ကြားကာလဒေသန္တရ ပြည်သူ့အုပ်ချုပ်ရေးဖော်ဆောင်မှု ဗဟိုကော်မတီ အစည်းအဝေး အမှတ်စဉ် (၂၅/၂၀၂၄)ကျင်းပပြုလုပ်၂၀၂၄ ခုနှစ်၊ ဇူလိုင်လ (၁၁) ရက်အမျိုးသားညီညွတ်ရေးအစိုးရ၊ ကြားကာလဒေသန္တရပြည်သူ့အုပ်ချုပ်ရေးဖော်ဆောင်မှု ဗဟိုကော်မတီ အစည်းအဝေး အမှတ်စဉ် (၂၅/၂၀၂၄) ကို ယနေ့ နံနက်(၁၀:၀၀)နာရီအချိန်တွင် ကျင်းပပြုလုပ်ခဲ့ရာ အစည်းအဝေးတွင် ကြားကာလဒေသန္တရပြည်သူ့အုပ်ချုပ်ရေးဖော် ဆောင်မှုဗဟိုကော်မတီ ဥက္ကဋ္ဌ ပြည်ထောင်စုဝန်ကြီးချုပ် မန်းဝင်းခိုင်သန်းမှ အဖွင့်အမှာ စကားပြောကြားခဲ့သည်။ပြည်ထောင်စုဝန်ကြီးချုပ်မှ အဖွင့်အမှာစကားပြောကြားရာတွင် "အကြမ်းဖက်စစ်ကောင်စီပြုတ်ကျရေးကိုဘက်ပေါင်းစုံက တိုက်စစ်ဖွင့်ပြီး အရှိန်မြှင့် ဆောင်ရွက်နေကြချိန်မှာ အုပ်ချုပ်ရေး အဖွဲ့တွေအနေနဲ့ ထောက်ပို့ကဏ္ဍနဲ့ လူသားချင်းစာနာထောက်ထားမှုဆိုင်ရာ အကာအကွယ် နဲ့ အကူအညီတွေ ချက်ချင်းပေးအပ်နိုင်ရေးကဏ္ဍတွေကို ပိုပြီး ဦးစားပေးလုပ်ဆောင်ကြဖို့ အသင့် ရှိစေလိုပါကြောင်း။ ဒါ့အပြင် အရေးပေါ် ကျန်းမာရေးစောင့်ရှောက်မှုလုပ်ငန်းတွေအတွက်လည်း ပြင် ဆင်သင့် ပြင်ဆင်ထိုက်တာတွေကို သက်ဆိုင်ရာ ဝန်ကြီးဌာနရဲ့ ကြီးကြပ်ကွပ်ကဲမှုနဲ့ ဆောင်ရွက် ပေးဖို့ကို ညွှန်ကြားလိုပါကြောင်း။ ကျွန်တော်တို့အနေနဲ့ ဒီရက်ပိုင်း ဒေသအချို့မှာ ရေကြီးရေလျှံမှုတွေကလည်း ဖြစ်လာတာကြောင့် အရေးပေါ် ကယ်ဆယ်ထောက်ပံ့ရေးလုပ်ငန်းအတွက် ဆောင်ရွက်ပေးကြဖို့လည်း တိုက် တွန်းလိုပါကြောင်း။ အချို့ဒေသများမှာ စိုက်ခင်းတွေ ပါ ရေဘေးသင့်ကုန်တာကြောင့် စိုက်ခင်းတွေ ပျက်စီးကြသလို သိုလှောင်ထားကြတဲ့ မျိုးစေ့တွေ လည်း ပျက်စီးဆုံးရှုံးကုန်မှာဖြစ်ပါကြောင်း။ ဒါ့ကြောင့် ရေပြန်ကျတဲ့အခါမှာ မူလအတိုင်း ပြန်လည်စိုက် ပျိုးနိုင်ကြဖို့ လိုအပ်တဲ့ မျိုးစေ့ ထောက်ပံ့မှုတွေကိုလည်း လုပ်ဆောင်ပေးဖို့ စိုက်ပျိုးရေးဌာနဘက် ကလည်း စဥ်းစားထားဖို့လိုမှာ ဖြစ်ပါကြောင်း" ပြောကြားရင်း နိဂုံးချုပ်ခဲ့ပါသည်။ဆက်လက်ပြီး တက်ရောက်လာကြသော ကြားကာလဒေသန္တရပြည်သူ့အုပ်ချုပ်ရေးဖော် ဆောင်မှု ဗဟိုကော်မတီအဖွဲ့ဝင်များမှ (၂၄/၂၀၂၄) တွင်ချမှတ်ထားသော ဆုံးဖြတ်ချက်၊ ရှေ့လုပ်ငန်း စဉ်များနှင့်ပတ်သက်၍ ပြီးစီးမှုအခြေအနေများနှင့် ဆက်လက်ဆောင်ရွက်ရန် ကျန်ရှိနေသည့် လုပ်ငန်းစဉ်များကို ချပြရှင်းလင်းပြီး တက်ရောက်လာသော တာဝန်ရှိသူများမှ အကျယ်တဝင့် ဆွေးနွေးခဲ့ကြပါသည်။အဆိုပါအစည်းအဝေးသို့ ပြည်ထောင်စုဝန်ကြီးချုပ် မန်းဝင်းခိုင်သန်းဦးဆောင်ကာ ပြည်ထောင်စု ဝန်ကြီးများ၊ ဒုတိယဝန်ကြီးများ၊ အမြဲတမ်းအတွင်းဝန်များ၊ တွဲဖက်အတွင်းဝန်များ နှင့် ဌာနဆိုင်ရာ များမှ တာဝန်ရှိသူများ တက်ရောက်ခဲ့ကြပြီး အစည်းအဝေးကို နေ့လည်(၁:၃၀)နာရီအချိန် တွင်အောင်မြင်စွာရပ်နားခဲ့ပါသည်။

ပြည်ထောင်စုသမ္မတမြန်မာနိုင်ငံတော်အမျိုးသားညီညွတ်ရေးအစိုးရwww.nugmyanmar.org(၆၂) နှစ်မြောက် ဆဲဗင်းဂျူလိုင် ကျောင်းသားအရေးတော်ပုံနေ့ အခမ်းအနားသို့ အမျိုးသားညီညွတ်ရေးအစိုးရက ပေးပို့သည့် သဝဏ်လွှာ၂၀၂၄ ခုနှစ်၊ ဇူလိုင်လ ၇  ရက်ယနေ့ကျရောက်သည့် (၆၂) နှစ်မြောက် ဆဲဗင်းဂျူလိုင် ကျောင်းသားအရေးတော်ပုံနေ့တွင် ခေတ် အဆက်ဆက် စစ်အာဏာရှင်တော်လှန်ရေးအတွက် အသက်၊ သွေး၊ ချွေး စတေး ပေးဆပ်ခဲ့ကြသည့် ကျောင်းသားလူငယ်များကို အမျိုးသားညီညွတ်ရေးအစိုးရအနေဖြင့် အလေးအမြတ်ပြု ဦးညွှတ် အပ်ပါသည်။၁၉၆၂ ခုနှစ်၊ မတ်လ (၂) ရက်နေ့မှစ၍ အကြမ်းဖက်စစ်ခေါင်းဆောင် အာဏာရှင်နေဝင်း ဦးဆောင် သော စစ်အုပ်စုက လူထုရွေးကောက်တင်မြှောက်ထားသော အစိုးရအား လက်နက်အားကိုးဖြင့် ဖြုတ်ချခြင်း၊ တက္ကသိုလ်အက်ဥပဒေကို ဖျက်သိမ်း၍ ကျောင်းသားများကို ဖိနှိပ်ချုပ်ချယ်ခြင်း၊ ရန်ကုန်တက္ကသိုလ်နယ်မြေ အတွင်း သန္ဓေတည်ခဲ့သည့် ကျောင်းသားသမဂ္ဂ အဆောက်အဦးအား ဗုံးခွဲ ဖြိုချ ဖျက်ဆီးခြင်းများကို ရက်ရက်စက်စက် ကျူးလွန် လုပ်ဆောင်ခဲ့ကြပါသည်။ လွတ်လပ်ခြင်း၊ တန်းတူညီမျှခြင်း၊ တရားမျှတခြင်းနှင့် ဓမ္မတရားတို့အတွက် အစဉ်အမြဲအသင့်ရှိကာ အနိုင်ကျင့် ဖိနှိပ်မှုများကို ရဲရဲဝံ့ဝံ့ တော်လှန်ခဲ့ကြသည့် ကျောင်းသားလူငယ်များ၏ အခန်းကဏ္ဍအား မှေးမှိန်စေရန် ခေတ်အဆက်ဆက် စစ်အာဏာရှင်များက လုပ်ဆောင်ခဲ့ကြသော်လည်း “သမဂ္ဂအဆောက်အဦးကိုသာ ဖြိုလို့ရမယ်။ အမောင်တို့ရင်ထဲက သမဂ္ဂစိတ်ဓာတ်ကိုတော့ ဘယ်သူမှ ဖြိုလို့မရပါဘူး” ဟူသည့် သခင်ကိုယ်တော်မှိုင်းပြောကြားခဲ့သော စကားအတိုင်း  ကျောင်းသားလူငယ်တို့၏ သမဂ္ဂစိတ်ဓါတ်သည် ယနေ့တိုင် သမိုင်းတွင်ရှင်သန်ဆဲ ဖြစ်ပါသည်။ယခု ၂၀၂၁ ခုနှစ် ပြည်သူ့နွေဦးတော်လှန်ရေးတွင်လည်း မင်းအောင်လှိုင်ဦးဆောင်သော အကြမ်း ဖက်စစ်အုပ်စုသည် လူထုရွေးကောက်တင်မြှောက်ထားသော အစိုးရထံမှ အတင်းအဓမ္မ အာဏာလုယူရန်ကြိုးစားကာ ကျောင်းသား/သူများ၊ ရဟန်းရှင်လူများနှင့် တိုင်းရင်းသားလူမျိုးများ အားလုံးကို လက်နက်အားကိုးဖြင့် ခြိမ်းခြောက် ဖမ်းဆီး သတ်ဖြတ်ကာ အသက်အိုးအိမ် စည်းစိမ်များကိုလည်း မီးရှို့ ဖျက်ဆီးနေသည့် သမိုင်းတလျှောက် အရက်စက်ဆုံးသော ဖက်ဆစ်သရုပ်ကို ဖော်ညွှန်းနေသည့်ကာလတွင်လည်း ကျောင်းသားလူငယ်ထုသည် သမဂ္ဂစိတ်ဓါတ်ဖြင့် အချိန်မဆိုင်းပဲ ပြည်သူလူထုနှင့်အတူ ရှေ့တန်းမှ ရုန်းကုန်တော်လှန်ခဲ့ကြပေသည်။ ထိုကဲ့သို့ မျိုးဆက်သစ် ကျောင်းသား လူငယ်များ၏ စုစည်းညီညွတ်မှု၊ တီထွင်ဆန်းသစ်နိုင်မှုတို့အပြင် တိုင်းရင်းသား မဟာမိတ် တော်လှန်ရေး အင်အားစုတို့နှင့် ဟန်ချက်ညီညီ ပူးပေါင်းဆောင်ရွက်နိုင်မှုတို့ကြောင့် ရက်စက်ကြမ်းကြုတ်သည့် ဖက်ဆစ်ဝါဒ ပြန်လည်အသက်သွင်း နေသော စစ်အုပ်စုယန္တရား တဖြည်းဖြည်း ယိုယွင်း ပျက်စီးလာနေပြီ ဖြစ်ပါသည်။အမျိုးသားညီညွတ်ရေးအစိုးရအနေဖြင့်လည်း ခေတ်အဆက်ဆက် စစ်အာဏာရှင်စနစ် တိုက်ဖျက် ရေးတွင် ကျဆုံးသွားခဲ့ကြသော ကျောင်းသားလူငယ်များ၏ စွန့်လွှတ် အနစ်နာခံမှုများကို အောက်မေ့ သတိရလျက် လက်ရှိဆင်နွှဲနေသည့် ပြည်သူ့နွေဦးတော်လှန်ရေးကြီး အမြန်ဆုံး အောင်မြင်ပြီးမြောက်စေရန် နိုင်ငံတဝန်းရှိ မဟာမိတ် တိုင်းရင်းသားတော်လှန်ရေးတပ်ဖွဲ့များနှင့် ယခင်ကထက် ပိုမို ရင်းနှီး ပွင့်လင်းစွာ ပူးပေါင်းဆောင်ရွက်လျက်ရှိသလို အောင်ပွဲဆွတ်ခူးနိုင်ရန် ဆက်လက်၍ အစွမ်းကုန် ကြိုးပမ်း ဆောင်ရွက်သွားမည်ဖြစ်ပါကြောင်း သန္နိဋ္ဌာန်ပြုရင်း ဤ သဝဏ်လွှာအား ပေးပို့အပ်ပါသည်။အမျိုးသားညီညွတ်ရေးအစိုးရ

ကုလသမဂ္ဂလူ့အခွင့်အရေးကောင်စီ၅၆ ကြိမ်မြောက် အစည်းအဝေးစဉ် (၄) – မြန်မာနိုင်ငံဆိုင်ရာ လူ့အခွင့်အရေးဆိုင်ရာ အထူးစုံစမ်းစစ်ဆေးရေး အရာရှိ၏ အစီရင်ခံစာအပေါ် တုန့်ပြန်ချက်မြန်မာ၉ ၊ ဇူလိုင်လ ၊ ၂၀၂၄မြန်မာနိုင်ငံဆိုင်ရာ လူ့အခွင့်အရေးဆိုင်ရာ အထူးစုံစမ်းစစ်ဆေးရေး အရာရှိ မစ္စတာ တွမ်အင်ဒရူး၏ လူ့အခွင့်အရေးကောင်စီတွင် တင်ပြခဲ့သည့် အပြန်အလှန်တုံ့ပြန် ဆွေးနွေး အစီရင်ခံချက်ကို ပြည်ထောင်စုသမ္မတ မြန်မာနိုင်ငံက ကြိုဆိုအပ်ပါသည်။ အကြမ်းဖက်စစ်အုပ်စု၏ အာဏာသိမ်းရန် ကြိုးပမ်းမှုကြောင့် လိင်/လိင်စိတ် အခြေပြု ဆိုင်ရာ သက်ရောက်မှုများအကြောင်း၊ ဘဏ်များနှင့် နိုင်ငံတကာ အစိုးရများက အကြမ်းဖက် စစ်အုပ်စုကို ဆက်လက် ကူညီပံ့ပိုးနေမှုများအကြောင်း အစီရင်ခံ တင်ပြခဲ့သည့်အတွက် အထူးကျေးဇူးတင်ရှိပါသည်။ ပထမစာတမ်းတွင် “တော်လှန်ရေးအတွင်းက တော်လှန်ရေး၊ ပေါ်ထွက်လာ အုပ်ချုပ်ရေး ယန္တရားများ အတွင်းမှတဆင့် ဖိုဝါဒီကြီးစိုးမှုများကို တွန်းလှန်ခြင်း၊ တာဝန်ခံမှုကို တောင်းဆိုခြင်းနှင့် အနာဂတ် မျိုးဆက်များအတွက် တန်းတူညီမျှမှုနှင့် တရားမျှတမှုကို အာမခံခြင်းများ” အတွက် မရှိမဖြစ် အရေးပါသည့် အမျိုးသမီးခေါင်းဆောင်များ၏ အခန်းကဏ္ဍကို ဖော်ပြထားပါသည်။ ဒုတိယစာတမ်းတွင် အကြမ်းဖက်စစ်အုပ်စု၏ စစ်ဘက် သုံးပစ္စည်းများ ဝယ်ယူမှုအတွက် ငွေပေးချေမှုများတွင် ပံ့ပိုးကူညီနေသည့် နိုင်ငံခြား ဘဏ် ၁၆ ဘဏ်ကို ဖော်ထုတ်ထားပါသည်။ စာတမ်းနှစ်ခုစလုံးသည် မြန်မာပြည်သူပြည်သားများ၏ ရဲစွမ်းသတ္တိနှင့် ကြံကြံခံနိုင်မှုကို သော်လည်းကောင်း၊ အကြမ်းဖက်စစ်အုပ်စု၏ အရပ်သားများအပေါ် ဆိုးရွားပြင်းထန်သည့် ရာဇဝတ်မှုများ၊ အကြမ်းဖက်မှုများ၊ ချိုးဖောက်မှုများကို ရည်ရွယ်ချက်ရှိရှိ၊ ကျယ်ကျယ် ပြန့်ပြန့် နှင့် စနစ်တကျ ကျူးလွန်နေမှုများကိုသော်လည်းကောင်း မှတ်တမ်း တင်ထားသည့် အစီရင်ခံစာပေါင်းများစွာအနက် ထင်ရှားသော စာတမ်းများအဖြစ် မှတ်တမ်းဝင်နေမည် ဖြစ်ပါသည်။ ပြိုလဲပျက်စီးနေပြီး နယ်မြေ၊ ငွေကြေးနှင့် တရားဝင်မှု ခေါင်းပါးလျက် ရှိနေပြီဖြစ်သော သေရေးရှင်ရေးနှင့် ရင်ဆိုင်နေရသည့် အကြမ်းဖက် စစ်အုပ်စု အနေဖြင့် “အရပ်သား ပြည်သူများအပေါ် ရက်စက်စွာ တိုက်ခိုက်မှုများ နှစ်ဆတိုး ဆောင်ရွက် နေကြောင်း”  အထူးစုံစမ်းစစ်ဆေးရေးအရာရှိက ဖော်ပြခဲ့သည်။ လူ့အခွင့်အရေးဆိုင်ရာ အထူးစုံစမ်းစစ်ဆေးရေးအရာရှိ က လူ့အခွင့်အရေးကောင်စီ သို့ တင်ပြရာတွင် ရခိုင်ပြည်နယ်အတွင်းရှိ အခြေအနေ အထူးသဖြင့် ရိုဟင်ဂျာပြည်သူများ၏ အကျပ်အတည်းကိုလည်း အလေးပေးသည့် အကြောင်းအရာအဖြစ် ဖော်ပြခဲ့ပါသည်။ လူ့အခွင့်အရေးဆိုင်ရာ အထူးစုံစမ်းစစ်ဆေးရေး အရာရှိ မစ္စတာ တွမ်အင်ဒရူးစ်၏ တင်ပြချက်တွင် ဖော်ပြထားသည့်  အတင်းအဓမ္မစေခိုင်းမှု၊ အတင်းအဓမ္မ ရွှေ့ပြောင်းမှုနှင့် ရခိုင်ပြည်နယ်ရှိ ဆိုးရွားလှသော လူသားချင်းစာနာထောက်ထားမှု အခြေအနေများသည် “၂၀၁၆ နှင့် ၂၀၁၇ ခုနှစ် တို့၏ လူမျိုးသုဉ်းသတ်ဖြတ်မှုဆိုင်ရာ အကြမ်းဖက်မှုများ၏ ပဲ့တင်သံများ” ကို ပြန်လည်သယ်ဆောင်လာခဲ့သည်ဟု ဖော်ပြခဲ့သည်။ အမျိုးသားညီညွတ်ရေးအစိုးရအနေဖြင့် ရခိုင်၊ ရိုဟင်ဂျာ နှင့် ရခိုင်ပြည်နယ်ရှိ အခြား လူနည်းစုများ အပါအဝင် မြန်မာနိုင်ငံရှိ လူနည်းစုများအပေါ် အလွန်ဆိုးရွားသော ရက်စက် ကြမ်းကြုတ်မှုများကို ဘယ်သောအခါမှ ထပ်မံမဖြစ်ပွားစေရေး အပြည့်အ၀ ဦးတည် ဆောင်ရွက်လျက်ရှိပါသည်။ လူမျိုးအလိုက် အသိုက်အဝန်းများအကြား အကွဲအပြဲကို ဖြစ်စေမည့် ကြိုးပမ်းမှုမှန်သမျှ အဆုံးသတ်ရမည် ဖြစ်သည်။ ယုံကြည်မှု၊ အပြန်အလှန် လေးစားမှု၊ နားလည်မှုနှင့် သည်းခံမှုတို့ကို တည်ဆောက်ရန် ကျွန်ုပ်တို့၏ ကြိုးပမ်း ဆောင်ရွက်မှုများကို အရှိန်အဟုန်မြှင့် ဆောင်ရွက်သွားမည်ဖြစ်ပါသည်။ လူ့အခွင့်အရေးဆိုင်ရာ အထူးစုံစမ်းစစ်ဆေးရေးအရာရှိ က မြန်မာ့အရေးနှင့်ပတ်သတ်၍ အရေးယူဆောင်ရွက် နိုင်စေရန် နိုင်ငံတကာကို ပြတ်ပြတ်သားသား တောင်းဆိုခဲ့ရာတွင် ယခုကဲ့သို့သော အလှည့်အပြောင်း အခြေအနေတွင် “ယခုအကျပ်အတည်းအား မည်သည့် ပုံစံဖြင့် မည်သည့်အချိန်တွင် အဆုံးသတ်မည်ကို ဖော်ဆောင်ရာတွင် ကြီးမားသည့် ခြားနား ချက်ကို ဖန်တီးနိုင်မည့် အခွင့်အလမ်းများ နိုင်ငံတကာ အစိုးရများတွင် ရှိနေကြောင်း” ဖော်ပြခဲ့သည်။ နိုင်ငံတကာ၏ ကြိုးပမ်းဆောင်ရွက်မှုနှင့် ပံ့ပိုးကူညီမှုများသာ ရရှိမည်ဆိုပါက မြန်မာ ပြည်သူများအနေဖြင့် ငြိမ်းချမ်းမှု၊ လွတ်လပ်မှု၊ တရားမျှတမှုနှင့် တန်းတူညီမျှမှုတို့ဖြင့် ပြည့်စုံသော တိုင်းပြည် တခုကို အသစ်တဖန် ပြန်လည်ထူထောင်နိုင်မည်ဖြစ်သည်။မြန်မာပြည်သူများ အကျိုးကိုရှေးရှုကာ  ၎င်း၏ လုပ်ပိုင်ဆောင်ရွက်ခွင့်အတွင်း အားသွန် ခွန်စိုက်  ကြိုးပမ်းဆောင်ရွက် လျက်ရှိသော လူ့အခွင့်အရေးဆိုင်ရာ အထူးစုံစမ်းစစ်ဆေးရေး အရာရှိ ကို ကျေးဇူးတင်ရှိပါကြောင်း မှတ်တမ်းတင်အပ်ပါသည်။လူ့အခွင့်အရေးဆိုင်ရာဝန်ကြီးဌာနအမျိုးသားညီညွတ်ရေးအစိုးရ    

ကြားကာလဒေသန္တရ ပြည်သူ့အုပ်ချုပ်ရေးဖော်ဆောင်မှု ဗဟိုကော်မတီ အစည်းအဝေး အမှတ်စဉ် (၂၄/၂၀၂၄)ကျင်းပပြုလုပ်၂၀၂၄ ခုနှစ်၊ ဇူလိုင်လ (၄) ရက်အမျိုးသားညီညွတ်ရေးအစိုးရ၊ ကြားကာလဒေသန္တရပြည်သူ့အုပ်ချုပ်ရေးဖော်ဆောင်မှု ဗဟိုကော်မတီ အစည်းအဝေး အမှတ်စဉ် (၂၄/၂၀၂၄) ကို ယနေ့ နံနက်(၁၀:၀၀)နာရီအချိန်တွင် ကျင်းပပြုလုပ်ခဲ့ရာ အစည်းအဝေးတွင် ကြားကာလဒေသန္တရပြည်သူ့အုပ်ချုပ်ရေးဖော် ဆောင်မှုဗဟိုကော်မတီ ဥက္ကဋ္ဌ ပြည်ထောင်စုဝန်ကြီးချုပ် မန်းဝင်းခိုင်သန်းမှ အဖွင့်အမှာ စကားပြောကြားခဲ့သည်။ပြည်ထောင်စုဝန်ကြီးချုပ်မှ အဖွင့်အမှာစကားပြောကြားရာတွင် "ကော်မတီအနေနဲ့ အရေးပေါ် စီမံဆောင်ရွက်ပေးရမယ့် မြို့နယ်ဆိုင်ရာကိစ္စများကို လျင်လျင်မြန်မြန် ညှိနှိုင်း ဆောင်ရွက်ပေးဖို့ လိုကြောင်း။ အခုလို ရှမ်းမြောက်ဘက်က ဒုတိယလှိုင်း စတင်လှုပ်ရှား လာချိန်မှာ ကျွန်တော်တို့ရဲ့ စိုးမိုးထိန်းချူပ်ဒေသတွေဘက်ကလည်း ဟန်ချက်ညီညီ လှုပ်ရှားကြရမယ့် အချိန်ဖြစ်ပါကြောင်း။ မြို့နယ်တွေမှာ  အချင်းချင်း ပဋိပက္ခတွေ လျော့နည်း ပြီး တော်လှန်ရေးအရှိန်အဟုန်နဲ့အတူလိုက်ပါနိုင်ဖို့ ကျွန်တော်တို့အားလုံးက ဝိုင်းဝန်းကြိုးစားပေးဖို့ လိုအပ်မှာဖြစ်ပါကြောင်း" ပြောကြားရင်း နိဂုံးချုပ်ခဲ့ပါသည်။ဆက်လက်ပြီး တက်ရောက်လာကြသော ကြားကာလဒေသန္တရပြည်သူ့အုပ်ချုပ်ရေးဖော် ဆောင်မှု ဗဟိုကော်မတီအဖွဲ့ဝင်များမှ (၂၃/၂၀၂၄) တွင်ချမှတ်ထားသော ဆုံးဖြတ်ချက်၊ ရှေ့လုပ်ငန်း စဉ်များနှင့်ပတ်သက်၍ ပြီးစီးမှုအခြေအနေများနှင့် ဆက်လက်ဆောင်ရွက်ရန် ကျန်ရှိနေသည့် လုပ်ငန်းစဉ်များကို ချပြရှင်းလင်းပြီး တက်ရောက်လာသော တာဝန်ရှိသူများမှ အကျယ်တဝင့် ဆွေးနွေးခဲ့ကြပါသည်။အဆိုပါအစည်းအဝေးသို့ ပြည်ထောင်စုဝန်ကြီးချုပ် မန်းဝင်းခိုင်သန်းဦးဆောင်ကာ ပြည်ထောင်စု ဝန်ကြီးများ၊ ဒုတိယဝန်ကြီးများ၊ အမြဲတမ်းအတွင်းဝန်များ၊ တွဲဖက်အတွင်းဝန်များ နှင့် ဌာနဆိုင်ရာ များမှ တာဝန်ရှိသူများ တက်ရောက်ခဲ့ကြပြီး အစည်းအဝေးကို နေ့လည်(၀၁:၄၅)နာရီအချိန် တွင်အောင်မြင်စွာရပ်နားခဲ့ပါသည်။

တီမောလက်စ်တီ ဒီမိုကရက်တစ် သမ္မတနိုင်ငံမှ ဒုတိယဝန်ကြီးချုပ်အပါအဝင် ဝန်ကြီးများနှင့် NUG ကိုယ်စားလှယ်အဖွဲ့ တွေ့ဆုံဆွေးနွေးခြင်း၂၀၂၄ ခုနှစ်၊ ဇွန်လ (၂၇) ရက်တီမောလက်စ်တီ ဒီမိုကရက်တစ် သမ္မတနိုင်ငံသို့ ရောက်ရှိနေသော အမျိုးသားညီညွတ်ရေးအစိုးရ (NUG)၊ နိုင်ငံခြားရေးဝန်ကြီးဌာန၊ ပြည်ထောင်စုဝန်ကြီး ဒေါ်ဇင်မာအောင်၊ ပညာရေးဝန်ကြီးဌာနနှင့် ကျန်းမာရေးဝန်ကြီးဌာ၊ ပြည်ထောင်စုဝန်ကြီး ပါမောက္ခ ဒေါက်တာဇော်ဝေစိုးတို့သည် ဇွန်လ (၂၀)၊ (၂၁) နှင့် (၂၄) ရက်နေ့များတွင် တီမောလက်စ်တီ ဒီမိုကရက်တစ် သမ္မတနိုင်ငံမှ ဒုတိယဝန်ကြီးချုပ် Mariano Assanami Sabino၊ နိုင်ငံခြားရေးနှင့် ပူးပေါင်းဆောင်ရွက်ရေးဝန်ကြီး Bendito dos Santos Freitas၊ ပညာရေးဝန်ကြီး Dulce de Jesus Soares၊ ကျန်းမာရေးဝန်ကြီး Elia A. A. dos Reis Amaral၊ ဒုတိယကျန်းမာရေးဝန်ကြီး Dr. Flavio Brandao တို့နှင့် တွေ့ဆုံ၍ မြန်မာနှင့် တီမောလက်စ်တီ နှစ်နိုင်ငံအကြား ပူးပေါင်းဆောင်ရွက်ရေး၊  ဖက်ဒရယ်ဒီမိုကရေစီ ပြည်သူ့တော်လှန်ရေး အောင်မြင်ရေး ကိစ္စရပ်များအပါအဝင် မြန်မာ့အရေးကိစ္စရပ်များကို ချစ်ကြည်ရင်းနှီးစွာ ဆွေးနွေးဖလှယ်ခဲ့ကြပါသည်။

ကြားကာလဒေသန္တရ ပြည်သူ့အုပ်ချုပ်ရေးဖော်ဆောင်မှု ဗဟိုကော်မတီ အစည်းအဝေး အမှတ်စဉ် (၂၃/၂၀၂၄)ကျင်းပပြုလုပ်၂၀၂၄ ခုနှစ်၊ ဇွန်လ (၂၇) ရက်အမျိုးသားညီညွတ်ရေးအစိုးရ၊ ကြားကာလဒေသန္တရပြည်သူ့အုပ်ချုပ်ရေးဖော်ဆောင်မှု ဗဟိုကော်မတီ အစည်းအဝေး အမှတ်စဉ် (၂၃/၂၀၂၄) ကို ယနေ့ နံနက်(၁၀:၀၀)နာရီအချိန်တွင် ကျင်းပပြုလုပ်ခဲ့ရာ အစည်းအဝေးတွင် ကြားကာလဒေသန္တရပြည်သူ့အုပ်ချုပ်ရေးဖော် ဆောင်မှုဗဟိုကော်မတီ ဥက္ကဋ္ဌ ပြည်ထောင်စုဝန်ကြီးချုပ် မန်းဝင်းခိုင်သန်းမှ အဖွင့်အမှာ စကားပြောကြားခဲ့သည်။ပြည်ထောင်စုဝန်ကြီးချုပ်မှ အဖွင့်အမှာစကားပြောကြားရာတွင် "ကျွန်တော်တို့အစိုးရအနေနဲ့လည်း အကြမ်းဖက်စစ်အုပ်စု မစိုးမိုးနိုင်တော့တဲ့ နေရာဒေသတွေ မှာ ပြည်သူ့၀န်ဆောင်မှု၊ တရားဥပဒေစိုးမိုးရေး၊ တိုင်းပြည်အေးချမ်းရေး ရှေးရှုပြီး အုပ်ချုပ်ရေး လုပ်ငန်းတွေ အဆင်ပြေချောမွေ့စွာ ဆောင်ရွက်နိုင်ဖို့ ကြိုးစားလုပ်ဆောင်လာတာ ၃ နှစ်ပြည့် တော့မှာပဲ ဖြစ်ပါကြောင်း။ ဒါပေမယ့်လည်း သာမန်အခြေအနေမဟုတ်ဘဲ ကြားကာလ တော်လှန်ရေး ကာလ ဖြစ်တာနဲ့အညီ အကန့်အသတ်များစွာနဲ့ လုပ်ဆောင်နေကြရပြီး ပူးပေါင်းလုပ်ဆောင်မှု၊ အဆင့်ဆင့်ကွပ်ကဲမှု၊ လူအင်အား၊ ငွေကြေးအင်အား၊ စည်းစနစ်ကျနမှုတွေမှာ လိုအပ်ချက်အားနည်း ချက်တွေရှိနေတာကြောင့် ထင်သလောက် ခရီးမပေါက်ခဲ့တာလည်း ရှိသလို အောင်အောင်မြင်မြင်နဲ့ အုပ်ချုပ်ရေးလုပ်ငန်း၊ ပြည်သူ့၀န်ဆောင်မှု၊ ပြည်သူလူထုအကာအကွယ်ပေးရေး၊ စစ်ဘေးရှောင်များ အကူအညီပေးရေး၊ ပညာရေး၊ ကျန်းမာရေး ကဏ္ဍတွေမှာ ယခုလိုကြားကာလမှပင် အောင်အောင်မြင်မြင် ဖော်ဆောင်နိုင်ခဲ့တဲ့ အပိုင်းကဏ္ဍများစွာလည်း ရှိပါကြောင်း။ ကြားကာလ အတွင်းရေးမှူးအဖွဲ့အနေနဲ့လည်း မြို့နယ် တစ်မြို့နယ်ချင်းစီရဲ့ လိုအပ်ချက် စိန်ခေါ်မှုတွေကို အသေးစိတ်လေ့လာနေပြီး ကျွန်တော်တို့ ကော်မတီ၀င်များအနေနဲ့ လည်း မြန်မြန်ဆန်ဆန် အကောင်အထည်ဖော်နိုင်အောင် တက်တက်ကြွကြွဆွေးနွေးကာ ဆုံးဖြတ် ချက်များ ချမှတ်ပေးကြရမဲ့ အချိန်ပဲ ဖြစ်ပါကြောင်း။ တရားစီရင်ရေးလုပ်ငန်းများ အကောင်အထည်ဖော် လည်ပတ်နိုင်ရေး ဥပဒေရေးရာတာဝန်ခံနဲ့ တရားသူကြီးအဖွဲ့တွေ ရှိနေဖို့ကို အထူးအရေးစိုက်ပြီး ဆောင်ရွက်စေလိုပါကြောင်း။ မြေပြင်မှာ အမှုအခင်းနဲ့ မူးယစ်ဆေးဝါးပြဿနာတွေ များပြားလွန်းတာကြောင့် ပလဖ အဖွဲ့တွေ အားကောင်း ဖို့ကိုလည်း လုပ်ဆောင်ပေးဖို့ မှာကြားလိုပါကြောင်း" ပြောကြားရင်း နိဂုံးချုပ်ခဲ့ပါသည်။ဆက်လက်ပြီး တက်ရောက်လာကြသော ကြားကာလဒေသန္တရပြည်သူ့အုပ်ချုပ်ရေးဖော် ဆောင်မှု ဗဟိုကော်မတီအဖွဲ့ဝင်များမှ (၂၂/၂၀၂၄) တွင်ချမှတ်ထားသော ဆုံးဖြတ်ချက်၊ ရှေ့လုပ်ငန်း စဉ်များနှင့်ပတ်သက်၍ ပြီးစီးမှုအခြေအနေများနှင့် ဆက်လက်ဆောင်ရွက်ရန် ကျန်ရှိနေသည့် လုပ်ငန်းစဉ်များကို ချပြရှင်းလင်းပြီး တက်ရောက်လာသော တာဝန်ရှိသူများမှ အကျယ်တဝင့် ဆွေးနွေးခဲ့ကြပါသည်။အဆိုပါအစည်းအဝေးသို့ ပြည်ထောင်စုဝန်ကြီးချုပ် မန်းဝင်းခိုင်သန်းဦးဆောင်ကာ ပြည်ထောင်စု ဝန်ကြီးများ၊ ဒုတိယဝန်ကြီးများ၊ အမြဲတမ်းအတွင်းဝန်များ၊ တွဲဖက်အတွင်းဝန်များ နှင့် ဌာနဆိုင်ရာ များမှ တာဝန်ရှိသူများ တက်ရောက်ခဲ့ကြပြီး အစည်းအဝေးကို နေ့လည်(၀၁:၀၀)နာရီအချိန် တွင်အောင်မြင်စွာရပ်နားခဲ့ပါသည်။

"ပဲခူးမြို့၊ ဝင်းနိမ္မိတာရုံ ဆရာတော်ဘုရားကြီးအတွက် ဝမ်းနည်းသဝဏ်လွှာ"၂၀၂၄ ခုနှစ်၊ ဇွန်လ ၂၇ ရက်နေ့နိုင်ငံတော် သံဃမဟာနာယကအဖွဲ့ဝင် (ငြိမ်း)၊ ပဲခူးမြို့ ဝင်းနိမ္မိတာရုံ ဆရာတော်ဘုရားကြီး ဘဒ္ဒန္တ မုနိန္ဒာဘိဝံသသည် ဇွန်လ ၁၉ ရက်နေ့က မန္တလေးတိုင်း၊ ငါန်းဇွန်-မြို့သာလမ်းပိုင်းတွင် အကြမ်းဖက်စစ်တပ်၏ ရည်ရွယ်ချက်ရှိရှိ ပစ်ခတ်မှုကြောင့် ပျံလွန်တော်မူခဲ့ရခြင်းအတွက် အထူးပင် စိတ်ထိခိုက် ဝမ်းနည်း ကြေကွဲရပါသည်။ဆရာတော်ဘုရားကြီးသည် ပရိယတ္တိသာသနာအတွက် စွမ်းစွမ်းတမံ အားထုတ် ကြိုးပမ်း ဆောင်ရွက်နေသည့် သာသနာ့အာဇာနည် ရဟန်းတပါး ဖြစ်သည့်အတွက် ပို၍ပင် ယူကျုံးမရ နှမြောတသဖြစ်မိပါသည်။ဘုရားသားတော် မြတ်သံဃာများကိုပင် ရည်ရွယ်ချက်ရှိရှိ သတ်ဖြတ်ဝံ့သည့် အကြမ်းဖက်စစ်တပ်၏ လုပ်ရပ်သည် ဗုဒ္ဓဘာသာတရပ်လုံးကို စော်ကားလိုက်ခြင်းဖြစ်သဖြင့် ပြင်းထန်စွာ ပြစ်တင် ရှုတ်ချသည်။ထို့အပြင် အကြမ်းဖက်စစ်တပ်သည် အဖြစ်မှန်ကို တမင်ဖုံးကွယ်၍ PDF အဖွဲ့အစည်းကို ရည်ရွယ်ချက်ရှိရှိ အပြစ်ပုံချခြင်း၊ လိမ်လည်လှည့်ဖျားကာ သတင်းထုတ်ပြန်၊ ပြောဆိုခြင်းကလည်း သံဃာထုနှင့် တိုင်းပြည်ကို ထပ်လောင်း စော်ကားလိုက်ခြင်းပင် ဖြစ်သည်။ ဤလိမ်ညာမှုအတွက် အကြမ်းဖက်စစ်တပ်၏ အဆင့်ဆင့်သော တာဝန်ရှိသူအားလုံးသည် အပြည့်အဝ တာဝန်ယူ၊ တာဝန်ခံရမည်ဖြစ်သည်။မိမိတို့ တိုင်းပြည်တွင် အကြမ်းဖက်စစ်တပ် သက်ဆိုးရှည်နေသရွေ့ ယခုကဲ့သို့ ဝမ်းနည်းကြေကွဲဖွယ် ဖြစ်ရပ်ဆိုးများနှင့် ဆက်လက် ကြုံတွေ့နေကြရဦးမည်ဖြစ်သဖြင့် စစ်အာဏာရှင်စနစ် အပြီးတိုင် ချုပ်ငြိမ်း ပပျောက်ရေးအတွက် ဘာသာပေါင်းစုံ တိုင်းပြည်လူထုတရပ်လုံးနှင့် လက်တွဲ၍ အစွမ်းကုန် ဆက်လက် ကြိုးပမ်း အားထုတ်သွားမည်ဖြစ်ပါကြောင်း ခိုင်ကျည်စွာ သန္နိဋ္ဌာန်ပြုခြင်းနှင့်အတူ ဤဝမ်းနည်းသဝဏ်လွှာကို လျှောက်ထား၊ ပေးပို့အပ်ပါသည်။ဒူဝါလရှီးလယာယီသမ္မတအမျိုးသားညီညွတ်ရေးအစိုးရ

လူ့အခွင့်အရေးဆိုင်ရာပြည်ထောင်စုဝန်ကြီး၊နိုင်ငံခြားရေးဝန်ကြီးဌာနပြည်ထောင်စုဒုတိယဝန်ကြီးနှင့် အမေရိကန်နိုင်ငံခြားရေးဝန်ကြီးဌာန ထိပ်တန်းအရာရှိတို့တွေ့ဆုံ ============================================ဇွန်လ ၂၂ ရက် ၊၂၀၂၄ ခုနှစ်အမျိုးသားညီညွတ်ရေးအစိုးရ လူ့အခွင့်အရေးဆိုင်ရာဝန်ကြီးဌာန၊ ပြည်ထောင်စုဝန်ကြီး ဦးအောင်မျိုးမင်းသည် နိုင်ငံခြားရေးဝန်ကြီးဌာန၊ ဒုတိယဝန်ကြီး ဦးမိုးဇော်ဦးနှင့်အတူ အမေရိကန်နိုင်ငံခြားရေးဝန်ကြီးဌာန ၏ ထိပ်တန်းအရာရှိတဦးဖြစ်သည့် Principal Deputy Assistant Secretary Bureau Of Democracy, Human Rights, and  Labor ဖြစ်သူ Mr. Robert S. Gilchrist နှင့် ဇွန်လ (၂၂)ရက် နေ့ တွင် အမေရိကန်နိုင်ငံခြားရေးဌာန၌ တွေ့ဆုံခဲ့ပါသည်။ အဆိုပါ တွေ့ဆုံမှုတွင် ပြည်ထောင်စုဝန်ကြီးက လက်ရှိ မြန်မာနိုင်ငံ၏ လူ့အခွင့်အရေးအခြေအနေများ၊ဆိုးဝါးလာသည့် လေကြောင်းတိုက်ခိုက်မှုများ အထူးသဖြင့် ရခိုင်ပြည်အတွင်း အရပ်သားပြည်သူများအပေါ် အကြမ်းဖက်စစ်အုပ်စု၏ ပစ်မှတ်ထား အကြမ်းဖက်တိုက်ခိုက်နေမှုများအကြောင်းတို့ကို တင်ပြခဲ့ပါသည်။ အမေရိကန်နိုင်ငံအစိုးရ အနေဖြင့် အကြမ်းဖက်စစ်အုပ်စုအပေါ် ယခုထက်ပိုမိုသော အရေးယူဆောင်ရွက်မှုများ လုပ်ဆောင်ရန်နှင့်  မြန်မာပြည်သူများအပေါ်  တိုက်ရိုက် အကျိုးရှိသော ကူညီမှုများ ပေးနိုင်ရန် တိုက်တွန်း ပြောဆိုခဲ့ပါသည်။ ထို့ပြင် အရပ်သား ပြည်သူများအပေါ် အကြမ်းဖက်စစ်အုပ်စုက ကျူးလွန်နေသည့် နိုင်ငံတကာရာဇဝတ်မှုများနှင့် ပတ်သက်၍ ပိုမိုပြင်းထန်ပြီး ပူးပေါင်းဆောင်ရွက်မှု ရှိသည့် စီးပွားရေးနှင့် လက်နက်တင်ပို့မှု ပိတ်ဆို့ခြင်း အပါအဝင် အရေးယူဆောင်ရွက်မှုများ ထပ်မံတိုးမြှင့်လုပ်ဆောင်ရန်၊ အကြမ်းဖက်စစ်အုပ်စုက စနစ်တကျ ကျူးလွန်နေသည့် လူ့အခွင့်အရေးနှင့်လူသားချင်းစာနာမှုဆိုင်ရာ အကြပ်အတည်းများကြောင့် ထွက်ပြေးတိမ်းရှောင်လာသောသူများ ၊အဓမ္မ စစ်မှုထမ်း ဥပဒေကြောင့် ထွက်ပြေးတိမ်းရှောင်လာသည့် လူငယ်မျိုးဆက်သစ်များကို တိုက်ရိုက် ကူညီမှုများ အမြန်ဆုံးလုပ်ဆောင်ပေးနိုင်ရန်  ဆွေးနွေးခဲ့သည်။ အမေရိကန်နိုင်ငံခြားရေးဝန်ကြီးဌာန အနေဖြင့် မြန်မာပြည်သူများနှင့်အတူ ရပ်တည်ပြီး ယခုထက် ပိုမိုထိရောက်သော အရေးယူဆောင်ရွက်မှုများနှင့် ကူညီမှုများ လုပ်ဆောင်သွားမည့် အကြောင်း ကတိပြု ပြောကြားခဲ့ပါသည်။အမျိုးသားညီညွတ်ရေးအစိုးရ