတကြီးနှင့် ခေါင်းဆောင်များခင်ဗျား - ယနေ့မှစတင်ပြီး ကျင်းပပြုလုပ်သွားမယ့် “ပြည်သူ့ညီလာခံကြီး” ရည်မှန်းချက်အတိုင်း အောင်မြင်စွာကျင်းပနိုင် ပါစေ။ ပါဝင်တက်ရောက်ကြသူကိုယ်စားလှယ်များ၊ စိတ်အားထက်သန်မှုများစွာဖြင့် လေ့လာသူများ၊ ညီလာခံ ကျင်းပရေးတာဝန်ရှိသူများ၊ အလုပ်အဖွဲ့ဝင်များအားလုံး ဘေးကင်းလုံခြုံစွာ ရှိကြပါစေ။ မြန်မာနိုင်ငံသူနိုင်ငံ သားအပေါင်း ဘေးလွတ်လုံခြုံ၍ တရားမျှတမှုနှင့် လွတ်လပ်ခြင်းများ အမြန်ဆုံးရရှိခံစားနိုင်ပါစေကြောင်း ဆုမွန်ကောင်းတောင်းရင်း လေးစားစွာ နိဂုံးချုပ်အပ်ပါတယ်။အားလုံးကို ကျေးဇူးတင်ပါတယ်ခင်ဗျား။၂၀၂၂ ခုနှစ် ဇန်နဝါရီလ ၂၇ ရက်

ယနေ့ အမျိုးသားညီညွတ်ရေးအတိုင်ပင်ခံကောင်စီက ကျင်းပပြုလုပ်သော ပြည်သူ့ညီလာခံ ဖွင့်ပွဲတွင် အမျိုးသားညီညွတ်ရေးအစိုးရ ယာယီသမ္မတ ဒူဝါလရှီးလ ပြောကြားခဲ့သော အမှာစကား

ယနေ့ အမျိုးသားညီညွတ်ရေးအတိုင်ပင်ခံကောင်စီက ကျင်းပပြုလုပ်သော ပြည်သူ့ညီလာခံ ဖွင့်ပွဲတွင် အမျိုးသားညီညွတ်ရေးအစိုးရ ယာယီသမ္မတ ဒူဝါလရှီးလ ပြောကြားခဲ့သော အမှာစကား

ပြည်ထောင်စုသမ္မတမြန်မာနိုင်ငံတော်အမျိုးသားညီညွတ်ရေးအစိုးရနိုင်ငံတော်သမ္မတရုံး[email protected]     ၂၀၂၂ ခုနှစ်၊ ဇန်နဝါရီလ ၂၇ ရက် ပြည်ထောင်စုသမ္မတ မြန်မာနိုင်ငံတော်အမျိုးသားညီညွတ်ရေးအစိုးရယာယီသမ္မတ ဒူဝါလရှီးလ၏ ပြည်သူ့ညီလာခံ ဖွင့်ပွဲအမှာစကား ချစ်ခင်လေးစားရပါသော ပြည်သူ့ညီလာခံကိုယ်စားလှယ်များ၊ အဖွဲ့အစည်းအသီးသီးမှ ခေါင်းဆောင်များ၊ လေ့လာသူများ၊ ဖိတ်ကြားထားသော ဧည့်သည်တော်များ၊ သံတမန်များကို ရှေးဦးစွာ ကိုယ်စိတ်နှစ်ဖြာ ကျန်းမာကြပါစေ၊ လိုအင်ဆန္ဒ အဝဝ ပြည့်ကြပါစေလို့ ဆုတောင်းမေတ္တာပို့ နှုတ်ခွန်းဆက်သလိုက်ပါတယ်။  ပြည်သူ့ညီလာခံကြီးကို အခုလို ကျင်းပနိုင်တာဟာ နွေဦးတော်လှန်ရေးရဲ့ အရေးကြီးလှတဲ့ အလှည့်အပြောင်း အချိုးအကွေ့ဖြစ်ပြီး သမိုင်းမှာလည်း မော်ကွန်းဝင်ကျန်ရစ်မယ့် အစည်းအဝေး ကြီးဖြစ်တဲ့အတွက် အခုလို မိန့်ခွန်းပြောခွင့်ရတာ အလွန်ပဲ ဝမ်းသာဂုဏ်ယူမိပါတယ်။ ဒီပြည်သူ့ ညီလာခံကြီးဟာ အကြမ်းဖက် စစ်အုပ်စုရဲ့ တိုင်းပြည်အာဏာကို လက်နက်အားကိုး မတရားသိမ်းယူဖို့ ကြိုးစားတဲ့ တစ်နှစ် ပြည့်လုဆဲဆဲ ကာလနဲ့ သွားရောက် တိုက်ဆိုင်နေတာလဲ ဖြစ်ပါတယ်။ စစ်အုပ်စုက ဘယ်လောက်ပဲ တိုင်းပြည်ကို အကြမ်းဖက် အာဏာရယူဖို့ ကြိုးစားပေမဲ့ ပြည်သူလူထုက လက်မခံပဲ နည်းအမျိုးမျိုးနဲ့ ဆန့်ကျင်တွန်းလှန် နေတယ်ဆိုတဲ့ ပြယုဂ်တစ်ခုအဖြစ် ဒီပြည်သူ့ညီလာခံကြီးကို ကျင်းပနိုင်တဲ့အတွက် နိုင်ငံရေးအနှစ်သာရ အားဖြင့် အလွန် အရေးကြီးလှပါတယ်။  ပြည်ထောင်စုကြီးရဲ့ အဓိကအရင်းခံ ရေသောက်မြစ် ပြဿနာတွေ၊ ပဋိပက္ခတွေကို ဖြေရှင်းနိုင် မယ့် ဖက်ဒရယ်ဒီမိုကရေစီပြည်ထောင်စုကြီး တည်ဆောက်နိုင်ရေးအတွက် အရေးကြီးလှတဲ့ ဖက်ဒရယ်ဒီမိုကရေစီပဋိဉာဉ်ကြီးကို ဒီညီလာခံမှာ အတည်ပြုပြီး သမိုင်းမှတ်တိုင်စိုက်ထူနိုင်တော့မှာ ဖြစ်ပါတယ်။ စစ်အာဏာရှင် စနစ်အပါအဝင် အာဏာရှင်စနစ်မှန်သမျှ ပပျောက်ရေး၊ ၂၀၀၈ ဖွဲ့စည်းပုံ အခြေခံဥပဒေ အပြီးသတ် ဖျက်သိမ်းရေး၊ ဖက်ဒရယ်ဒီမိုကရေစီ ပြည်ထောင်စုတည်ဆောက်ရေး၊ အရပ်သား ပြည်သူ့အစိုးရ ပေါ်ထွန်းရေးအစရှိတဲ့ ရည်ရွယ်ချက်တွေနဲ့ အတည်ပြုပြဌာန်းမယ့် ပဋိဉာဉ် ကြီးက နွေဦးတော်လှန်ရေးအတွက် ရှေ့ဆောင်လမ်းပြ မီးရှုးတန်ဆောင်ဖြစ်လာမှာ ဖြစ်ပါတယ်။    ဒီပဋိဉာဉ်ကြီးမှာ ပါတဲ့ နိုင်ငံရေးလမ်းပြမြေပုံအတိုင်း ဖက်ဒရယ်ဒီမိုကရေစီ ဖွဲ့စည်းပုံအခြေခံ ဥပဒေတစ်ရပ်ကို လူထုဆန္ဒနဲ့အညီ အတည်ပြုပြဌာန်းပြီး ဖွဲ့စည်းပုံအခြေခံဥပဒေစနစ် (Constitutionalism)ကို လိုက်နာကျင့်သုံးနိုင်မှသာ ကျွန်တော်တို့မျှော်ရည်တဲ့ ဖက်ဒရယ်ပြည်ထောင် စုကြီးတည်ဆောက်နိုင်မှာ ဖြစ်ပါတယ်။ ဒီလို တည်ဆောက်နိုင်ဖို့ ပဋိညာဉ်မှာ ပါဝင်တဲ့ အစုအဖွဲ့များ ဖြစ်တဲ့ ရွေးကောက်ခံ ကိုယ်စားလှယ်များ၊ နိုင်ငံရေးပါတီများ၊ တိုင်းရင်းသားလက်နက်ကိုင် တော်လှန်ရေး အဖွဲ့အစည်းများ၊ ကြားကာလ ပြည်နယ်နဲ့ ဖက်ဒရယ်ယူနစ် ကိုယ်စားပြုအဖွဲ့အစည်း များ၊ သမဂ္ဂများ၊ အမျိုးသမီး၊ လူငယ်နဲ့ လူနည်းစုဆိုင်ရာ အဖွဲ့အစည်းများ အပါအဝင် အရပ်ဖက် အဖွဲ့အစည်းများ၊ အာဏာရှင်စနစ်ဆန့်ကျင်ရေး CDM လှုပ်ရှားမှုဆိုင်ရာ အဖွဲ့အစည်းများ၊ လူထုသပိတ် လှုပ်ရှားမှုဆိုင်ရာ အဖွဲ့အစည်းများရဲ့  စုပေါင်းညီညွတ်မှု၊ ညှိနှိုင်းတိုင်ပင်မှုနဲ့ ဟန်ချက် ညီညီ ကြိုးပမ်းအားထုတ်မှုက အလွန်အရေးကြီးလှပါတယ်။ အဲဒီလို အားထုတ်ကြဖို့ ပေါင်းစပ် ညှိနှိုင်းရေးကော်မတီ/ ကော်မရှင်တွေ ဖွဲ့စည်းပြီး ဆောင်ရွက်နေကြတဲ့အတွက်လည်း များစွာ ဝမ်းသာ ဂုဏ်ယူမိပါတယ်။  အာဏာရှင်စနစ်ပပျောက်ရေး၊ ၂၀၀၈ ဖွဲ့စည်းပုံအခြေခံဥပဒေဖျက်သိမ်းရေး၊ ဖက်ဒရယ် ဒီမိုကရေစီ ပြည်ထောင်စုတည်ဆောက်ရေးအတွက် ဒီပဋိဉာဉ်နဲ့အညီ ရေးဆွဲထားတဲ့ မဟာဗျူဟာ တွေကိုလည်း အကောင်းဆုံး လေ့လာသုံးသပ်ပြီး အတည်ပြုပေးနိုင်ပြီး ဖက်ဒရယ်ဒီမိုကရေစီ တည်ဆောက်ရေး ကြိုတင် ပြင်ဆင်မှုဆိုင်ရာ လုပ်ငန်းတွေကိုလည်း တင်ပြအတည်ပြုချက် ရယူနိုင် မယ်လို့ ယုံကြည်ပါတယ်။ အမျိုးသားညီညွတ်ရေးအစိုးရအနေနဲ့လည်း အမျိုးသားညီညွတ်ရေး အတိုင်ပင်ခံကောင်စီရဲ့ လမ်းညွှန်မှု၊ မူဝါဒဆိုင်ရာ ထိန်းကျောင်းမှုတွေကို ခံယူပြီး ဒီမဟာဗျူဟာတွေ၊ လုပ်ငန်းစဉ်တွေကို အားလုံးနဲ့ လက်တွဲပြီး အကောင်အထည်ဖေါ်သွားမှာဖြစ်ပါတယ်။ အမျိုးသား ညီညွတ်ရေးအစိုးရ အနေနဲ့ အစိုးရဖွဲ့စည်းပြီးကတည်းက အခုအချိန်ထိ ပဋိဉာဉ်မှာ ပါတဲ့ ပြဌာန်းချက် များနဲ့အညီ ဆောင်ရွက်ခဲ့တဲ့ လုပ်ငန်းတွေကို ညီလာခံမှာ အစီရင်ခံ တင်ပြသွားမှာ ဖြစ်ပါတယ်။   ဒီလိုညီလာခံကြီးကျင်းပနိုင်ဖို့အတွက် အားထုတ်ကြိုးပမ်းခဲ့ကြသူတွေ၊ အထူးသဖြင့် အမျိုးသားညီညွတ်ရေးအတိုင်ပင်ခံကောင်စီ အဖွဲ့ဝင်တွေ၊ နည်းပညာပံ့ပိုးကူညီကြသူတွေကိုလည်း အထူးကျေးဇူးတင်ပါကြောင်း ဖေါ်ပြလိုပါတယ်။ ဒီညီလာခံကြီးကနေ အစပြုပြီး ဖက်ဒရယ် ဒီမိုကရေစီပဋိဉာဉ်ကြီးနဲ့အညီ ဖက်ဒရယ်ဒီမိုကရေစီပြည်ထောင်စုကြီး တည်ဆောက်နိုင်ဖို့ အားလုံး ဝိုင်းဝန်းလက်တွဲ ကြိုးပမ်းဆောင်ရွက်ကြပါစို့လို့ သန္နိဌာန်ပြုရင်း၊ ဒီညီလာခံကြီး အောင်မြင်စေ ကြောင်း ဆုမွန်ကောင်းတောင်းလိုက်ပါတယ်။    အားလုံး စစ်ဘေးဒဏ်၊ သဘာဝဒဏ်များမှ ကင်းလွတ်ပြီး၊ ငြိမ်းချမ်းမှု၊ ပျော်ရွှင်မှုများ ခံစား ရရှိပါစေ၊ ငြိမ်းချမ်းသာယာဝပြောတဲ့၊ တရားမျှတတဲ့ နိုင်ငံရေးစနစ်တခုကိုလည်း ခံစားရရှိပါစေလို့ ဆုမွန်ကောင်း တောင်းအပ်ပါတယ်။ အားလုံးကို ကျေးဇူးတင်ပါတယ်။ အရေးတော်ပုံ မုချအောင်ရမည်။(ယာယီသမ္မတ)အမျိုးသားညီညွတ်ရေးအစိုးရပြည်တော်စုသမ္မတမြန်မာနိုင်ငံတော်

အမျိုးသားညီညွတ်ရေးအစိုးရအဖွဲ့အစည်းအဝေး (၃/၂၀၂၂) ကျင်းပပြုလုပ်

အမျိုးသားညီညွတ်ရေးအစိုးရအဖွဲ့အစည်းအဝေး (၃/၂၀၂၂) ကျင်းပပြုလုပ်

ဇန်နဝါရီ ၂၅၊ ၂၀၂၂အမျိုးသားညီညွတ်ရေးအစိုးရအဖွဲ့အစည်းအဝေးအမှတ်(၄၀) (၃/၂၀၂၂) ကို ယနေ့ဇန်နဝါရီလ ၂၅ ရက်နေ့ နံနက် ၁၀ နာရီ တွင် ကျင်းပခဲ့ပါတယ်။အစည်းအဝေးမှာ အမျိုးသားညီညွတ်ရေးအစိုးရ ယာယီသမ္မတ ဒူဝါလရှီးလက လာမယ့် ဖေဖော်ဝါရီလ ၁ ရက်နေ့ဆိုရင် ဆိုးရွာလွန်းတဲ့ စစ်အာဏာသိမ်းမှု ၁ နှစ်ပြည့်မြောက်ပြီဖြစ်ကြောင်း၊ ရက်စက်ကြမ်းကြုတ်လွန်းတဲ့ စစ်အာဏာရှင် အကြမ်းဖက်သမားတွေကို ပြည်သူတွေဟာ ဇွဲရှိစွာနဲ့ လုံ့လဝီရိယမလျှော့ဘဲ တွန်းလှန်လာခဲ့ကြတာလည်း တနှစ်ပြည့်မြောက်ပြီဖြစ်ကြောင်း၊ ပြည်သူတွေ အတွက်လည်း ဒီတော်လှန်ရေးဟာ အတော်ပင်ပန်းဆင်းရဲ လှကြောင်း၊ ဒါပေမယ့် အရှိန်လျော့မသွားဘဲ ဆက်လက်တွန်းလှန်နေတဲ့ ပြည်သူတွေနဲ့အတူ အမြန်ဆုံး အောင်မြင်မှုတွေ ရရှိအောင် ပိုမိုအားကောင်းအောင်၊ အားဖြည့်ကြရင်း ကျနော်တို့ ရှေ့ဆက်သွားကြမှာဖြစ်ပါကြောင်း။ ကျွန်တော်တို့ တော်လှန်ရေးဟာ zero ကနေ စကြရတာဖြစ်ပြီး အခုအချိန်အထိလည်း နိုင်ငံတကာရဲ့ ကူညီထောက်ပံ့မှုတွေ သိသာထင်ရှားစွာ မရသေးပေမယ့် ပြည်တွင်းပြည်ပက ကျွန်တော်တို့ပြည်သူတွေရဲ့ စုပေါင်းအားနဲ့ သွားနေကြတာဖြစ်ကြောင်း၊ ဒီလိုသွားရင်းနဲ့ အောင်မြင်မှုဟာ မြင်နေရပြီမို့ ဆက်လက်ကြိုးပမ်းကြဖို့ ပြောကြားလိုကြောင်း။ နိုင်ငံတကာအနေနဲ့လည်း အမှန်တရားဘက်က ရပ်တည်ပေးဖို့ နှိုးဆော်လိုကြောင်း၊ အမှန်တရားဘက်မှ ရပ်တည်ပေးခဲ့တဲ့ အာဆီယံနိုင်ငံအချို့မှ ခေါင်းဆောင်များကိုလည်း ကျေးဇူးတင်ကြောင်း ပြောကြားခဲ့ပြီး ပြည်ထောင်စုဝန်ကြီးချုပ်က ဒီတပတ်အတွင်းမှာ ကျွန်တော်တို့ပြည်သူတွေအတွက် ဝမ်းမြောက်ဂုဏ်ယူစရာကိစ္စကတော့ အမေရိကန်နိုင်ငံ အခြေစိုက် Chevron နဲ့ ပြင်သစ်နိုင်ငံ အခြေစိုက် Total တို့ စစ်ကောင်စီနှင့် စီးပွားဆက်မလုပ်ဖို့ ဆုံးဖြတ်ချက်ချခဲ့တဲ့ကိစ္စဖြစ်ကြောင်း။ ပြည်တွင်း ပြည်ပမှ မြန်မာနိုင်ငံသားများ၊ မြန်မာ့ဒီမိုကရေစီအရေးကို အားတက်သရော အကူအညီပေးနေကြတဲ့ နိုင်ငံတကာ အဖွဲ့အစည်းများနှင့် NUG ရဲ့ဝန်ကြီးဌာန အသီးသီး၊ အထူးသဖြင့် စီးပွားရေးဆိုင်ရာ ဝန်ကြီး ဌာနများရဲ့ အားထုတ်ကြိုးပမ်းမှုကြောင့် ယခုကဲ့သို့ စစ်ကောင်စီရဲ့ အကြီးမားဆုံး ဝင်ငွေရလမ်းတစ်ခုကို ပိတ်ဆို့နိုင်တာဖြစ်တာကြောင့် တက်ညီလက်ညီဆောင်ရွက်ခဲ့ကြတာ တွေအတွက် အထူးပင်ဂုဏ်ပြုလိုကြောင်း။ တိုင်းပြည်အာဏာကို မတရားလုယူထားတဲ့ အကြမ်းဖက်သမားတွေ ထင်ရာစိုင်းနေတဲ့ ကာလဖြစ်တာကြောင့် စိတ်မချမ်းမြေ့စရာများကတော့ နေ့စဉ်လိုလို ကြားသိ နေရတာတွေရှိကြောင်း။ အကြမ်းဖက်စစ်အုပ်စုကို ခုခံတွန်းလှန်ရင်း ကျဆုံးသွားရတဲ့ မြန်မာပြည်အရပ်ရပ်က သူရဲကောင်းတွေအတွက်လည်း အလွန်စိတ်ထိခိုက်ရသလို အပြစ်မဲ့ပြည်သူကိုပါမရှောင် နည်းမျိုးစုံနဲ့ ဒုက္ခပေးနေကြတာတွေအတွက်လည်း ထပ်တူ စိတ်မကောင်းဖြစ်ရပါကြောင်း၊ မကြာခင်ရက်ပိုင်းအတွင်းက မတရားသဖြင့် သေဒဏ်ချခံလိုက်ရတဲ့ တော်လှန်ရေးရဲဘော် ၂ ဦးဖြစ်တဲ့ ဦးဂျင်မီနဲ့ ဦးဖြိုးဇေယျာသော်တို့အပါအဝင် သေဒဏ်ချခံရတဲ့ တော်လှန်ရေးသမားများအားလုံးအတွက် စိတ်ထိခိုက်ရသလို တဘက်ကလည်း ငါတို့ တော်လှန်ရေးကို မြန်မြန်အောင်မြင်အောင်လုပ်ရမယ်ဆိုတဲ့ သံဓိဌာန်လည်း ပိုမို ခိုင်မာလာကြောင်း၊ ကျဆုံးသွားတဲ့ သူရဲကောင်းတွေ မတရားအကျဉ်းချခံနေရတဲ့ သူရဲကောင်းတွေ အားလုံးအတွက် ကျွန်တော်တို့ ပိုကြိုးစားပြီး ဒီအကြမ်းဖက်သမားတွေကို အမြစ်ဖြတ် ချေမှုန်းနိုင်သည်အထိ တိုက်ပွဲဝင်ကြရမှာဖြစ်ပါကြောင်း။ ဒီလိုအောင်မြင်မှုတွေ ရနိုင်ဖို့အတွက်ဆိုရင် ပြည်သူတွေ ယုံကြည်အားကိုးကြတဲ့ ကျွန်တော်တို့ အမျိုးသားညီညွတ်ရေးအစိုးရအနေနဲ့လည်း ပြည်သူတွေနဲ့ ထိုက်တန်တဲ့ ရလဒ်တခုကို ဆောင်ကြဉ်းပေးနိုင်ဖို့ အားကုန်ရုန်းကန်ကြရမယ့် နှစ်လည်းဖြစ်ပါကြောင်း။ မကြာခင်မှာ စစ်အာဏာသိမ်းမှု တနှစ်ပြည့် တော့မှာဖြစ်ပြီး ကျွန်တော်တို့ မကြုံချင်ခဲ့တဲ့ နှစ်ပတ်လည်တခုဖြစ်ကြောင်း၊ တနှစ်လုံးလုံး ပြောစရာစကားမရှိလောက်အောင် ရက်စက် ကြမ်းကြုတ်မှုတွေ ကျူးလွန်ခဲ့တဲ့ အကြမ်းဖက် သမားတွေကို ဇွဲကြီးကြီးနဲ့ တွန်းလှန်ရင်း အာဏာရှင်စနစ်အမြစ်ပြတ်နိုင်ဖို့ ကြိုးစားရုန်းကန် နေကြတဲ့သူ တဦးချင်းစီကို လေးစားဂုဏ်ပြုလျက် ကျွန်တော်တို့တတွေ အလုပ်တွေ ပိုကြိုးစားကြပါမယ်လို့ ကတိပြုပါကြောင်း ပြောကြားခဲ့ပါတယ်။ ဆက်လက်ပြီး ဖက်ဒရယ်ပြည်ထောင်စုရေးရာဝန်ကြီးဌာန၊ စီမံကိန်း ဘဏ္ဍာရေးနှင့် ရင်းနှီး မြှပ်နှံမှုဝန်ကြီးဌာန၊ ဆက်သွယ်ရေး သတင်းအချက်အလက်နှင့် နည်းပညာဝန်ကြီးဌာန ပြည်ထောင်စု ဝန်ကြီးတို့က သက်ဆိုင်ရာကဏ္ဍအလိုက် အသီးသီးတင်ပြကြပြီး အစည်းအဝေးကို နံနက် (၁၁း၅၀)မိနစ်တွင် ရုတ်သိမ်းခဲ့ပါတယ်။

အကြမ်းဖက်စစ်ကောင်စီလက်အောက်ခံ မြို့တော်စည်ပင်သာယာရေးကော်မတီများ၏ မြေအရောင်းအဝယ်ဆိုင်ရာ လုပ်ဆောင်ချက်များအားလုံး တရားဝင်မှုမရှိကြောင်း ကြေညာခြင်း

အကြမ်းဖက်စစ်ကောင်စီလက်အောက်ခံ မြို့တော်စည်ပင်သာယာရေးကော်မတီများ၏ မြေအရောင်းအဝယ်ဆိုင်ရာ လုပ်ဆောင်ချက်များအားလုံး တရားဝင်မှုမရှိကြောင်း ကြေညာခြင်း

ပြည်ထောင်စုသမ္မတမြန်မာနိုင်ငံတော်အမျိုးသားညီညွတ်ရေးအစိုးရhttps://nugmyanmar.orgကြေညာချက်အမှတ် (၄/၂၀၂၂)အာဏာသိမ်းပြီးကာလအတွင်း အကြမ်းဖက်စစ်ကောင်စီလက်အောက်ခံ နေပြည်တော်၊ ရန်ကုန်မြို့တော်၊ မန္တလေးမြို့တော်စည်ပင်သာယာရေးကော်မတီများ၏ မြေအရောင်းအဝယ်ဆိုင်ရာ လုပ်ဆောင်ချက်များအားလုံး တရားဝင်မှုမရှိကြောင်း ကြေညာခြင်း၂၀၂၂၊ ဇန်နဝါရီ ၁၆ရက်၁။ အကြမ်းဖက်စစ်ကောင်စီသည် ပြည်သူလူထုထံမှ အာဏာကို မတရားသောနည်းလမ်းဖြင့် အတင်းအဓမ္မ သိမ်းယူထားသော၊ ပြည်ထောင်စုလွှတ်တော်ကိုယ်စားပြုကော်မတီ(CRPH)က အကြမ်းဖက် အဖွဲ့အစည်းအဖြစ် တရားဝင်ကြေညာခြင်းခံထားရသော၊ ကမ္ဘာ့ကုလသမဂ္ဂအပါအဝင် မည်သည့်နိုင်ငံကမျှ တရားဝင်အစိုးရအဖြစ် အသိအမှတ်ပြုထားခြင်းမရှိသော အကြမ်းဖက်အဖွဲ့အစည်းတစ်ခုသာဖြစ်သည်။၂။ အကြမ်းဖက်စစ်ကောင်စီ၏ လက်အောက်ခံ စည်ပင်သာယာရေးကော်မတီများသည် စည်ပင်သာယာ ပိုင်မြေများကို ရောင်းချခြင်း၊ ဂရံဖောက်ခြင်းများ စီစဉ်ဆောင်ရွက်နေကြောင်းသိရှိရသည်။ နိုင်ငံပိုင်မြေ၏ မူလပိုင်ရှင်သည် နိုင်ငံတော်တွင်မှီတင်းနေထိုင်ကြသော နိုင်ငံသူနိုင်ငံသားများဖြစ်သည့်အတွက် ပြည်သူလူထုအား ကိုယ်စားပြုမှု အလျဉ်းမရှိသော အကြမ်းဖက်စစ်ကောင်စီနှင့် ယင်း၏ လက်အောက်ခံအဖွဲ့အစည်းများအနေဖြင့် အဆိုပါမြေများအား စီမံခန့်ခွဲ ရောင်းချပိုင်ခွင့် မရှိကြောင်း အမျိုးသားညီညွတ်ရေးအစိုးရအနေဖြင့် သတိပေးအပ်ပါသည်။၃။ အကြမ်းဖက်စစ်ကောင်စီက အာဏာသိမ်းထားသည့်ကာလအတွင်း နေပြည်တော်၊ ရန်ကုန်မြို့တော်၊ မန္တလေးမြို့တော်စည်ပင်သာယာရေးကော်မတီများက မြေကွက်များရောင်းချခြင်း၊ ဂရံထုတ်ပေးခြင်းများသည် တရားဝင်မှု လုံးဝမရှိသော ဆောင်ရွက်ချက်သာဖြစ်၍ အဆိုပါမြေကွက်များကို ဝယ်ယူခြင်း၊ ဂရံထုတ်ယူခြင်း၊ တဆင့်ရောင်းချခြင်းများ မပြုလုပ်ကြရန် တားမြစ်ပြီး ပြည်သူ့အာဏာ ပြည်သူ့လက်ဝယ်ပြန်လည်ရောက်ရှိသည့် အချိန်ကာလတွင် အဆိုပါ မြေများအား ပြည်သူပိုင်မြေအဖြစ် ပြန်လည် သိမ်းယူသွားမည်ဖြစ်ကာ ဝယ်ယူသူများ၊ ရောင်းချသူများနှင့်တကွ ပူးပေါင်းဆောင်ရွက်သူများအားလုံးကို ဥပဒေနှင့်အညီ အရေးယူ ဆောင်ရွက်သွားမည် ဖြစ်ကြောင်း သတိပေးလိုက်သည်။

ကရင်နီပြည်နယ်တွင်ဖြစ်ပေါ်နေသည့် အကြမ်းဖက်စစ်ကောင်စီ၏အကြမ်းဖက်လုပ်ရပ်များနှင့် ပတ်သက်သည့် ထုတ်ပြန်ကြေညာချက်

ကရင်နီပြည်နယ်တွင်ဖြစ်ပေါ်နေသည့် အကြမ်းဖက်စစ်ကောင်စီ၏အကြမ်းဖက်လုပ်ရပ်များနှင့် ပတ်သက်သည့် ထုတ်ပြန်ကြေညာချက်

ပြည်ထောင်စုသမ္မတမြန်မာနိုင်ငံတော်အမျိုးသားညီညွတ်ရေးအစိုးရhttps://nugmyanmar.orgကြေညာချက်အမှတ် (၂/၂၀၂၂)ကရင်နီပြည်နယ်တွင်ဖြစ်ပေါ်နေသည့် အကြမ်းဖက်စစ်ကောင်စီ၏အကြမ်းဖက်လုပ်ရပ်များနှင့် ပတ်သက်သည့် ထုတ်ပြန်ကြေညာချက်၂၀၂၂၊ ဇန်နဝါရီ ၁၁ရက်၁။ အကြမ်းဖက်စစ်ကောင်စီတပ်ဖွဲ့သည် ၂၀၂၂ ခုနှစ် ဇန်နဝါရီလ (၇) ရက်နေ့မှစတင်ပြီး ယမန်နေ့အထိ ကရင်နီပြည်နယ်၊ လွိုင်ကော်မြို့ကိုလေကြောင်းမှလည်းကောင်း၊ မြို့တွင်း၌တင့်ကားများအသုံးပြု၍လည်း ကောင်း သာလွန်အင်အားများဖြင့်ပစ်ခတ်တိုက်ခိုက်ခဲ့သည်။ ယင်းသို့ ပစ်ခတ်တိုက်ခိုက်ခြင်းကြောင့် အရပ်သား ပြည်သူများကိုထိမှန်ခြင်း၊ အပြစ်မဲ့ပြည်သူများ၏နေအိမ်များ မီးလောင်ကျွမ်းခြင်းအပါအဝင် ထိခိုက်ပျက်စီးမှု များစွာဖြစ်ပေါ်ခဲ့သည့်ပြင် အပြစ်မဲ့ပြည်သူများထောင်နှင့်ချီ၍ ဘေးလွတ်ရာ အရပ်ဒေသများ သို့ တိမ်းရှောင် ထွက်ပြေးနေကြရလျက်ရှိသည်။၂။ အမျိုးသားညီညွတ်ရေးအစိုးရအဖွဲ့သည် ၂၀၂၂ ခုနှစ် ဇန်နဝါရီလ (၉) ရက်နေ့ညနေပိုင်းတွင် ပြည်ထောင်စု ဝန်ကြီးချုပ်ဦးဆောင်၍ ကရင်နီပြည်အတိုင်ပင်ခံကောင်စီမှ တာဝန်ရှိခေါင်းဆောင်များနှင့် အရေးပေါ် တွေ့ဆုံပြီး လက်ရှိ ကရင်နီပြည်နယ်တွင်ဖြစ်ပေါ်နေသည့် အကြမ်းဖက်စစ်ကောင်စီ၏အကြမ်းဖက် လုပ်ရပ်များနှင့် အရပ်သားပြည်သူများရင်ဆိုင်ကြုံတွေ့နေရသည့်အခက်အခဲများကို အတူတကွဖြေရှင်း ဆောင်ရွက်နိုင်ရန်အတွက် နှစ်ဖက်ရင်းနှီးပွင့်လင်းစွာဆွေးနွေးညှိနှိုင်းခဲ့ကြသည်။၃။ ကရင်နီပြည်နယ်၊ လွိုင်ကော်မြို့တွင် အကြမ်းဖက်စစ်ကောင်စီတပ်ဖွဲ့များမှ ကျူးလွန်ခဲ့သော လူ့အခွင့်အရေး ချိုးခေါက်မှုများအပါအဝင် မြန်မာနိုင်ငံအနှံ့အပြား၌ အကြမ်းဖက်စစ်ကောင်စီကပြုမူလျက် ရှိသော အကြမ်းဖက် မှုများအတွက် ပြင်းထန်စွာရှုတ်ချကြောင်းနှင့် စစ်ကောင်စီကြောင့်ဒုက္ခဆင်းရဲမှု မျိုးစုံကြုံတွေ့နေရသည့် တိုင်းရင်းသားပြည်သူများအား မိမိတို့အမျိုးသားညီညွတ်ရေးအစိုးရအဖွဲ့အနေဖြင့် ပြည်သူအတွက် ပြည်သူက ရပ်တည်ကြမည်ဟူသောဆောင်ပုဒ်နှင့်အညီ တတ်နိုင်သမျှ ကူညီထောက်ပံ့မှုများ ဆက်လက်ဆောင်ရွက်သွားမည်ဖြစ်ကြောင်း အသိပေးထုတ်ပြန်အပ်ပါသည်။ ၄။ ကုလသမဂ္ဂအဖွဲ့ကြီးနှင့် အာဆီယံတို့အပါအဝင် လူသားချင်းစာနာထောက်ထားမှုနှင့် လူသားဂုဏ်သိက္ခာကို အလေးအမြတ်ပြုတန်ဖိုးထားကြသည့် နိုင်ငံတကာအသိုင်းအဝိုင်းများအနေဖြင့်လည်း အာဏာသိမ်းစစ်ကောင်စီ၏ အကြမ်းဖက်မှုနှင့် စစ်ရာဇဝတ်မှုများကို မျက်ခြေမပြတ်စောင့်ကြည့်သိရှိပြီး၊ ကရင်နီပြည်နယ်၊ ချင်းပြည်နယ်၊ စစ်ကိုင်းတိုင်းနှင့် မကွေးတိုင်းတို့အပါအဝင် မြန်မာနိုင်ငံတဝှမ်းတွင် အကြမ်းဖက်စစ်ကောင်စီကြောင့် အရပ်သားပြည်သူများ ဒုက္ခမျိုးစုံရင်ဆိုင်ကြုံတွေ့ခံစားနေရမှုကို အမြန်ဆုံး ရပ်တန့်နိုင်ရေးအတွက် ထိရောက် သောအရေးယူဆောင်ရွက်မှုများအလျင်အမြန်ပြုလုပ်နိုင်ရန် အလေးအနက် ထပ်မံတိုက်တွန်းပန်ကြားပါသည်။

အမျိုးသားညီညွတ်ရေးအစိုးရအဖွဲ့အစည်းအဝေး (၁/၂၀၂၂) ကိုကျင်းပပြုလုပ်

အမျိုးသားညီညွတ်ရေးအစိုးရအဖွဲ့အစည်းအဝေး (၁/၂၀၂၂) ကိုကျင်းပပြုလုပ်

အမျိုးသားညီညွတ်ရေးအစိုးရအဖွဲ့အစည်းအဝေး (၁/၂၀၂၂) ကို ယနေ့ဇန်နဝါရီလ ၄ ရက်နံနက် ၁၀ နာရီမှာကျင်းပပြုလုပ်ခဲ့ပါတယ်။အစည်းအဝေးမှာ ယာယီသမ္မတကြီးက ဒီနှစ် လွတ်လပ်ရေးနေ့တွင် မြန်မာပြည်သူပြည်သားအားလုံး စိတ်အားညိုးငယ် နှလုံး မသက်မသာ ခံစားနေကြရကြောင်း။ တောင်တန်းပြည်မ အားလုံးရဲ့ စည်းလုံးညီညွတ်မှု၊ အသက်သွေးကြွေးမြောက်များစွာ ပေးဆပ်ပြီး ရခဲ့တဲ့လွတ်လပ်ရေးဟာ အာဏာမက်၊ ကိုယ်ကျိုးရှာ လူတစ်စုရဲ့ ရက်စက်တဲ့ အကြံကြောင့် ပျောက်ဆုံးခဲ့ရကြောင်း။ ယခုအချိန်မှာ အာဏာသိမ်း မင်းအောင်လှိုင်နဲ့ စစ်အုပ်စုတို့က တွေ့ဆုံဆွေးနွေးရေးကို ပြောကြားလာတာ တွေ့ရကြောင်း၊ ရိုင်းစိုင်းပြီး တိုင်းပြည်တစ်ခုလုံး ကုန်းကောက်စရာမရှိအောင် ဖျက်ဆီးနေတဲ့ အာဏာသိမ်း မင်းအောင်လှိုင်နဲ့ စစ်အုပ်စုကို တွေ့ဆုံဆွေးနွေးဖို့ရန် အင်မတန် ခက်ခဲမှာဖြစ်ပါကြောင်း၊ မင်းအောင်လှိုင်တို့ ကမ်းလှမ်းတဲ့ တွေ့ဆုံဆွေးနွေးရေး NCA လမ်းကြောင်းကို ပယ်ချဖို့ တိုင်းရင်းသားလက်နက်ကိုင်အဖွဲ့အစည်းအားလုံးကို ပန်ကြားလိုကြောင်း။ သွေးစွန်းသော စစ်ကောင်စီရဲ့ ဉာဏ်နီဉာဏ်နက်ကို မယုံကြဖို့ တိုက်တွန်းလိုပါကြောင်း။ ကုလသမဂ္ဂနဲ့ ကမ္ဘာ့နိုင်ငံအသီးသီးကလည်း မြန်မာနိုင်ငံရဲ့ ပကတိအခြေအနေကို လေ့လာပြီး လူသားချင်းစာနာထောက်ထားတဲ့အနေနဲ့ မြန်မာနိုင်ငံကို ကူညီပံ့ပိုးပေးကြပါရန် တိုက်တွန်း တောင်းဆိုကြောင်း။ ပြည်သူလူထုရဲ့ လိုအင်ဆန္ဒကို ဖော်ဆောင်နိုင်ပေးနိုင်တဲ့ အမျိုးသားညီညွတ်ရေးအစိုးရကို အသိအမှတ်ပြုပြီး၊ မင်းအောင်လှိုင်နဲ့စစ်ကောင်စီကို အသိအမှတ်မပြုပဲ ဝိုင်းဝန်းဖယ်ကြဉ်ကြဖို့ ပြောကြားလိုကြောင်း စသဖြင့် ပြောကြားခဲ့ပါတယ်။ ပြည်ထောင်စုဝန်ကြီးချုပ်က  မြန်မာပြည်သူတွေအတွက် သိပ်ကိုကြမ်းတမ်းဆိုးဝါးလွန်းခဲ့တဲ့ ၂၀၂၁ခုနှစ်ကတော့ ကုန်လွန်သွားပြီဖြစ်ကြောင်း၊ ၂၀၂၂ခုနှစ်ဟာ မြန်မာပြည်သူတွေအတွက် အောင်ပွဲတွေ ဆက်တိုက်ဆောင်ကျဉ်းပေး နိုင်မယ့် မဂ်လာနှစ်သစ်တခုဖြစ်လာမှာ သေချာကြောင်း။ ကာကွယ်ရေးဝန်ကြီးပြောထားသလိုမျိုး ကျနော်တို့အတွက် အဓိကလိုအပ်ချက် (၄)ခုဖြစ်တဲ့ ရံပုံငွေ၊ လက်နက်၊ မဟာမိတ်စုဖွဲ့မှုနဲ့ ပူးပေါင်းဆောင်ရွက်မှု၊ ဗျူဟာပိုင်းစတဲ့ ကဏ္ဍ(၄)ခုလုံးကို ပိုမိုဖြည့်ဆည်းလာနိုင်ပြီဖြစ်တဲ့အတွက် ကျနော်တို့ပြည်သူတွေအတွက် အောင်ပွဲဟာ မဝေးတော့ဘူးလို့ ပြောကြားလိုကြောင်း။ ကြားကာလ ဒေသန္တရပြည်သူ့အုပ်ချုပ်ရေးဆိုင်ရာ ကိစ္စရပ်တွေမှာလည်း ကော်မတီအနေနဲ့ သတ်မှတ်ထားတဲ့ နေရာဒေသတွေမှာ နယ်မြေစိုးမိုးရေးကိစ္စတွေနဲ့  အုပ်ချုပ်ရေးယန္တရားလည်ပတ်မှု ရရှိနိုင်မှုတွေ စီစဉ်ဆောင်ရွက်နေမှုတွေဟာလဲ အဆင်ပြေပြေအောင်မြင်သွားမယ်လို့ ယုံကြည်ကြောင်း။ အမျိုးသားညီညွတ်ရေးအစိုးရနဲ့ အတူ ပူးပေါင်းဆောင်ရွက်နေတဲ့ မဟာမိတ် EAOတွေကလည်း အားတက်သရောပိုမိုပူးပေါင်းကူညီလာကြတဲ့အတွက် ကျနော်တို့ တော်လှန်ရေးအောင်မြင်မှုအတွက် အားရစရာတခု ဖြစ်ကြောင်း။ ပြည်နယ်ဆိုင်ရာ အုပ်ချုပ်ရေးကိစ္စတွေ အတွက်လည်း သက်ဆိုင်ရာ ပြည်နယ်အတိုင်ပင်ခံကောင်စီတွေနဲ့ တွေ့ဆုံပြီး ညှိနှိုင်းဆွေးနွေးမှုတွေ ပြုလုပ်တဲ့အခါ ပိုမိုနားလည်မှုတွေရရှိလာပြီး ပူးပေါင်းဆောင်ရွက်ရမယ့်ကဏ္ဍတွေ၊ အမျိုးသားညီညွတ်ရေးအစိုးရအနေနဲ့ ကူညီပံ့ပိုး ပေးရမယ့် ကဏ္ဍတွေ စသဖြင့်သိရှိလာရပြီး အနာဂတ်ဖက်ဒရယ် ဒီမိုကရေစီတည်ဆောက်မှုအတွက် အထောက်အကူပြု နိုင်အောင် ဆက်လက်တိုင်ပင်ဆောင်ရွက် သွားကြဖို့ရှိပါကြောင်း။ ဒီတပတ်အတွင်း ကြားကာလဒေသန္တရ အုပ်ချုပ်ရေးကဏ္ဍအတွက် အင်မတန်အရေးကြီးတဲ့ တရားစီရင်ရေးမဏ္ဍိုင်ဆိုင်ရာ အစည်းအဝေးတခုကိုလည်း ပြုလုပ်နိုင်ခဲ့ပါကြောင်း။ ဥပဒေပြုရေးမဏ္ဍိုင်ဖြစ်တဲ့ CRPH ကိုလည်းဖိတ်ကြားပြီး အတူတကွဆွေးနွေးခဲ့ကြပါကြောင်း၊ အခုနှစ်ဆန်းပိုင်းကစပြီးတော့ NUG အနေနဲ့အစိုးရ တစ်ရပ်ရဲ့လုပ်ငန်းဆောင်တာ တွေကို စနစ်တကျ ပီပီပြင်ပြင် လုပ်ကိုင်နိုင်အောင် စီမံသွားတော့မှာဖြစ်တဲ့အတွက် တရားရေး မဏ္ဍိုင်ထားရှိရေးကိစ္စ ဟာလည်း အင်မတန်အရေးကြီးတဲ့ ကိစ္စတခုဖြစ်ပါကြောင်း၊ ဒီနှစ်အတွင်းမှာကျနော်တို့အနေနဲ့ စစ်ရေး၊ လုံခြုံရေး၊ ကာကွယ်ရေးနှင့် အုပ်ချုပ်ရေးဆိုင်ရာ မဟာဗျူဟာတွေကိုအားစိုက်ရမှာဖြစ်သလို နိုင်ငံတကာဘက်ကိုလည်း မျက်ခြေပြတ် လို့မဖြစ်ပါကြောင်း၊ နိုင်ငံ တကာရဲ့ပြောင်းလဲလာတဲ့ အခြေအနေတွေကို အမြဲမပြတ်သုံးသပ်ပြီး ဆက်စပ်ဝန်ကြီးဌာန တွေကစီမံဆောင်ရွက်ပေးကြဖို့ တိုက်တွန်းလိုပါကြောင်း၊  NUG အနေနဲ့အာဆီယံနိုင်ငံများနှင့် နိုင်ငံရေး၊ စီးပွားရေး၊ လူသားချင်းစာနာမှု၊ လူ့အခွင့်အရေး စတာတွေမှာပူးပေါင်းဆောင်ရွက်သွားဖို့ စိတ်အားထက်သန်ပါကြောင်းနှင့် အာဆီယံနိုင်ငံတွေအနေနဲ့ ကျနော်တို့ မြန်မာနိုင်ငံ ကြုံတွေ့နေရတဲ့ ဆိုးရွားတဲ့စစ်အာဏာရှင်စနစ် အမြန်ဆုံးချုပ်ငြိမ်းနိုင်ဖို့ ဝိုင်းဝန်းပူးပေါင်းဆောင်ရွက် သွားကြမယ်လို့လည်း ယုံကြည်မျှော်လင့်ပါကြောင်းစတာတွေကိုပြောကြားခဲ့ပါတယ်။ ဆက်လက်ပြီး သက်ဆိုင်ရာဝန်ကြီး ဌာနတွေက လေးကေကော်ဒေသက  စစ်ဘေးရှောင်တွေနဲ့ ပတ်သက်ပြီ ဝိုင်းဝန်းဆွေးနွေးကြကာ အစည်းအဝေးကို နံနက် ၁၁:၁၅မိနစ်မှာ ရုပ်သိမ်းခဲ့ပါတယ်။

အမျိုးသားညီညွတ်ရေးအစိုးရ ယာယီသမ္မတ  ဒူဝါလရှီးလက ပြောကြားသော  ၇၄ နှစ်မြောက် လွတ်လပ်ရေးနေ့ မိန့်ခွန်း

အမျိုးသားညီညွတ်ရေးအစိုးရ ယာယီသမ္မတ ဒူဝါလရှီးလက ပြောကြားသော ၇၄ နှစ်မြောက် လွတ်လပ်ရေးနေ့ မိန့်ခွန်း

Respected citizens and people of Myanmar,   I am greatly honored to deliver a speech to you all, the citizens, ethnic nationalities, and the people, on this occasion of the 74th anniversary of Independence Day of the Union of Myanmar.   Although it has been 70 years since we were free from colonial rule, it is sad that we are still under the slavery of military dictatorships and harshly suffering their violence and suppression.   Although the state could retain its sovereignty, the freedom of the people, the owner of that sovereignty, has been lost under consecutive coups and we are still struggling for it.   The visions and values of the architects of Independence have truly been reflected in the Independence declaration.   Article 5 of the declaration clearly states, "The New Republic of Burma is also established upon the principle of Burmese unity, not by blood, tribe, or faith, but by a unity that speaks with one voice, representing many."   However, the Myanmar military has outrightly violated the principles and values of the Independence Declaration, and they hold the country as their hostage as if it is their own and are taking advantage of it; thereby, enslaving the country. As long as the owners of the sovereignty of the country lose their rights, we cannot say the country has achieved its independence. In the last 60 years, the military has staged a coup four times and has revealed their true colors of fascism. The attempted coup on February 1, 2021, was the ugliest incident in history. All Myanmar people and the international community have seen that the military is using several inhumane ways to repress, torture, kill and commit crimes against the people. This terrorist military no longer deserves to be called the Army as they degraded themselves into the enemy of the people and terrorists. For now, the people have only one choice. That is to launch a defensive war, a war that all people can take part in different ways, against the military to completely remove the military dictatorship. We can call it a struggle for the second independence. On last new year's days, I saw a piece of news in which the terrorist military leader said, "This year, we are going start a new step of the peace process and we invite all stakeholders to dialogue for peace." An attempted coup has trampled hopes of peace. They have destroyed peace and the future of the country. The reason they are releasing such news while they are facing defeats in all areas - in politics, military, and defeats - is no other reason except than to find their political exit, to dither, to deceive the international community, and to confuse the resistance forces. They are also deceiving people by saying that they are going to host an election in 2023. The election held by the military group will not reflect the will of the people, but it also will not be a free and fair election. Trusting this deceitful military will result in dithering the people's revolution processes. In fact, the war criminals who are stained with the people's blood should not be sent to political dialogues. They should be sent to domestic and international criminal courts. The National Unity Government will always welcome the military personnel who detests the military's atrocities, who believe that their responsibility is to protect the country, not to be involved in politics, even though you may still be under the terrorist leadership at the moment. In the National Unity Consultative Council, a platform where all the political forces who want genuine federal and democracy gather together, we have confirmed the Federal Democratic Charter that includes a political road map for the future of the Union of Myanmar. The National Unity Government will follow this charter and continually move forward and implement it as in the road map. The most important thing at the moment is, based on the objectives of ending the military dictatorship and building a federal democratic union, all political forces including the EAOs, should build unity and get involved in people's revolution. The revolution that has sacrificed many lives in the last 11 months will see a new change in 2022 and, have no doubt, we will achieve the people'svictory. As in the Declaration of the Independence which states, "The Burmese people, have here made a solemn declaration of Burmese Independence and of the principles upon which the New Republic of Burma is founded and will be governed", I would like to urge you to let us tenaciously work together until we free ourselves from military slavery and bring back freedom, equality, and justice for the people who are the original owner of the sovereignty.   Our cause shall triumph!January 4, 2022

(၂၇၁၃) နှစ်မြောက် တအာင်းနှစ်သစ်ကူးနေ့သို့ပေးပို့သည့်နှုတ်ခွန်းဆက်သဝဏ်လွှာ

(၂၇၁၃) နှစ်မြောက် တအာင်းနှစ်သစ်ကူးနေ့သို့ပေးပို့သည့်နှုတ်ခွန်းဆက်သဝဏ်လွှာ

ပြည်ထောင်စုသမ္မတမြန်မာနိုင်ငံတော်အမျိုးသားညီညွတ်ရေးအစိုးရhttps://nugmyanmar.org(၂၇၁၃) နှစ်မြောက် တအာင်းနှစ်သစ်ကူးနေ့သို့ပေးပို့သည့်နှုတ်ခွန်းဆက်သဝဏ်လွှာ၂၀၂၁ ခုနှစ် ဒီဇင်ဘာလ (၂၄) ရက်၁။ ယနေ့သည် ပြည်ထောင်စုဖွား တအာင်းလူမျိုးတို့၏ (၂၇၁၃) နှစ်မြောက်နှစ်သစ်ကူးနေ့ဖြစ်သည်။ ဤ မင်္ဂလာရှိသောနှစ်သစ်ကူးနေ့ရက်အချိန်အခါသမယတွင် ပြည်ထောင်စုမြန်မာနိုင်ငံတဝှမ်းတွင်သာမက ကမ္ဘာ့ နိုင်ငံအသီးသီးတွင်ရောက်ရှိနေထိုင်နေကြသည့် တအာင်းအမျိုးသမီး၊ အမျိုးသားများအားလုံး ကိုယ်စိတ်နှစ်ဖြာ ကျန်းမာချမ်းသာကြပါစေကြောင်း မေတ္တာပို့သလျက်နှုတ်ခွန်းဆက်သအပ်ပါသည်။၂။ တအာင်းလူမျိုးတို့သည် ပြည်ထောင်စုမြန်မာနိုင်ငံအတွင်းရှိ အခြားသောလူနည်းစုတိုင်းရင်းသားလူမျိုးများ ကဲ့သို့ပင် လူမျိုး မတူကွဲပြားမှုကိုအကြောင်းပြု၍ နိုင်ငံရေး၊ စီးပွားရေး၊ လူမှုရေးအဘက်ဘက်တွင် မျိုးစုံသော ခွဲခြားဘေးဖယ် ခံရမှုများကြောင့် ပြည်ထောင်စုအတွင်း ကိုယ်ပိုင်ပြဌာန်းခွင့်ရရှိရေး၊ အမျိုးသားတန်းတူရေးနှင့် ကိုယ့်ကြမ္မာကိုယ် ဖန်တီးခွင့်ရရှိရေးအတွက် စည်းလုံးညီညွတ်စွာတိုက်ပွဲဝင်နေကြသည်ကို တွေ့ရှိရပါသည်။၃။ ယခုအချိန်သည် တပ်မတော်က နိုင်ငံတော်အာဏာကိုသိမ်းယူလိုက်ပြီး အာဏာသိမ်းယူမှုကိုလက်မခံ ငြင်းဆန်ကြသည့် နိုင်ငံသူနိုင်ငံသားများအပေါ် တရားမဲ့ပြုမှုဆောင်ရွက်ချက်များကြောင့် တအာင်းလူမျိုးများ အပါအဝင် မြန်မာနိုင်ငံသူနိုင်ငံသားအပေါင်း လုံခြုံငြိမ်းချမ်းမှု၊ ဒီမိုကရေစီနှင့်လူ့အခွင့်အရေး၊ လွတ်လပ်မှုနှင့် တရားမျှတမှုတို့ ပျောက်ဆုံးကင်းမဲ့ခဲ့ရကာ စစ်ကောင်စီ၏လူမဆန်သောရက်စက်ကြမ်းကြုတ်မှု များကြောင့် တိုင်းရင်းသားများအားလုံးစိတ်ဆင်းရဲ၊ ကိုယ်ဆင်းရဲညိုးငယ်စွာနေထိုင်နေကြရသည့် အချိန်ကာလ ဖြစ်သည်။ ၄။ ဤတအာင်းနှစ်သစ်ကူးနေ့ရက်တွင် တအာင်းလူမျိုးများအပါအဝင် မြန်မာနိုင်ငံသူနိုင်ငံသားများ လက်လွတ် ပျောက်ဆုံးခဲ့ရသောလုံခြုံငြိမ်းချမ်းမှု၊ ဖက်ဒရယ်ဒီမိုကရေစီနှင့် လူ့အခွင့်အရေးဆိုင်ရာမျှော်မှန်းချက်များ ဖြစ် ထွန်းရှင်သန်လာနိုင်ပါစေကြောင်းနှင့် စစ်အာဏာရှင်ချုပ်ငြိမ်းရေး၊ ပြည်သူ့လွတ်မြောက်ရေးအတွက် ခုခံတွန်း လှန်စစ်ဆင်နွဲနေကြသည့် တအာင်းဒေသအပါအဝင် နိုင်ငံတဝှမ်းမှ ပြည်သူများအားလုံး တစ်ခဲနက် အောင်မြင်မှု များရရှိနိုင်ပါစေကြောင်း ဆုမွန်ကောင်းတောင်းရင်း ဤဂုဏ်ပြုနုတ်ခွန်းဆက်သဝဏ်လွှာကို ပေးပို့အပ်ပါသည်။အမျိုးသား ညီညွတ်ရေးအစိုးရ