အမျိုးသားညီညွတ်ရေးအစိုးရ ပုံမှန်အစည်းအဝေး (၁၇/၂၀၂၁) ကို ကျင်းပပြုလုပ်၃ ဩဂုတ် ၂၀၂၁------------------------------------------------------------------ဒီနေ့ ဩဂုတ်လ ၃ ရက်နေ့မှာ အမျိုးသားညီညွတ်ရေးအစိုးရအဖွဲ့ ပုံမှန်အစည်းအဝေး (၁၇/၂၀၂၁) ကို ကျင်းပပြုလုပ်ခဲ့တာဖြစ်ပြီး ယာယီသမ္မတ ဒူဝါလရှီးလ၊ ပြည်ထောင်စုဝန်ကြီးချုပ် မန်းဝင်းခိုင်သန်းနဲ့ ပြည်ထောင်စုဝန်ကြီးများ ၊ ဒုဝန်ကြီးများ တက်ရောက်ခဲ့ကြပါတယ်။ အစည်းအဝေးမှာ ယာယီသမ္မတ နဲ့ ပြည်ထောင်စုဝန်ကြီးချုပ်တို့က အမှာစကားများအသီးသီးပြောကြားကြရာ…..ယာယီသမ္မတကြီးက အမျိုးသားညီညွတ်ရေးအစိုးရအနေနဲ့ ရက်ပေါင်း (၁၀၀) အတွင်း စစ်ကောင်စီကို အပြီးသတ်တိုက်ထုတ်ရှင်းလင်းနိုင်ခြင်းမရှိသေးပေးပေမယ့် စစ်ကောင်စီရဲ့ခြေကုတ် အနိုင်ကျင့်မှုတွေကို ဖြိုဖျက်နိုင်မယ့် အခြေခံလုပ်ငန်းတွေကို တည်ဆောက်နိုင်ခဲ့ကြောင်း၊ အထူးသဖြင့် မြန်မာ့သမိုင်းမှာမရှိခဲ့ဘူးတဲ့ တိုင်းရင်းသားပေါင်းစုံပါဝင်တဲ့ ညီညွတ်သောအစိုးရကိုဖွဲ့စည်းပြီး ကြားကာလအစိုးရ ယန္တယားကို ပြည်သူလူထုအတွင်း အမြစ်တွယ်နေစေရန်လုပ်ဆောင်ခြင်း၊ နိုင်ငံတကာရဲ့ အသိအမှတ်ပြုမှုရရှိအောင် လုပ်ဆောင်ခြင်း၊တစ်ဘက်မှာလဲ စစ်ကောင်စီကိုဖြုတ်ချနိုင်ဖို့ တိုင်းရင်းသားအင်အားစုတွေနဲ့  စည်းလုံး ညီညွတ်မှု၊ ယုံကြည်မှုတည်ဆောက်နေခြင်းတွေကို လုပ်ဆောင်နိုင်ခဲ့ကြောင်း ပြောကြားခဲ့ပြီး ပြည်ထောင်စုဝန်ကြီးချုပ်က ယခုတစ်ပတ်အတွင်း စစ်ကိုင်းတိုင်း ကနီ၊ မင်းကင်းနဲ့ယင်းမာပင် မြို့နယ်တွေမှာ တိုက်ပွဲတွေဖြစ်နေပြီး  ပြည်သူတွေ ထွက်ပြေးတိမ်းရှောင်နေရသလို အရပ်သားပြည်သူသေဆုံးမှု မနေ့ကအထိ (၂၃)ဦးအထိရှိပြီဖြစ်ကြောင်း၊ အပြစ်မဲ့ပြည်သူတွေ သေဆုံးရတဲ့အတွက်အလွန်စိတ်ထိခိုက်ရကြောင်း၊တော်လှန်ရေးက တရက် ကြန့်ကြာလေလေ ပြည်သူများ အသက်တွေဆုံးရှူံးနေရလေလေ ဖြစ်တာ ကြောင့် NUG အစိုးရရဲ့ တော်လှန်ရေးမဟာဗျူဟာများ ၊စစ်ရေးမဟာဗျူဟာများကို အမြန်အသက်ဝင်အောင် လုပ်ဆောင်ကြရတော့မည့် အချိန်ရောက်နေပြီလို့ ပြောလိုကြောင်း၊ ပြည်သူတွေက D day ကိုမျှော်လင့်နေ ကြကြောင်း၊ ဒါပေမယ့် တစ်နိုင်ငံလုံးအတိုင်းအတာအနေနဲ့ပြောရရင် D day ဆိုတာ ရက် တစ်ရက် သီးသန့် သတ်မှတ်တယ်ဆိုတာထက် တော်လှန်ရေးဖြစ်စဉ်ကြီးတစ်ခု ဖြစ်ကြောင်း ၊ ဒါကြောင့် မြို့နယ်တစ်ခုချင်းစီမှာ မြေပြင်အခြေအနေအလိုက် လိုအပ်လာမယ့် သက်ဆိုင်ရာကဏ္ဍတွေကို ဝန်ကြီးဌာနများ အချင်းချင်းချိတ်ဆက်ပြီး အစီအမံများဆောင်ရွက်ထားဖို့ဝန်ကြီးတွေကို တိုက်တွန်းလိုကြောင်း၊ လာမည့် သြဂုတ်လ (၈) ရက်နေ့ဆိုရင် ဒီမိုကရေစီအရေးအတွက် ပြည်သူတွေတိုက်ပွဲဝင်ခဲ့ကြတဲ့ ၈ လေးလုံးအရေးတော်ပုံကြီးရဲ့ (၃၃) နှစ်မြောက်နှစ်ပတ်လည်နေ့ဖြစ်ကြောင်း၊ ၁၉၈၈ ကာလ ၈လေးလုံး အရေးတော်ပုံကစလို့ ၂၀၂၁ကာလ (၂) ငါးလုံးအရေးတော်ပုံအထိ ပြည်သူလူထုဟာ စစ်အာဏာရှင်ကိုမလိုလားပဲ ဒီမိုကရေစီစနစ်ကိုသာ လိုလားတယ်ဆိုတဲ့စိတ်ကို တစ်စိုက်မတ်မတ်ပြသလာကြတာ အခုတကြိမ်မှာတော့ စစ်အာဏာရှင်စနစ်ကို အမြစ်ဖြတ် အပြီးသတ် ချေမှုန်းသွားကြဖို့တိုက်တွန်းကြောင်းပြောကြားခဲ့ပါတယ်။ဆက်လက်ပြီး ဝန်ကြီးဌာနတွေက သက်ဆိုင်ရာ ကဏ္ဍအလိုက်တင်ပြရာ နိုင်ငံခြားရေးဝန်ကြီးဌာနက NUCC အတွင်း ဖြစ်ပေါ်တိုးတက်မှုတွေ၊ ကျန်းမာရေးဝန်ကြီးဌာနက Covid 19 အတွက် လက်ရှိဆောင်ရွက်ချက်တွေ၊ အလုပ်သမားဝန်ကြီးဌာနက ကြားကာလလူမှုဖူလုံရေး ဆေးကုသရေးနဲ့ ထောက်ပံ့မှုများစီစဉ်နိုငရေးကိစ္စတွေ၊  အမျိုးသမီး လူငယ်နှင့် ကလေး သူငယ်ဝန်ကြီးဌာနက အင်းစိန်ထောင်တွင်း ဆန္ဒပြမှု နောက်ဆက်တွဲအခြေအနေတွေ၊ တရားရေးဝန်ကြီးဌာနက ဝန်ကြီးဌာနရဲ့ မူဝါဒတင်ပြမှုတွေ  ဆောင်ရွက်ခဲ့ကြပြီး နေ့လည် ၁၂ နာရီ မိနစ် ၃၀ တွင် အစည်းအဝေးကို ရုပ်သိမ်းခဲ့ပါတယ်။

အမျိုးသားညီညွတ်ရေးအစိုးရ ပုံမှန်အစည်းအဝေး (၁၄/၂၀၂၁) ကို ကျင်းပပြုလုပ်၁၃ ဇူလိုင် ၂၀၂၁--------------------------------------------အမျိုးသားညီညွတ်ရေးအစိုးရအဖွဲ့ အစည်းအဝေး (၁၄/၂၀၂၁) ကို ယနေ့ ဇူလိုင်လ ၁၃ ရက်နေ့ နံနက် ၁၀ နာရီတွင် ကျင်းပခဲ့ရာ ယာယီသမ္မတ ဒူဝါလရှီးလ၊ ပြည်ထောင်စုဝန်ကြီးချုပ် မန်းဝင်းခိုင်သန်းနဲ့ ပြည်ထောင်စုဝန်ကြီးများ ၊ ဒုတိယဝန်ကြီးများ တက်ရောက်ခဲ့ကြပါတယ်။ အစည်းအဝေးမှာ ယာယီသမ္မတ နဲ့ ပြည်ထောင်စုဝန်ကြီးချုပ်တို့က အမှာစကားများအသီးသီးပြောကြားကြရာ…..ယာယီသမ္မတကြီးက အစိုးရအဖွဲ့အစည်းဝေးတွေမှာ  ဝန်ကြီးဌာနတွေက အရေးကြီးသောအကြောင်း အရာတွေကို တင်ပြလာကြကြောင်း၊ ထိုအကြောင်းအရာများကို ဝန်ကြီး ဒုဝန်ကြီးများက ဝိုင်းဝန်းဆွေးနွေး ဆုံးဖြတ်ပေးကြစေလိုကြောင်း ပြောကြားခဲ့ပြီး၊ ပြည်ထောင်စုဝန်ကြီးချုပ်က ယခုတပတ်အတွင်း မြန်မာနိုင်ငံမှာ ကိုဗစ်ရောဂါ ပြန့်ပွားမှုကို မထိန်းသိမ်းနိုင်သော အခြေအနေတွေ ကြားသိရနေရတဲ့အတွက် အလွန်စိတ်မချမ်းမြေ့ဖြစ်ရကြောင်း၊  ဒီရောဂါနဲ့ ပတ်သက်ပြီး အကြမ်းဖက်စစ်ကောင်စီ စီမံခန့်ခွဲနေတဲ့ ပုံစံဟာ  ပြည်သူတွေ အပေါ် ရည်ရွယ်ချက်ရှိရှိနဲ့ လူသတ်မှုကျူးလွန်နေရာရောက်ကြောင်း၊ အခုလို ကိုဗစ် outbreak ဖြစ်နေတဲ့အချိန်မှာ ဆေးပစ္စည်းတွေကို ရည်ရွယ်ချက်ရှိရှိ ထိန်းချုပ်ပြီး၊ ပုဂ္ဂ္ဂ္ဂလိက အောက်ဆီဂျင်စက်ရုံတွေကို စစ်တပ်အမိန့်နဲ့လိုက်ပိတ်တာတွေအပြင် ရောဂါဖြစ်ပွားနေတဲ့  ပြည်သူတွေအတွက် ကျန်းမာရေးအဆောက်အအုံတွေ စနစ်တကျ စီမံထားခြင်း များမရှိကြောင်း ၊ နေ့စဉ် နေ့တိုင်း ပြည်သူတွေ တစ်ယောက်ပြီးတစ်ယောက်ကို လက်လွှတ်ဆုံးရှုံးနေရတာ တွေအတွက် အလွန် စိတ်မချမ်းမသာဖြစ်ရကြောင်း၊ဖေဖေါ်ဝါရီလကစပြီး  ပြည်သူတွေဟာ အကြမ်းဖက်စစ်ကောင်စီ နှိပ်စက်မှုကြောင့် ဒုက္ခမျိုးစုံ ရောက်ရသလို အခု ကပ်ရောဂါဘေးကိုပါ အကာအကွယ်မဲ့ခံစားနေရကြောင်း၊ မြန်မာနိုင်ငံအနေနဲ့ ပထမလှိုင်း ၊ဒုတိယလှိုင်းတွေကို ဖြတ်ကျော်ခဲ့စဉ်က ခေါင်းဆောင်ကောင်းရဲ့လမ်းညွှန်မှု ၊အစိုးရဝန်ကြီးဌာနများ အားလုံးရဲ့ ပူးပေါင်းဆောင်ရွက်မှု၊ အဓိကအားဖြင့် ပြည်သူတစ်ရပ်လုံးရဲ့ အရပ်သားအစိုးရအပေါ် ယုံယုံကြည်ကြည်ပူးပေါင်းဆောင်ရွက်မှုတွေကြောင့် ရောဂါအန္တရယ်ကိုကျော်လွှားနိုင်ခဲ့ကြသလို စီးပွားရေးရပ်နားထားရမှုများကြောင့် ကြုံတွေ့ရတဲ့ အခက်အခဲတွေကိုလည်း စုပေါင်းအင်အားနဲ့ ကျော်လွှားနိုင်ခဲ့ကြကြောင်းအကြမ်းဖက်စစ်ကောင်စီဟာ ပြည်သူတွေကို COVID 19 ကပ်ရောဂါဆိုးကနေ ကာကွယ်ပေးဖို့မရှိ တဲ့အပြင် ပိတ်ပင်တားဆီးမှုတွေကိုပါ လုပ်ကိုင်ဆောင်ရွက်နေတာကို ကြည့်ရင်  သူတို့ရဲ့သဘောထားကို ရှင်းရှင်းလင်းလင်း သိနိုင်မှာဖြစ်ကြောင်း၊ အမျိုးသားညီညွတ်ရေးအစိုးရအနေနဲ့ ပြည်သူတွေကို တတ်နိုင်သမျှ အစွမ်းကုန်အကူအညီပေးနိုင်မယ့် အစီအစဉ်တွေကို အမြန်ချမှတ်ဖို့လိုကြောင်း၊  ဝန်ကြီးဌာနတွေက လိုအပ်တဲ့ ကော်မရှင်တွေဖွဲ့စည်းပြီး ဆောင်ရွက်နေကြကြောင်း၊ ပိုမိုမြန်ဆန်ထိရောက်မယ့် နည်းလမ်းများရှိဖွေလုပ်ဆောင်ကြဖို့တိုက်တွန်းလိုကြောင်း၊ အမျိုးသားညီညွတ်ရေးအစိုးရရဲ့ ကျန်းမာရေးဝန်ကြီး ဌာနအနေနဲ့လဲ ပြည်သူတွေကို ကိုဗစ်နဲ့ပါတ်သတ်ပြီးအသိပညာပေးများကို ကျန်းမာရေးဝန်ကြီးဌာန website မှ စဉ်ဆက်မပြတ်ထုတ်လွှင့်ပေးနေတာကိုလည်း ကျေးဇူးတင်ပါကြောင်း၊ ပြည်သူတွေအနေနဲ့လဲ အသိ သတိဖြင့် ဒီကပ်ရောဂါကြီးကို ကျော်လွှားနိုင်ဖို့အားတင်းထားကြမယ်လို့ယုံကြည်ကြောင်း၊အခုဆိုရင် ထောင်တွေထဲမှာလည်း ကိုဗစ်ရောဂါပြန့်ပွားနေပြီလို့ ကြားသိရတဲ့အတွက် မတရား အဖမ်းဆီးခံထားရတဲ့ နွေဦးတော်လှန်ရေး သူရဲကောင်းတွေအတွက်လည်း အလွန်စိုးရိမ်ပူပန်မိကြောင်း၊ ဒီကိစ္စအတွက်လည်း ICRC တို့လို နိုင်ငံတကာ အဖွဲ့အစည်းတွေနဲ့ဆက်သွယ်ပြီး ဘယ်လိုအကာအကွယ် ပေးနိုင်မလဲဆိုတာ စဉ်းစားဖို့လိုအပ်ကြောင်း၊အမျိုးသားညီညွတ်ရေးအစိုးရအနေနဲ့ ကပ်ရောဂါဆိုးကြီးကို ရင်ဆိုင်ရင်း၊ တစ်ဘက်မှလည်း တော်လှန်ရေးကို မျက်ခြေမပြတ်လှုပ်ရှားဆောင်ရွက်နေဖို့လိုအပ်ကြောင်း၊ မြန်မာနိုင်ငံတွင် ကြုံတွေ့နေရသော အခက်အခဲအားလုံးရဲ့တရားခံဟာ အကြမ်းဖက်စစ်အုပ်စုသာဖြစ်ကြောင်း၊ သူတို့ကို အမြစ်ပြတ်ချေမှုန်း နိုင်မှသာ မြန်မာနိုင်ငံရဲ့ ဘေးဒုက္ခအပေါင်းချုပ်ငြိမ်းမယ်ဆိုတာကို အမြဲနှလုံးသွင်းဖို့လိုကြောင်း ပြောကြားခဲ့ ပါတယ်။ ဆက်လက်ပြီး ပြည်ထောင်စုဝန်ကြီးနဲ့ ဒုဝန်ကြီးတွေက သက်ဆိုင်ရာဝန်ကြီးဌာနလုပ်ငန်းစဉ်များနဲ့ ပတ်သက်လို့ ဆွေးနွေးကြရာ စီမံကိန်း၊ဘဏ္ဍာရေးနှင့် ရင်းနှီးမြှပ်နှံမှုဝန်ကြီးဌာနက နိုင်ငံတကာရင်းနှီးမြှပ်နှံမှုနြ့ ပတ်သက်တဲ့ကိစ္စ၊ ဖက်ဒရယ်ရေးရာဝန်ကြီးဌာနက NUCC ဖြစ်ပေါ်တိုးတက်မှုအခြေအနေနဲ့ ဖက်ဒရယ်ပြည်ထောင်စု ဖွဲ့စည်းပုံအခြေခံဥပဒေရေးဆွဲပြဌာန်းနိုင်ရေး လုပ်ငန်းစဉ်များနဲ့ပတ်သက်တဲ့ကိစ္စတွေ ဆွေးနွေးကြပြီး၊ ကျန်းမာရေး ဝန်ကြီးဌာနက COVID 19 အတွက် လက်ရှိလုပ်ဆောင်နေသောကိစ္စတွေကို အသီးသီးဆွေးနွေးတင်ပြကြခဲ့ကြကာ အစည်းအဝေးကို နေ့လည် ၁၂ နာရီ မိနစ် ၃၀ တွင် ရုပ်သိမ်းလိုက်ပါတယ်။

အမျိုးသားညီညွတ်ရေးအစိုးရအဖွဲ့ ပုံမှန်အစည်းအဝေး (၁၃/၂၀၂၁) ကို ကျင်းပပြုလုပ်၆ ဇူလိုင် ၂၀၂၁------------------------------------အမျိုးသားညီညွတ်ရေးအစိုးရအဖွဲ့ အစည်းအဝေး (၁၃/၂၀၂၁) ကို ယနေ့ ဇူလိုင်လ ၆ ရက်နေ့မှာ ကျင်းပခဲ့ပြီး ယာယီသမ္မတ ဒူဝါလရှီးလ၊ ပြည်ထောင်စုဝန်ကြီးချုပ် မန်းဝင်းခိုင်သန်းနှင့် ဝန်ကြီးများ ၊ ဒုဝန်ကြီးများ တက်ရောက်ကြပါတယ်။ အစည်းအဝေးမှာ ယာယီသမ္မတ နှင့် ပြည်ထောင်စုဝန်ကြီးချုပ်တို့က အမှာစကားများ အသီးသီးပြောကြားကြရာ…..ယာယီသမ္မတက တော်လှန်ရေးကာလအတွင်း စိန်ခေါ်မှုများစွာရှိနေပေမယ့်  ဝန်ကြီးဌာနတွေရဲ့ ကြိုးပမ်းမှုတွေကို ကျေးဇူးတင်ကြောင်း၊ ပြည်သူတွေအနေနဲ့ အစိုးရရဲ့စိန်ခေါ်မှုတွေကို နားလည်ပြီး လုပ်ဆောင်မှု များကို အကောင်းမြင် အပြုသဘောဆောင်နေကြတာကိုလဲ ကျေးဇူးတင်ကြောင်း ၊ နိုင်ငံတကာနဲ့ ချိတ်ဆက် ဆောင်ရွက်နေကြတဲံ သက်ဆိုင်ရာဝန်ကြီးဌာနတွေအနေနဲ့ လက်ရှိကာလဟာ မိမိတို့အစိုးရရဲ့ တရားဝင်မှုကို အသိအမှတ်ပြုဖို့အားတက်သရော နည်းဗျူဟာကျကျလုပ်ဆောင်ရမယ့် အချိန်ကာလတစ်ခုကိုရောက်ရှိနေပြီဖြစ်ကြောင်းပြောကြားခဲ့ပြီး ဝန်ကြီးချုပ်က မိမိတို့နိုင်ငံဟာ လူကြောင့်ဖြစ်ရတဲ့ဘေးဒုက္ခ၊ ရောဂါကြောင့် ဖြစ်ရတဲ့ ဘေးဒုက္ခတွေ ကြုံတွေ့နေရပြီး အင်မတန်စိတ်မချမ်းမြေ့စရာ အခြေအနေဖြစ်ကြောင်း၊  ပြည်သူတွေ တရားဝင်အာဏာ လွှဲအပ်ထားတဲ့ တရားဝင်အစိုးရလက်ထဲကနေ အာဏာကို သေနတ်ပြပြီး လုခဲ့သူတစ်စုကြောင့် နိုင်ငံရေး၊ လူမှုရေး၊ကျန်းမာရေး၊စီးပွားရေး အခက်အခဲပေါင်းစုံရင်ဆိုင်ကြုံတွေ့နေရတာဖြစ်ကြောင်း၊ ကောင်းစွာ စောင့်ရှောက်မှု မပေးနိုင်သောကြောင့် ရောဂါဘေးကြုံရပြီး သေဆုံးကြရသူတွေနဲ့   စစ်အုပ်စုရဲ့အကြမ်းဖက် မှုကြောင့် သေဆုံးသွားရသော ဒီပဲယင်းမှ အပြစ်မဲ့ပြည်သူ ၄၀ ကျော် အတွက် အလွန်စိတ်မကောင်းဖြစ်ရပြီး၊ ထွက်ပြေးတိမ်းရှောင်နေရသော ပြည်သူ ၃၀၀၀ ကျော်အတွက်လည်း စိတ်ပူပန်မိကြောင်း၊ ဒီအခြေအနေတွေအတွက် သက်ဆိုင်ရာဝန်ကြီး ဌာနတွေက ကူညီနိုင်တာတွေကို အမြန်ဆုံး ကူညီပံ့ပိုးပေးကြဖို့ တိုက်တွန်းကြောင်း၊ လူသားချင်းစာနာကူညီရေးနှင့် ဘေးအန္တရယ်တုံ့ပြန်ရေးကော်မရှင်ရဲ့ ပထမအကြိမ် အစည်းအဝေးမှာလည်း မကြာခင်ဖြစ်ပေါ်လာတော့မယ့်အခြေအနေတွေအတွက် တိုင်ပင်ဆွေးနွေးထား ကြတာတွေရှိပြီး အရေးကြုံလာပါက လျှင်လျှင်မြန်မြန်ဆောင်ရွက်ကြရန်ဖြစ်ကြောင်း တိုက်တွန်းပြောကြား ခဲ့ပါတယ်။ အဲဒီ့နောက် ကာကွယ်ရေးဝန်ကြီးဌာနက တိုက်ပွဲဝင်မ ဟာဗျူဟာကိုတင်ပြဆွေးနွေးခြင်း၊ ကျန်းမာရေးဝန်ကြီးဌာနက အရေးပေါ် Covid 19 ကာကွယ်ထိန်းချုပ် ကုသရေးအမျိုးသားအဆင့် ဗဟိုကော်မတီဖွဲ့စည်းဆောင်ရွက်ရေးကိစ္စကို တင်ပြဆွေးနွေးခြင်း၊ အလုပ်သမားဝန်ကြီးဌာနမှ နိုင်ငံတကာအလုပ်သမားသမဂ္ဂတွေနဲ့ တွေ့ဆုံဆွေးနွေးနေတဲ့ ကိစ္စများ ဆွေးနွေးကြပြီး၊ အမျိုးသမီး၊လူငယ်နှင့် ကလေးသူငယ်ဝန်ကြီးဌာနက 7 ဇူလိုင် အတွက် ကြေညာချက်ထုတ်ရန်ကိစ္စ များ အသီးသီးတင်ပြဆွေးနွေးကြပြီး အစည်းအဝေးကို  ၁၂ နာရီခွဲ တွင် ရုပ်သိမ်းခဲ့ပါတယ်။

အမျိုးသားညီညွတ်ရေးအစိုးရအဖွဲ့ အစည်းအဝေး (၁၁/၂၀၂၁) ကိုကျင်းပပြုလုပ် ၂၂ ဇွန် ၂၀၂၁------------------------------အမျိုးသားညီညွတ်ရေးအစိုးရအဖွဲ့ အစည်းအဝေး (၁၁/၂၀၂၁) ကို ယနေ့ဇွန်လ ၂၂ ရက်နေ့တွင် ကျင်းပခဲ့ရာ ယာယီသမ္မတ ဒူဝါလရှီးလ၊ ပြည်ထောင်စုဝန်ကြီးချုပ် မန်းဝင်းခိုင်သန်းနှင့် ဝန်ကြီးများ ၊ ဒုဝန်ကြီးများ တက်ရောက်ကြပါတယ်။ အစည်းအဝေးမှာ ဒုတိယသမ္မတ နှင့် ပြည်ထောင်စုဝန်ကြီးချုပ်တို့က အမှာစကားများအသီးသီးပြောကြားကြရာဒုတိယသမ္မတကြီးက cabinet အစည်းအဝေးကြီးဟာ နိုင်ငံတော်ရဲ့စီမံခန့်ခွဲသည့် အဖွဲ့အစည်းတွင် အမြင့်ဆုံးဖြစ်ကြောင်း၊ ဝန်ကြီးများသည်လည်း မိမိဌာနတွင် စီမံခန့်ခွဲမှုအရ အမြင့်ဆုံးတာဝန်ထမ်းဆောင်နေသော ပုဂ္ဂိုလ်များဖြစ်ကြောင်း၊အစိုးရအဖွဲ့တွင်တာဝန်ထမ်းဆောင်နေသူများအားလုံးသည် ဖိနှိပ်ရမ်းကားနေသည့် စစ်ကောင်စီကို ဖြိုဖျက်ပြီး ပြည်သူလူထုအာဏာပိုင်စိုးသော အစိုးရတစ်ရပ်အဖြစ် ပြန်လည်တည်ဆောက်ရန် နောက်ခံအတွေ့အကြုံမျိုးစုံမှ စုရုံးရောက်ရှိလာသူများဖြစ်သည်ဟုနားလည်ယုံကြည်ကြောင်း၊ များပြားသည့် လုပ်ငန်းတာဝန်များကို စီမံခန့်ခွဲရာတွင် တိကျ မှန်ကန် မြန်ဆန်သွက်လက်ဖို့ဝိုင်းဝန်းဆွေးနွေး အဖြေရှာကြရန် လိုအပ်ကြောင်း ပြောကြားခဲ့ပြီး….ပြည်ထောင်စု ဝန်ကြီးချုပ်က ၇၅ ကြိမ်မြောက် ကုလသမဂ္ဂ အထွေထွေညီလာခံတွင် မြန်မာနိုင်ငံအခြေ အနေနှင့် ပတ်သက်သော resolution ကို မဲခွဲဆုံးဖြတ်ရာ resolution ပါ အကြောင်းအရာများသည် အလုံးစုံကျေနပ်စရာမဟုတ်သော်လည်း၊ ကန့်ကွက်မဲ ၁ မဲသာရှိပြီး အမြဲကန့်ကွက်နေကျနိုင်ငံများဖြစ်သော တရုတ် နှင့် ရုရှား နိုင်ငံများသည်ပင် ကြားနေအဖြစ်ရပ်တည်လာတာကိုတွေ့ရ၍ တိုးတက်မှုရှိလာသည်ဟု ပြောဆို၍ရကြောင်း၊ သို့သော် အိမ်နီးချင်း ၅ နိုင်ငံလုံး ကြားနေအဖြစ်သာရပ်တည်ခဲ့သည်ကို တွေ့ရကြောင်း၊ သို့ဖြစ်ပါ၍ နိုင်ငံတကာရေးရာနှင့် ပတ်သတ်ပြီး အိမ်နီးချင်းနိုင်ငံများနှင့် ဆက်ဆံရေးတွင် NUG အစိုးရအနေနှင့် ခိုင်မာသောမူဝါဒများစနစ်တကျ ထားရှိရန်လိုအပ်ကြောင်း၊ နိုင်ငံတကာအနေနှင့်လည်း ပြည်သူ၏ အပြည့်အဝအာဏာအပ်နှင်းခြင်းခံထားရသော အမျိုးသား ညီညွတ်ရေးအစိုးရကို အပြည့်အဝထောက်ခံမှု ပေးရန်လိုအပ်သလို၊ လက်နက်အားကိုးဖြင့် တရားမဝင် အာဏာလုယူထားသော အကြမ်းဖက်စစ်ကောင်စီကို လုံး၀ အသိအမှတ်မပြုရန်လိုအပ်ပါကြောင်း၊ အသက်မပြည့်သေးသောကလေးငယ်များ အကြမ်းဖက်စစ်ကောင်စီ၏ သတ်ဖြတ်ခြင်းခံနေရခြင်း၊ ည ဖမ်းပြီး မနက်အလောင်းလာထုတ်ခိုင်းသောကိစ္စများ ကြားသိရခြင်းအတွက် အလွန် စိတ်ထိခိုက်ရကြောင်း၊ ပြည်သူများနေ့စဉ် မလုံမခြုံဖြစ်နေရသော၊ တရားမဲ့ပြုကျင့်ခြင်းများခံနေရသော ကိစ္စများအတွက် အမျိုးသား ညီညွတ်ရေးအစိုးရအနေဖြင့် အကြမ်းဖက်စစ်ကောင်စီကိုဖြုတ်ချနိုင်ရေးအတွက် ပိုမိုကြိုးစားရမည်ဖြစ်ကြောင်း၊ အရင်တပတ် အစိုးရအဖွဲ့အစည်းအဝေးတွင် ဆွေးနွေးဆုံးဖြတ်ထားသောကိစ္စများအား သက်ဆိုင်ရာ ဝန်ကြီးဌာနများမှ ပြီးစီးမှုအခြေအနေများတင်ပြပေးရန်များ ပြောကြားခဲ့ပြီး ဆက်သွယ်ရေး၊ သတင်းအချက်အလက်နှင့် နည်ပညာဝန်ကြီးဌာနနှင့် လျှပ်စစ်နှင့်စွမ်းအင်ဝန်ကြီးဌာနတို့မှတင်ပြထားသော မူဝါဒ လုပ်ငန်းစဉ်နှင့် ဝန်ကြီးဌာန Logo များကို အတည်ပြုပေးခဲ့ပါတယ်။ဆက်လက်ပြီး ဝန်ကြီးများ ၊ဒုဝန်ကြီးများမှ မိမိတို့သက်ဆိုင်ရာဝန်ကြီးဌာနများနှင့်ပါတ်သတ်၍  ဆွေးနွေးတင်ပြကြရာ စီမံကိန်း၊ ဘဏ္ဍာရေးနှင့် ရင်းနှီးမြှပ်နှံမှုဝန်ကြီးဌာနမှ စာရင်းစစ်ချုပ်ခန့်အပ်ရန် နာမည်စာရင်းတင်သွင်းခြင်း၊ ဖက်ဒရယ်ရေးရာ ဝန်ကြီးဌာနမှ NUCC လုပ်ဆောင်နေမှုများနှင့် ပတ်သတ်၍ ရှင်းလင်းခြင်း၊ လူသားချင်းစာနာထောက်ထားမှုနှင့် သဘာဝဘေးအန္တရယ်စီမံခန့်ခွဲမှုဝန်ကြီးဌာနမှ နိုင်ငံတကာမှ လူသားချင်းစာနာထောက်ထားမှုအကူအညီများရရန်ကိစ္စများဆွေးနွေးတင်ပြသွားကြပါတယ်။

ပြည်ထောင်စုသမ္မတမြန်မာနိုင်ငံတော် အမျိုးသားညီညွတ်ရေးအစိုးရအဖွဲ့ ပုံမှန်အစည်းအဝေး အမှတ်စဉ် (၁၀/၂၀၂၁) ပြုလုပ်၁၅ ဇွန် ၂၀၂၁-----------------------------------------အမျိုးသားညီညွတ်ရေးအစိုးရအဖွဲ့ အစည်းအဝေး (၁၀/၂၀၂၁) ကို ယနေ့ဇွန်လ ၁၅ ရက်နေ့တွင် ကျင်းပခဲ့ရာ ဒုတိယ သမ္မတ ဒူဝါလရှီလ၊ ပြည်ထောင်စုဝန်ကြီးချုပ် မန်းဝင်းခိုင်သန်းနှင့် ဝန်ကြီးများ ၊ ဒုဝန်ကြီးများ တက်ရောက်ခဲ့ကြသည်။ အစည်းအဝေးတွင် ဒုတိယသမ္မတ နှင့် ပြည်ထောင်စုဝန်ကြီးချုပ်တို့က အမှာစကားများအသီးသီးပြောကြားကြရာ…..ဒုတိယ သမ္မတက G 7 အစည်းအဝေးက ထွက်ပေါ်လာချက်တွေဟာ အကျိုးရှိပေမယ့် ပိုမိုထိရောက်မှုရှိရန် လိုကြောင်း။ နိုင်ငံတကာ ထိတွေ့ဆက်ဆံမှုတွေအပိုင်းမှာ ပိုမို အားကောင်းလာတာ ကိုတွေ့ရကြောင်း၊ တော်လှန်ရေးအတွက် ပြည်သူတွေက ညီညီညွတ်ညွတ်ကြိုးစားနေကြသလို အစိုးရအဖွဲ့အနေနဲ့ လည်း ညီညွတ်တဲ့အစိုးရဖြစ်ဖို့ပိုမို အားစိုက်ဖို့လိုကြောင်းပြောကြားခဲ့ပြီး၊ပြည်ထောင်စု ဝန်ကြီးချုပ်က မနက်ဖြန်ဆိုလျှင် အမျိုးသားညီညွတ်ရေး အစိုးရအဖွဲ့ရဲ့သက်တမ်းဟာ ၂ လပြည့်ပြီဖြစ်ကြောင်း၊  ၂ လ အတွင်း အစိုးရအဖွဲ့ဝင် ဝန်ကြီးများ ကြိုးစားဆောင်ရွက်နေကြသော်လည်း ပြည်သူများ နေ့စဉ်ခံစားနေရတဲ့ဒုက္ခများက ကြီးမားလွန်း၍ အစိုးရအဖွဲ့အနေဖြင့် လုပ်ဆောင်ချက်များကို ယခုထက်ပို၍ မြန်မြန်ဆန်ဆန် ရလဒ်များထွက်အောင်လုပ်ဆောင်စေချင်ကြောင်း၊ တချို့ကိစ္စများတွင် NUG အနေဖြင့်  အကြမ်းဖက်စစ်ကောင်စီကို အမြစ်ပြတ်ချေမှုန်းနိုင်ရေးအတွက် အားသွန်ခွန်စိုက်ဆောင်ရွက်နေတာတွေရှိသော်လည်း ပြည်သူများကို အကုန်ချပြ၍ မရသေးတာတွေရှိနေ တာကြောင့်  ပြည်သူများဘက်ကကြည့်လျှင် အားမလိုအားမရဖြစ်နေတာများကိုလည်းတွေ့ရကြောင်း၊ အမျိုးသားညီညွတ်ရေးအစိုးရအနေနဲ့ပြည်သူများအတွက် စာနာထောက်ထားမှုအကူအညီများ ကူညီထောက်ပံ့ ခြင်းကိုပင် ဖျက်လိုဖျက်စီးလုပ်နေသော အကြမ်းဖက်စစ်ကောင်စီရဲ့လုပ်ရပ်များဟာ ဆိုးဝါးလွန်းလှကြောင်းကို ဇွန်လ ၁၀ ရက်နေ့က ဖြစ်ပွားခဲ့သော မိုးဗြဲမြို့နယ်ဖြစ်စဉ်တွင် တွေ့နိုင်ကြောင်း၊ ဒီလိုကိစ္စရပ်တွေ အတွက်သက်ဆိုင်ရာဝန်ကြီးဌာနအနေဖြင့်လည်း နိုင်ငံတကာကပါ သိအောင် ဆောင်ရွက်ပေးဖို့တိုက်တွန်း ကြောင်း၊ ဇွန်လ ၁၂ ရက်နဲ့၁၃ ရက်များတွင် ကမ္ဘာလုံးဆိုင်ရာ မြန်မာ့နွေဦးတော်လှန်ရေးနေ့များအဖြစ် ကမ္ဘာ့နိုင်ငံ ၂၀ကျော် ပြည်ပရောက်မြန်မာများနှင့် နိုင်ငံတကာမှ တရားမျှတမှုကိုလိုလားသော၊ ဒီမိုကရေစီကို ချသ်မြတ်နိုးသောမိတ်ဆွေတွေပူးပေါင်းပြီး ဆန္ဒပြပွဲတွေဆောင်ရွက်ခဲ့တယ်လို့သိရတဲ့အတွက် အထူးကျေးဇူး တင်ကြောင်း စသဖြင့် ပြောကြားခဲ့ကြသည်။ ဆက်လက်၍ ဝန်ကြီးများ ၊ ဒုဝန်ကြီးများက မိမိတို့သက်ဆိုင်ရာ ဝန်ကြီးဌာနများနှင့် ပါတ်သတ်၍ ဆွေးနွေးတင်ပြကြရာ ကာကွယ်ရေးဝန်ကြီးဌာနက PDF ထူထောင်နေခြင်းကိစ္စများ နှင့် Federal Alliance များလုပ်ဆောင်နေခြင်းကိစ္စများ၊ စီမံဘဏ္ဍာဝန်ကြီးဌာနမှ ပြည်သူ့ကြွေးမြီ စီမံခန့်ခွဲသည့် ဥပဒေပြင်ဆင်ခြင်း ကိစ္စ၊သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနမှ ဖက်ဒရယ်သယံဇာတမူဝါဒရေးဆွဲရေး လုပ်ငန်းစဉ်ကိစ္စများဆွေးနွေးကြပြီး လျှပ်စစ်နှင့် စွမ်းအင်ဝန်ကြီးဌာနနှင့် ဆက်သွယ်ရေး၊သတင်းအချက် အလက်နှင့် နည်းပညာဝန်ကြီးဌာန များမှ ဝန်ကြီးဌာန Logo နှင့် ဖွဲ့စည်းပုံများအား အသီးသီးတင်ပြခဲ့ကြသည်။

အမျိုးသားညီညွတ်ရေးအစိုးရ၊ ဖက်ဒရယ်ပြည်ထောင်စုရေးရာဝန်ကြီးဌာနမှ "Federal Dialogue Series” ဆွေးနွေးပွဲအား ကျင်းပလုပ်ဆောင်လျက်ရှိရာ ၂၀၂၁ ခုနှစ် ဩဂုတ်လ (၅) ရက်နေ့တွင် ဒုတိယနေ့အဖြစ် Prof. Dr. David Williams (Indiana University Bloomington) မှ ဦးဆောင်ဆွေးနွေးပြီး ဝန်ကြီးဌာနအသီးသီးမှ ပါဝင်တက်ရောက်သူများက တက်ရောက်ဆွေးနွေးခဲ့ပါသည်။ "Federal Dialogue Series” ဆွေးနွေးပွဲတတိယနေ့ကို ၂၀၂၁ ခုနှစ် သြဂုတ်လ (၁၂) ရက်နေ့တွင် ဆက်လက်ကျင်းပမည်ဖြစ်ပါသည်။

ဖက်ဒရယ်ပြည်ထောင်စုရေးရာဝန်ကြီးဌာန၏ ပထမအကြိမ်အစည်းအဝေးကို ၂၀၂၁ ခုနှစ် ဧပြီလ (၂၂) ရက်နေ့ မနက် (၁၁း၀၀) နာရီတွင် ကျင်းပပြုလုပ်ခဲ့သည်။ အစည်းအဝေးသို့ ပြည်ထောင်စုဝန်ကြီး ဒေါက်တာလျန်မှုန်းဆာခေါင်း၊ ဒုတိယဝန်ကြီးများဖြစ်ကြသည့် ဦးချစ်ထွန်းနှင့် မိုင်းဝင်းထူးတို့ တက်ရောက်ကြသည်။ အဆိုပါအစည်းအဝေးတွင် ဖက်ဒရယ်ပြည်ထောင်စုရေးရာဝန်ကြီးဌာန၏ ပထမ (၆) လ အတွက် လုပ်ငန်းစီမံချက်ကို ရေးဆွဲခဲ့ကြသည်။