ပြည်ထောင်စုသမ္မတမြန်မာနိုင်ငံတော်အမျိုးသားညီညွတ်ရေးအစိုးရနိုင်ငံခြားရေးဝန်ကြီးဌာန⇝⇝⇝⇝✥⇜⇜⇜⇜အီးယူ-အာဆီယံထိပ်သီးအစည်းအဝေး ခေါင်းဆောင်များ၏ ပူးတွဲကြေညာချက်အပေါ် ထုတ်ပြန်ကြေညာချက်ကြေညာချက်အမှတ် (၁၉/၂၀၂၂)ရက်စွဲ။ ၂၀၂၂ ခုနှစ်၊ နိုဝင်ဘာလ ၁၉ ရက်⇝⇝⇝⇝✥⇜⇜⇜⇜ပြည်ထောင်စုသမ္မတမြန်မာနိုင်ငံတော်၊ အမျိုးသားညီညွတ်ရေးအစိုးရသည် ၂၀၂၂ ခုနှစ်၊ ဒီဇင်ဘာလ ၁၄ ရက်နေ့တွင် မြန်မာနိုင်ငံနှင့်ပတ်သက်၍ အတည်ပြုချမှတ်ခဲ့သော အီးယူ-အာဆီယံ ထိပ်သီး အစည်းအဝေး ခေါင်းဆောင်များ၏ ပူးတွဲကြေညာချက်အပေါ် ကြိုဆိုပါသည်။အဆိုပါ ပူးတွဲကြေညာချက်တွင် မြန်မာနိုင်ငံအတွင်း အကြမ်းဖက်မှုများ ချက်ချင်းရပ်တန့်ရန်၊ နိုင်ငံရေး အကျဉ်းသားများအားလုံးကို လွှတ်ပေးရန်နှင့် လိုအပ်လျက်ရှိသည့် လူသားချင်း စာနာမှု အကူအညီများအား ခွဲခြားဆက်ဆံမှုမရှိဘဲ ထိရောက်စွာပေးအပ်နိုင်ရေးတို့အတွက် တောင်းဆို ထားကြောင်း တွေ့ရှိရသည်။ အီးယူနှင့် အာဆီယံခေါင်းဆောင်များအနေဖြင့် ယခုနှစ် ဇူလိုင်လ အတွင်းက ဒီမိုကရေစီရေးတက်ကြွလှုပ်ရှားသူလေးဦးအား အကြမ်းဖက်စစ်အုပ်စုမှ မတရား ကွပ်မျက်ခဲ့ခြင်းအား ရှုတ်ချခဲ့ပြီး၊ အာဆီယံဥက္ကဋ္ဌ၏ အထူးသံတမန်အား “သက်ဆိုင်သည့် အဖွဲ့ အားလုံးနှင့် အပြည့်အဝ ထိတွေ့ဆက်ဆံ၍ ယုံကြည်မှု” တည်ဆောက်ရန် တောင်းဆိုခဲ့ပါသည်။ ယခုကဲ့သို့ တောင်းဆိုမှုများအား ကြိုဆိုသော်လည်း ယင်းတောင်းဆိုမှုများသည် အသစ်အဆန်း မဟုတ်သကဲ့သို့ အရေးပါသည့် အချက်အလက်များလည်း မပါဝင်ဘဲ ကျန်ရှိနေသည်ကို တွေ့ရှိ ရသည်။ပူးတွဲကြေညာချက်တွင် အမျိုးသားညီညွတ်ရေးအစိုးရအား မြန်မာပြည်သူများ၏ တရားဝင် ကိုယ်စားလှယ်အဖြစ် ထောက်ခံကြောင်း ဖော်ပြထားခြင်း မရှိသည့်အပြင် တရားမဝင် အကြမ်းဖက် စစ်အာဏာရှင်များ၏ ကြမ်းကြုတ်ယုတ်မာရက်စက်မှုများကို ရှုတ်ချကြောင်း ဖော်ပြရန်လည်း ပျက်ကွက်ခဲ့သည်။ သို့သော်လည်း အဆိုပါ ပူးတွဲထုတ်ပြန်ချက်သည် မြန်မာနိုင်ငံအတွင်း လူ့အခွင့်အရေးနှင့် အခြေခံလွတ်လပ်ခွင့်များ အခိုင်အမာဆက်လက်တည်ရှိရေးကို ထင်ဟပ်သည့် ငြိမ်းချမ်းသော ဖြေရှင်းချက်ဆီသို့ ဦးတည်စေရန် 'နှစ်ဆတိုး' စုပေါင်းကြိုးပမ်းမှုများ ဖော်ဆောင်သွားမည့် အီးယူ-အာဆီယံ ကတိကဝတ်အား ဖော်ညွှန်းထားသည်ကို ထင်ရှားစွာ တွေ့မြင်ရသည်။လူ့အခွင့်အရေးနှင့် အခြေခံလွတ်လပ်ခွင့်များအတွက် ကတိကဝတ်ပြုထားသည့် အီးယူ-အာဆီယံ ကတိကဝတ်ပြုမှုသည်  ၂၀၂၀ ပြည့်နှစ် အထွေထွေရွေးကောက်ပွဲရလဒ်ကိုသာ အတည်ပြု လက်ကိုင် ထား၍ အကြမ်းဖက်စစ်အုပ်စု၏ အတုအယောင် ရွေးကောက်ပွဲကျင်းပရန် ကြိုးပမ်းမှု အားလုံးကို တားဆီးပိတ်ပင်ခြင်းဖြင့် မြန်မာပြည်သူများ၏ ဒီမိုကရေစီဆန္ဒအား လေးစားမှုကို ပြသရမည် ဖြစ်သည်။ ဖယ်ဒရယ်ဒီမိုကရေစီ ပဋိညာဉ်စာတမ်းကို ထောက်ခံရမည်ဖြစ်ပြီး အကြမ်းဖက် စစ်အုပ်စု၏ ဥပဒေမဲ့ အရေးပေါ်အခြေအနေ ကြေညာခြင်းတို့အား ပယ်ချရမည် ဖြစ်သည်။ လေယာဉ်ဆီ ရောင်းချနေသူများအပေါ် ဒဏ်ခတ်ပိတ်ဆို့မှုများချမှတ်ခြင်း အပါအဝင် အကြမ်းဖက် အပြစ်မဲ့အရပ်သားများအပေါ် နောက်ထပ် ရက်စက်ကြမ်းကြုတ်မှုများ ပြုလုပ် လာနိုင်မည့် စစ်အုပ်စု၏ လုပ်ဆောင်နိုင်စွမ်းအား ဖြိုဖျက်နိုင်ရန်အတွက် ထိရောက်သည့် ဆောင်ရွက်မှုကို တောင်းဆိုရမည်ဖြစ်သည်။ ထို့ပြင် အကြမ်းဖက်စစ်အုပ်စုအနေဖြင့် နိုင်ငံရေး အကျဉ်းသားများအား ထပ်မံကွပ်မျက်ခြင်းမပြုနိုင်အောင် ပြင်းထန်သည့် ဖိအားများပေးရန် လိုအပ်သည်။ဒေသတွင်း ငြိမ်းချမ်းရေးနှင့်လုံခြုံရေးကို မတည်မငြိမ်ဖြစ်စေလျက်ရှိသည့် အကြမ်းဖက်စစ်အုပ်စု ကြောင့် ဖြစ်ပေါ်နေသော ဘက်ပေါင်းစုံ အကျပ်အတည်းများအား ကူညီဖြေရှင်းပေးရန် အီးယူနှင့် အာဆီယံတို့မှ ဆောင်ရွက်မည့် နှစ်ဆတိုး ကြိုးပမ်းအားထုတ်မှုများအား အမျိုးသားညီညွတ်ရေး အစိုးရအနေဖြင့် အတူတကွ ပူးပေါင်းဆောင်ရွက်ရန် အသင့်ရှိနေပါသည်။နိဂုံးချုပ်အနေဖြင့် အမျိုးသားညီညွတ်ရေးအစိုးရသည် အီးယူကဲ့သို့သော ပြင်ပမိတ်ဖက်များထံမှ ပံ့ပိုးကူညီမှုကို ထပ်လောင်းတောင်းဆိုသည့် အာဆီယံ၏ တောင်းဆိုချက်အား အသိအမှတ်ပြု ပါသည်။ အပြန်အလှန်အားဖြင့် အာဆီယံသည် ကုလသမဂ္ဂလုံခြုံရေးကောင်စီ၏ မြန်မာနိုင်ငံ အပေါ် အရေးယူဆောင်ရွက်မှုနှင့် နိုင်ငံတကာ၏ တာဝန်ခံမှုဆိုင်ရာ ကြိုးပမ်းဆောင်ရွက်နေမှုများ အပေါ် ၎င်းတို့၏ ထောက်ခံမှုကို လူသိရှင်ကြား ထုတ်ဖော်ပြသသင့်ပါသည်။နိုင်ငံခြားရေးဝန်ကြီးဌာနအမျိုးသားညီညွတ်ရေးအစိုးရ

December 16, 2022The National Unity Government (NUG) and the pro-democracy forces of Myanmar applaud passage today by the US Congress of the Burma Act as part of the James M. Inhofe National Defense Authorization Act for Fiscal Year 2023 (2023 NDAA). We look forward to President Biden soon signing it into law.This important law clearly sets out United States policy to support the people of Myanmar as well as the NUG, NUCC, CRPH, CDM and our allied organizations in our struggle against the junta for democracy, human rights, and justice. It also expands authorization for economic sanctions on the military junta, its cronies, and the energy sector and related businesses. The law authorizes greater humanitarian assistance for the people of Myanmar; technical support and non-lethal assistance to Ethnic Armed Organizations (EAOs) and People’s Defence Forces (PDFs); and to support programs for former members of the military. It also authorizes support for the establishment and operation of transitional justice mechanisms. The legislation will promote steps to increase pressure on the military, including at the UN.The Burma Act will provide much needed hope and support to the struggling people of our country. We also thank the Burmese diaspora and people of good conscience across the U.S. who worked tirelessly in support of this achievement. It is only through working together with our brothers and sisters around the world that we will bring democracy back to our people. With the passage of the Burma Act, support for our democracy movement grows ever stronger. I again deeply thank the US Congress and all those who worked to get the Burma Act approved.

၂၀၂၂ ခုနှစ်၊ ဒီဇင်ဘာလ ၁၃ ရက်နေ့စစ်အစိုးရရဲ့ အာဏာသိမ်းမှုဟာ ဘယ်တုန်းကမှ မအောင်မြင်ခဲ့ဘူး။ စစ်အာဏာရှင်တွေကို ပြည်တွင်းမှာရော နိုင်ငံတကာမှာပါ အသိအမှတ်မပြုခဲ့ဘူး။ တချိန်တည်းမှာပဲ အာဏာသိမ်းဖို့ ကြိုးပမ်းမှုကစပြီး စစ်အာဏာရှင် တို့ရဲ့ စုစည်းချုပ်ကိုင်မှုမလုပ်နိုင်ဖို့ ပြည်သူတွေက တားဆီးခဲ့တယ်။ စစ်အစိုးရဟာ တိုင်းပြည်ကို ချုပ်ကိုင်ထား နိုင်ခြင်း မရှိတဲ့အပြင် နေရာတိုင်းမှာလည်း အရပ်သားအတိုက်အခံတွေနဲ့ ရင်ဆိုင်နေရပါတယ်။ အရပ်သားတွေရဲ့ ပံ့ပိုးမှုနဲ့အတူ ကျနော်တို့ တိုက်ပွဲမှာ အနိုင်ရပြီး နိုင်ငံတဝက်ကျော်ကို အခု ထိန်းချုပ်နိုင်နေပြီ ဖြစ်ပါတယ်။ ဒါပေမယ့် ယူကရိန်းလိုမျိုး နိုင်ငံတကာ အသိုက်အဝန်းဆီက ရရှိတဲ့ ထောက်ပံ့မှုကိုရရင် ပြည်သူတွေ ကြုံနေရတဲ့ သတ်ဖြတ်မှုနဲ့ ဒုက္ခတွေပိုမိုမြန်ဆန်ချုပ်ငြိမ်းသွားမှာ ဖြစ်ပါတယ်။အရပ်သားတွေအပေါ် အကြမ်းဖက်မှုအစိုးရအုပ်ချုပ်ရေးကောင်စီ(SAC)ကနေ ကျူးလွန်တဲ့ အကြီးအကျယ် လူ့အခွင့်အရေးချိုးဖောက်မှုတွေကို ကျွန်ုပ်တို့တွေ့မြင်နေရပါတယ်။ အခု ကျွန်တော်တို့နိုင်ငံမှာ အိုးမဲ့အိမ်မဲ့ အရပ်သား ၁.၄ သန်းရှိနေပြီဖြစ်ပါတယ်။ အရပ်သားနေအိမ်တွေကို မီးရှို့ပြီး ပြည်သူတွေအပေါ် ရက်စက်ကြမ်းကြုတ်မှုတွေ လုပ်နေကြတယ်။ ဒီအတွက်ကြောင့် ကျနော်တို့ တိုင်းရင်းသား လက်နက်ကိုင် အဖွဲ့အစည်းတွေနဲ့ ပြည်သူတွေလက်တွဲပြီး ဒီစစ်အာဏာရှင်တွေကို ဖြုတ်ချဖို့ အစွမ်းကုန် လုပ်ဆောင်နေပါတယ်။ ကြောက်စရာကောင်းတဲ့ ရာဇ၀တ်မှုကျူးလွန်သူတွေကို ပြစ်ဒဏ်ပေးရပါမယ်။ ကမ္ဘောဒီးယား ဝန်ကြီးချုပ် (ဟွန်ဆန်) အပါအဝင် အာဆီယံခေါင်းဆောင်တွေဟာ ဘုံသဘောတူညီချက် (၅)ချက်ကို မြန်မာနိုင်ငံအတွက် ပိုမိုကောင်းမွန်တဲ့ ရလဒ်ကောင်းတွေရရှိနိုင်ဖို့ စေတနာကောင်းနဲ့ ကျိုးကြောင်းဆီလျော်စွာ လုပ်ဆောင်ခဲ့ကြပါတယ်။ ကံမကောင်းစွာပဲ၊ သဘောတူညီချက်ကို လက်မှတ် ရေးထိုးထားတဲ့ မင်းအောင်လှိုင်အဖွဲ့က လုံးဝအကောင်အထည်မဖော်ခဲ့ပါဘူး။ အဓိကအချက်မှာ NUG နဲ့ အာဆီယံရဲ့ တိုက်ရိုက်ထိတွေ့ဆက်ဆံပြီး ဤအချက်ငါးချက် ဘုံသဘောတူညီမှုကို တိုးချဲ့ဖို့လိုအပ်ပါတယ်။ ပိုမိုကောင်းမွန်တဲ့ရလဒ်ကိုဖန်တီးဖို့အတွက် ASEAN လုပ်ငန်းစဉ်အဆင့်တိုင်းမှာ SAC ကိုယ်စားလှယ်တွေကို ကိုယ်စားပြုခွင့်မပြုသင့်ပါဘူး။အကျဉ်းသား ၅,၇၇၄ ဦးကို လွှတ်ပေးခဲ့ပေမယ့် ၎င်းတို့အနက် ၄၀၀ ခန့်မှာ နိုင်ငံရေး အကျဉ်းသားတွေ ဖြစ်ကြပါတယ်။ သမ္မတဦးဝင်းမြင့်၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ အခြား ထောင်ပေါင်းများစွာသော နိုင်ငံရေးအကျဉ်းသားတွေဟာ ဆက်လက်ထိန်းသိမ်းထားခံရဆဲဖြစ်ပါတယ်။

ပြည်ထောင်စုသမ္မတမြန်မာနိုင်ငံတော်အမျိုးသားညီညွတ်ရေးအစိုးရပြည်ထောင်စုဝန်ကြီးချုပ်ရုံးအမိန့်ကြော်ငြာစာအမှတ် (၁၃ / ၂၀၂၂)၁၃၈၄ ခုနှစ်၊ နတ်တော် လပြည့်ကျော်  ၇  ရက်နေ့(၂၀၂၂ ခုနှစ် ၊  ဒီဇင်ဘာလ ၁၄ ရက်)အမျိုးသားညီညွတ်ရေးအစိုးရ၏ ပြောရေးဆိုခွင့်ရှိသူများအား ခန့်အပ်တာဝန်ပေးခြင်း၁။ အမျိုးသားညီညွတ်ရေးအစိုးရ၏ ပြောရေးဆိုခွင့်ရှိသူများအဖြစ် ယခင် ခန့်အပ်တာဝန်ပေးထားသော ပြည်ထောင်စုဝန်ကြီးများသည် ဝန်ကြီးဌာနဆိုင်ရာ လုပ်ငန်းတာဝန်များ များပြားသောကြောင့်   အောက်ဖော်ပြပါ ပုဂ္ဂိုလ် (၂) ဦးကို ပြောင်းလဲခန့်အပ်တာဝန်ပေးလိုက်သည် -  (က) ဦးကျော်ဇော် (နိုင်ငံတော်သမ္မတရုံး) (ခ)  ဦးနေဘုန်းလတ် (ဝန်ကြီးချုပ်ရုံး)၂။  (က) အမျိုးသားညီညွတ်ရေးအစိုးရ ဝန်ကြီးဌာနအသီးသီး၏ ပြည်ထောင်စုဝန်ကြီးများ၊ ဒုတိယဝန်ကြီးများသည် ၎င်းတို့၏ဝန်ကြီးဌာနများနှင့် သက်ဆိုင်သော အကြောင်း အရာများအတွက် ပြောရေးဆိုခွင့်ရှိသူများအဖြစ် တည်ရှိပြီးဖြစ်သည်။ (ခ) သမ္မတရုံး ပြောရေးဆိုခွင့်ရှိသူသည် ယာယီသမ္မတ၏ ဆောင်ရွက်ချက်များ၊ အစိုးရ၏မူဝါဒများနှင့် သမ္မတရုံးနှင့် သက်ဆိုင်သည့် သတင်းအချက်အလက်များကို ဦးစားပေး ထုတ်ဖော် ပြောကြားရမည်ဖြစ်သည်။ (ဂ)   ဝန်ကြီးချုပ်ရုံး ပြောရေးဆိုခွင့်ရှိသူသည် ဝန်ကြီးချုပ် အပါအဝင် အစိုးရအဖွဲ့အတွင်း ဆောင်ရွက်ချက်များ၊ အစိုးရ၏မူဝါဒများနှင့် သက်ဆိုင်သည့် သတင်းအချက်အလက်များကို ဦးစားပေး ထုတ်ဖော် ပြောကြားရမည်ဖြစ်သည်။ပြည်ထောင်စုဝန်ကြီးချုပ်ရုံးအမျိုးသားညီညွတ်ရေးအစိုးရ

၂၀၂၂ ခုနှစ်၊ ဒီဇင်ဘာလ (၁၃) ရက်  တော်လှန်ရေးကာလမှာ တာဝန်ထမ်းဆောင်ကြရတဲ့ တော်လှန်ရေးအစိုးရအဖွဲ့ဝင်တွေဖြစ်တာ ကြောင့် သမ္မတကြီးနဲ့ကျွန်တော်အပါအဝင် ဝန်ကြီး၊ ဒုဝန်ကြီးတွေ၊ အတွင်းဝန်တွေ တာဝန်ထမ်း ဆောင်ကြတဲ့အခါ ပုံမှန်ကာလတွေလိုဘဏ္ဍာငွေအင်အားနဲ့ လူ့စွမ်းအားအရင်းအမြစ်တွေ လုံလောက် မှုမရှိတာကြောင့် စိတ်ရောလူရောပိုပင်ပန်းကြမှာအမှန်ပါပဲ။ စီမံခန့်ခွဲမှုအခက်အခဲတွေကြားကပဲ ကျား ကုတ်ကျားခဲကြိုးစားရင်း တော်လှန်ရေးအတွက်ပိုမိုကောင်းမွန်တဲ့ အခြေအနေတွေကို တက်လှမ်းလာ နိုင်တာလည်း ရှိပါတယ်။  ကောင်းမွန်တဲ့ရလဒ်တွေရှိသလို ကျွန်တော်တို့မကြားချင်တဲ့သတင်းတွေဖြစ်တဲ့ ရွာမီးရှို့ခံရတဲ့သ တင်းတွေ၊ စစ်ရှောင်ပြည်သူတွေရဲ့အခက်အခဲတွေ၊ ဖမ်းဆီးခံနေရတဲ့ ပြည်သူတွေ၊ တော်လှန်ရေး မှာအသက်ပေးသွားရတဲ့ PDF ရဲဘော်တွေ စတဲ့သတင်းတွေကိုကြားသိရတာ အင်မတန်စိတ်မကောင်း ဖြစ်ရပါတယ်။ ပြီးခဲ့တဲ့စနေနေ့ ဒီဇင်ဘာလ ၁၀ ရက်နေ့ဟာ (၇၄) ကြိမ်မြောက်  အပြည်ပြည်ဆိုင်ရာ လူ့အခွင့်အရေးနေ့ဖြစ်ပါတယ်။ ကျွန်တော်တို့နိုင်ငံမှာတော့ စစ်အာဏာရှင်အဆက်ဆက်ကြောင့် လူ့အ ခွင့်အရေးဆိုတာ ဘာမှန်းတောင်မသိဘဲနေလာခဲ့ရတာ နှစ်ပေါင်း ၆၀ ကျော် ကာလတလျှောက်လုံးပဲ ဖြစ်ပါတယ်။ ပြီးခဲ့တဲ့အရပ်သားအစိုးရလက်ထက်မှာတော့ မိမိတို့ ရသင့်ရထိုက်တဲ့ အခွင့်အရေးတွေကို သိရှိနားလည်လာပြီး မြန်မာနိုင်ငံမှာ  လူ့အခွင့်အရေးနဲ့အညီ နေထိုင်နိုင်အောင်  ဝိုင်းဝန်းကြိုးစားခဲ့ကြ ပေမယ့် ၂၀၂၁ ဖေဖော်ဝါရီ (၁) မှ စလို့ ကျွန်တော်တို့ အားလုံး မိမိတို့ ကိုယ်ပိုင်အခွင့်အရေးတွေအားလုံး ပြန်လည်ဆုံးရှုံးခဲ့ရပြန်ပါတယ်။ အခုလက်ရှိအခြေအနေမှာဆိုရင်လည်း လူမဆန်လွန်းတဲ့ အကြမ်းဖက် စစ်အုပ်စုဟာ ပြည်သူလူထုအပေါ်ကို နည်းလမ်းမျိုးစုံနဲ့ လူ့အခွင့် အရေးချိုးဖောက်မှုတွေကို ပြုလုပ်နေ တာအားလုံးအသိပဲဖြစ်ပါတယ်။ ဒီလိုအကြမ်းဖက် စစ်အုပ်စုကို အမြန်ဆုံး အမြစ်ဖြတ် ချေမှုန်းပြီးမှသာ လူ့အခွင့်အရေးကို လေးစားလိုက်နာတဲ့၊ လူလူချင်း ညီညွတ်မျှတ လွတ်လပ်စွာ ရှင်သန်ရပ်တည်နိုင်မယ့် လူ့ဘောင်သစ်တစ်ခုကို ကျွန်တော်တို့ထူထောင်နိုင်မှာဖြစ်ပါတယ်။ ဒါဟာ ကျွန်တော်တို့ရဲ့ ပန်းတိုင်ဖြစ် ပါတယ်။ ပန်းတိုင်ကိုမျက်ခြေပျက်မခံဘဲ ကျွန်တော်တို့ညီညီညာညာလျှောက်လှမ်းကြရမှာဖြစ်ပါ တယ်။  တကယ်တော့ ဒီကာလတွေအတွင်းမှာ စစ်ကောင်စီရဲ့လူမဆန်တဲ့ ဖိနှိပ်မှုတွေ အခံရဆုံးက ကျွန် တော်တို့ရဲ့ အညာဒေသ ဖြစ်ပါတယ်။ ဖိနှိပ်မှုတွေ ဖိစီးမှုတွေ အမျိုးမျိုးနဲ့အတူ ကျွန်တော်တို့ရဲ့ အနာဂတ်၊ ကလေးငယ်လေးတွေဟာ ဗုံးခိုကျင်း တွေတူးပြီး စာသင်ဖို့ ပြင်ဆင်နေကြတဲ့ အခြေအနေတွေကို မြင်တွေ့ရတာ အတော်လေး စိတ်မကောင်းဖြစ်ရပါတယ်။ ဒါကြောင့် ကျွန်တော်တို့ အနေနဲ့လည်း ကြားကာလဒေသန္တရ အုပ်ချုပ်ရေးကော်မတီရဲ့ အစည်းအဝေးတွေကို အပတ်စဉ် မပြတ်ဘဲ တက်ရောက်ပြီး  မြေပြင်က အသံတွေ နားထောင်ကြဖို့နဲ့ ပေါင်းစပ်လုပ်ဆောင်ရမှာတွေကို အမြဲတမ်း အားစိုက်လုပ်ဆောင် ပေးကြဖို့ တိုက်တွန်း ညွှန်ကြားနေတာ ဖြစ်ပါတယ်။  ကောင်းမွန်တဲ့ရလာဒ်အနေနဲ့ကတော့ ပြီးခဲ့တဲ့သတင်းပတ် အမေရိကန်နိုင်ငံကာကွယ်ရေး ဥပ ဒေကြမ်း American National Defense Authorization Act -၂၀၂၃ မှာ BURMA Act လို့ခေါ်တဲ့ မြန်မာနိုင်ငံနဲ့ဆိုင်တဲ့ ဥပဒေမူကြမ်းကို အမေရိကန်အထက်လွှတ်တော်က အတည်ပြုလိုက်ခြင်းဟာ မြန်မာပြည်သူတစ်ရပ်လုံးရဲ့ ဒီမိုကရေစီ ရုန်းကန်မှုအောင်ပွဲဖြစ်သလို အမျိုးသားညီညွတ်ရေးအစိုးရရဲ့ လူ့အခွင့်ရေးဝန်ကြီးဟာ EU ပါလီမန်ရဲ့ တရားဝင်အစိုးရအဖြစ် အသိအမှတ်ပြုဖိတ်ကြားပြီး တက်ရောက်မိန့်ခွန်းပြောခွင့်ရခဲ့တာဟာလည်း ကြီးမားတဲ့ သံတမန်ရေးအောင်မြင်မှု ဖြစ်ပါတယ်။ များမကြာမှီကာလမှာ ရောက်ရှိလာတော့မှာဖြစ်တဲ့ ထိရောက်တဲ့ နိုင်ငံတကာ အကူအညီတွေကို အရေးကြီးသော နေရာများတွင် ထိရောက်စွာ ရောက်ရှိ စီမံခန့်ခွဲနိုင်စေဖို့  နှောင့်နှေးကျန့်ကြာမှုများ မရှိအောင် ယခုကတည်းက ဝန်ကြီးဌာနများအနေနှင့် ဦးစားပေး လိုအပ်ချက်များကို ပြင်ဆင်ထားကြစေလိုပါတယ်။ ဒီလိုပြင်ဆင်ရာမှာလည်း မိမိတို့ ဝန်ကြီးဌာန သဘောသဘာဝအရ ပုံမှန်လိုအပ်ချက်များထက် တော်လှန်ရေး တစ်နှစ်အတွင်း အောင်မြင်နိုင်ရေး ထိရောက်သည့် ဦးစားပေးမှုများ ဖြစ်စေဖို့ တိုက်တွန်းလိုပါတယ်။ စားနပ်ရိက္ခာလိုအပ်ချက်များ၊ ကျန်းမာရေး၊ စစ်ဆင်ရေးအတွက်လိုအပ်သည့် ထောက်ပံ့ပစ္စည်းများ စသည်တို့ကို အဓိကထား ဦးစားပေးကြပြီး မိမိတို့ မဟာမိတ်အဖွဲ့အစည်းများရဲ့ မူဝါဒနှင့် ဦးစားပေးလုပ်ငန်းများ တစ်ထပ်တည်းကျအောင် ဆောင်ရွက်ကြဖို့မှာလည်း အရေးကြီးပါတယ်။ NDAA အတည်ပြုပြီးသည့် အခါတွင်လည်း မိမိတို့ ဝါရှင်တန် အစိုးရရုံးနှင့် အခြား သက်ဆိုင်ရာ channel အသီးသီးမှ အမေရိကန်အစိုးရနှင့် တိုက်ရိုက်ထိတွေ့ဆက်ဆံကာ ယခု ထောက်ပံ့မှုများ ထိရောက်စေရေးအတွက် ပူးပေါင်း ဆောင်ရွက် ကြဖို့ကိုလည်း အလေးအနက်မှာကြားလိုပါတယ်။  အမေရိကန် လွှတ်တော်များမှ ယခုကဲ့သို့ တရားဝင် NUG, NUCC နှင့် CRPH တို့ကို ထောက်ပံ့ခြင်းသည် နိုင်ငံရေးအရကြီးမားသည့် အောင်မြင်မှုဖြစ်ပါတယ်။    ဒါ့အပြင် ကျွန်တော်တို့ဟာ ဒေသတွင်း တည်ငြိမ်အေးချမ်းရေးနဲ့  ဒေသတွင်း မိတ်ဆွေများကို တန်ဖိုးထားသလို မြန်မာနိုင်ငံကို အာဏာရှင်စနစ်အမြစ်ပြတ်စေပြီး ဖက်ဒရယ်ဒီမိုကရေစီနိုင်ငံသစ် တစ်ရပ်အဖြစ် ဂုဏ်သိက္ခာရှိစွာ ရပ်တည်နိုင်ရေး အကူအညီပေးနေတဲ့ မည်သည့် မိတ်ဆွေနိုင်ငံကို မဆို ဝမ်းမြောက်ဝမ်းသာ ကြိုဆိုပါတယ်။  ကျနော်တို့တော်လှန်ရေးအင်အားစုတွေ မည်သည့်အကြောင်း ကြောင့်မျှ မိမိတို့ ယုံကြည်မှုတွေ ယိမ်းယိုင်မသွားကြပဲ နိုင်ငံရေးသမိုင်းသစ်ကိုအတူတကွရေးထိုးပြီး ညီညီညွတ်ညွတ် တိုက်ပွဲဝင်သွားကြမယ့် အချိန်ကာလဖြစ်တာမို့ အခက်အခဲတွေကို အတူပူးပေါင်းရင်ဆိုင်ကြပြီး တိုက်ပွဲဝင်ဖို့လိုအပ်ပါကြောင်းပြောကြားရင်း နိဂုံး ချုပ်ပါတယ်။

၂၀၂၂ ခုနှစ် ဒီဇင်ဘာ (၁၃) ရက် ဒီနေ့ အမျိုးသားညီညွတ်ရေးအစိုးရအဖွဲ့ အစည်းအဝေးမှာ ကျွန်တော့်အနေနဲ့ ပြောလိုတာက လက်ရှိ ရှမ်းပြည်နယ်မြောက်ပိုင်းဒေသကို အကြမ်းဖက်စစ်ကောင်စီက လေကြောင်းထိုးစစ်ဆင်ပြီး စစ်ရေးပစ်မှတ် / အရပ်သားပစ်မှတ် မခွဲခြားဘဲနဲ့ ဗုံးကြဲတိုက်ခိုက်နေတဲ့ကိစ္စဖြစ်ပါတယ်။ ပြည်တွင်းမှာ စစ်ရေးအသာစီးရဖို့ နိုင်ငံရေးကို နည်းမျိုးစုံနဲ့ လှည့်ကွက်တွေထွင်ပြီး လုပ်ဆောင်နေတာကိုလည်း တွေ့ရပါတယ်။ လေကြောင်း ထိုးစစ်တွေကို အဓိကထားပြီး လုပ်လာတာဟာ စစ်ကောင်စီရဲ့ မြေပြင် ကြည်းတပ် အင်အား ယုတ်လျော့ချိနဲ့ လာတာကို ပြနေပါတယ်။ တစ်ဖက်မှာလည်း စစ်ကောင်စီရဲ့ လေကြောင်းထိုးစစ်ကြောင့် အရပ်သားပြည်သူ လူထုထဲမှာ စစ်ဘေးရှောင်ဒုက္ခသည် အရေအတွက်ပိုများလာပါတယ်။ အကြမ်းဖက်စစ်ကောင်စီဟာ သူတို့အနိုင်ရဖို့ သူတို့ ရှင်သန်ရပ်တည်နိုင်ဖို့အတွက် ဘယ်ကိစ္စကိုမဆို လက်မရွံ့ လုပ်နိုင်တယ်ဆိုတာကို အထင်အရှားပြနေပါတယ်။ ကျွန်တော်တို့ တော်လှန်ရေးအင်အားစုတွေမှာတော့ ကျင့်ဝတ်အရ၊ စည်းမျဉ်းအရ၊ လူ့အခွင့်အရေးလေးစားလိုက်နာမှုတွေအရ စစ်ကို စစ်လို မတိုက်နိုင်တာတွေ ရှိနေတယ်။ အကြောင်းကတော့ ကျွန်တော်တို့ဟာ မူနဲ့ / စနစ်နဲ့ / ကျင့်ဝတ်နဲ့ လျှောက်လှမ်းနေတဲ့ တော်လှန်ရေးလမ်းစဉ်မို့ ဖြစ်ပါတယ်။ တစ်ဖက်မှာ တရားသောစစ်ရဲ့ ကျင့်ဝတ်တွေကို စောင့်ထိန်းပြီး ခုခံတော်လှန်နေရသလို တစ်ဖက်မှာလည်း မကောင်းဆိုးရွားလို ဆိုးယုတ်တဲ့ အကြမ်းဖက်စစ်အုပ်စုကို အမြစ်ဖြတ် ချေမှုန်းနေရပါတယ်။ အမျိုးသားညီညွတ်ရေးအစိုးရအနေနဲ့ စစ်ကောင်စီရဲ့ စစ်ရေးအရှိုက်ကို ထိုးနှက်နိုင်ဖို့ နိုင်ငံရေးအရ လုပ်နိုင်သမျှ ကိစ္စရပ်အားလုံးကို လုပ်ကြရပါလိမ့်မယ်။ တစ်ဖက်မှာလည်း အရပ်သားသေကြေမှုတွေ နည်းနိုင်သမျှ နည်းအောင်လုပ်ရမှာဖြစ်သလို မိမိတို့ မဟာမိတ်တော်လှန်ရေးအင်အားစုတွေရဲ့ ရဲဘော် ရဲဘက်တွေ အကျအဆုံး နည်းနိုင်သမျှ နည်းရေးကို အဓိကလုပ်ဆောင်ကြဖို့ ကျွန်တော့်အနေနဲ့ တိုက်တွန်းလိုပါတယ်။ အသွင်ကူးပြောင်းရေးကာလ ဖွဲ့စည်းပုံအခြေခံဥပဒေပြင်ဆင်ရေးကော်မတီ ဖွဲ့စည်းတဲ့အခါမှာ ဥပဒေရေးရာ ကျွမ်းကျင်သူတွေအပြင် နိုင်ငံရေး အမြော် အမြင်အားကောင်းသူတွေလည်း ပါဝင်ဖွဲ့စည်းဖို့ လိုအပ်ပါတယ်။ ဒါ့အပြင် ပဋိပက္ခဖြေရှင်းရေးဆိုင်ရာ ကိစ္စရပ်တွေကို ထိရောက်စွာ ကိုင်တွယ်ဖြေရှင်းခဲ့ဖူးတဲ့ အတွေ့အကြုံ ရှိသူတွေလည်း ပါဝင်စေသင့်တယ်လို့ ယူဆပါတယ်။ ဒီလိုပါဝင်လုပ်ဆောင်မယ့် သူတွေဟာ တော်ရုံ ထူးချွန်ရုံ သက်သက် မဟုတ်ဘဲ၊ နိုင်ငံနဲ့ တော်လှန်ရေးပေါ်မှာ စေတနာစိတ်ထားသူတွေလည်းဖြစ်ဖို့ လိုပါတယ်။မြန်မာ့နွေဦးတော်လှန်ရေးဟာ ဖက်ဒရယ်ဒီမိုကရေစီဆိုတဲ့ ဘုံသဘောတူညီမှု/ ဘုံရည်မှန်းချက်ကို အခြေခံပြီး တော်လှန်ရေးအင်အားစုတွေကို စုဖွဲ့ထားတာဖြစ်ပါတယ်။ ဒါ့ကြောင့် ဖက်ဒရယ်ဒီမိုကရေစီ အခြေခံစံနှုန်းတွေကို အသွင်ကူးပြောင်းရေးကာလ ဖွဲ့စည်းပုံအခြေခံဥပဒေရဲ့ အခြေခံမူဘောင်တွေအဖြစ် ကိုင်ဆွဲ အသုံးပြုရပါလိမ့်မယ်။ ဒါဟာ နွေဦးတော်လှန်ရေးအင်အားစုတွေအတွင်းက ဘုံနိုင်ငံရေးရည်မှန်းချက်တွေလည်းဖြစ်ပါတယ်။ နွေဦးတော်လှန်ရေးရဲ့ အောင်ပွဲဟာ စစ်ရေးအောင်နိုင်မှုနဲ့ နိုင်ငံရေးအရ ခိုင်ခိုင်မာမာ ထောက်ခံမှု ရှိထားရေး အပေါ်မှာ မူတည်နေပါတယ်။ ဒါ့ကြောင့် ခုခံတော်လှန်စစ်မှာ ထင်ထင်ရှားရှား ဆုပ်ကိုင်ပြနိုင်တဲ့ စစ်ရေး အောင်နိုင်မှုတွေရအောင်လည်း  ကျွန်တော်တို့ ကြိုးစားကြရမယ်။ တစ်ဖက်မှာလည်း ပြည်တွင်းနိုင်ငံရေး ထောက်ခံမှုရေချိန် လျော့ပါးမသွားအောင် လုပ်ထားရပါလိမ့်မယ်။ ပြည်ပနိုင်ငံတွေထဲမှာ မိတ်ဆွေ နိုင်ငံတွေ တိုးပွားရေးကို အစဉ်တစိုက် လုပ်ဆောင်နေရပါလိမ့်မယ်။ ပြည်တွင်းက တော်လှန်သောအစုအဖွဲ့အားလုံးနဲ့ ညီညွတ်သော တော်လှန်ရေး တပ်ပေါင်းစုဖြစ်အောင် ခိုင်ခိုင်မြဲမြဲ ချိတ်ဆက်ပေါင်းစည်းထားရမှ ဖြစ်ကြောင်း ပြောကြားရင်း နိဂုံးချုပ်ပါတယ်။ အရေးတော်ပုံမုချအောင်ရမည်....

ပြည်ထောင်စုသမ္မတ မြန်မာနိုင်ငံတော်အမျိုးသားညီညွတ်ရေးအစိုးရကြေညာချက်အမှတ် ၂၅/၂၀၂၂၁၃၈၄ ခုနှစ်၊ နတ်တော်လပြည့်ကျော်(၁)ရက်(၂၀၂၂ ခုနှစ်၊ ဒီဇင်ဘာလ (၁၀)ရက်)အကြမ်းဖက်စစ်ကောင်စီက ကျူးလွန်လျက်ရှိသည့် ကျေးလက်၊မြို့ပြနေ ပြည်သူများ၏ နေအိမ်များဖျက်ဆီး၍ မြေယာများလုယူနေခြင်းနှင့် စပ်လျဉ်း၍ အထူးသတိပေးတားမြစ်ခြင်း၁။ မင်းအောင်လှိုင်ဦးဆောင်သည့် အကြမ်းဖက်စစ်အုပ်စုသည် နိုင်ငံတော်အာဏာကို လက်နက်အားကိုး၊လုယူပြီးနောက် ကျေးလက်နေ ပြည်သူပိုင်နေအိမ်များ၊ ကျေးရွာများကို မီးရှို့ဖျက်ဆီးခြင်းပြုလုပ်နေရုံသာမက၊ မြို့ပြနေ ပြည်သူများ၏ နေအိမ်များကိုပါ အတင်းအဓမ္မ ဖျက်ဆီး၍ မြို့ပြမြေယာများအား အဓမ္မလုယက်လျက်ရှိသည်။ ၂။ ၂၀၂၂ ခုနှစ် နိုဝင်ဘာလအတွင်း ရန်ကုန်နှင့် မန္တလေးမြို့ကြီးများအပါအဝင် မြို့ကြီးအချို့တွင် အကြမ်းဖက်စစ်အုပ်စုက မြို့ပြနေ အခြေခံလူတန်းစားများ၏ နေအိမ်များအား အတင်းအဓမ္မ ဖြိုဖျက်ကာ မြေယာလုယက်မှုများကျူးလွန်လျက်ရှိရာတွင် မင်္ဂလာဒုံမြို့နယ်ရှိ ရပ်ကွက် ၅ ခုမှ အိမ်ခြေပေါင်း ၁ သောင်းကျော်၊ လူဦးရေ ၅ သောင်းကျော် အိုးမဲ့အိမ်မဲ့ဖြစ်စေခဲ့သကဲ့သို့ မရမ်းကုန်းမြို့နယ်တွင် အိမ်ထောင်စုပေါင်း ၁၀၀ ကျော်၊ မန္တလေးမြို့တွင် အိမ်ထောင်စုပေါင်းများစွာ အား အိမ်မဲ့ရာမဲ့ဘ၀သို့ ရောက်စေခဲ့သည်။ ၃။ ကိုဗစ်ကူးစက်ရောဂါနှင့် နိုင်ငံတော်အာဏာလုယူမှုကြောင့် လူမှုဒုက္ခအ၀၀ကို ခံစားနေကြရသည့် အခြေခံပြည်သူများ၏ ဘ၀ကို စာနာနားလည်မှုမရှိ၊ ဖေးမကူညီမှုမရှိဘဲ ၎င်းတို့၏ ကျောတခင်းစာ နေရာများကို ဖျက်စီးခြင်း၊ ပြည်သူများ၏ အသိုက်အမြုံအားဖျက်စီးခြင်း၊  ၎င်းတို့၏ မြေယာများကို လုယူခြင်းသည် အကြမ်းဖက်စစ်အုပ်စု၏ အရပ်သားပြည်သူများအပေါ် ယုတ်မာရက်စက်မှုကို ထပ်လောင်း အတည်ပြုပေးနေသည်။ ထိုသို့ ရက်စက်ယုတ်မာခြင်းသည် အခြေခံလူ့ကျင့်ဝတ်ကို ချိုးဖောက်ခြင်းဖြစ်သည်သာမက နိုင်ငံတကာ လူ့အခွင့်အရေးဆိုင်ရာ ပြဌာန်းချက်များပါ လူတိုင်း လုံလောက်သော အိမ်ရာ၊ စားနပ်ရိက္ခာ နှင့် အခြေခံဝန်ဆောင်မှုများ ရရှိခွင့်ကိုလည်း ပြောင်ပြောင် တင်းတင်း ချိုးဖောက်လျက်ရှိနေသည်။ ၄။ ထို့အပြင် ကျေးရွာများကို မီးရှို့ဖျက်ဆီးခြင်း၊ စစ်ဘေးရှောင်ကာ လူအစုအလိုက်အပြုံလိုက် ရွေ့ပြောင်းစေခြင်းများဖြင့် ကျေးလက်နေပြည်သူများကို တော်လှန်ရေးနှင့် ကင်းကွာစေရန် အကြောက်တရားနှင့် ခြိမ်းခြောက်ကျူးလွန်နေသကဲ့သို့ မြို့ပြနေ ပြည်သူများ၏ အိုးအိမ်များ ဖျက်ဆီးခြင်းဖြင့် မြို့ပြများကို ပိုမိုကျပ်တည်းခက်ခဲစေကာ ပြည်သူ့တော်လှန်ရေးအပေါ် အားပျော့ လာစေရန် ဆောင်ရွက်နေခြင်းဖြစ်သည်။ ၅။ အကြမ်းဖက်စစ်ကောင်စီနှင့် ၎င်းလက်အောက်ရှိ စည်ပင်သာယာရေးကော်မတီအပါအဝင် ဝန်ထမ်းများနှင့် ၎င်းစစ်ကောင်စီ၏ အပေါင်းပါများအနေဖြင့် ယခုကဲ့သို့ မြို့ပြနေပြည်သူလူထု၏ နေအိမ်များကို အတင်းအဓမ္မဖျက်စီးခြင်း၊ မြေယာများအား လုယက်ခြင်းများကို ချက်ချင်းရပ်ဆိုင်းရန်၊ ပြည်သူလူထု၏ နေအိမ်များ ဖျက်စီးခြင်းကို ဆက်လက်မပြုလုပ်ရန် ပြင်းထန်စွာသတိပေး တားမြစ်လိုက်သည်။ တားမြစ်ချက်ကို မလိုက်နာဘဲ ဆက်လက်ကျူးလွန်နေပါက အမျိုးသားညီညွတ်ရေးအစိုးရအနေဖြင့် ပါဝင်ပတ်သက်သူများ၊ အဖွဲ့အစည်းများအား ထိရောက်စွာအရေးယူသွားမည်ဖြစ်ကြောင်းနှင့် နစ်နာဆုံးရှုံးခဲ့သည့် ပြည်သူတစ်ဦးချင်းဆီအတွက် တရားမျှတမှုနှင့် ပြန်လည်တည်ထောင်ရေး လုပ်ငန်းစဉ်များကို မဖြစ်မနေအာမခံဖော်ဆောင်သွားမည်ဖြစ်ကြောင်း အသိပေးထုတ်ပြန်လိုက်သည်။အမျိုးသားညီညွတ်ရေးအစိုးရ

၂၀၂၂ ခုနှစ် ဒီဇင်ဘာ (၁၀) ရက် ယနေ့ အပြည်ပြည်ဆိုင်ရာ လူ့အခွင့်အရေးနေ့ အထိမ်းအမှတ် အခမ်းအနားမှာ ကျွန်တော့်အနေနဲ့ အဖွင့်အမှာ စကား ပြောကြားခွင့်ရလို့ ဝမ်းသာမိပါတယ်။ ယနေ့ အခမ်းအနားမှာ အတိတ်သမိုင်းတစ်လျှောက်လုံး – လူ့အခွင့်အရေးအတွက် နယ်ပယ်အသီးသီး ကဏ္ဍအသီးသီးမှာ ပုံစံမျိုးစုံနဲ့ တိုက်ပွဲဝင်လာတဲ့ လူ့အခွင့်အရေး တက်ကြွလှုပ်ရှားသူအားလုံးနဲ့ လူ့အခွင့်အရေးအတွက် တော်လှန်တောင်းဆိုခဲ့ကြသူအားလုံးကို လေးစားဦးညွှတ် ကြောင်း ပဏာမအနေနဲ့ ပြောကြားလိုပါတယ်။ ကျွန်တော်တို့ အမျိုးသားညီညွတ်ရေးအစိုးရဟာ – စစ်အာဏာရှင်စနစ်ကို တော်လှန်ပြီး ဒီမိုကရေစီလူ့ဘောင်သစ် ပေါ်ထွန်းအောင် ဦးဆောင်နေတဲ့ တော်လှန်ရေးအစိုးရတစ်ရပ်ဖြစ်ပါတယ်။ ဒီမိုကရေစီလို့ ပြောရင် လူ့အခွင့်အရေးဟာ တွဲဖက်ပါဝင်လာပြီး ဖြစ်ပါတယ်။ လစ်ဘရယ်ဒီမိုကရေစီကျင့်ထုံးတွေနဲ့အတူ လူ့အဖွဲ့အစည်း အတွင်းမှာ လူအချင်းချင်း တန်ဖိုးထားသော လူသားဖြစ်တည်မှုကို တန်ဖိုးထား လေးစားသော ကျင့်ထုံးတွေ ဓလေ့တွေ ပေါ်ထွက်လာဖို့ လိုအပ်ပါတယ်။ အဲသည့်အတွက် လူ့အခွင့်အရေးဟာ လူ့အဖွဲ့အစည်းအတွင်းမှာ ကျယ်ကျယ်ပြန့်ပြန့် လွတ်လွတ်လပ်လပ် အသက်ဝင် ခိုင်မာနေရမှာ ဖြစ်ပါတယ်။ ကျွန်တော်တို့ နိုင်ငံရဲ့ အတိတ်သမိုင်းဇာတ်ကြောင်းကို ကြည့်ရင် အာဏာရှင်ဓလေ့ ထွန်းကားတာကို တွေ့ရပါတယ်။ လက်နက်အားကိုးတဲ့သူက လက်နက်နဲ့ အာဏာရှင်လုပ်တယ်။ လူအုပ်စုကြီးတဲ့သူက လူအုပ်ကို အမှီပြုပြီး အာဏာရှင်လုပ်တယ်။ ကျွန်တော်တို့ နိုင်ငံမှာ အာဏာနဲ့ လုပ်ပိုင်ခွင့်ကို စည်းနဲ့ ဘောင်နဲ့ ဥပဒေနဲ့ အသုံးပြုတဲ့ဓလေ့လည်း နည်းပါးခဲ့ပါတယ်။ ဒါ့ကြောင့်လည်း ရထားတဲ့ အာဏာကို လက်လွှတ်စပယ် အသုံးချပြီး လူအချင်းချင်း ခေါင်းပုံဖြတ် အမြတ်ထုတ်တာတွေ၊ နှိမ့်ချစော်ကားခြင်းအမှုတွေကို အကန့်အသတ်မရှိ ကျူးလွန်ကြတာတွေ့ရပါတယ်။ အာဏာဟာ လူကို ဖောက်ပြန်စေတတ်ပါတယ်။ အာဏာရှိထားတဲ့သူ / လုပ်ပိုင်ခွင့်ရှိထားတဲ့သူနဲ့ လက်နက်ရှိထားတဲ့သူ‌တွေ ပေါင်းပြီး ပြည်သူလူထုအပေါ် ကျူးလွန်တဲ့ လူ့အခွင့်အရေး ချိုးဖောက်မှုတွေ များစွာ ရှိခဲ့ပါတယ်။ ဒီလို လက်နက် / အာဏာနဲ့ လုပ်ပိုင်ခွင့်ရှိထားတဲ့ အစိုးရတွေ / အစုအဖွဲ့ တွေဟာ လူမဆန်တဲ့ ရာဇဝတ်မှုတွေကို ရဲရဲတင်းတင်း ကျူးလွန်ဖောက်ပြန်ကြတယ်။ ဒီလိုဖြစ်ရပ်မျိုးတွေဟာ အတိတ်တုန်းကလည်း ရှိခဲ့တယ်။ ယခု ပစ္စုပ္ပန်မှာလည်း ရှိနေပါတယ်။ အထူးသဖြင့် လက်နက်၊ အာဏာနဲ့ အကျိုးစီးပွားကိုပဲ ဗဟိုပြု တည်ဆောက်ထားတဲ့ မြန်မာစစ်တပ်လို စစ်အုပ်စုဟာ ပြည်သူလူထုအပေါ် လူ့အခွင့်အရေး ချိုးဖောက်မှုတွေကို တာဝန်ယူမှု/ တာဝန်ခံမှု မဲ့စွာ ကျူးလွန်နေပါတယ်။ ပြည်သူလူထုအပါအဝင် ကျွန်တော်တို့ အမျိုးသားညီညွတ်ရေးအစိုးရအဖွဲ့ဝင်တွေနဲ့ သက်ဆိုင်ရာ တော်လှန်ရေးအစုအဖွဲ့အသီးသီးဟာ — စစ်အာဏာရှင်စရိုက်ဆိုးကနေ မွေးထုတ်ပေးလိုက်တဲ့ လူ့အခွင့်အရေး ချိုးဖောက်ခံရမှုတွေကို အမြစ်ပြတ် တော်လှန်ဖို့အတွက် စုဖွဲ့ထားပြီး ဖြစ်ပါတယ်။ ဒါ့အပြင် လူ့အခွင့်အရေးကို လေးစားလိုက်နာသော / လူချင်းတူတူ သူချင်းမျှမျှ လွတ်လပ်စွာ ရှင်သန်ရပ်တည်နိုင်သော လူ့ဘောင်သစ်ကို တည်ထောင်ဖို့ တူညီသော ပန်းတိုင်တွေ ရှိထားပါတယ်။ တိုင်းပြည်နဲ့ ပြည်သူလူထုဟာ နိုင်ငံရေးပဋိပက္ခနဲ့ လက်နက်ကိုင်ပဋိပက္ခကာလတွေထဲမှာ လူ့အခွင့်အရေး ချိုးဖောက်ခံရမှု အမြင့်ဆုံးမှာ ကျရောက်နေပါတယ်။ မြန်မာ့နွေဦးတော်လှန်ရေးဟာ လျင်လျင်မြန်မြန်နဲ့ အောင်ပွဲခံနိုင်ပြီး လက်ရှိတည်ဆဲ စစ်ရေးပဋိပက္ခတွေကို ချုပ်ငြိမ်းနိုင်အောင် လုပ်မှသာ ပြည်သူလူထုဟာ လူ့အခွင့်အရေးရဲ့ အနှစ်သာရကို ခံစားကြရမှာ ဖြစ်ပါတယ်။ ပဋိပက္ခသက်တမ်း ရှည်ကြာလေလေ၊ လူ့အခွင့်အရေးတွေဟာ တဖြည်းဖြည်း ယုတ်လျော့ကျဆင်း လာလေလေ ဖြစ်လာပါလိမ့်မယ်။ ဒါကို ကျွန်တော်တို့ အားလုံး သတိချပ်ရပါလိမ့်မယ်။ ကျွန်တော်တို့ တော်လှန်ရေးအစိုးရဟာ — လူ့အခွင့်အရေးအတွက် တိုက်ပွဲဝင်နေသော အစိုးရတစ်ရပ်လည်းဖြစ်ပါတယ်။ ဖက်ဒရယ်ဒီမိုကရေစီစနစ်ကို အုတ်မြစ်ချ တည်ဆောက်ဖို့ အတွက် တည်ဆောက်ရေးအင်အားစုအသီးသီးကို စုဖွဲ့ထားတဲ့ အစိုးရတစ်ရပ်လည်းဖြစ်ပါတယ်။ ကုလသမဂ္ဂဟာ လူသားတိုင်း အခြေခံအခွင့်အရေးများနှင့် လွတ်လပ်ခွင့်များ ရရှိရေးအတွက် လူ့အခွင့်အရေး ကြေညာစာတမ်းကို ၁၉၄၈ ခုနှစ် ဒီရက်ဘာ ၁၀ ရက်နေ့တွင် ထုတ်ပြန်ကြေညာခဲ့ပြီးဖြစ်သော်လည်း ကျွန်ပ်တို့ တိုင်းပြည်ဟာ ယနေ့တိုင် အာဏာရှင်များ/ အကြမ်းဖက်စစ်အုပ်စုများ၏ အုပ်စိုးမှုကြောင့် ပြည်သူတရပ်လုံး အကျည်းကျနေသဖွယ် ခံစားနေကြသည်မှာ ဆယ်စုနှစ်များစွာ ရှိပြီဖြစ်ပါတယ်။ ထို့ကြောင့် ကျွန်တော်တို့ဟာ အနာဂတ်ကာလမှာ လူ့အဖွဲ့အစည်းအတွက် လူ့အခွင့်အရေးတွေ ပြည့်ပြည့်ဝဝ ရရှိဖို့ အစဉ်တစိုက် ကြိုးစားနေရ ပါမယ်။ဒါ့အပြင် ယနေ့ မြန်မာ့နွေဦးတော်လှန်ရေးဟာ လူ့အခွင့်အရေးချိုးဖောက်မှုတွေကို နေ့ညမပြတ် ကျူးလွန်နေတဲ့ စစ်အာဏာရှင်စနစ်ကို အမြစ်ပြတ် သုတ်သင်ချေမှုန်းတဲ့ တော်လှန်ရေးလည်း ဖြစ်တယ်ဆိုတာ မမေ့ကြဖို့ သတိပေးလိုပါတယ်။ လူသားဂုဏ်သိက္ခာအပြည့်အဝရှိပြီး လူသားတန်ဖိုးတွေကို အရှိ ပကတိအတိုင်း ကြည့်မြင် လေးစားနိုင်တဲ့ လူ့အဖွဲ့အစည်းဖြစ်အောင် ယုံကြည်ချက်နဲ့လည်း ကြိုးစားရမှာ ဖြစ်သလို၊ ဉာဏ်ပညာအားဖြင့် လည်း ကြိုးစားကြရမယ်လို့ ကျွန်တော့်အနေနဲ့ ပြောကြားလိုပါတယ်။ ဒီလို ခိုင်မာသော ယုံကြည်မှုနဲ့ နက်နဲတဲ့ ဉာဏ်ပညာတွေကို အသုံးပြုပြီး ဇွဲနပဲရှိရှိ ဆက်လက်တိုက်ပွဲဝင်မယ်ဆိုရင် လူ့အခွင့်အရေးပြည့်ပြည့်ဝဝ ရရှိတဲ့ လူ့ဘောင်သစ်ကို တည်ဆောက်နိုင်မှာ ဖြစ်ကြောင်း ပြောကြားရင်း နိဂုံးချုပ် ပါတယ် ခင်ဗျား….။အရေးတော်ပုံမုချအောင်ရမည်....