အမျိုးသားညီညွတ်ရေးအစိုးရဖွဲ့စည်းခြင်း (၃) နှစ်ပြည့် ထုတ်ပြန်ကြေညာချက်
ပြည်ထောင်စုသမ္မတမြန်မာနိုင်ငံတော်
အမျိုးသားညီညွတ်ရေးအစိုးရ
https://nugmyanmar.org
“အမျိုးသားညီညွတ်ရေးအစိုးရဖွဲ့စည်းခြင်း (၃) နှစ်ပြည့် ထုတ်ပြန်ကြေညာချက်”
၂၀၂၄ ခုနှစ်၊ ဧပြီလ ၃၀ ရက်
အမျိုးသားညီညွတ်ရေးအစိုးရသည် စတင်ဖွဲ့စည်းခဲ့သည့်အချိန်မှစ၍ ပြည်ထောင်စုမျှော်ရည်ချက်ဖြစ်သော လွတ်လပ်မှု၊ တရားမျှတမှု၊ တန်းတူညီမျှမှုကို အာမခံပြီး ငြိမ်းချမ်းသည့် ဖက်ဒရယ်ဒီမိုကရေစီ ပြည်ထောင်စုတည်ဆောက်ရေးကို ဖော်ဆောင်နိုင်ရန်အတွက် စစ်အာဏာရှင်စနစ်အပါအဝင် အာဏာရှင်စနစ်မှန်သမျှ ပပျောက်ရေးကို မြန်မာနိုင်ငံ၏ တရားဝင် အစိုးရတရပ်အနေဖြင့် တော်လှန်ရေးအင်အားစုအသီးသီးနှင့် ပူးပေါင်းကာ တာဝန်ယူမှု တာဝန်ခံမှုရှိစွာဖြင့် တစိုက်မတ်မတ် ကြိုးပမ်းအားထုတ်ခဲ့သည်။
အမျိုးသားညီညွတ်ရေးအစိုးရ၏ (၃)နှစ်တာကာလအတွင်း ဆောင်ရွက်ချက်များအား အမျိုးသားညီညွတ်ရေးအစိုးရ ဖွဲ့စည်းခြင်း (၃) နှစ်ပြည့်နေ့ဖြစ်သော ၂၀၂၄ ခုနှစ် ဧပြီလ (၁၆) ရက်နေ့တွင် အစိုးရ၏ သတင်းထုတ်ပြန်ရေး လမ်းကြောင်းများမှတဆင့် ပြည်သူသို့ အစီရင်ခံခဲ့ပြီးဖြစ်သည်။ ထို့အတူ ပြည်ထောင်စုလွှတ်တော် ကိုယ်စားပြုကော်မတီ(CRPH)က ၂၀၂၄ ခုနှစ်၊ ဖေဖော်ဝါရီလ ၁ ရက်နေ့ နှင့် ၂ ရက်နေ့တို့တွင် ကျင်းပပြုလုပ်ခဲ့သော ဆဋ္ဌမအကြိမ်မြောက် ပြည်ထောင်စုလွှတ်တော်အစည်းအဝေးနှင့် အမျိုးသားညီညွတ်ရေးအတိုင်ပင်ခံကောင်စီ (NUCC) က ၂၀၂၄ ခုနှစ်၊ ဧပြီလ (၄) ရက်နေ့မှ (၉) ရက်နေ့အထိ ကျင်းပခဲ့သည့် ဒုတိယအကြိမ်၊ ပြည်သူ့ညီလာခံတို့တွင် အမျိုးသားညီညွတ်ရေး အစိုးရအနေဖြင့် (၃) နှစ်တာ လုပ်ကိုင်ဆောင်ရွက်မှုများနှင့် ပတ်သက်သည့် အစီရင်ခံစာကို တင်သွင်းခဲ့ပါသည်။
နိုင်ငံရေးကဏ္ဍ
နိုင်ငံရေးကဏ္ဍအနေဖြင့် တော်လှန်ရေးအောင်မြင်ရန် အင်အားစုများ အားလုံးအကြား စုစည်းညီညွတ်စွာဖြင့် ပူးပေါင်း ဆောင်ရွက်နိုင်ရေးအတွက် နိုင်ငံရေးဘုံရည်မှန်းချက်များ ပိုမိုအားကောင်းခိုင်မာစေရန် ကြိုးပမ်းဆောင်ရွက်လျက် ရှိပါသည်။ ၂၀၂၄ ခုနှစ် ဇန်နဝါရီလ ၃၁ ရက်နေ့တွင် "စစ်အာဏာရှင်စနစ်ချုပ်ငြိမ်းရေး နှင့် ဖက်ဒရယ် ဒီမိုကရေစီ ပြည်ထောင်စု တည်ဆောက်ရေးအတွက် အတူတကွ လက်တွဲတော်လှန် တိုက်ပွဲဝင်နေကြသော အဖွဲ့များ၏ ဘုံသဘောထားရပ်တည်ချက်" တရပ်ထုတ်ပြန်ပြီး တော်လှန်ရေးအင်အားစုများ၏ မျှော်မှန်းချက်၊ ဦးတည်ချက်၊ ရပ်တည်ချက်များနှင့် လုပ်ငန်းစဉ်အဆင့်ဆင့်တို့ကို ပြည်သူသို့ အသိပေးနိုင်ခဲ့သည်။
နိုင်ငံတကာဆက်ဆံရေးကဏ္ဍ
နိုင်ငံတကာဆက်ဆံရေးကဏ္ဍတွင် တော်လှန်ရေးအင်အားစုများ၏ စစ်အာဏာရှင်ဆန့်ကျင်မှု လုပ်ငန်းများကို နိုင်ငံတကာ အသိုင်းအဝိုင်းက ထောက်ခံအားပေးကူညီလာရန်နှင့် အကြမ်းဖက်စစ်အုပ်စုအား ထောက်ခံမှု၊ အားပေးကူညီမှုများ မရှိစေရန်နှင့် တရားဝင်မှု မရစေရန် နည်းမျိုးစုံဖြင့် ကြိုးပမ်းဆောင်ရွက်ခဲ့ပါသည်။ ဤသို့ကြိုးပမ်းရာတွင် နိုင်ငံအသီးသီးမှ အစိုးရများ၊ လွှတ်တော်များ၊ ကုလသမဂ္ဂ အပါအဝင် နိုင်ငံတကာ အဖွဲ့အစည်းများ၊ ASEAN , EU အစရှိသည့် ဒေသဆိုင်ရာနိုင်ငံများ၏ အဖွဲ့အစည်းများ၊ ဒေသတွင်းနှင့် အိမ်နီးချင်းနိုင်ငံများနှင့် ချဥ်းကပ် ဆက်ဆံ၍ နည်းလမ်းအမျိုးမျိုးဖြင့် ပူးပေါင်းဆောင်ရွက်နိုင်ရန် ကြိုးပမ်းခဲ့ပါသည်။ စစ်အုပ်စု၏ ရက်စက် ကြမ်းကြုတ်သော ရာဇဝတ်မှု ကျူးလွန်မှုများအတွက် တရားမျှတမှု ရှာဖွေရန်နှင့် စီးပွားရေး၊ ဘဏ္ဍာရေး၊ သံတမန်ရေးအရ အရေးယူနိုင်ရန်လည်း လူထုအခြေပြုအဖွဲ့အစည်းများ၊ နိုင်ငံတကာအဖွဲ့အစည်းများ၊ နိုင်ငံအသီးသီးမှ မြန်မာနွယ်ဖွား တက်ကြွလှုပ်ရှားသူများနှင့် အတူတကွ ပူးပေါင်း ဆောင်ရွက်နိုင်ခဲ့ပါသည်။ နိုင်ငံတကာမှ မိမိတို့တော်လှန်ရေးအတွက် အကူအညီများရရှိရန်လည်း နိုင်ငံတကာ အကူအညီပေးရေး အဖွဲ့များနှင့် ဆက်သွယ်ပြီး အဘက်ဘက်မှ ကြိုးပမ်းဆောင်ရွက်ခဲ့ပါသည်။
စစ်ရေးကဏ္ဍ
စစ်ရေးကဏ္ဍတွင် ၂၀၂၁ ခုနှစ် မေလ (၅) ရက်နေ့တွင် အနာဂတ်ဖက်ဒရယ်တပ်မတော်၏ အမြုတေအဖြစ် စတင် တည်ထောင်ခဲ့သော ပြည်သူ့ကာကွယ်ရေးတပ်မတော်သည် (၃) နှစ်တာကာလအတွင်း တိုင်းရင်းသား တော်လှန်ရေး အင်အားစုများနှင့် ပူးပေါင်းကာ စုဖွဲ့၊ ပြင်ဆင်၊ လေ့ကျင်၊ တိုက်ပွဲဝင်ခဲ့ရာမှ လက်ရှိကာလတွင် မဟာဗျူဟာမြောက် ထိုးစစ်များကို စတင်ဖော်ဆောင်လာနိုင်သည့် အခြေအနေသို့ ရောက်ရှိခဲ့ပြီဖြစ်သည်။ စစ်ရေးမဟာဗျူဟာများကို ပူးပေါင်းခင်းကျင်း ဆောင်ရွက်နိုင်ရန်အတွက် တိုင်းရင်းသားမဟာမိတ် တော်လှန်ရေး အင်အားစု များနှင့် ဗဟိုကွပ်ကဲရေးနှင့်ပေါင်းစပ်ညှိနှိုင်းရေးကော်မတီ(C3C)၊ (J2C) စသည့် ကော်မတီများဖွဲ့စည်းကာ ချိတ်ဆက် ဆောင်ရွက်လျက်ရှိသည်။ အမျိုးသားညီညွတ်ရေးအစိုးရနှင့် တိုင်းရင်းသားတော်လှန်ရေးအင်အားစုများသည် နယ်စပ်ကုန်သွယ်ရေးမြို့ (၅) မြို့အပါအဝင် မြန်မာတနိုင်ငံလုံး၏ (၆၀) ရာခိုင်နှုန်းကျော်ကို စိုးမိုးထိန်းချုပ်ထားနိုင်ပြီဖြစ်ပြီး အဓိကကျသော စစ်ရေးပစ်မှတ်များဖြစ်သည့် နေပြည်တော်၊ ပြင်ဦးလွင် ၊ ကပစလက်နက်ထုတ်စက်ရုံများ စသည်တို့ကို ထိုးဖောက်တိုက်ခိုက်နိုင်ခဲ့သည်။
အုပ်ချုပ်ရေးကဏ္ဍ
အုပ်ချုပ်ရေးကဏ္ဍတွင် အမျိုးသားညီညွတ်ရေးအစိုးရသည် စိုးမိုးထိန်းချုပ်ထားသော ဒေသများတွင် ပြည်သူလူထု၏ လုံခြုံရေးအတွက် ပြည်သူ့ကာကွယ်ရေးအဖွဲ့(ပကဖ)၊ ပြည်သူ့လုံခြုံရေးအဖွဲ့(ပလဖ)တို့ကို ဖွဲ့စည်း ဆောင်ရွက်လျက်ရှိပြီး အာဏာလေဟာနယ် မပေါ်ပေါက်စေရေးနှင့် တရားဥပဒေစိုးမိုးရေးအတွက် ပြည်သူ့အုပ်ချုပ်ရေးအဖွဲ့(ပအဖ) အဆင့်ဆင့်နှင့် တရားရေးဌာနအဆင့်ဆင့်ကို ဖွဲ့စည်းဆောင်ရွက်ကာ သက်ဆိုင်ရာဝန်ကြီးဌာနများကလည်း ပြည်သူ့ဝန်ဆောင်မှု ပေးရေးလုပ်ငန်းများကို အရှိန်အဟုန်ဖြင့် ဖြည့်ဆည်းဆောင်ရွက်လျက်ရှိသည်။ တိုင်းရင်းသား တော်လှန်ရေး အင်အားစုများ ဖော်ဆောင်နေသော ပြည်နယ်အဆင့် အုပ်ချုပ်ရေးလုပ်ငန်းစဉ်များနှင့်လည်း Federal and State Coordination Commission (FSCC) ကိုဖွဲ့စည်း၍ ပူးပေါင်းဆောင်ရွက်လျက်ရှိသည်။
ဘဏ္ဍာရေးကဏ္ဍ
ဘဏ္ဍာရေးကဏ္ဍတွင်လည်း “ဖက်ဆစ်ဝင်ငွေဖြတ်တောက် ပြည်သူ့ဘဏ္ဍာ တည်ဆောက်” ဟူသည့် ဆောင်ပုဒ်ကို လက်ကိုင်ထား၍ အကြမ်းဖက်စစ်အုပ်စုထံစီးဝင်နေသော ဘဏ္ဍာငွေများကို နည်းလမ်းပေါင်းစုံဖြင့် ဖြတ်တောက်ခြင်း၊ တော်လှန်ရေးအတွက်လိုအပ်သော ဘဏ္ဍာငွေများကို ရှာဖွေခြင်းတို့ကို စဉ်ဆက်မပြတ်ဆောင်ရွက်ခဲ့သည်။ စီမံကိန်း၊ ဘဏ္ဍာရေးနှင့် ရင်းနှီးမြှုပ်နှံမှု ဝန်ကြီးဌာနမှ တာဝန်ယူဆောင်ရွက်လျက်ရှိသော လုပ်ငန်းများမှ -
(က) အောင်လံလွှင့်ချီ နွေဦးထီ (ဩဂုတ်လ ၂၀၂၁ မှ ဒီဇင်ဘာ ၂၀၂၃ အထိ CDM ဝန်ထမ်းများအား ကျပ် ၄၃၆.၇၈၉ သန်း - အမေရိကန်ဒေါ်လာ ၁၁၁,၇၀၀ ထောက်ပံ့ပေးခဲ့)
(ခ) NUG အစိုးရထိမ်းချုပ် မြို့နယ် ၄၂ မြို့နယ်မှ ၂၀၂၃ ခုနှစ်အတွင်း အခွန်ကောက်ခံရရှိမှု ကျပ်သန်းပေါင်း ၈၉,၈၈၄ သန်း - အမေရိကန်ဒေါ်လာ ၂၂.၉၈သန်း
(ဂ) အထူးငွေတိုက်စာချုပ်များ ဒီဇင်ဘာ ၂၀၂၁ မှ ဒီဇင်ဘာ ၂၀၂၃ အထိ အမေရိကန်ဒေါ်လာ ၄၄သန်းကျော်
(ဃ) End of Dictatorship/Early Partnership Scheme မှ ဒီဇင်ဘာ ၂၀၂၃ အထိ အမေရိကန်ဒေါ်လာ ၉၇သန်းကျော်
(င) Spring Development Bank ငွေစုရောင်းချရငွေ အမေရိကန်ဒေါ်လာ ၁၁.၈ သန်း ရရှိခဲ့ပြီး
(စ)NUG pay စနစ်ဖြင့် အမေရိကန်ဒေါ်လာ သန်း ၃၀၀ ကျော်နဲ့ ညီမျှသော ငွေကြေးစီးဆင်းမှုကို တော်လှန်ရေးအတွက် ထောက်ကူဆောင်ရွက်နိုင်ခဲ့ပါသည်။
စဉ်ဆက်မပြတ် ထည့်ဝင်ပံ့ပိုးနေကြသော ပြည်သူလူထုထံ ဝန်မပိစေသည့် ဘဏ္ဍာငွေရရှိရေးလမ်းကြောင်းများကို ရှာဖွေ ဖော်ထုတ်လျက်ရှိပြီး စိုးမိုးထိန်းချုပ်နယ်မြေများမှ ရရှိသော အခွန်ဘဏ္ဍာငွေများကိုလည်း တာဝန်ယူမှု၊တာဝန်ခံမှု အပြည့်ဖြင့် စီမံခန့်ခွဲသုံးစွဲလျက်ရှိသည်။
လူထုဆက်ဆံရေးကဏ္ဍ
လူထုဆက်ဆံရေးကဏ္ဍအားဖြင့်လည်း အမျိုးသားညီညွတ်ရေးအစိုးရအဖွဲ့၏ ဆောင်ရွက်ချက်များနှင့် တော်လှန်ရေးနှင့် ပတ်သက်သည့် သတင်းအချက်အလက်၊ အကြောင်းအရာများကို ပြည်သူလူထု စဉ်ဆက်မပြတ်သိရှိနေစေရန်အတွက် လွတ်လပ်ပြီး အမီအခိုကင်းသော သတင်းမီဒီယာများနှင့် ထိတွေ့ကာဆောင်ရွက်နေသကဲ့သို့ ရုပ်သံ၊ ရေဒီယို၊ ဝပ်ဆိုဒ် လူမှုကွန်ယက်စာမျက်နှာ၊ အပတ်စဉ်စာစောင် စသဖြင့် လမ်းကြောင်းမျိုးစုံမှနေ၍ ပြည်သူလူထုအား ထုတ်ပြန် အစီရင်ခံလျက်ရှိပါသည်။
အမျိုးသားညီညွတ်ရေးအစိုးရအနေဖြင့် ဖြတ်သန်းခဲ့ပြီးသော (၃) နှစ်တာကာလ၏ အားသာချက်၊ အားနည်းချက်၊ အခွင့်အလမ်း၊ စိန်ခေါ်မှုများကို ပြန်လည်သုံးသပ်ပြီး သင်ခန်းစာများရယူကာ ပြည်သူလူထုလိုလားတောင့်တနေသော တော်လှန်ရေးကို အောင်ပွဲနှင့်အတူ အပြီးပြတ် အဆုံးသတ်နိုင်ရေးအတွက် တော်လှန်ရေး အင်အားစုများ အားလုံးနှင့် လက်တွဲကာ ဆက်လက်ကြိုးပမ်းသွားမည်ဖြစ်ကြောင်း ပြည်သူလူထုအား ကတိသစ္စာပြုလျက် အစီရင်ခံတင်ပြ အပ်ပါသည်။ ယခုအခါ စစ်ကောင်စီသည် လုံးဝယိုင်နဲ့နေပြီး၊ အဆုံးသတ်ပြိုလဲရန်သာ ကျန်တော့သည့်အတွက် အမျိုးသားညီညွတ်ရေးအစိုးရ နှင့် တော်လှန်ရေးအင်အားစုများအားလုံးနှင့်အတူ ဤအဆုံးသတ်တိုက်ပွဲတွင် ကိုယ်စွမ်းဉာဏ်စွမ်းရှိသမျှ အရှိန်အဟုန်မြှင့်ကာ ဆက်လက်တိုက်ပွဲဝင်သွားရန် ပြည်သူလူထုတရပ်လုံးအားလည်း တိုက်တွန်းနှိုးဆော်အပ်ပါသည်။
အမျိုးသားညီညွတ်ရေးအစိုးရ
မှတ်ချက် - အမျိုးသားညီညွတ်ရေးအစိုးရ (၃) နှစ်ပြည့် နှင့်သက်ဆိုင်သော လိုအပ်သည့် သတင်းအချက်အလက်များကို ပူးတွဲထုတ်ပြန်အပ်ပါသည်
(၁) "ဆဋ္ဌမအကြိမ်မြောက် ပြည်ထောင်စုလွှတ်တော်အစည်းအဝေးသို့ အမျိုးသားညီညွတ်ရေးအစိုးရမှ တင်သွင်းသည့် အစီရင်ခံစာ”
https://go.nugmyanmar.org/a64a79a0
(၂) ကြားကာလဒေသန္တရအုပ်ချုပ်ရေးနှင့် ပြည်သူ့ဝန်ဆောင်မှုများ ဆောင်ရွက်မှုဆိုင်ရာ အစီရင်ခံစာ
https://go.nugmyanmar.org/fcb8f866
(၃) "စစ်အာဏာရှင်စနစ်ချုပ်ငြိမ်းရေး နှင့် ဖက်ဒရယ်ဒီမိုကရေစီပြည်ထောင်စု တည်ဆောက်ရေးအတွက် အတူတကွ လက်တွဲတော်လှန် တိုက်ပွဲဝင်နေကြသော အဖွဲ့များ၏ ဘုံသဘောထားရပ်တည်ချက်”
https://go.nugmyanmar.org/da9e1ea9
(၄) အမျိုးသားညီညွတ်ရေးအစိုးရဖွဲ့စည်းခြင်း (၃) နှစ်ပြည့် ပြည်ထောင်စုဝန်ကြီးချုပ်၏ မိန့်ခွန်း
https://go.nugmyanmar.org/bd041e1e
(၅) အမျိုးသားညီညွတ်ရေးအစိုးရဖွဲ့စည်းခြင်း (၃) နှစ်ပြည့် ဝန်ကြီးဌာနများ၏ ပြည်သူသို့ အစီရင်ခံချက်များ
