ပြည်ထောင်စုဝန်ကြီးချုပ် မန်းဝင်းခိုင်သန်း ပြောကြားသော ပြည်ထောင်စုသမ္မတမြန်မာနိုင်ငံတော် အမျိုးသားညီညွတ်ရေးအစိုးရ ဖွဲ့စည်းခြင်း (၃) နှစ်ပြည့် မိန့်ခွန်း ၂၀၂၄ ခုနှစ်၊ ဧပြီလ  (၁၆) ရက်

"အမျိုးသားညီညွတ်ရေးအတိုင်ပင်ခံကောင်စီနှင့် အမျိုးသားညီညွတ်ရေးအစိုးရ တို့ ပူးပေါင်းစီစဉ်ကျင်းပသော (၇၇) ကြိမ်မြောက် ပြည်ထောင်စုနေ့ အခမ်းအနား၌ အမျိုးသားညီညွတ်ရေးအစိုးရ၊ နိုင်ငံတော်ယာယီသမ္မတ ဒူဝါလရှီးလ ပြောကြားသည့် မိန့်ခွန်း"၂၀၂၄ ခုနှစ်၊ ဖေဖော်ဝါရီလ (၁၂) ရက်နေ့ ယနေ့ ကျရောက်တဲ့ (၇၇) ကြိမ်မြောက် ပြည်ထောင်စုနေ့ အခမ်းအနားမှာ ကျွန်တော်တို့ အားလုံး “ညီညွတ်သော ပေါင်းစည်းခြင်းနဲ့ ကျစ်လစ်သော စုဝေးခြင်း” ကို ပြည်ထောင်စုနေ့ အမှတ်သင်္ကေတ အနေနဲ့ တွေ့ရ၊ မြင်ရလို့ ကျွန်တော့်အနေနဲ့ အထူး ဝမ်းသာ ဂုဏ်ယူကြောင်း ပြောချင်ပါတယ်။ ယနေ့ ပြည်ထောင်စုနေ့အခမ်းအနားကို တက်ရောက်လာကြတဲ့ အမျိုးသားညီညွတ်ရေးအစိုးရအဖွဲ့မှ ပြည်ထောင်စုဝန်ကြီးချုပ်နှင့်တကွ၊ အစိုးရအဖွဲ့ဝင်များ၊ တိုင်းရင်းသားလက်နက်ကိုင်တော်လှန်ရေး အဖွဲ့များမှ ခေါင်းဆောင်ကြီးများ၊ ပြည်ထောင်စုလွတ်တော်ကိုယ်စားပြုကော်မတီမှ လွတ်တော် ကိုယ်စားလှယ်များ၊ အမျိုးသားညီညွတ်ရေးအတိုင်ခံကောင်စီ (NUCC) မှ အဖွဲ့ဝင်များနှင့် ယနေ့ အခမ်းအနားကို တက်ရောက်လာကြတဲ့ ကိုယ်စားလှယ်များအားလုံးကို မင်္ဂလာပါလို့ နှုတ်ခွန်းဆက်သ အပ်ပါတယ်။ ဒီနေ့ အခမ်းအနားဟာ ကျွန်တော်တို့အားလုံးရဲ့ အညီအညွတ် စုဝေးခြင်းနဲ့ တစ်စုတစ်စည်းတည်းဖြစ်မှု၊ တစ်သားတည်းဖြစ်မှုကို အထင်အရှားပြသတဲ့ အခမ်းအနားတစ်ခုလည်းဖြစ်ပါတယ်။ ဒါ့အပြင် အတိတ်က ကျွန်တော်တို့ရဲ့ ဘိုးဘေးတွေ ညီညွတ်ခဲ့ကြသလို၊ ယခု လက်ရှိမှာလည်း ကျွန်တော်တို့ဟာ ညီညွတ်ခြင်းနဲ့ စုဝေးရောက်ရှိနေကြတယ်ဆိုတာကို လက်တွေ့ ပြသခြင်းလည်းဖြစ်ပါတယ်။ ပြည်ထောင်စုနေ့ ပေါ်ပေါက်လာခြင်းရဲ့ အနှစ်သာရကို ကြည့်ရင်၊ ကျွန်တော်တို့ဟာ အတူတကွ စုပေါင်းနေထိုင်ခြင်းရဲ့ ကောင်းကျိုးကို လေးနက်စွာ သိမြင်ခဲ့ကြတယ်လို့ ပြောချင်ပါတယ်။ ဒါ့အပြင် ငြိမ်းချမ်းစွာ အတူယှဉ်တွဲနေထိုင်ခြင်းရဲ့ အကျိုးကျေးဇူးကို ကောင်းစွာ သိမြင်ခဲ့ကြတယ်လို့ ယူဆပါတယ်။ ဒါ့ကြောင့်လည်း တစ်ပေါင်းတစ်စည်းတည်း လွတ်လပ်ရေးရယူဖို့ ပင်လုံစာချုပ်ရယ်လို့ ဖြစ်ပေါ်လာတာကို တွေ့ရပါတယ်။ ခေါင်းဆောင်များနဲ့ ကိုယ်စားလှယ်ကြီးများ ခင်ဗျား ပင်လုံစာချုပ်ဟာ ကျွန်တော်တို့ ပြည်ထောင်စုနိုင်ငံတော်ရဲ့ အနှစ်သာရကို ဖော်ဆောင်တဲ့ ကောင်းချီးတစ်ခုဖြစ်တယ်လို့ ယုံကြည်ပါတယ်။ ပင်လုံစာချုပ်ကို အကြောင်းပြုပြီး ထင်ရှားလာတဲ့ ပြည်ထောင်စုဖွဲ့တည်မှုဟာ ကျွန်တော်တို့ နိုင်ငံရဲ့ လေးနက်သော အတိတ်သမိုင်းနောက်ခံအဖြစ် ရှိနေပါတယ်။ ကျွန်တော်တို့ဟာ ဒီလိုလေးနက်တဲ့ အတိတ်သမိုင်းနောက်ခံကို အစဉ်အမြဲ အောက်မေ့ သတိရခြင်းနဲ့ ညီညွတ်သော တော်လှန်ရေးခရီးကို ရှေ့ဆက်ကြရမယ်လို့ ပြောချင်ပါတယ်။ ကြီးမြတ်သော ကောင်းချီးတွေတိုင်းကို ဖျက်လိုဖျက်ဆီး လုပ်တဲ့ အကြောင်းတရားတွေဟာ အမြဲတမ်း လိုလို ရှိနေတတ်ကြပါတယ်။ ပင်လုံအနှစ်သာရကို ဖော်ဆောင်နိုင်တဲ့ ပြည်ထောင်စုစိတ်ဓာတ်ဟာ မဟာလူမျိုးကြီးဝါဒနဲ့ စစ်အာဏာရှင်စရိုက်ရဲ့ ဖျက်ဆီးမှုကို ခံခဲ့ရပါတယ်။ ဒါ့ကြောင့် ကျွန်တော်တို့ နိုင်ငံဟာ ကိုလိုနီလက်အောက်က လွတ်လပ်ရေး ရခဲ့ပေမယ့် စစ်အာဏာရှင်စနစ်ရဲ့ ယန္တရားအောက်ကို ထပ်မံ ကျရောက်ခဲ့ရပါတယ်။ ကျွန်တော်တို့ တိုင်းရင်းသားပြည်သူလူထုတွေထဲမှာလည်း ပြည်ထောင်စုစိတ်ဓာတ်ကို ပျက်စီးအောင် နှောက်ယှက်ခံခဲ့ရပါတယ်။ တန်းတူညီမှုနဲ့ အတူတကွ ငြိမ်းချမ်းစွာ ပေါင်းစည်းနေထိုင်ခြင်းဆိုတဲ့ အနှစ်သာရဟာ စစ်အာဏာရှင်အစိုးရ လက်အောက်မှာ ပျက်သုဉ်းခဲ့ကြရပါတယ်။ ဒါ့အပြင် လူမျိုးရေး ခွဲခြားမှုနဲ့ လူမျိုးရေး ဖိနှိပ်ခံရမှုတွေကို နှစ်ပေါင်းများစွာ ခံစားလာခဲ့ကြရပါတယ်။ ကျွန်တော်တို့ နိုင်ငံထဲမှာ လူမျိုးရေးခွဲခြားမှုဟာ ကြီးမားသထက် ကြီးမားလာခဲ့တာတွေ့ရပါတယ်။ အခု နွေဦးတော်လှန်ရေးအတွင်းမှာ ကျွန်တော်တို့ဟာ လူမျိုးရေးခွဲခြားမှုနဲ့ လူမျိုးရေး ဖိနှိပ်မှုကို ထောက်ပံ့ပေးတဲ့ အတွေးအခေါ်၊ အယူအဆတွေကို ပြန်လည် သုတ်သင် ရှင်းလင်းပစ်ဖို့ လိုပါတယ်။ ဒါမှသာလျှင် စစ်မှန်တဲ့ ဖက်ဒရယ်ဒီမိုကရေစီပြည်ထောင်စုသစ် တည်ဆောက်ရေးက ခိုင်ခိုင်မာမာ ပေါ်ထွက်လာမှာ ဖြစ်ပါတယ်။ ကျွန်တော်တို့ဟာ တော်လှန်ရေးအတွက်လည်း အားထုတ်ကြရမှာ ဖြစ်သလို၊ တည်ဆောက်ရေးအတွက်လည်း မြော်မြင် တွေးခေါ်ထားရမှာဖြစ်ပါတယ်။ ဒါ့အပြင် အနာဂတ် ပြည်ထောင်စုသစ်အတွက် ကြိုတင် လုပ်ဆောင်ထားရမယ့် အရေးအရာတွေ အများကြီး ရှိနေတာကို မမေ့သင့်ဘူးလို့ ထင်ပါတယ်။ ခေါင်းဆောင်များနဲ့ ကိုယ်စားလှယ်ကြီးများ ခင်ဗျား ယနေ့ ပြည်ထောင်စုနေ့ အခမ်းအနားမှာ ကျွန်တော်တို့အတွက် ထပ်မံ အလေးအနက်ထားရမယ့်ကိစ္စ တစ်ခုကို ပြောချင်ပါတယ်။ အဲဒါကတော့ ပြီးခဲ့တဲ့ ၂၀၂၄ ခုနှစ် ဇန်နဝါရီလ (၃၁) ရက်နေ့က ထုတ်ပြန်ကြေညာလိုက်တဲ့ [K3C] လို့ခေါ်တဲ့ ကချင်၊ ကရင်၊ ကရင်နီ၊ ချင်း စတဲ့ တော်လှန်ရေးအင်အားစုကြီးတွေနဲ့ ကျွန်တော်တို့ အမျိုးသားညီညွတ်ရေးအစိုးရက အညီအညွတ် သဘောထားရပ်တည်ချက်တစ်ခုကို ရယူနိုင်ခဲ့ပါတယ်။ နွေဦးတော်လှန်ရေးရဲ့ ဘုံသဘောထား ရပ်တည်ချက်အဖြစ် ကျွန်တော်တို့ ပြည်သူလူထုကို ထုတ်ပြန်ကြေညာနိုင်ခဲ့ပါတယ်။ ဒါဟာ တိုင်းရင်းသားလက်နက်ကိုင်တော်လှန်ရေး အင်အားစုများနဲ့ ကျွန်တော်တို့အစိုးရအကြား ခိုင်မာ အားကောင်းတဲ့ နိုင်ငံရေးယုံကြည်မှုကို တည်ဆောက်နိုင်ခြင်း လက္ခဏာတစ်ရပ်လည်းဖြစ်ပါတယ်။ ဒီဘုံသဘောထားရပ်တည်ချက်ဟာ အမျိုးသားညီညွတ်ရေးအတိုင်ပင်ခံကောင်စီက အတည်ပြု ပြဋ္ဌာန်းထားတဲ့ ဖက်ဒရယ်ဒီမိုကရေစီပဋိညာဉ် အပိုင်း (၁) နဲ့ အပိုင်း (၂) တွေကို အခြေခံမူထားပြီး တော်လှန်ရေးအလွန်ကာလမှာ ဆက်လက်လုပ်ဆောင်ရမယ့် နိုင်ငံရေးလမ်းပြမြေပုံကို ဖော်ဆောင် ထားခြင်းလည်းဖြစ်ပါတယ်။ ဒီလိုမျိုး တိုင်းရင်းသားမဟာမိတ် အဖွဲ့အစည်းကြီးတွေနဲ့ ဘုံသဘောထား ရပ်တည်ချက် ရရှိနိုင်အောင် ကြိုးစားလာခဲ့တာ အခု (၃) နှစ် ရှိခဲ့ပြီ ဖြစ်ပါတယ်။ ဒါကို တိုင်းရင်းသား ပြည်သူလူထုအပေါင်းကလည်း ဝိုင်းဝန်း ခွန်အားပြုကြဖို့ တိုက်တွန်းချင်ပါတယ်။ အာဏာရှင်စနစ် ချုပ်ငြိမ်းရေးနဲ့ ဖက်ဒရယ်ဒီမိုကရေစီပြည်ထောင်စု တည်ဆောက်ရေး ပန်းတိုင်ကို မသွေဖီတဲ့ လုပ်ဆောင်ချက်တွေ သဘောတူညီချက်တွေကို ညီညီညွတ်ညွတ် ထောက်ခံအားပေးရမှာ ဖြစ်ပါတယ်။ လူထုကို ရှေ့ဆောင်နေတဲ့ လူပုဂ္ဂိုလ်တွေ/ အဖွဲ့အစည်းတွေအနေနဲ့ “ငါ ပါမှ ဖြစ်မယ်၊ ငါ လုပ်မှ ဖြစ်မယ်” ဆိုတဲ့ အရာတွေကို အထူး ရှောင်ကြဉ်ဖို့ လိုတယ်လို့ ပြောချင်ပါတယ်။ တော်လှန်ရေးကာလဟာ အရေးပေါ်ကာလလည်းဖြစ်တယ်။ပြည်သူလူထုရဲ့ အသက်နဲ့ အိုးအိမ်ကို ရင်းနှီးမြှုပ်နှံပြီး ရှေ့ဆက် လျှောက်လှမ်းနေခြင်းဖြစ်ပါတယ်။ ပိုပြီး တိတိကျကျ ပြောရရင် လက်ရှိ မြှုပ်နှံပေးဆပ်မှုတွေဟာ အရင်းအနှီး သိပ်ကြီးပါတယ်။ ဒါ့ကြောင့် မိမိတို့အတ္တကို ဇက်ပိုး မသပ်နိုင်ဘဲနဲ့ တော်လှန်ရေးကို နှောင့်နှေးစေမည့်လုပ်ရပ်တွေကို ကျွန်တော်တို့အနေနဲ့ နိုင်ငံရေးသတိ အမြဲ ရှိနေဖို့ လိုပါတယ်။ အခုအချိန်မှာ တော်လှန်ရေး ရှေ့ခရီး ခပ်မြန်မြန် / ခပ်သွက်သွက် လျှောက်နိုင်ဖို့ဟာ အရေးတကြီး လိုအပ်နေချိန်လည်း ဖြစ်ပါတယ်။ နှောင့်နှေးကြန့်ကြာအောင် လုပ်နေတဲ့ လုပ်ရပ်မျိုး တွေကို ပြည်သူလူထုက လုံးဝ လိုလားမှာ မဟုတ်ပါဘူး။ ဒါကို ကျွန်တော်တို့ ကောင်းစွာ သဘောပေါက် နားလည်ရမယ်လို့ ယုံကြည်ပါတယ်။ ဒါ့အပြင် တော်လှန်ရေးကာလနဲ့ အသွင်ကူးပြောင်း ရေးကာလအတွင်းမှာ မြန်မြန်ဆန်ဆန်လုပ်ဆောင်ရမယ့် ကိစ္စရပ်တွေကို လျင်လျင်မြန်မြန် လုပ်ဆောင် နိုင်အောင် ဘုံသဘောတူညီချက်အနေနဲ့ ထုတ်ပြန်ထားတဲ့ လုပ်ငန်းလမ်းညွှန်တစ်ခုအဖြစ် ပေါ်ပေါက် လာမှုကို ကျွန်တော်တို့အနေနဲ့ ကြိုဆိုလက်ကမ်းရမှာ ဖြစ်ပါတယ်။ ဒီဘုံသဘောထားရပ်တည်ချက်ကနေ ဆက်လက် တိုးချဲ့ စုရုံးသွားရမယ့်ကိစ္စတွေလည်း ရှိနေတယ်လို့ ပြောချင်ပါတယ်။ ဒီနေရာမှာ ကျွန်တော်တို့ဟာ မြောက်ပိုင်း မဟာမိတ် (၃) ဖွဲ့ရဲ့ အရေးပါတဲ့ အခန်းကဏ္ဍကို အလေးအနက်ထားပြီး အတူတကွ ပေါင်းစည်း ဖြစ်တည်ဖို့ ကြိုးစားရမှာ ဖြစ်ပါတယ်။ ဒါ့အပြင် ရှမ်းပြည်နယ်အတွင်းမှာရှိတဲ့ တိုင်းရင်းသားလက်နက်ကိုင်အဖွဲ့အစည်းတွေရဲ့ တစ်တပ်တစ်အား ပါဝင်အားဖြည့်မှုကို ကျွန်တော်တို့ အလေးအနက်ထား ကြိုးစားဖို့ လိုပါတယ်။ ဒါ့အပြင် မွန်ပြည်နယ်အတွင်းက တိုင်းရင်းသားလက်နက်ကိုင်အဖွဲ့အစည်းတွေရဲ့ အားဖြည့်မှုကိုလည်း အထူး လိုလားစွာ ကြိုဆိုကြောင်း တင်ပြချင်ပါတယ်။ ခေါင်းဆောင်များနဲ့ ကိုယ်စားလှယ်ကြီးများ ခင်ဗျား ကျွန်တော်တို့ဟာ ယခုအချိန်မှာ အတိတ်က ကြုံဆုံခဲ့တဲ့ သင်ခန်းစာဟောင်းတွေကို ပြန်လည် ဆင်ခြင်ကြဖို့ တာဝန်ရှိပါတယ်။ ဒါ့အပြင် ဆယ်စုနှစ်ချီပြီး ကြည့်မြင်နားလည်နိုင်တဲ့ မိမိတို့ရဲ့ နိုင်ငံရေး အမြော်အမြင်ကိုလည်း ဆန့်ထုတ်ဖို့ လိုအပ်ပါတယ်။ လူမျိုးပေါင်းစုံ စုစည်းနေထိုင်တဲ့ နိုင်ငံတစ်ခုမှာ ကျွန်တော်တို့ ရင်တွင်းက သဘောထားကြီးမှုကို မဖော်ထုတ်နိုင်ရင် ကျွန်တော်တို့ဟာ ငြိမ်းချမ်းသော / စည်းလုံးသော လူ့ဘောင်အဖွဲ့အစည်းကို တည်ဆောက်နိုင်မှာ မဟုတ်ပါဘူး။ ကျွန်တော်တို့ရဲ့ ရင်တွင်းမှာ လွတ်လပ်ခြင်းနဲ့ တရားမျှတခြင်းကို ကိန်းအောင်း ဖြစ်တည်စေဖို့ အထူးလိုအပ်ပါတယ်။ ဒါ့အပြင် တန်းတူညီမျှမှုနဲ့ ကိုယ်ပိုင်ပြဋ္ဌာန်းခွင့်တွေကို အလေးအနက်ထားကြဖို့ အထူးအရေးကြီးပါတယ်။ ကျွန်တော်တို့ရဲ့ နှလုံးအိမ်ထဲမှာ ဗိုလ်ကျစိုးမိုးချင်တဲ့စိတ်၊ နိုင့်ထက်စီးနင်း လုပ်ချင်တဲ့စိတ်၊ ခွဲခြားဆက်ဆံချင်တဲ့စိတ်တွေ ရှိခဲ့ရင်လည်း ဒါတွေကို စစ်အာဏာရှင်စရိုက် ချုပ်ငြိမ်းရေးနဲ့အတူ တစ်ပါတည်း ချုပ်ငြိမ်းစေဖို့ လိုအပ်ပါတယ်။ ကျွန်တော်တို့ရဲ့ ပြည်ထောင်စုသစ် တည်ဆောက်ရေးမှာ ပဋိပက္ခအသစ်တွေကို ထပ်မံ မကြုံတွေ့စေချင်ပါဘူး။ ကျွန်တော်တို့ရဲ့ ပြည်သူလူထုဟာ စစ်ဘေး ဒုက္ခတွေကို အလူးအလဲ ခံနေကြရပါတယ်။ ဒါတွေကို အမြန်ဆုံး ပပျောက်စေဖို့နဲ့ စစ်အာဏာရှင်စနစ် အမြန်ဆုံး ချုပ်ငြိမ်းစေဖို့ အထူးလိုအပ်ပါတယ်။ နေ့စဉ်နဲ့အမျှ တွေ့မြင်နေရတဲ့ ပြည်သူလူထုရဲ့ မျက်ရည်ကို ဆင်ခြေတွေနဲ့ နှစ်သိမ့်ပေးတာမျိုး လုံးဝ လုပ်လို့ မရဘူးလို့ ယူဆပါတယ်။ ကျွန်တော်တို့ဟာ ပြည်သူလူထုကို အလုပ်အကျွေးပြုဖို့နဲ့ ပြည်သူလူထုကို ကာကွယ်စောင့်ရှောက်ဖို့ တာဝန်ရှိသူတွေ ဖြစ်တယ်ဆိုတာ မမေ့စေချင်ပါဘူး။ ဒီတာဝန်ကို ကျေပွန်ကြောင်း ကျွန်တော်တို့ဟာ အလုပ်နဲ့ သက်သေပြကြရမှာ ဖြစ်ပါတယ်။ လက်တွေ့ အားဖြင့် အကောင်အထည်ဖော်ပြီး ပြသနိုင်ရမှာ ဖြစ်ပါတယ်။ ခေါင်းဆောင်များနဲ့ ကိုယ်စားလှယ်ကြီးများ ခင်ဗျား ကျွန်တော့်အနေနဲ့ နိဂုံးချုပ်အားဖြင့်‌ပြောကြားချင်တဲ့ အချက်ကတော့ ကျွန်တော်တို့ဟာ နေ့စဉ်နဲ့အမျှ ကြုံတွေ့နေရတဲ့ ပြည်သူတွေရဲ့ အထွေထွေသော ဘေးဒုက္ခတွေကို ရင်နှင့်အမျှ ကိုယ်ချင်းစာနာစိတ် အပြည့် ရှိထားဖို့ ဖြစ်ပါတယ်။ မိမိတို့ရဲ့ သဘောထား သေးသိမ်မှုကြောင့် ပြည်သူလူထု ခံစားရမယ့် အေးငြိမ်းချမ်းသာခြင်းကို ထိပါးစေလို့ မရပါဘူး။ ဒါ့အပြင် မိမိတို့ရဲ့ နိုင်ငံရေးအမြော်အမြင်ဟာ တိုင်းပြည်ရဲ့ ဆယ်စုနှစ်သော အနာဂတ်တွေအထိ စဉ်းစားရမှာဖြစ်သလို ရာစုနှစ်အတိုင်းအတာအထိ ကျော်လွန် စဉ်းစားနိုင်ဖို့လည်း လိုအပ်ပါတယ်။ တိုင်းရေးပြည်ရေးကို စဉ်းစားလုပ်ဆောင်ကြတဲ့နေရာမှာ ရေတိုကိုပဲ ကြည့်လို့ မရပါဘူး / ရေရှည်ကိုလည်း မျှော်ကြည့်ဖို့ လိုပါတယ်။ ကျွန်တော်တို့ဟာ တိုင်းပြည်နဲ့ လူထုရဲ့ အနာဂတ်ရေးကို စဉ်းစားလုပ်ဆောင်တဲ့နေရာမှာ လတ်တလော ဖြစ်ပျက်နေတဲ့ အသေးအမွှား ပြဿနာတွေ / အခက်အခဲတွေကို ကျော်လွန်နိုင်ဖို့ အထူးအရေးကြီး ပါတယ်။ တိုင်းပြည်ဟာ “ဦးနင်း ပဲ့ထောင် / ပဲ့နင်း ဦးထောင်” မဖြစ်ဖို့ အထူးလိုအပ်ကြောင်း သတိပြု စေချင်ပါတယ်။ကျွန်တော်တို့ဟာ ပြည်ထောင်စုသစ်ကို တည်ဆောက်တဲ့နေရာမှာ အာမခံချက်ရှိသော တန်းတူညီမျှမှုနဲ့ အာမခံချက်ရှိသော ကိုယ်ပိုင်ပြဋ္ဌာန်းခွင့်တွေကို အလေးအနက်ထား တည်ဆောက်မှသာ အောင်မြင်နိုင်ကြောင်း သတိပြုစေချင်ပါတယ်။ ဒါ့အပြင် ဒီမိုကရေစီအခွင့်အရေးတွေနဲ့ အာမခံချက် ရှိသော နိုင်ငံသားလွတ်လပ်ခွင့်တွေကိုလည်း အလေးအနက်ထားပြီး တည်ဆောက်မှသာ စစ်မှန်တဲ့ ပြည်ထောင်စုသစ် တည်ဆောက်ရေးကို အကောင်အထည်ဖော်နိုင်မှာ ဖြစ်ကြောင်း ပြောကြားရင်း နိဂုံးချုပ်အပ်ပါတယ် ခင်ဗျား….အရေးတော်ပုံမုချအောင်ရမည်... ဒူဝါလရှီးလနိုင်ငံတော် ယာယီသမ္မတအမျိုးသားညီညွတ်ရေးအစိုးရ

အမျိုးသားညီညွတ်ရေးအစိုးရ၊ ပြည်ထောင်စုအစိုးရနှင့် ပြည်နယ်/ ဖက်ဒရယ်ယူနစ်များအကြား ပူးပေါင်းဆောင်ရွက်ရေးကော်မရှင်အစည်းအဝေး (၂ / ၂၀၂၃) ၌ အမျိုးသားညီညွတ်ရေးအစိုးရအဖွဲ့၏ ယာယီသမ္မတ ဒူဝါလရှီးလ ပြောကြားသည့် မိန့်ခွန်း ၂၀၂၃ ခုနှစ် စက်တင်ဘာ (၂၀) ရက် ဒီကနေ့ ပြည်ထောင်စုအစိုးရနှင့် ပြည်နယ်/ ဖက်ဒရယ်ယူနစ်များအကြား ပူးပေါင်းဆောင်ရွက်ရေး ကော်မရှင် အစည်းအဝေး (FSCC) ကို တက်ရောက်လာကြတဲ့ ပြည်ထောင်စု ဝန်ကြီးချုပ်နှင့်တကွ၊ ပြည်ထောင်စုဝန်ကြီးများ၊ ဒုတိယဝန်ကြီးများ၊ အစိုးရအဖွဲ့ဝင်များနဲ့ FSCC ကော်မရှင်အဖွဲ့ဝင်များ အားလုံး မင်္ဂလာပါလို့ နှုတ်ခွန်းဆက်သပါတယ်။ ဒီနေ့ ပြုလုပ်ကျင်းပတဲ့ FSCC ကော်မရှင်အစည်းအဝေးဟာ ဒီနှစ်ထဲမှာ ဒုတိယအကြိမ် ပြုလုပ်ကျင်းပတဲ့ အစည်းအဝေးဖြစ်ပါတယ်။ ဒါ့ကြောင့် ယခင် FSCC ကော်မရှင်အစည်းအဝေး ပထမအကြိမ် ကျင်းပတုန်းက ကျွန်တော် ပြောခဲ့ဖူးတဲ့ အခြေခံမူတွေနဲ့ပတ်သက်ပြီး ထပ်မံ ပြောကြားချင်တာ ရှိပါတယ်။ ဒီနေ့ ကော်မရှင်အစည်းအဝေး agenda က နိုင်ငံရေးအရ သော်လည်းကောင်း၊ အမျိုးသားစည်းလုံးညီညွတ်ရေးအရသော်လည်းကောင်း အရေးကြီးတဲ့ နိုင်ငံရေးပိုင်းတွေ ပါဝင်နေတယ်လို့ ယူဆပါတယ်။ ကျွန်တော့်အနေနဲ့ ရှင်းရှင်းလင်းလင်း တိတိကျကျ ပြောချင်တဲ့ အချက်တွေ ရှိပါတယ်။ အဲဒါတွေကတော့ FSCC ကော်မရှင်အနေနဲ့ ရှေ့ရှုရမယ့် အခြေခံသဘောထား၊ စစ်ကိုင်းတိုင်းဒေသကြီးမှာရှိတဲ့ အင်အားစုတွေနဲ့ တွေ့ဆုံညှိနှိုင်းရေးကိစ္စအပြင် KNU နဲ့ တွေ့ဆုံရေးကိစ္စတို့မှာ ကျွန်တော်တို့ သတိချပ်ရမယ့် အချက်တချို့ကို ပြောကြားချင်ပါတယ်။ ဒီနေ့ FSCC ကော်မရှင်အနေနဲ့ မိမိတို့ ပြုသမျှ / ပြောသမျှ / လုပ်သမျှ ကိစ္စအားလုံးကို အမျိုးသားစည်းလုံးညီညွတ်ရေးကို အခြေခံမူထားပြီး လုပ်ဆောင်ရလိမ့်မယ်လို့ ကနဦး ပြောကြားလို ပါတယ်။ ကျွန်တော်တို့ဟာ စစ်အာဏာရှင်စနစ်ကို တော်လှန်နေရင်း တစ်ဖက်မှာလည်း တိုင်းပြည် တည်ဆောက်ရေးလို့ ခေါ်တဲ့ Nation Building ကိစ္စကို လုပ်နေကြရတာ ဖြစ်ပါတယ်။ ဒါ့ကြောင့် အမျိုးသားစည်းလုံးညီညွတ်ရေးကိစ္စဟာ FSCC ကော်မရှင်ရဲ့ အခြေခံအုတ်မြစ် သဘောထား အဖြစ် ခိုင်ခိုင်မာမာ အုတ်မြစ်တည်ထားဖို့ လိုအပ်ပါတယ်။ ဒါ့အပြင် နွေဦးတော်လှန်ရေးမှာ တော်လှန်ရေးအင်အားစုအားလုံးရဲ့ အခြေခံ ပဋိညာဉ်မူဘောင်ဖြစ်တဲ့ “ဖက်ဒရယ်ဒီမိုကရေစီ ပဋိညာဉ် အပိုင်း (၁) နဲ့ (၂)” အပေါ်မှာ ဆုံချက်ထားပြီး လုပ်ဆောင်ကြဖို့ တိုက်တွန်းလိုပါတယ်။ ကျွန်တော်တို့ဟာ သက်ဆိုင်ရာ ပြည်နယ်အလိုက် / သက်ဆိုင်ရာ လူမျိုးစုအလိုက် ရည်မှန်းထားတဲ့ အမျိုးသားရေးဦးတည်ချက်တွေနဲ့ ဖီလာဆန့်ကျင်ဘက် ဖြစ်နေတာမျိုးကို အထူးသတိပြု ရှောင်ရှား ကြဖို့ လိုပါတယ်။ ယခု ကျွန်တော်တို့ နွေဦးတော်လှန်ရေးနဲ့ ပူးတွဲတည်ဆောက်နေတဲ့ nation building ကိစ္စကို (တန်းတူညီမျှရေး၊ ကိုယ်ပိုင်ပြဋ္ဌာန်းခွင့်နဲ့ လူမျိုးစုလွတ်မြောက်ရေး) စတဲ့ အခြေခံ အချက် (၃) ရပ်နဲ့ အစဉ်တစိုက် ယှဉ်တွဲတည်ဆောက်ကြဖို့ ပြောကြားလိုပါတယ်။ နောက်ထပ် ပြောကြားချင်တဲ့ကိစ္စကတော့ စစ်ကိုင်းတိုင်းက အဖွဲ့အစည်းတွေနဲ့ တွေ့ဆုံညှိနှိုင်းရေး ကိစ္စ ဖြစ်ပါတယ်။ စစ်ကိုင်းတိုင်းဧရိယာကို ကြည့်ရင် နယ်မြေအရ အကြီးမားဆုံးနဲ့ အကျယ်ပြန့်ဆုံး ပထဝီအနေအထားကို တွေ့ရပါတယ်။ စစ်အာဏာရှင်စနစ်ကို လက်နက်ကိုင်ခုခံတော်လှန်တဲ့ နေရာမှာလည်း အပြင်းထန်ဆုံးနဲ့ အကျယ်ပြန့်ဆုံးသော ပြည်မဧရိယာကြီးတစ်ခုအဖြစ် ပါဝင် နေတာတွေ့ရပါတယ်။ တော်လှန်ရေးဇွဲနပဲလည်း ပြင်းပြထက်သန်လွန်းတာကို လေးစားဂုဏ်ယူ ဖွယ် တွေ့မြင်နေရပါတယ်။ ဒါ့ကြောင့် စစ်ကိုင်းတိုင်းထဲက အင်အားစုအသီးသီးနဲ့ ကျစ်လစ်သော နိုင်ငံရေးညီညွတ်မှုကို ဖော်ဆောင်နိုင်ရေးဟာ နွေဦးတော်လှန်ရေးရဲ့ အရေးပေါ် လုပ်ငန်းစဉ် တစ်ခုလို့ ယူဆပါတယ်။ စစ်ကိုင်းတိုင်းဧရိယာအတွင်းက အဖွဲ့အစည်းတွေနဲ့ တွေ့ဆုံညှိနှိုင်းရေးကို အကောင်အထည်ဖော်တဲ့ အခါမှာ အထူး သတိမူသင့်တဲ့ အချက်တချို့ကို ပြောချင်ပါတယ်။ အထူးသဖြင့် “မိတ်ဆွေများကို ရန်သူ မလုပ်ရေးမူ” အပေါ်မှာ အခြေခံသင့်တယ်လို့ ယူဆပါတယ်။ ကျွန်တော်တို့ဟာ တော်လှန်ရေး အင်အားစုအသီးသီးရဲ့ အင်အားတွေကို စုစည်းယူရမှာ ဖြစ်ပါတယ်။ ဒါ့ကြောင့် မိမိတို့နဲ့ မိတ်ဖက် အစုအဖွဲ့တွေထဲမှာ ရန်သူ အသစ် မမွေးမိဖို့ လိုပါတယ်။ ဒါဟာ အထူး သတိထားရမယ့်ကိစ္စလို့ ယူဆပါတယ်။ ကျွန်တော်တို့ အမျိုးသားညီညွတ်ရေးအစိုးရဟာ နိုင်ငံရေးသဘောထားကြီးမှုကို ထင်ထင်ရှားရှားပြသရပါလိမ့်မယ်။ ဒါ့အပြင် မိမိတို့ရဲ့ စိတ်ကို ဖွင့်ထားပြီး ဒေသတွင်း အင်အားစု အသီးသီးကို လက်ကမ်းကြိုဆိုဖို့ လိုအပ်ပါတယ်။ လူထုကြားထဲက အင်အားစုတွေနဲ့ ထိတွေ့ဆက်ဆံ တဲ့အခါမှာ မိမိရဲ့ နိုင်ငံရေးအမြော်အမြင်ကြီးမှုနဲ့ မိမိတို့ရဲ့ နိုင်ငံရေးသဘောထားကြီးမှုကို အခြေခံထားပြီး တွေ့ဆုံညှိနှိုင်းကြဖို့ ကျွန်တော့်အနေနဲ့ အထူး တိုက်တွန်းလိုပါတယ်။ ကျွန်တော်တို့ နိုင်ငံရဲ့ ပထဝီမြေပုံကို ပုံကြမ်းချ လေ့လာကြည့်ရင် နိုင်ငံ့ရဲ့ အရှေ့ဘက်၊ အနောက်ဘက်နဲ့ တောင်ဘက်၊ မြောက်ဘက်တို့မှာ အဓိက လက်နက်ကိုင်အင်အားစုကြီးတွေရဲ့ အခန်းကဏ္ဍကို ထင်ထင်ရှားရှားတွေ့ရပါတယ်။ KNU ဟာ ကျွန်တော်တို့ နိုင်ငံရဲ့ တောင်ပိုင်းဒေသကြီးကို ခြေကုတ်မြဲမြဲ ယူထားနိုင်တဲ့ လူမျိုးစုတော်လှန်ရေးအဖွဲ့အစည်းကြီး တစ်ခုဖြစ်ပါတယ်။ နွေဦးတော်လှန်ရေးအတွက် အထူးအလေးထားရမယ့် အဖွဲ့အစည်းကြီးတစ်ခု ဖြစ်သလို၊ အနာဂတ်ဖက်ဒရယ်ဒီမိုကရေစီနိုင်ငံသစ် တည်ဆောက်ရေးအတွက်လည်း အရေးပါတဲ့ အဖွဲ့အစည်းကြီးတစ်ခုဖြစ်ပါတယ်။ ဒီလို နားလည်သဘောပေါက်ပြီး ကျွန်တော်တို့ဟာ ပိုမိုကျစ်လစ် တဲ့ လူမျိုးပေါင်းစုံအုံကြွမှုကြီးကို ဝိုင်းဝန်းတည့်မတ်ကြဖို့ ဖြစ်ပါတယ်။ နွေဦးတော်လှန်ရေး အတွင်းမှာ မဟာမိတ်ဆက်ဆံရေး ခိုင်မာကျစ်လစ်ရေးဟာ အထူးအရေးကြီးတဲ့ ကိစ္စအဖြစ် ပါဝင်နေ ပါတယ်။ KNU က တာဝန်ရှိ ပုဂ္ဂိုလ်တွေနဲ့ တွေ့ဆုံတဲ့အခါတိုင်း ကျွန်တော်တို့ဟာ အမြော်အမြင်ကြီးတဲ့ နိုင်ငံတည်ဆောက်ရေးသဘောထားတွေကို အတူတကွ ဆွေးနွေးဖလှယ်ကြဖို့ လိုပါတယ်။ ကျွန်တော်တို့တတွေဟာ အသေးအဖွဲသော ပုဂ္ဂိုလ်နိုင်ငံရေးတွေကို ကျော်ကြည့်ပြီး ကြီးမြတ်တဲ့ တိုင်းပြည်တည်ဆောက်ရေးသဘောတရားတွေကို အပြန်အလှန် ဆွေးနွေးဖလှယ်ကြဖို့ လိုပါတယ်။ ဒီသဘောထားနဲ့ ရှေ့ဆက်တက်လှမ်းကြရင် ကျွန်တော်တို့ဟာ အသေးအဖွဲသော နိုင်ငံရေးပြဿနာတွေကို ကျော်လွှားနိုင်စွမ်း ရှိလိမ့်မယ်လို့ ယုံကြည်ပါတယ်။ နိဂုံးချုပ်အားဖြင့် ပြောကြားလိုတာကတော့ ကျွန်တော်တို့ အမျိုးသားညီညွတ်ရေးအစိုးရဟာ တော်လှန်ရေးတပ်ဦးနေရာကနေ ဦးဆောင် ပဲ့ကိုင်သူတွေ ဖြစ်ပေမယ့် လူထုရဲ့ အခန်းကဏ္ဍကို ဘယ်သောအခါမှ မမေ့ပျောက်ကြဖို့ လိုကြောင်း ပြောချင်ပါတယ်။ ဒါ့အပြင် ပြည်သူလူထုရဲ့ နေ့စဉ်ဘဝကို ကိုယ်ချင်းစာနာစိတ်နဲ့ (လူထုအပေါ် ရေလို ကျင့် / ရန်သူ စစ်ကောင်စီအပေါ်ကို မီးလိုကျင့်) ပြီး တော်လှန်ရေးအောင်ပွဲကို အမြန် ရယူကြဖို့ တိုက်တွန်းရင်း နိဂုံးချုပ်ပါတယ် ခင်ဗျား…..

၂၀၂၃ ခုနှစ် စက်တင်ဘာ (၁၅) ရက်ကျွန်တော့်အနေနဲ့ ဒီနေ့ ပြုလုပ်ကျင်းပတဲ့ နိုင်ငံတကာဒီမိုကရေစီနေ့ အခမ်းအနားကို တက်ရောက်ခွင့်ရလို့ အထူး ဝမ်းသာ ဂုဏ်ယူပါတယ်။ ပြည်ထောင်စုလွှတ်တော်ကိုယ်စားပြုကော်မတီ (CRPH) ကနေ ဦးဆောင်ကျင်းပတဲ့ အတွက်လည်း ကျေးဇူးတင်ကြောင်း ပဏာမအားဖြင့် ပြောချင်ပါတယ်။ဒီမိုကရေစီလို့ ပြောရင် အနှစ်သာရအားဖြင့် အမြောက်အမြားရှိတာ တွေ့ရပါတယ်။ ဒီနေ့ နိုင်ငံတကာဒီမိုကရေစီနေ့ အခမ်းအနားမှာ ကျွန်တော့်အနေနဲ့ ဒီမိုကရေစီရဲ့ အနှစ်သာရ အများအပြားရှိတဲ့အထဲက အခြေခံကျတဲ့ အချက် (၃) ချက်ကို ကောက်နုတ် ပြောချင်ပါတယ်။ အဲဒီ့အချက် (၃) ချက်ကတော့ “တန်းတူညီမျှခြင်း” “လွတ်လပ်ခွင့်” နဲ့ “တရားဥပဒေစိုးမိုးမှု” ဆိုတဲ့ အချက် (၃) ချက်ပဲ ဖြစ်ပါတယ်။ကျွန်တော်တို့ နိုင်ငံဟာ ဒီမိုကရေစီကို မြည်းစမ်းခွင့်သာ ရပြီး ဒီမိုကရေစီရဲ့ အရသာကို အချိန်ကြာကြာ စားသုံးခွင့် မရခဲ့ကြပါဘူး။ အခုလည်း ၂၀၂၁ ခုနှစ် စစ်အာဏာသိမ်းမှုဖြစ်လို့ ဒီမိုကရေစီ အသွင်ကူးပြောင်း သန္ဓေတည်နေတဲ့ကာလမှာပဲ နောက်ကြောင်းပြန်မှု ဖြစ်ခဲ့ပါတယ်။ ဒါကို အခု ကျွန်တော်တို့ အမျိုးသားညီညွတ်ရေးအစိုးရက ပြည်သူလူထုရဲ့ သဘောထားနဲ့ အညီ ဒီမိုကရေစီလမ်းကြောင်းပေါ် ရောက်ရှိအောင် ပြန်လည် တွန်းတင်နေကြောင်း ပြောချင်ပါတယ်။ ကျွန်တော်တို့ နိုင်ငံဟာ ဒီမိုကရေစီအသွင်ကူးပြောင်းရေးလမ်းကြောင်း အလျင်အမြန် ပြန်ရောက်ဖို့ လိုပါတယ်။ဒီတစ်ခါ နွေဦးတော်လှန်ရေးမှာ တွေ့ရတဲ့ လူထုဒီမိုကရေစီကြိုးပမ်းမှုကြီးကတော့ ဒီမိုကရေစီသက်သက် မဟုတ်တော့ပါဘူး။ ဖက်ဒရယ်စနစ်လည်း ပါဝင်လာပြီ ဖြစ်ပါတယ်။ ဒါ့ကြောင့် နွေဦးတော်လှန်ရေးရဲ့ လူထုကြွေးကြော်သံဟာ ဖက်ဒရယ်ဒီမိုကရေစီနိုင်ငံတော်သစ် တည်ဆောက်ရေးဖြစ်ပါတယ်။ ဖက်ဒရယ်ဟာ “တန်းတူညီမျှမှု” ကို ကိုယ်စားပြုတယ်လို့ ယူဆပါတယ်။ identity လို့ ခေါ်တဲ့ အမှတ်သရုပ်အရ တန်းတူညီမျှတာနဲ့ အာဏာခွဲဝေမှုအရ တန်းတူညီမျှတာတွေဟာ ဖက်ဒရယ်စနစ်ထဲမှာ အကြုံးဝင်တယ်လို့ ယူဆပါတယ်။ဒါ့အပြင် ကိုယ်ပိုင်ပြဋ္ဌာန်းခွင့်ရဲ့ အခြေခံနှုန်းစံတွေကလည်း ဖက်ဒရယ်စနစ်မှာ ပါဝင်နေပါတယ်။ လွတ်လပ်စွာ စီရင်ပြဋ္ဌာန်းပိုင်ခွင့်ဟာ အာဏာအရ တန်းတူညီမျှခွင့်လို့ ကျွန်တော်တို့ နားလည်ထားပါတယ်။ ဒီမိုကရေစီဟာ လူထုရဲ့ လွတ်လပ်ခွင့်ကို အာမခံထားချက်ဖြစ်ပြီး ဖက်ဒရယ်ကတော့ လူမျိုးစုပြဋ္ဌာန်းခွင့်ကို လွတ်လပ်ခွင့် ပေးထားတယ်လို့ ယူဆပါတယ်။ ဒါတွေဟာ ကျွန်တော်တို့ နိုင်ငံရဲ့ အခြေခံ အုတ်မြစ်တွေ ဖြစ်ရမယ်လို့ ယုံကြည်ပါတယ်။ဒီမိုကရေစီမှာ လူထုတန်းတူညီမျှခွင့်ကို ဇောင်းပေးပြောတာတွေ့ရပြီး ဖက်ဒရယ်မှာတော့ လူမျိုးစုတွေရဲ့ တန်းတူညီမျှမှုကို အခြေခံပြီး ပြောတာတွေ့ရပါတယ်။ ဒီမိုကရေစီနဲ့ ဖက်ဒရယ်ဟာ အခြေခံ မိတ်ဖက်တွေ ဖြစ်တယ်ဆိုတာ တွေ့ရပါတယ်။ ဒါ့ကြောင့် ဒီနေ့ နိုင်ငံတကာ ဒီမိုကရေစီနေ့ အခမ်းအနားမှာ ဖက်ဒရယ်နဲ့ ဒီမိုကရေစီစနစ်ဟာ မွေးရာပါ မိတ်ဖက်တွေ ဖြစ်ကြောင်း ပြောချင်ပါတယ်။ ဒီနေ့ အခမ်းအနားကို တက်ရောက်လာသူ အားလုံးကလည်း ဒီအခြေခံအချက်ကို သတိတရ ရှိကြလိမ့်မယ်လို့ ယုံကြည်ပါတယ်။နောက်ထပ် ပြောကြားချင်တာကတော့ တရားဥပဒေစိုးမိုးမှုနဲ့ပတ်သက်ပြီး အထူးပြု ပြောချင်ပါတယ်။ ဒီမိုကရေစီမှာ လူထုလွတ်လပ်ခွင့်နဲ့ တန်းတူညီမျှမှုတွေ အရေးကြီးသလို တိုင်းပြည်နဲ့ လူထုအတွင်းမှာ တရားဥပဒေစိုးမိုးဖို့လည်း အရေးကြီးပါတယ်။ ဒီမိုကရေစီရဲ့ အခြေခံ စံတန်ဖိုးတွေထဲမှာ တရားဥပဒေစိုးမိုးရေးဆိုတဲ့ အခြေခံ အချက်ပါဝင်ပါတယ်။ ကျွန်တော်တို့ဟာ အခု အချိန်မှာ တော်လှန်ရေးကာလအတွင်း ဖြတ်သန်းနေကြရပါတယ်။ လူထုဟာ မိုးထဲ ရေထဲမှာ ဓားတောင်ကို ကျော်ပြီး မီးပင်လယ်ကို ဖြတ်နေကြရပါတယ်။ကျွန်တော်တို့ ပြည်သူလူထုဟာ နေ့စဉ်နဲ့ အမျှ အသက်အန္တရာယ် ခြိမ်းခြောက်ခံရမှုတွေနဲ့ ကြုံနေကြရပါတယ်။ ဒီမိုကရေစီ အသွင်ကူးပြောင်းရေး မျှော်လင့်ချက် ပျက်သုဉ်းလိုက်တာနဲ့ ပြည်သူလူထုဟာ တရားသောဥပဒေတွေရဲ့ ကာကွယ်ပေးမှုကို မခံရတော့ပါဘူး။ ဒါကို သေချာ နားလည်ပြီး ကျွန်တော်တို့ဟာ တရားသော ဥပဒေတွေနဲ့ ထိန်းကျောင်းသော လူမှုအဆောက်အအုံကို တည်ဆောက်ဖို့ လိုပါတယ်။ ပြည်ထောင်စုလွှတ်တော်ကိုယ်စားပြုကော်မတီဟာ လွှတ်တော် institution တစ်ခုဖြစ်တာကြောင့် တရားသောဥပဒေတွေဟာ ကျွန်တော်တို့ နိုင်ငံမှာ အုတ်မြစ်ချနိုင်ရေးအတွက် အဓိက တာဝန်ရှိတဲ့ အဖွဲ့အစည်းဖြစ်တယ်လို့ ယူဆပါတယ်။ဒါပေမယ့် ဒါဟာ အတူတကွ အားလုံး ဝိုင်းဝန်း လုပ်ဆောင်ကြရမယ့်ကိစ္စဖြစ်တယ်လို့ ယုံကြည်ပါတယ်။ ဒီနေ့ ကျရောက်တဲ့ နိုင်ငံတကာဒီမိုကရေစီနေ့ အခမ်းအနားမှာ ကျွန်တော်တို့ဟာ ဒီမိုကရေစီရဲ့ အခြေခံ အနှစ်သာရတွေကို ဘက်ပေါင်းစုံကနေ မြှင့်တင်ကြဖို့ တိုက်တွန်းလိုပါတယ်။ ဒါ့အပြင် ဒီမိုကရေစီရဲ့ မွေးရာပါ မိတ်ဖက်ဖြစ်တဲ့ ဖက်ဒရယ်နှုန်းစံတွေကိုလည်း ကျွန်တော်တို့ လူထုကြားထဲ သယ်ဆောင်လာကြဖို့ အလေးအနက်တိုက်တွန်းလိုပါတယ်။နိဂုံးချုပ်အားဖြင့် ပြောကြားချင်တာကတော့ ကျွန်တော်တို့ဟာ ယခုအချိန်မှာ နိုင်ငံသစ်နဲ့ လူ့အဖွဲ့အစည်းသစ်ကို တည်ဆောက်နေကြခြင်း ဖြစ်ပါတယ်။ ဒီလို တည်ဆောက်တဲ့နေရာမှာ အဟောင်းကို ဖြိုတဲ့ လုပ်ငန်းစဉ်တွေ ရှိသလို၊ အသစ်ကို တည်ဆောက်တဲ့ လုပ်ငန်းစဉ်တွေလည်း ရှိပါတယ်။ အသစ်ကို တည်ဆောက်ရာမှာ / ဒီမိုကရေစီရဲ့ အခြေခံ စံတန်ဖိုးတွေဖြစ်တဲ့ တန်းတူညီမျှရေး၊ / လွတ်လပ်ခွင့်နဲ့ / တရားသော ဥပဒေမူဘောင်များ အုတ်မြစ်တည်နိုင်ရေးကို/ အမြော်အမြင်ရှိရှိ / သဘောထားကြီးကြီးနဲ့ တည်ဆောက်ကြဖို့ / တိုက်တွန်းရင်း နိဂုံးချုပ်ပါတယ် ခင်ဗျား….။

ပြည်ထောင်စုသမ္မတမြန်မာနိုင်ငံတော်၊ အမျိုးသားညီညွတ်ရေးအစိုးရ ပြည်သူခုခံတော်လှန်စစ် ကြေညာခြင်း (၂) နှစ်ပြည့် ယာယီသမ္မတ ဒူဝါလရှီးလ၏ နိုင်ငံတော်အခြေပြမိန့်ခွန်း၂၀၂၃ ခုနှစ်၊ စက်တင်ဘာလ (၇) ရက်နေ့လေးစားချစ်ခင်ရပါသော တိုင်းသူပြည်သားများခင်ဗျားနွေဦးတော်လှန်ရေးရဲ့ ပြည်သူ့ခုခံတွန်းလှန်စစ်ဟာ ဒီကနေ့ စက်တင်ဘာလ ၇ ရက်နေ့မှာ (၂) နှစ်ပြည့်ပြီ ဖြစ်ပါတယ်။ ပြည်သူ့တော်လှန်ရေးဟာ နိုင်ငံရေး၊ စစ်ရေး၊ ပြည်သူပါဝင်ရေး စတဲ့  ကဏ္ဍ အသီးသီးမှာ အောင်မြင်မှုတွေ ရရှိနေပြီဆိုတာလည်း တိုင်းသူပြည်သားအားလုံးကို အသိပေးချင်ပါတယ်။ နွေဦးတော်လှန်ရေးဟာ ပြည်သူလူထုရဲ့ ငြိမ်းချမ်းစွာဆန္ဒပြခြင်းနဲ့ စတင်ခဲ့တာ ဖြစ်ပါတယ်။ ဒါပေမယ့် အကြမ်းဖက်စစ်တပ်က လူထုအပေါ် ရက်စက်ကြမ်းကြုတ်စွာ ဖိနှိပ်သတ်ဖြတ်မှု များကြောင့် ရရာလက်နက်စွဲကိုင်ပြီး ခုခံတွန်းလှန်တဲ့အဆင့်ကို ကူးပြောင်းလာတာဖြစ်ပါတယ်။ ကိုယ့်ဒေသ ကျေးရွာ ကာကွယ်ရေးအတွက် လက်လုပ် တူမီးသေနတ်များဖြင့် စတင်ခဲ့ပေမယ့် အခုချိန်မှာတော့ မဟာဗျူဟာ ကျကျ တပ်ရင်းတပ်ဖွဲ့တွေ ဖွဲ့စည်းထားနိုင်တဲ့အဆင့်ကို ရောက်ရှိနေပါပြီ။ စနစ်တကျဖွဲ့စည်းထားတဲ့ တပ်ရင်းတပ်ဖွဲ့တွေဟာ မောင်းပြန်သေနတ်ကိုင်ပြီး အကြမ်းဖက်စစ်တပ်ကို တွန်းလှန် တိုက်ခိုက်လာ နိုင်ပြီဖြစ်ပါတယ်။ ထို့အတူ Generation – Z လို့ခေါ်တဲ့ လူငယ်များ၊ နည်းပညာရှင်များရဲ့ ဆန်းသစ်တီထွင်မှုများကြောင့် နည်းပညာမြင့် ဒရုန်းများကို အသုံးပြုပြီး အကြမ်းဖက်စစ်အုပ်စုကို ထိရောက်စွာ တိုက်ခိုက်ချေမှုန်းနိုင်နေပြီဖြစ်ပါတယ်။ စစ်ဒေသ (၃) ခုမှာ ပြည်သူ့ကာကွယ်ရေးတပ်ဖွဲ့ တပ်ရင်းပေါင်း (၃၀၀) ကျော် ဖွဲ့စည်းထားနိုင်ပြီး တိုင်းရင်းသားလက်နက်ကိုင် တော်လှန်ရေး မဟာမိတ်အင်အားစုများနဲ့ အတူလက်တွဲကာ ဖက်ဒရယ် ဒီမိုကရေစီပြည်ထောင်စု ပေါ်ပေါက်ရေးအတွက် တိုက်ပွဲဝင်လျက်ရှိပါတယ်။ မိမိတို့ စိုးမိုးနယ်မြေတွေ မှာ အုပ်ချုပ်ရေး၊ တရားစီရင်ရေး၊ လူထုဝန်ဆောင်မှု စတဲ့ကဏ္ဍတွေကိုလည်း စနစ်တကျ ဆောင်ရွက်လာနိုင်ပြီဖြစ်ပါတယ်။ တဘက်မှာ စစ်ပွဲရဲ့ လိုအပ်ချက်တွေကို ဖြည့်ဆည်းနိုင်ဖို့အတွက် လက်နက်ခဲယမ်းများ ကိုယ်တိုင် ထုတ်လုပ်လာနိုင်တာကလည်း တော်လှန်ရေးအတွက် အရေးပါတဲ့ အလှည့်အပြောင်းတခု ဖြစ်ပါတယ်။ စစ်ရေးအရ အောင်မြင်မှုတွေ တစထက်တစ ပိုမိုရရှိလာနေတာကိုလည်း အနီးစပ်ဆုံးအချိန်က တိုက်ပွဲများရဲ့ရလဒ်တွေကို ကြည့်ခြင်းအားဖြင့် သိနိုင်မှာဖြစ်ပါတယ်။ ရန်သူစစ်အုပ်စုအတွက် အလုံခြုံဆုံးလို့ ယုံကြည်နေကြတဲ့ နေပြည်တော်မှာပင်လျှင် မလုံခြုံမှုများ ခံစားရအောင် တော်လှန်ရေး ရဲဘော်တွေက စွမ်းဆောင်ပြနိုင်နေပြီဖြစ်ပါတယ်။ အကြမ်းဖက်မင်းအောင်လှိုင်နဲ့ စစ်အုပ်စုဟာ စစ်ရေး၊ သံတမန်ရေး၊ စီးပွားရေးစတဲ့ ကဏ္ဍစုံမှာ အဘက်ဘက်က ပြိုလဲကျရှုံးနေပြီဆိုတာ အားလုံးမြင်တွေ့မှာ ဖြစ်ပါတယ်။ တိုင်းသူပြည်သားများခင်ဗျားဒီအောင်မြင်မှုတွေဟာ စစ်အာဏာရှင်စနစ် အပြီးတိုင် ချုပ်ငြိမ်းရမယ်ဆိုတဲ့ ခိုင်မာတဲ့ ယုံကြည်ချက်ကို အခြေတည်ပြီး ကျွန်တော်တို့ ပြည်သူလူထုရဲ့ မဆုတ်မနစ်သော ဇွဲလုံ့လနဲ့ အနစ်နာခံမှု၊ မဟာမိတ် တိုင်းရင်းသားအင်အားစုများရဲ့ လက်တွဲပူးပေါင်းပါဝင်မှု၊ ရှေ့တန်းစစ်မျက်နှာတွေမှာ တိုက်ပွဲဝင်နေတဲ့ ရဲဘော်များရဲ့ ရဲဝံ့စွာ စွန့်လွှတ်အနစ်နာခံမှု၊ နွေဦးတော်လှန်ရေးမှာ ကျရာ အခန်းကဏ္ဍကနေ ပါဝင်ဆောင်ရွက်နေကြတဲ့ တော်လှန်ရေးအင်အားစုအသီးသီးရဲ့  ကြိုးစားအားထုတ်မှု တွေကြောင့် ဖြစ်ပါတယ်။ ခုခံတွန်းလှန်စစ် ၂ နှစ်တာကာလအတွင်း ဂုဏ်ရောင် ပြောင်မြောက်စွာ အသက်ပေး စွန့်လွှတ်ခဲ့ ကြသူများ၊ ကိုယ်လက်အင်္ဂါ ပေးဆပ်ထားကြသူများ၊ စစ်အုပ်စုရဲ့ အကျဥ်းထောင်အသီးသီးမှာ ကြံ့ကြံ့ခံ ရင်ဆိုင်ဖြတ်သန်းနေကြသူများ၊ စစ်ကောင်စီကို ဆန့်ကျင် အာဏာဖီဆန်ခဲ့သော CDM ဝန်ထမ်းများ အစရှိတဲ့ သူရဲကောင်းများကိုလည်း ကျွန်တော်တို့ရဲ့ နှလုံးသားနဲ့ စိတ်ဝိဉာဥ်မှာ အမြဲအမှတ်ရ ဂုဏ်ပြု ဦးညွှတ်နေမှာဖြစ်ပါတယ်။ ရန်ပုံငွေရှာဖွေမှု၊ ဘဏ္ဍာငွေ စနစ်တကျ သုံးစွဲနိုင်မှုတွေကလည်း တော်လှန်ရေးရဲ့ အရေးပါတဲ့ အသက်သွေးကြောတွေဖြစ်ပါတယ်။ တော်လှန်ရေးအတွက် ရန်ပုံငွေရှာဖွေပေးနေတဲ့ အဖွဲ့အစည်းအသီးသီး၊ လူပုဂိုလ်အသီးသီးနဲ့ ရန်ပုံငွေ ထည့်ဝင်ပေးနေကြသူတွေ အားလုံးဟာ တော်လှန်ရေးအတွက် အရေးကြီးတဲ့ကဏ္ဍမှာရှိပါတယ်။ ဒီ့အတွက်လည်း အထူးကျေးဇူးတင်ပြီး အလေးအနက်ထား မှတ်တမ်းတင်ရပါကြောင်းပြောလိုပါတယ်။ ကျွန်တော်တို့ရဲ့ ပြည်သူ့ခုခံတွန်းလှန်စစ်ဟာ ပြည်တွင်းမှာ အရှိန်အဟုန်မြင့်နေသလိုပဲ ပြည်သူကို ကိုယ်စားပြုတဲ့ အမျိုးသားညီညွတ်ရေးအစိုးရအနေနဲ့ နိုင်ငံတကာမျက်နှာစာမှာလည်း အရေးပါတဲ့ တရားဝင်မှုတွေကို ဆက်လက်ဆုပ်ကိုင်ထားနိုင်ပါတယ်။ အမျိုးသားညီညွတ်ရေးအစိုးရရဲ့  ကုလသမဂ္ဂ ဆိုင်ရာ မြန်မာသံအမတ်ကြီး ဦးကျော်မိုးထွန်းဟာ ကုလသမဂ္ဂမှာ မြန်မာနိုင်ငံကို ကိုယ်စားပြုပြီး ပြည်သူတွေရဲ့ အသံကို ဆက်လက် ထုတ်ဖော် ပြောကြားလျက်ရှိပါတယ်။  အကြမ်းဖက် စစ်ကောင်စီ ကို အာဆီယံနဲ့  နိုင်ငံတကာအသိုင်းအဝိုင်းက အသိအမှတ်မပြုဘဲ ဆက်လက် ဖယ်ကျဉ်ထားဆဲဖြစ်ပါ တယ်။ မြန်မာနိုင်ငံအရေးနဲ့ ပတ်သက်ပြီး အရှေ့တီမောနိုင်ငံရဲ့ ခိုင်မာပြတ်သားတဲ့ ရပ်တည်ချက်က လည်း  မြန်မာလူထုအနေဖြင့် သမိုင်းမှတ်တမ်းတင်ထားရမယ့် ရပ်တည်ချက်ဖြစ်ပါတယ်။လက်ရှိအချိန်မှာ တိုင်းရင်းသား လက်နက်ကိုင် မဟာမိတ်အင်အားစုများနဲ့ အမျိုးသားညီညွတ်ရေး အစိုးရကြားမှာ စစ်ရေး နိုင်ငံရေးအရ လက်တွဲ ပူးပေါင်း ဆောင်ရွက်မှု၊ ဘဏ္ဏာငွေ မျှဝေသုံးစွဲမှု စသဖြင့် စုစည်းညီညွတ်မှု၊ နားလည်ယုံကြည်မှုတွေနဲ့ လက်တွဲဆောင်ရွက်မှုတွေ အရှိန်ရနေပါပြီ။ တိုင်းရင်းသား တော်လှန်ရေးလက်နက်ကိုင် အဖွဲ့အစည်းများနဲ့ တော်လှန်ရေးအင်အားစုများအကြား အနာဂတ် ဖက်ဒရယ်ဒီမိုကရေစီ တည်ဆောက်ရေးအတွက် ကြေကြေလည်လည် ဆွေးနွေးနေကြပြီဖြစ်ပါတယ်။(၁) အမျိုးသားညီညွတ်ရေးအစိုးရအတွင်း တာဝန်ထမ်းဆောင်နေသော တော်လှန်ရေး ရဲဘော်များခင်ဗျား ပြည်သူကပေးအပ်ထားတဲ့ တော်လှန်ရေးတာဝန်ကို ထမ်းဆောင်နေကြတဲ့ အမျိုးသားညီညွတ်ရေးအစိုးရရဲ့  ပြည်ထောင်စုဝန်ကြီးများ၊ ဒုဝန်ကြီးများနဲ့ ဝန်ထမ်းအဆင့်ဆင့်ကိုလည်း တော်လှန်ရေးမှာ ပါဝင်လုပ်ဆောင်ဖို့  ရဲရင့်တဲ့ဆုံးဖြတ်ချက်တွေ ချမှတ်ခဲ့တာကို ကျွန်တော့်အနေနဲ့ အထူး ကျေးဇူးတင် မှတ်ကျောက်တင်လိုပါတယ်။ အစိုးရဆိုတာ လူထုကို ဝန်ဆောင်မှု ပေးရတာဖြစ်တဲ့အတွက် လူထုကို အလေးထား မျက်နှာမူပြီး လူထုအသံကို အမြဲမပြတ် နားထောင်နေရမှာ ဖြစ်ပါတယ်။ ထို့အတူ ကျွန်တော်တို့အစိုးရအဖွဲ့ရဲ့ လုပ်ငန်းဆောင်တာတွေကလည်း ပိုပြီး စနစ်တကျရှိဖို့ အရေးကြီးပါတယ်။ ပြည်သူ့အုပ်ချုပ်ရေးအဖွဲ့ (ပအဖ)၊ ပြည်သူ့ကာကွယ်ရေးအဖွဲ့ (ပကဖ) နဲ့ တရားရေးကဏ္ဍပိုင်းမှာ တာဝန်ယူ လုပ်ဆောင်နေကြတဲ့ ရဲဘော်များကို တိုက်တွန်းချင်တာက ရဲဘော်တို့အနေနဲ့ လူထုအသံကို အနီးကပ်ဆုံး နားထောင်ကြပါ။ ပြည်သူကို ဝန်ဆောင်မှုပေးရတဲ့ အုပ်ချုပ်မှုယန္တရားကို အကောင်းဆုံး ဖြစ်အောင် ကြိုးစားကြပါ။ ကျွန်တော်တို့ဟာ ပြည်သူလူထုကို ဝန်ဆောင်မှုပေးရတဲ့ ပြည်သူ့ဝန်ထမ်းများ ဖြစ်တယ်ဆိုတာကို အမြဲသတိချပ်ပြီး ပြည်သူများအပေါ် ဝန်ပိ၊ ဝန်လေးစေမယ့် လုပ်ရပ်တွေကို မလုပ်မိ ကြဖို့၊ ပြည်သူလူထုကို ထိခိုက်နစ်နာအောင် မလုပ်ကြဖို့ ကျွန်တော် အထူး တိုက်တွန်းလိုပါတယ်။ ပြည်သူ့ကာကွယ်ရေးတပ်ဖွဲ့ (PDF) ရဲဘော်များနဲ့ ဒေသကာကွယ်ရေး (LPDF) ရဲဘော်များခင်ဗျား စစ်အာဏာရှင်ဖြုတ်ချရေးအတွက် မည်သည့်အခက်အခဲမျိုးကိုမဆို အံတုပြီး ရှေ့တန်းကနေ မားမားမတ်မတ် ရင်ဆိုင်တိုက်ပွဲဝင်နေကြတဲ့ ရဲဘော်တို့ရဲ့  စွန့်လွှတ်အနစ်နာခံမှု၊ ရဲဝံ့မှုတွေကို အထူး ဂုဏ်ပြု ကျေးဇူးတင်ကြောင်း ထပ်မံပြောကြားလိုပါတယ်။ တုတ်/ဓား/ တူမီး ရရာလက်နက်ကိုင်စွဲပြီး မတရားမှုကို ဆန့်ကျင်တော်လှန်ရင်း အစပြုခဲ့တဲ့ ကျွန်တော်တို့ တော်လှန်ရေးဟာ ၂ နှစ်ကျော်ကာလ အတွင်းမှာ တပ်ရင်းပေါင်းများစွာကို လက်နက်များ တပ်ဆင်လာနိုင်ပါပြီ။ နယ်မြေစိုးမိုးမှု များစွာ ချဲ့ထွင် လာနိုင်ပါပြီ။ ဒီအောင်မြင်မှုတွေဟာ ရဲဘော်တို့ရဲ့  စွမ်းစွမ်းတမံ ဆောင်ရွက်မှုနဲ့ ပြည်သူလူထုရဲ့ အားပေး ထောက်ခံမှုတွေကြောင့်ဖြစ်တယ်ဆိုတာ အလေးအနက်ထား ပြောလိုပါတယ်။ ကျွန်တော်တို့အစိုးရ အနေနဲ့လည်း လက်နက်ခဲယမ်းများ ထပ်မံဖြည့်ဆည်းနိုင်အောင် အမြဲဦးစားပေး ဆောင်ရွက်နေတယ် ဆိုတာ ထပ်မံအသိပေးလိုပါတယ်။ လိုအပ်ချက်တွေ၊ စိန်ခေါ်မှုတွေကို ကျော်ဖြတ်ပြီး ဆက်လက် အားဖြည့် ထောက်ပံ့နေမှာ ဖြစ်ပါတယ်။ တဆက်တည်းဆိုသလိုပဲ ဒေသခံ ကာကွယ်ရေးတပ်ဖွဲ့တွေကို ကျွန်တော့်အနေနဲ့ အထူး မေတ္တာရပ်ခံလို တာက ကျွန်တော်တို့ PDF များနဲ့အတူ မဟာမိတ်များက “ထုအင်အား” တည်ဆောက်ပြီး စစ်ကောင်စီကို ထိုးစစ်ဆင်တိုက်ခိုက်မှု အကောင်အထည်ဖေါ်တဲ့အပိုင်းမှာ ပူးပေါင်းပါဝင်ကြပါ။  စစ်ကောင်စီကို အဆုံးသတ်တိုက်ထုတ်ဖို့ရာ ကျွန်တော်တို့အနေနဲ့ စုစည်းညီညွတ်မှု ရှိဖို့လိုသလို စစ်ရေးမှာ စနစ်တကျ အဆင့်ဆင့် အမိန့်ပေးကွပ်ကဲမှု (Chain of Command) ရှိဖို့ဟာ အသက်တမျှ အရေးကြီးပါတယ်။ ဒါကြောင့် Chain of Command တခုတည်းအောက်မှာ အားလုံး စုစည်းညီညွတ်စွာ တော်လှန်ရေး အောင်ပွဲပန်းတိုင်ကို အရယူကြဖို့ ကျွန်တော် မေတ္တာရပ်ခံ တိုက်တွန်းလိုပါတယ်။ တော်လှန်ရေးရဲဘော်များအနေဖြင့် စစ်မြေပြင်မှာ စစ်ဖက်ဆိုင်ရာကျင့်ဝတ်စည်းကမ်းများ (code of conduct) ကို အမြဲဦးပန်လျက် လိုက်နာစောင့်ထိန်းကြဖို့ ထပ်မံအလေးအနက်ထား သတိပေးလိုပါတယ်။ တော်လှန်ရေးကဏ္ဍအသီးသီးမှာ တာဝန်ထမ်းရွက်နေကြသူတွေကို ကျွန်တော့်အနေနဲ့ အထူးသတိပေး လိုတာက စစ်အာဏာရှင်ကို ဆန့်ကျင်နေပါလျက်နဲ့ ကျွန်တော်တို့ကိုယ်တိုင်က စစ်အာဏာရှင်များရဲ့ အမူအကျင့်၊ အတွေးအခေါ်နဲ့ လုပ်ရပ်တွေကို မလုပ်ဆောင်မိကြဖို့  အင်မတန်မှ အရေးကြီးပါတယ်။ ဒီလို စစ်အာဏာရှင်ရဲ့ အမှုအကျင့်တွေ၊ အတွေးအခေါ်တွေ ရှိလာရင်လည်း ခြေမ မကောင်း ခြေမ လက်မ မကောင်း လက်မ၊ ပြတ်ပြတ်သားသား ဖယ်ထုတ်ရမှာပဲ ဖြစ်ပါတယ်။ ကျွန်တော်တို့ ဆက်လက်လျှောက်လှမ်းရမယ့် တော်လှန်ရေးခရီးမှာ ခက်ခဲကြမ်းတမ်းမှုတွေ၊ စိန်ခေါ်မှု တွေ အများကြီး ရင်ဆိုင်ကြုံတွေ့ရနိုင်ပါတယ်။ ဒါတွေကို ပြည်သူတွေရဲ့ အား၊ ကျွန်တော်တို့ရဲ့ စုစည်း ညီညွတ်မှုအား၊ တော်လှန်ရေးအပေါ်ထားတဲ့ မြဲမြံခိုင်မာသော ယုံကြည်ချက်တွေနဲ့ ကျော်ဖြတ်ပြီး မျှော်ရည်ထားတဲ့ အန္တိမပန်းတိုင်ဆီ အရောက်သွားရမှာ ဖြစ်ပါတယ်။(၂) မဟာမိတ် တိုင်းရင်းသားလက်နက်ကိုင် အင်အားစုများခင်ဗျားကျွန်တော်တို့ရဲ့ ပြည်သူ့ခုခံတွန်းလှန်မှု ခိုင်ခိုင်မာမာနဲ့ ရှင်သန်နေပြီး အောင်မြင်မှုတွေ ရယူနိုင်တာဟာ တိုင်းရင်းသားလက်နက်ကိုင်အဖွဲ့အစည်းများရဲ့ စစ်ရေး၊ နိုင်ငံရေး အဘက်ဘက်ကနေ လက်တွဲကူညီမှု၊ ပူးပေါင်း ဆောင်ရွက်မှု၊ အတွေ့အကြုံနဲ့စွမ်းရည်များ ပံ့ပိုး ဝေမျှပေးမှုတွေက အင်မတန်အရေးကြီးတဲ့ အခန်းကဏ္ဍမှာ ရှိပါတယ်။ ဒီကနေ့အချိန်မှာ အကြမ်းဖက်စစ်တပ်ကို ပြည်သူ့ကာကွယ်ရေးတပ်ဖွဲ့ဝင် တွေ မဟာဗျူဟာကျကျ ရင်ဆိုင် တိုက်ခိုက်နေနိုင်တာဟာ တိုင်းရင်းသားလက်နက်ကိုင်အဖွဲ့အစည်းများရဲ့ စစ်ရေးလေ့ကျင့်ပေးမှု၊ လက်နက်တပ်ဆင်ပေးမှု တွေကနေရရှိလာတဲ့ တန်ဖိုးတွေဖြစ်ပါတယ်။ဒီလို ခမ်းနားလှတဲ့ တန်ဖိုးတွေကို ကျွန်တော်တို့ လေးနက်စွာ အသိအမှတ်ပြုပြီး အမြဲတမ်း ဂုဏ်ယူနေမှာ ဖြစ်ပါတယ်။ ကျွန်တော်တို့ တော်လှန်ရေးရဲ့ပန်းတိုင်ဟာ စစ်အာဏာရှင်စနစ်အပါအဝင် အာဏာရှင်စနစ် ဟူသမျှကို အပြီးတိုင်ဖျက်သိမ်းပြီး ဖက်ဒရယ်ဒီမိုကရေစီနိုင်ငံတော် တည်ဆောက်ရေးဖြစ်ပါတယ်။ ဒီပန်းတိုင်ကိုရောက်ဖို့ရာ ကျွန်တော်တို့အားလုံး ကျောချင်းကပ်ပြီး အတူတကွ တိုက်ပွဲဝင်သွားကြဖို့ လေးနက်စွာ တိုက်တွန်း တောင်းဆိုပါတယ်။ ညီညွတ်မှုများဖြင့် ကျွန်တော်တို့အတူတကွ လက်တွဲ တိုက်ပွဲဝင်ကြမယ်ဆိုရင် ယိုင်နဲ့နေတဲ့ စစ်အာဏာရှင်စနစ်ဟာ မကြာခင်မှာပဲ အဆုံးသတ် ပြိုလဲသွားမှာြဖစ်ပါတယ်။(၃) နိုင်ငံတကာ မိတ်ဆွေများခင်ဗျား  ကျွန်တော်တို့ ပြည်သူလူထုဟာ အသက်တွေ၊ ဘ၀တွေ ပေးဆပ်ပြီး စစ်အာဏာရှင်စနစ်ကို ဆန့်ကျင် တွန်းလှန်နေကြတယ်ဆိုတာ နိုင်ငံတကာအစိုးရများကို အလေးအနက်ထား ပြောလိုပါတယ်။ ရရှိထားတဲ့ အချက်အလက်များအရ ယခုနှစ် ဩဂုတ်လကုန်အထိ အကြမ်းဖက်စစ်အုပ်စုကြောင့် အရပ်သားပြည်သူ ပေါင်း (၄,၀၂၃) ဦး သေဆုံးထားရပါတယ်။ အကြမ်းဖက်စစ်တပ်ဟာ အရပ်သားကျေးရွာ၊ နေအိမ်နဲ့ ဘာသာရေးအဆောက်အအုံတွေကိုပါ  ခွဲခြားမှုမရှိဘဲ လေကြောင်းတိုက်ခိုက်မှုပေါင်း အကြိမ် (၁,၄၀၀) ကျော် ကျူးလွန်တိုက်ခိုက်ထားပါတယ်။ အကြမ်းဖက်စစ်တပ်ဟာ လူသားမျိုးနွယ်အပေါ် ကျူးလွန်တဲ့ စစ်ရာဇဝတ်မှုတွေကို  ဗြောင်ကျကျ ကျူးလွန်လျက်ရှိပါတယ်။ ဒီကျူးလွန်မှုတွေအတွက် အရေးယူ အပြစ်ပေးခံရခြင်းကနေ ကင်းလွတ်ခွင့် မရသင့်တော့ပါဘူး။ မြန်မာပြည်သူလူထုကို အမှန်တကယ် ကူညီချင်တယ်ဆိုရင် နွေဦးတော်လှန်ရေး အမြန်အောင်မြင်ဖို့သာ ထောက်ကူပါလို့ အလေးအနက် တောင်းဆိုပါတယ်။ နိုင်ငံတကာက ထိရောက်စွာကူညီရင် လူထုထိခိုက်မှုနည်းပြီး အောင်ပွဲ အမြန်ရရှိမှာဖြစ်ပါတယ်။တဘက်မှာ စစ်ကောင်စီအတွက် ငွေကြေးစီးဆင်းမှုအားလုံးကို ဖြတ်တောက်ပြီး လက်နက်ခဲယမ်းနဲ့ လေယာဉ်ဆီဝယ်ယူမှုတွေကို ပြင်းပြင်းထန်ထန် ပိတ်ဆို့ကန့်သတ်ဖို့ တောင်းဆိုတိုက်တွန်းပါတယ်။ နိုင်ငံတကာအစိုးရများအနေနဲ့ အကြမ်းဖက်စစ်ကောင်စီကို အသိအမှတ်မပြုဘဲ ဆက်လက်ဖယ်ကျဉ် ထားပြီး ဒီကနေ့ကမ္ဘာကြီးမှာ စစ်အာဏာရှင်တွေအတွက် နေရာမရှိဘူးဆိုတာကို သက်သေပြရမှာ ဖြစ်ပါတယ်။ အကြမ်းဖက်စစ်ကောင်စီက စစ်ဘက် အရပ်ဘက်  ခွဲခြားမှုမရှိ ပစ်ခတ်တိုက်ခိုက်မှုကြောင့် နေရပ်စွန့် ထွက်ပြေးရတဲ့ ဒုက္ခသည်တွေနဲ့ စစ်ဘေးရှောင်တွေ၊ ဒုက္ခသည်စခန်းတွေက ရိုဟင်ဂျာပြည်သူတွေ၊ မိုခါမုန်တိုင်းဒဏ်သင့် ရခိုင်ပြည်သူတွေ ဒီလူတွေအားလုံးအတွက် လူသားစာနာမှုအကူအညီတွေ အရေးပေါ် လိုအပ်နေပါတယ်။ နိုင်ငံတကာအကူအညီတွေဟာ ပေးကားပေး၏ မရဆိုသလို အဓိက လိုအပ်နေတဲ့ ပြည်သူတွေထံ မရောက်ရှိပါဘူး။ မြေပြင်မှာ ထိရောက်မှုမရှိနိုင်တဲ့ အကြမ်းဖက်စစ်အုပ်စု ကတဆင့် ကူညီထောက်ပံ့မှုများကို ရပ်တန့်ပြီး  လက်တွေ့မြေပြင်က ဒုက္ခရောက်နေတဲ့ ပြည်သူတွေထံ တိုက်ရိုက် ကူညီပံ့ပိုးပေးနိုင်မယ့် နည်းလမ်းများကို ဆောင်ရွက်ကြဖို့ အထူးတိုက်တွန်းပါတယ်။မြန်မာ့အရေးနဲ့ ပတ်သက်ပြီး အာဆီယံရဲ့  အလေးအနက်ထား ကြိုးပမ်းဆောင်ရွက်မှုများကို ကျွန်တော်တို့အနေနဲ့ အသိအမှတ်ပြု ကျေးဇူးတင်ကြောင်းပြောလိုပါတယ်။ တဘက်မှာလည်း စစ်ကောင်စီဟာ အာဆီယံဘုံသဘောတူညီချက် ၅ ရပ်ကို လုံး၀ လိုက်နာဆောင်ရွက်ခြင်းမရှိတာကို တွေ့ရမှာဖြစ်ပါတယ်။ ဘုံသဘောတူညီချက် (၅) ရပ်ကို အကောင်ထည်ဖေါ်ရာမှာလည်း တိကျတဲ့ အချိန်ကာလသတ်မှတ်ပြီး ထိရောက်တဲ့ အကောင်အထည်ဖေါ်မှုတွေကို လုပ်ဆောင်ကြဖို့ တိုက်တွန်းလိုပါတယ်။မြန်မာ့ဒီမိုကရေစီအရေးအပေါ် အမေရိကန်အစိုးရက အလေးအနက်ထားပြီး Burma Act ကို ပြဌန်းခဲ့တာအတွက် ကျေးဇူးအထူးတင်ရပါတယ်။ Burma Act မှာ ပါဝင်တဲ့ လူသားခြင်းစာနာမှု အကူအညီတွေနဲ့ Non-lethal Assistance အကူအညီတွေကို အမြန်ဆုံး အကောင်ထည်ဖေါ်လုပ်ဆောင်ကြဖို့ မေတ္တာရပ်ခံ တိုက်တွန်းလိုပါတယ်။(၄) တိုင်းသူပြည်သားများခင်ဗျား စစ်အာဏာရှင်စနစ် အပြီးတိုင် ချုပ်ငြိမ်းဖို့အတွက် တိုင်းရင်းသားလက်နက်ကိုင် မဟာမိတ်တွေနဲ့ ပြည်သူ့ ကာကွယ်ရေးတပ်ဖွဲ့တွေဟာ ရှေ့တန်းစစ်မျက်နှာတွေမှာ စွမ်းစွမ်းတမံ တိုက်ပွဲဝင်နေကြပါ တယ်။ ကျွန်တော်တို့တော်လှန်ရေးဟာ စစ်အုပ်စုကို လက်နက်ကိုင်တော်လှန်မှုတခုတည်း မဟုတ်ပါဘူး။ စစ်အုပ်စုကို နိုင်ငံရေး စီပွားရေးအရ ဆန့်ကျင်အံတုမှုတွေကလည်း အရေးပါတဲ့နေရာမှာ ရှိပါတယ်။ ရန်သူစစ်အုပ်စု စိုးမိုးနိုင်နေသေးတဲ့ မြို့ပြကြီးတွေမှာ အခက်အခဲ အန္တရာယ်မျိုးစုံကို အမှုမထားဘဲ ဆန္ဒပြပွဲတွေ ဖော်ဆောင်တာ၊ မြို့ပြပြောက်ကြားတိုက်ပွဲတွေ ဆင်နွှဲတာ စတဲ့ လုပ်ဆောင်ချက်တွေ ကိုလည်း ကျွန်တော့်အနေနဲ့ အထူးအားရမိပါတယ်။  အကြမ်းဖက်စစ်အုပ်စုက ပြည်သူလူထုကို တော်လှန်ရေးနဲ့ ဝေးကွာသွားဖို့ သူတို့ချုပ်ကိုင်နိုင်နေသေးတဲ့ မြို့ပြတွေမှာ ပျော်ပွဲရွှင်ပွဲတွေလုပ်တာ၊ သူတို့မီဒီယာတွေကို အသုံးချပြီး ဖျော်ဖြေရေးတွေနဲ့ အာရုံလှည့် စားတာတွေ လုပ်နေပါတယ်။ ဒါတွေဟာ တော်လှန်ရေးအပေါ် ပြည်သူလူထုရဲ့ စူးစိုက်မှုကို အာရုံလွှဲဖို့ ရည်ရွယ်ချက်ရှိရှိ လုပ်နေတယ်ဆိုတာ သတိပြု ဆင်ခြင်မိဖို့လိုပါတယ်။ ပြည်သူလူထုအနေနဲ့ စစ်အုပ်စုရဲ့ သွေးဆောင်ဖျားယောင်းမှုနောက် လိုက်ပါမသွားဘဲ တော်လှန်ရေးနဲ့ တသားတည်းရှိနေကြဖို့ အထူး တိုက်တွန်းလိုပါတယ်။ ကျွန်တော်တို့ပြည်သူများဟာ မင်းအောင်လှိုင်ဦးဆောင်တဲ့ အကြမ်းဖက်စစ်အုပ်စုရဲ့ အင်မတန် မိုက်မဲတဲ့ အဆင်ခြင်မဲ့လုပ်ရပ်တွေကြောင့် ကုန်စျေးနူန်းကြီးမြင့်မှု၊ စီးပွားရေးကျပ်တည်းမှုတွေနဲ့ ရင်ဆိုင်ကြုံတွေ့ နေရတယ်ဆိုတာကို ကျွန်တော်တို့ အမျိုးသားညီညွတ်ရေးအစိုးရက ကောင်းစွာ သတိပြုမိပြီး အလေးအနက်ထားစောင့်ကြည့်လျက်ရှိပါတယ်။ ဒီအခြေအနေကနေ အမြန်ဆုံး လွတ်မြောက်နိုင်ဖို့ လည်း အစွမ်းကုန် ကြိုးစားဆောင်ရွက်နေတယ်ဆိုတာ ပြည်သူများကို အသိပေးလိုပါတယ်။ ဒီလို ခက်ခဲကျပ်တည်းမှုတွေကို ဖြေရှင်းကုစားနိုင်ဖို့ဆိုတာ အဓိက လက်သည်တရားခံဖြစ်တဲ့ အကြမ်းဖက် စစ်အုပ်စုကို အမြန်ဆုံး ဖြုတ်ချပြီး တော်လှန်ရေးအောင်ပွဲကို ရယူခြင်းကသာလျှင် တခုတည်းသော နည်းလမ်းဖြစ်ပါတယ်။တော်လှန်ရေးအောင်ပွဲ အမြန်ဆုံးရယူနိုင်ဖို့အတွက် ကျွန်တော်တို့ပြည်သူတွေအနေနဲ့ တတ်စွမ်းသမျှ ပါဝင်ကြပါ။ ငွေကြေးတတ်နိုင်သူ ငွေကြေး၊ ငွေကြေးမတတ်နိုင်သူတွေအနေနဲ့လည်း သတင်း အချက်အလက်များ ပေးပြီး ပံ့ပိုးကူညီတာ၊ စစ်တပ်ပိုင်စီးပွားရေးတွေကို ဆန့်ကျင်တာ၊ စစ်တပ် ထုတ်ကုန်ပစ္စည်းတွေကို အသုံးမပြုတာ စတဲ့ ကိုယ်တတ်နိုင်တဲ့နည်းလမ်းများဖြင့် တော်လှန်ရေးကို ပံ့ပိုးကူညီနေကြဖို့ တိုက်တွန်းလိုပါတယ်။ ကျွန်တော်တို့ဟာ စစ်အာဏာရှင်စနစ်ကို ပြည်သူ့အားနဲ့ အဆုံးသတ်ရပါလိမ့်မယ်၊ ပြည်သူ့ဓါးနဲ့ အမြစ်ဖြတ်ရပါလိမ့်မယ်။ “လှည်းနေလှေအောင်း၊ မြင်းဇောင်းမကျန်” ပြည်သူအားလုံး တသံတည်းညီ၊ တချီတည်း ရုန်းချိန် တန်ပါပြီ။ မင်းအောင်လှိုင်နဲ့တကွ အပေါင်းအပါ အကြမ်းဖက်စစ်အုပ်စုကို ပြောလိုတာက ပြည်သူတွေ ကျွေးတာ စား၊ ပြည်သူ့ဘဏ္ဍာသုံးပြီး ပြည်သူတွေကို အကြမ်းဖက်သတ်ဖြတ်နေတဲ့ လုပ်ရပ်တွေကို ရပ်တန့်ပါ။ မင်းအောင်လှိုင်နဲ့ အပေါင်းအပါလူတစုရဲ့ ကိုယ်ကျိုးစီးပွားကို ကာကွယ်ပြီး ပြည်သူလူထုရဲ့ အသက် အိုးအိမ် စည်းစိမ်ကို ခြိမ်းခြောက်ဖျက်ဆီးနေကြတဲ့ စစ်ကောင်စီတပ်သားတွေအနေနဲ့လည်း စစ်အုပ်စုရဲ့ လက်ကိုင်တုတ် အဖြစ်မခံဘဲ အခြေအနေအမှန်ကို လက်တွေ့ကျကျ ရှုမြင်ကာ အကြမ်းဖက်စစ်တပ်ကို စွန့်ခွါကြပါ။ ပြည်သူ့ထံမှာ အလင်းဝင်ပြီး အမှန်တရားဘက်မှာ ဂုဏ်သိက္ခာရှိစွာရပ်တည်ကြပါ။ တိုင်းပြည်ရဲ့ အာဏာဟာ ပြည်သူ့ထံကသာ ဆင်းသက်တာဖြစ်တယ်၊ ပြည်သူ့အာဏာကို ပြည်သူ မလိုလားတဲ့ မင်းအောင်လှိုင် ဘယ်တော့မှ ရနိုင်မှာမဟုတ်ဘူးဆိုတာ ပြတ်ပြတ်သားသား သတိပေးလိုက်ပါတယ်။ နိဂုံးချုပ်အားဖြင့် ပြောလိုတာက ကျွန်တော်တို့တော်လှန်ရေးဟာ စုစည်းညီညွတ်မှုအားနဲ့  ပြည်သူ့အား ကို မြဲမြံစွာ ဆုပ်ကိုင်ထားရမှာဖြစ်ပါတယ်။ စစ်အာဏာရှင်စနစ်ကို အပြီးတိုင် တိုက်ထုတ်ဖို့ဆိုရင် ကျွန်တော်တို့ကြားမှာ ကွဲလွဲတဲ့ သဘောထားအမြင်တွေ ရှိလာရင်လည်း အသိအမှတ်ပြုပြီး စုစည်း ညီညွတ်တဲ့အင်အားကို လက်တွဲ တည်ဆောက်ရပါလိမ့်မယ်၊ ဘုံရန်သူကို ရှင်းလင်းပြတ်သားစွာ ကြည့်မြင်ရပါလိမ့်မယ်။ ဒီတော်လှန်ရေးဟာ ပြည်သူကြားက ပေါက်ဖွားလာတဲ့ တော်လှန်ရေး ဖြစ်တာ ကြောင့် ကျွန်တော်တို့တော်လှန်ရေးဟာ ပြည်သူလူထုနဲ့ ဝေးကွာမသွားစေရေး အမြဲမပြတ် နှလုံးသွင်း ထားကြဖို့ လိုအပ်ပါတယ်။ "ပြည်သူ့အားပေါ် အခြေတည်၊ စုစည်းညီညွတ်မှုသည် အောင်ပွဲအရင်းခံ" ဖြစ်တယ်ဆိုတာ ပြောကြား ရင်း နိဂုံးချုပ်လိုက်ပါတယ်။အရေးတော်ပုံမုချအောင်ရမည်...

၂၀၂၃ ခုနှစ် မတ်လ (၃၁) ရက် ပထမဦးစွာ ကျွန်တော့်အနေနဲ့ ဖက်ဒရယ်ဒီမိုကရေစီပဋိညာဉ် (၂) နှစ်ပြည့်အခမ်းအနားမှာ  လူမျိုးစု ခေါင်းဆောင်အသီးသီးနဲ့ တော်လှန်ရေးအင်အားစုအသီးသီးက ကိုယ်စားလှယ်များ/ ခေါင်းဆောင်များကို  တစ်ညီတစ်ညွတ်တည်း တွေ့ခွင့်ဆုံခွင့်ရလို့ အထူး ဝမ်းမြောက်ဂုဏ်ယူကြောင်း ပြောလိုပါတယ်။ တစ်ဆက်တည်းမှာ ယခု တက်ရောက်လာသော ကိုယ်စားလှယ်များ၊ ခေါင်းဆောင် များကို နွေဦးတော်လှန်ရေး ဘက်တော်သားများအဖြစ် အလေးအမြတ် ဦးညွှတ်ကြောင်း ပြောကြားချင်ပါတယ်။ ကျွန်တော့်အနေနဲ့ ဖက်ဒရယ်ဒီမိုကရေစီပဋိညာဉ်အပေါ် လူထုရဲ့ နားလည်လက်ခံထားမှုကို အနည်းငယ် ပြောကြားချင်ပါတယ်။ ဖက်ဒရယ်ဒီမိုကရေစီပဋိညာဉ်ဟာ နွေဦးတော်လှန်ရေးကာလ အတွင်းမှာ ပေါ်ထွန်းလာခဲ့တဲ့ နိုင်ငံရေးပဋိညာဉ်တစ်ရပ်ဖြစ်ပါတယ်။ ဒါ့အပြင် ဖက်ဒရယ်ဒီမိုကရေစီ နိုင်ငံသစ်ဆီကို ဦးတည်လျှောက်လှမ်းတဲ့နေရာမှာ နိုင်ငံရေးလမ်းပြမြေပုံအဖြစ် တည်ရှိနေပါတယ်။ ထိုနည်းတူစွာပဲ လွတ်လပ်ပွင့်လင်း၍ တရားမျှတသော၊ တန်းတူညီမျှသော လူ့ဘောင်အဖွဲ့အစည်း ကို စနစ်တကျ တည်ထောင်ဖို့ ရည်ညွှန်းထားတဲ့ အခြေခံမူ အပေါင်းအစုလည်း ဖြစ်ပါတယ်။ လူထုကိုယ်၌က ဖက်ဒရယ်ဒီမိုကရေစီပဋိညာဉ်အပေါ်မှာ ဒီလို နားလည်ထားသလို၊ ကျွန်တော်တို့ အမျိုးသားညီညွတ်ရေးအစိုးရကလည်း လူထုသဘောထားနဲ့ ထပ်တူ နားလည်လက်ခံထားကြောင်း ပြောကြားလိုပါတယ်။ တော်လှန်သော လူထုလှုပ်ရှားမှုလှိုင်းလုံးကြီးထဲမှာ လူထုရဲ့ အင်နဲ့ အားနဲ့ တော်လှန်မှုကို ကျွန်တော်တို့ အားလုံး ထင်ထင်ရှားရှား မြင်တွေ့ရပြီး ဖြစ်ပါတယ်။ ဒီလို လူထုလှုပ်ရှားမှုအတွင်းမှာ တော်လှန်ရေး အင်အားစုအားလုံး ဝိုင်းဝန်း သဘောညီထားတဲ့ နိုင်ငံရေးဘုံသဘောတူညီချက် တစ်ခုဟာ မဖြစ်မနေ ရှိထားရပါလိမ့်မယ်။ ဒီလိုအပ်ချက်ကြောင့် အမျိုးသားညီညွတ်ရေးအတိုင်ပင်ခံကောင်စီ ပေါ်ထွက် လာတာဖြစ်သလို ဒီလိုအပ်ချက်ကြောင့်ပဲ ဖက်ဒရယ်ဒီမိုကရေစီပဋိညာဉ်ဟာ ခြေခြေမြစ်မြစ် ပေါ်ထွက်လာရခြင်း ဖြစ်တယ်လို့ ပြောချင်ပါတယ်။ နွေဦးတော်လှန်ရေးဟာ လူထုရဲ့ လွတ်လပ်ခွင့်နဲ့ လူထုရဲ့ အကျိုးစီးပွားကို အခြေခံပြီး ပေါ်ထွက် လာတဲ့ လူထုတော်လှန်ရေးကြီးဖြစ်ပါတယ်။ အုပ်စုအကျိုးစီးပွားတွေနဲ့ ဖြစ်ပေါ်လာတဲ့ တော်လှန်ရေး မဟုတ်ဘူးဆိုတာကို ပြတ်ပြတ်သားသား နားလည်ထားကြဖို့ လိုပါတယ်။ အုပ်စုအသီးသီးရဲ့ အကျိုးစီးပွားအတွက် မဟုတ်ဘဲ လူထုရဲ့ လွတ်လပ်ခွင့်အတွက်သာ ကျွန်တော်တို့ဟာ တိုက်ပွဲ ဝင်နေခြင်းဖြစ်ပါတယ်။ လူထုရဲ့ အကျိုးစီးပွားအတွက်သာ တော်လှန်နေခြင်းဖြစ်ပါတယ်။ ဒါ့ကြောင့်လည်း အင်မတန် ကျယ်ပြန့်သော / အင်မတန် အင်အားကြီးသော လူထုလှုပ်ရှားမှုပုံစံကို အလျင်အမြန် ရောက်ရှိလာခြင်းဖြစ်ပါတယ်။ ကျွန်တော်တို့ဟာ အားလုံးပါဝင်ရေးမူကို ကိုင်စွဲသလို၊ စုပေါင်းခေါင်းဆောင်မှု စံနှုန်းကိုလည်း အခြေပြုထားပါတယ်။ ဒီနေရာမှာ လက်တွေ့ကျကျ မလုပ်နိုင်တာတွေနဲ့ အကန့်အသတ်တွေ ရှိနေတယ်ဆိုတာလည်း သတိချပ်ဖို့ လိုပါတယ်။ ဒါပေမယ့် ဘယ်လိုပဲ အကန့်အသတ်တွေ ရှိနေပါစေ အမျိုးသားညီညွတ်ရေးအတိုင်ပင်ခံကောင်စီရဲ့ စုဖွဲ့မှုနဲ့ ဖက်ဒရယ်ဒီမိုကရေစီပဋိညာဉ်ကို စနစ်တကျ ဆွေးနွေးအတည်ပြု ပြဋ္ဌာန်းနိုင်ခြင်းဟာ အောင်မြင်မှု တစ်ရပ်ဖြစ်တယ်လို့ ပြောနိုင်ပါတယ်။ ကျွန်တော်တို့ဟာ မူအပေါ်မှာ အခြေခံတဲ့ နိုင်ငံရေးလျှောက်လမ်းကို စနစ်တကျ လျှောက်လှမ်း နေပါတယ်။ တော်လှန်ရေးကာလအတွင်းမှာ အခြေခံမူကောင်းတွေနဲ့ ထိန်းကွပ်ဦးဆောင်နိုင်စွမ်းရှိဖို့ ဖက်ဒရယ်ဒီမိုကရေစီပဋိညာဉ်ကို နိုင်ငံရေးအခြေခံမူတွေအဖြစ် ကိုင်စွဲပြီး လျှောက်လှမ်းနေပါတယ်။ ယခု တက်ရောက်လာတဲ့ ခေါင်းဆောင်အသီးသီး၊ ကိုယ်စားလှယ်အသီးသီးကလည်း ဖက်ဒရယ် ဒီမိုကရေစီပဋိညာဉ်ပါ အခြေခံမူတွေကို လေးစားတန်ဖိုးထားကြတဲ့သူတွေ ဖြစ်ကြောင်း ကျွန်တော့် အနေနဲ့ အလေးအနက် ယုံကြည်ထားပါတယ်။ နိဂုံးချုပ်အနေနဲ့ ပြောချင်တာကတော့ နွေဦးတော်လှန်ရေး လူထုလှုပ်ရှားမှုကြီးကို ဦးဆောင်ရာမှာ ကျွန်တော်တို့ အားလုံးဟာ ဖက်ဒရယ်ဒီမိုကရေစီပဋိညာဉ်ပါ အခြေခံမူတွေကို ဗဟိုပြုပြီး ခေါင်းဆောင်မှု ပြုကြပါလို့ အထူး တိုက်တွန်းလိုပါတယ်။ ဒါ့အပြင် စစ်အာဏာရှင်စနစ် အမြစ်ပြတ် သုတ်သင်ချေမှုန်းရေးအတွက် မူကိုအခြေခံသော တော်လှန်ရေးတိုက်ပွဲကို ဆင်နွှဲနေတာ ဖြစ်ပါတယ်။ ဒါ့ကြောင့် ဖက်ဒရယ်ဒီမိုကရေစီပဋိညာဉ်ကို စစ်အာဏာရှင်တော်လှန်ရေးအတွက် မိစ္ဆာနှင်တဲ့ကမ္မဝါစာအဖြစ် အသုံးချ တိုက်ပွဲဝင်ရပါလိမ့်မယ်။ ဖက်ဒရယ်ဒီမိုကရေစီပဋိညာဉ်ဟာ တော်လှန်ရေးအင်အားစုအားလုံး သဘောညီထားတဲ့ နိုင်ငံရေးသဘောတူညီချက်တစ်ခုဖြစ်သလို၊ အနာဂတ်နိုင်ငံတော်သစ်ရဲ့ လမ်းစဉ်မူဝါဒတွေဖြစ်ကြောင်း အတည်ပြု ပြောကြားရင်း နိဂုံးချုပ် အပ်ပါတယ် ခင်ဗျား…..အရေးတော်ပုံမုချအောင်ရမည်...

(၂၀၂၃ ခုနှစ်၊ မတ်လ ၃၀ ရက်)           ဒီနေ့ (၁၃/၂၀၂၃) အစည်းအဝေးကို လုပ်ငန်းတာဝန်တွေ များပြားတဲ့ကြားကနေ မပျက်မကွက် တက်ရောက်ပေးနေကြတဲ့ ဗဟိုကော်မတီဝင် ပြည်ထောင်စုဝန်ကြီးများ၊ ဒုတိယဝန်ကြီးများနှင့် အတွင်းဝန်များအားလုံးကို အထူးကျေးဇူးတင်ရှိပါကြောင်း ပြောကြားလိုပါတယ်။ အလားတူပဲ မြေပြင်မှာ ပဋိပက္ခတွေတင်းမာနေတဲ့ မြို့နယ်တွေထဲကတစ်ခုဖြစ်တဲ့ ရေစကြိုမြို့နယ်နဲ့ ဗဟိုကော်မတီ အတွင်းရေးမှူးအဖွဲ့ဝင် အတွင်းဝန်တွေ တွေ့ဆုံဆွေးနွေးကြတယ်လို့ သိရတဲ့အတွက်လည်း ဝမ်းမြောက် မိပါတယ်။ ဒီလိုတွေ့ဆုံခြင်းအားဖြင့် မြေပြင်မှာဖြစ်နေကြတဲ့ တင်းမာမှုတွေကိုလည်း အတော်အတန် လျော့ချနိုင်လိမ့်မယ်လို့ ယူဆပါတယ်။ ဒါပေမယ့်လည်း လုံးဝပြေလည်သွားတဲ့အထိ ဆောင်ရွက်ပေး နိုင်ဖို့ကိုလည်း ဆက်လက်ကြိုးစားကြရမှာ ဖြစ်ပါတယ်။ ဒါကြောင့် ကာကွယ်ရေးဝန်ကြီးဌာန အနေနဲ့ လည်း ရေစကြိုမှာဖြစ်နေတဲ့ ပြသနာတွေနဲ့ပက်သက်ပြီး အမြန်ဆုံးဆက်လက် ဆောင်ရွက်ပေးဖို့ လိုအပ် မှာဖြစ်ပါတယ်။ အဲ့ဒီလို မြေပြင်ရဲ့အခက်အခဲနဲ့ ပဋိပက္ခတွေကို ပြေလည် အောင်ဖြေရှင်းဖို့ ကြိုးပမ်းတဲ့ နေရာမှာ မြို့နယ်တစ်ခုချင်းစီရဲ့ ပကတိအခြေအနေအမှန်ကို သိရှိထား ကြဖို့ကလည်း  ပြဿနာများကို ဖြေရှင်းနိုင်မယ့် နည်းလမ်းတစ်ခု ဖြစ်တာကြောင့်   မြေပြင်ရဲ့ သတင်း အချက်အလက်များကို ပြုစုထားဖို့ အမြဲမပြတ် ညွှန်ကြားချက်တွေ ပေးနေရခြင်း ဖြစ်ပါတယ်။        ဒီလအတွင်းမှာ media ပေါ်ထိတက်လာတဲ့ ကိစ္စတွေလည်း ရှိနေသလို တိုင်စာတက်လာတဲ့ ကိစ္စတွေလည်း ရှိနေပါတယ်။ ဝက်လက် PDF အမှတ် (၂) တပ်ရင်းက လက်နက်တပ်ဆင်ရန်အတွက် တစ်အိမ်လျှင် ငွေကျပ် ၂၀၀၀၀ နှုံးကောက်ခံနေမှုကိုလည်း တာဝန်ရှိသူတွေအနေနဲ့ သေသေချာချာ စုံစမ်း မေးမြန်းပြီး နောင်ကိုမဖြစ်ရအောင် စီမံဆောင်ရွက်သွားဖို့ လိုပါတယ်။ ဒီလိုပဲ ပခုက္ကူမှာလည်း ဖမ်းပြီးငွေကြေးတောင်းခံတဲ့ ပြဿနာက တော်တော်သတင်းတွေထွက်လာတာ ရှိပါတယ်။ ဒါတွေနဲ့ ပါတ်သက်ပြီးလည်း အတွင်းရေးမှူးအဖွဲ့အနေနဲ့ ကာကွယ်ရေးဝန်ကြီးဌာန အတွင်းဝန်နဲ့ပါ သေချာ ညှိနှိုင်းတိုင်ပင်ပြီး အမြန်ဆုံးဆောင်ရွက်သင့်ပါတယ်။ အကယ်၍ နောက်ပိုင်းမှာ မူဝါဒခိုင်ခိုင်မာမာနဲ့ တာဝန်ရှိသူအဆင့်ဆင့်က စီမံဆောင်ရွက်နိုင်ပြီဆိုရင်တော့ ဗဟိုကော်မတီအထိ ပါဝင်နေစရာ မလိုတော့ပေမယ့် အခုလိုကာလမျိုးမှာတော့ ပင်ပန်းကြပေမယ့်လည်း ပိုပြီးထိရောက်မှုရှိအောင် အတွင်းရေးမှူးအဖွဲ့ဝင်များက ကြိုးစားပေးကြဖို့ တိုက်တွန်းလိုပါတယ်။ပြီးခဲ့တဲ့တစ်ပတ်အတွင်းမှာပဲ ဖြစ်ပေါ်ခဲ့တဲ့ အခြေအနေအရပ်ရပ်ကို ပြန်လည်သုံးသပ် ကြည့်မယ် ဆိုရင် အကြမ်းဖက်စစ်တပ်ဟာ အင်အားချိနဲ့နေပြီဆိုတာ ပိုပြီးပေါ်လွင်လာပါတယ်။ တိုက်ပွဲတိုင်းမှာ ပြန်လည်တိုက်ခိုက်ဖို့ထက် လက်နက်ချအညံ့ခံတဲ့နည်းလမ်း ဒါမှမဟုတ် တပ်ဆုတ်ထွက်ပြေးတဲ့ နည်းလမ်းကို လက်တွေ့ပိုပြီး ကျင့်သုံးလာတာကို တွေ့ရှိရပါတယ်။ ကျွန်တော်တို့ ဘက်ကလည်း ပြည်သူ့ကာကွယ်ရေးတပ်ဖွဲ့ဝင်များနဲ့ စစ်ရေးစစ်ရာမှာ အတွေ့အကြုံများစွာ ကြွယ်ဝနေပြီးဖြစ်တဲ့ တိုင်းရင်းသား လက်နက်ကိုင် တော်လှန်ရေးအင်အားစုတွေနဲ့ လက်တွဲညီညီ ပူးပေါင်းတိုက်စစ်ဆင် ဖော်ဆောင်နိုင်မှုတွေကိုလည်း ကျယ်ပြန့်စွာ လုပ်ဆောင်လာနိုင်တာကို တွေ့ရတဲ့အတွက် ဝမ်းမြောက် ဝမ်းသာ ဖြစ်ရပါတယ်။ ဒါဟာ အနာဂတ်မှာ ဖက်ဒရယ်တပ်မတော် ပေါ်ပေါက်လာစေမယ့် ပထမဆုံး ခြေလှမ်းလို့ဆိုရင်လည်း မမှားနိုင်ပါဘူး။ အကြမ်းဖက်စစ်အုပ်စုက မတရားအာဏာသိမ်းယူထားတဲ့ (၂) နှစ်ကျော် ကာလအတွင်းမှာ နိုင်ငံရေးမတည်ငြိမ်မှုတွေ၊ စီးပွားရေး၊ လူမှုဘဝ အဆင့်အတန်းများ၊ ပြည်သူ့ဝန်ဆောင်မှုများ ပြိုကျ ပျက်စီးခဲ့ရသလို ဒေသတွင်းအတွက်လည်း မတည်ငြိမ်မှုတွေကို ဖြစ်ပေါ်စေပါတယ်။ ဒါပေမယ့် စစ် ကောင်စီဟာ လက်တွေ့ဖြစ်ပျက်နေတာတွေ၊ ပျက်စီးပြိုလဲနေတာတွေ၊ အရှက်တကွဲ ရှုံးနိမ့်မှုတွေကို လိမ်ညာဖုံးကွယ်ပြီး၊ အာဏာကို မစွန့်လွတ်ရစေရေးအတွက် မိုက်မဲတဲ့လုပ်ရပ်တွေကို ဆက်လက် ကျူးလွန်လျက်ရှိနေတာကို တောင်ပေါ်နဲ့ အညာမြေပြန့်၊ ကျေးလက်နဲ့ မြို့ပြမကျန် ခံစားနေရတာ ဖြစ်ပါတယ်။ ပြည်သူတွေကတော့ စစ်မိစ္ဆာတွေလက်အောက် ဘယ်တော့မှမနေဘူး ဆိုတာကို သူတို့ရဲ့ အနစ်နာခံမှုတွေ၊ ပေးဆပ်မှုတွေ၊ ဝေမျှထောက်ပံ့မှုတွေကနေ မြင်တွေ့နိုင်ပြီး ဒီလို ဉာဏ်ပညာ၊ သတ္တိနဲ့ ပေးဆပ်မှုတွေကပဲ ကျွန်တော်တို့ အမျိုးသားညီညွတ်ရေးအစိုးရရဲ့ တော်လှန်ရေးအတွက်၊ ရှေ့ဆက်ပြီး လုပ်ဆောင်သွားရမယ့် အလုပ်တွေအတွက် ပိုမိုအားရှိစေတဲ့ ခွန်အားတွေ ဖြစ်ရပါတယ်။ ဒီနေရာမှာ ပြည်သူ့ကာကွယ်ရေးအင်အားစုများ၊ အစိုးရနဲ့ ပုဂ္ဂလိကဝန်ထမ်း CDM များ၊ ပြည် သူ့အုပ်ချုပ်ရေး၊ ဝန်ဆောင်မှုပေးရေးအတွက် လုပ်ဆောင်နေသူများမှသည် ဒေသအကျိုးအတွက် ဖိအားအမျိုးမျိုး၊ အခက်အခဲအမျိုးမျိုးကြားက နိုင်ရာတာဝန်ယူပေးနေကြတဲ့ ပြည်သူများအားလုံးရဲ့ မဆုတ်မနစ် ကြိုးပမ်းမှုများအတွက်လည်း ဂုဏ်ယူလေးစားကြောင်း ပြောလိုပါတယ်။ ကျွန်တော်တို့အနေနဲ့လည်း ကြားကာလအုပ်ချုပ်ရေးကို စီမံဆောင်ရွက်တဲ့နေရာမှာ ဝန်ကြီး ဌာနတွေဟာ အရင်းအမြစ်နည်းနည်းနဲ့ စုစုစည်းစည်း ကြိုးစားဆောင်ရွက်နေကြရတာ ဖြစ်ပါတယ်။ အုပ်ချုပ်ရေးနှင့် ပြည်သူ့လိုအပ်ချက်များပံ့ပိုးရေး၊ ဝန်ဆောင်မှုပေးရေးတို့ဟာ ကြီးမားကျယ်ပြန့်တဲ့ တာဝန်များဖြစ်ပါတယ်။ အစိုးရတစ်ရပ်ကဲ့သို့ ဝန်ထမ်းယန္တရားကြီး တစ်ခုလုံးကို လည်ပတ် ဆောင်ရွက်နေရတာ မဟုတ်တဲ့အတွက် လိုအပ်ချက်တွေရှိနိုင်ပေမယ့် တတ်နိုင်သမျှ စနစ်လည်းကျ၊ အလုပ်လည်းဖြစ်နိုင်ဖို့  ကြိုးစားရမှာဖြစ်ပါတယ်။ ကြားကာလကော်မတီမှ ဝန်ကြီးဌာနများ အနေနဲ့  လည်း လက်ရှိလုပ်ဆောင်မှုများကို  အချိန်နဲ့တပြေးညီ လုပ်ဆောင်ရင်း ပိုမိုကောင်းမွန်မယ့် မူဝါဒ ညွှန်ကြားချက်တွေနဲ့ စီမံအုပ်ချုပ်နိုင်ဖို့အတွက်လည်း အမြဲမပြတ် စဉ်းစားလုပ်ဆောင်နေကြဖို့ အကြံပြုတိုက်တွန်းလိုပါတယ်။၃       နိဂုံးချုပ်အနေနဲ့ ပြောကြားလိုတာကတော့ ကြားကာလပြည်သူ့အုပ်ချုပ်ရေးဆိုတာ အခက် ခဲဆုံး၊ အကြမ်းတမ်းဆုံး အခြေအနေမှာ လမ်းဖောက်ရတာဖြစ်လို့ ချောမွေ့မှုတော့ ရှိမှာမဟုတ်တာ ကို နားလည်လက်ခံထားပြီးသားဖြစ်ပါတယ်။ ဒါပေမယ့်လည်း ကျွန်တော်တို့အစိုးရ တာဝန်ရှိသူများ အချင်းချင်းအကြားမှာ ခိုင်မာတဲ့ပူးပေါင်းဆောင်ရွက်မှု၊ အပြန်အလှန်လေးစားမှုတွေနဲ့သာ ဆောင်ရွက် သွားမယ်ဆိုရင် ဘယ်လောက်ပဲ ခက်ခဲကြမ်းတမ်းနေပါစေ ကောင်းမွန်တဲ့ ရလဒ်များကို ဖော်ဆောင် နိုင်မှာ ဖြစ်ကြောင်း အားပေးပြောကြားရင်း နိဂုံးချုပ်အပ်ပါတယ်။

လေးစားအပ်တဲ့ နိုင်ငံတော် ယာယီသမ္မတကြီး-       ပြည်ထောင်စုဝန်ကြီးချုပ်-       ပြည်ထောင်စုလွှတ်တော်ကိုယ်စားပြုကော်မတီဥက္ကဋ္ဌ-       အမျိုးသားညီညွတ်ရေးအတိုင်ပင်ခံကောင်စီဝင်များ-       တိုင်းရင်းသားတော်လှန်ရေးအဖွဲ့အစည်းများမှ ခေါင်းဆောင်များ-       ပြည်နယ်ဖက်ဒရယ်ယူနစ်အတိုင်ပင်ခံကောင်စီဝင်များ-       ပြည်ထောင်စုအစိုးရအဖွဲ့ဝင် ဝန်ကြီးများ၊ ဒုတိယဝန်ကြီးများ-       လွှတ်တော်ကိုယ်စားလှယ်များ၊ သံတမန်များ-       အထူးဖိတ်ကြားထားတဲ့ဧည့်သည်တော်ကြီးများခင်ဗျားအခုလို ပြည်ထောင်စုလွှတ်တော် ကိုယ်စားပြုကော်မတီ (CRPH) နှင့် ပြည်ထောင်စုသမ္မတ မြန်မာနိုင်ငံ- အမျိုးသား ညီညွတ်ရေးအစိုးရတို့က ပူးတွဲကျင်းပတဲ့ (၇၅) နှစ်မြောက် အာဇာနည်နေ့အောက်မေ့ဖွယ် အခမ်းအနားမှာ ကြားကာလချင်းအမျိုးသားအတိုင်ပင်ခံကောင်စီကိုယ်စား အောက်မေ့ဖွယ် အမှတ်တရစကား ပြောကြားခွင့်ရရှိတဲ့အတွက် များစွာ ဂုဏ်ယူဝမ်းသာမိပါတယ်။            ဗိုလ်ချုပ်အောင်ဆန်းနဲ့ အာဇာနည် ခေါင်းဆောင်ကြီးများကို ၁၉၄၇ ခုနှစ်၊ ဇူလိုင်လ (၁၉) ရက်နေ့မှာ မြန်မာပြည် ကြားဖြတ်အစိုးရရဲ့ ဝန်ကြီးများ အစည်းအဝေးကျင်းပနေတဲ့ အချိန်မှာ လုပ်ကြံ သတ်ဖြတ်ခြင်း ခံခဲ့ ကြရတာ ဖြစ်ပါတယ်။ အဲဒီ့နံနက်မှာ ကျင်းပခဲ့တဲ့ မြန်မာပြည် ကြားဖြတ်အစိုးရ ဝန်ကြီးချုပ် ဗိုလ်ချုပ် အောင်ဆန်း ဦးဆောင်တဲ့ ဝန်ကြီးများအစည်းအဝေး အစီအစဉ်ကို ကျနော်တို့ မသိပါဘူး။ ဘာအကြောင်းတွေ ဆွေးနွေးခဲ့တယ်ဆိုတာလည်း ကျနော်တို့ မသိပါဘူး။ သို့သော် ကျနော် သိခွင့်ရတာက ဗိုလ်ချုပ်အောင်ဆန်းနဲ့ အာဇာနည်ခေါင်းဆောင်ကြီးများကို လုပ်ကြံ သတ်ဖြတ်ခဲ့တဲ့အချိန်ဟာ မြန်မာပြည် လွတ်လပ်ရေးကြိုးပမ်းမှုနှင့် ပြည်ထောင်စု တည်ဆောက်ရေးအတွက် အရေးအကြီးဆုံးကာလ ဖြစ်ခဲ့တယ်ဆိုတာကိုပဲ ကျနော်တို့ သိရှိနိုင် ပါတယ်။            တိုင်းရင်းသား လူမျိုးပေါင်းစုံ ပူးပေါင်းပါဝင်တဲ့ ပြည်ထောင်စုကြီးကို အတူတကွ ထူထောင်ဖို့ ၁၉၄၇၊ ဖေဖော်ဝါရီလ (၁၂) ရက်နေ့မှာ ဗိုလ်ချုပ်အောင်ဆန်းနှင့် တိုင်းရင်းသားခေါင်းဆောင်ကြီးများ ပင်လုံစာချုပ်ကို လက်မှတ်ရေးထိုးခဲ့ကြတယ်။ ပင်လုံစာချုပ်ကို အခြေခံပြီး တိုင်းရင်းသားလူမျိုးပေါင်းစုံတို့ရဲ့ အမျိုးသား တန်းတူ ရေးနှင့် ကိုယ်ပိုင်ပြဋ္ဌာန်းခွင့် အခွင့်အရေးများကို အာမခံချက်ပေးနိုင်တဲ့ ပြည်ထောင်စုကြီးကို တည်ဆောက်ဖို့ ကြိုုးပမ်းနေတဲ့ကာလ ဖြစ်ခဲ့ပါတယ်။ ဒါကြောင့် ဒီမိုကရေစီရေး၊ အမျိုးသား တန်းတူရေးနှင့် ကိုယ်ပိုင်ပြဋ္ဌာန်းခွင့် အခွင့်အရေးများကို အာမခံချက် ပေးနိုင်တဲ့ ပြည်ထောင်စု ဖွဲ့စည်းပုံ အခြေခံဥပဒေကို ရေးဆွဲပြဋ္ဌာန်းဖို့ ဗိုလ်ချုပ် အောင်ဆန်းနှင့် အာဇာနည်ခေါင်းဆောင်ကြီးများ အပူတပြင်း ကြိုးပမ်းတဲ့ကာလ ဖြစ်ခဲ့ပါတယ်။            ဒီလို ပြည်ထောင်စု ဖွဲ့စည်းပုံ အခြေခံဥပဒေ တရပ်ကို ရေးဆွဲပြဋ္ဌာန်းနိုင်ဖို့ ၁၉၄၇ ဧပြီလမှာ တိုင်းပြု ပြည်ပြုလွှတ်တော် ရွေးကောက်ပွဲကို ကျင်းပခဲ့ပါတယ်။ တိုင်းပြုပြည်ပြုလွှတ်တော် ရွေးကောက်ပွဲ ကျင်းပပြီး နောက် ဗိုလ်ချုပ်အောင်ဆန်း ဦးဆောင်တဲ့ ဖဆပလ အဖွဲ့ချုပ်ကြီးက တိုင်းပြုပြည်ပြု လွှတ်တော်အတွက် အလွန်ကြီးမားတဲ့ ပြင်ဆင်မှုကြီး တခုကို ပြုလုပ်ခဲ့ပါတယ်။ ဒါဟာ ၁၉၄၇ မေလ (၂၃) ရက်နေ့မှာ စတင် ကျင်းပ ခဲ့တဲ့ ဖဆပလအဖွဲ့ချုပ်ရဲ့ ပြင်ဆင်မှု ပဏာမ ညီလာခံပဲဖြစ်ပါတယ်။ ဖဆပလ ပြင်ဆင်မှု ပဏာမ ညီလာခံကြီး ကို ရန်ကုန်မြို့ရှိ နေသူရိန်ခန်းမကြီးထဲမှာ ကျင်းပခဲ့ပြီး ဗိုလ်ချုပ်အောင်ဆန်းက အဲဒီ့ညီလာခံကြီးမှာ ဖွဲ့စည်းပုံ အခြေခံဥပဒေ မူကြမ်းတခုကို တင်သွင်းနိုင်ခဲ့ပါတယ်။            ၁၉၄၇ ဇွန်လ (၉) ရက်နေ့မှ (၁၈) ရက်နေ့အထိ ကျင်းပခဲ့တဲ့ တိုင်းပြုပြည်ပြုလွှတ်တော် ပထမ အစည်း အဝေးမှာ ဗိုလ်ချုပ်အောင်ဆန်းက လွတ်လပ်ရေး ရရှိရေးအတွက် မရှိမဖြစ် လိုအပ်တဲ့ ပြည်ထောင်စု ဖွဲ့စည်းပုံ အခြေခံဥပဒေတရပ်ကို ဒီလွှတ်တော်ကြီးမှာ ရေးဆွဲပြဋ္ဌာန်းရမှာဖြစ်ကြောင်း အကျယ်တဝင့် ရှင်းလင်း တင်ပြခဲ့ ပါတယ်။ ဖဆပလ ပြင်ဆင်မှု ပဏာမ ညီလာခံမှာ တင်ပြခဲ့တဲ့ ဖွဲ့စည်းပုံ အခြေခံဥပဒေမူကြမ်းကိုလည်း တိုင်းပြု ပြည်ပြုလွှတ်တော်သို့ တင်သွင်းခဲ့တယ်လို့ သိရပါတယ်။            ဒါပေမဲ့ ၁၉၄၇ ဇူလိုင်လ (၂၉) ရက်နေ့မှ ဩဂုတ်လ (၁၆) ရက်နေ့အထိ ကျင်းပခဲ့တဲ့ တိုင်းပြုပြည်ပြု လွှတ်တော် ဒုတိယ အစည်းအဝေးကို မကျင်းပမီ ၁၉၄၇ ဇူလိုင်လ (၁၉) ရက်နေ့မှာ ဗိုလ်ချုပ်အောင်ဆန်းနှင့် အာဇာနည်ခေါင်းဆောင်ကြီးများ လုပ်ကြံခြင်း ခံခဲ့ရပါတယ်။ အဲဒီ့ တိုင်းပြုပြည်ပြုလွှတ်တော် ဒုတိယအစည်း အဝေးမှာ ပြည်ထောင်စုအဖွဲ့ဝင် ပြည်နယ်များကိစ္စနှင့် တိုင်းရင်းသားလူမျိုးများရဲ့ အနာဂတ်အရေးကို အကျိတ် အနယ် ဆွေးနွေးခဲ့ကြပါတယ်။ ဒါပေမဲ့ အဲဒီ့အစည်းအဝေးမှာ ဖဆပလခေါင်းဆောင်ကြီးများက ဗိုလ်ချုပ် အောင်ဆန်းနှင့် အာဇာနည် ခေါင်းဆောင်ကြီးများ လုပ်ကြံခံရ၍ တိုင်းပြည်ကြီး ဝမ်းနည်းပူဆွေးနေတဲ့ အချိန်မှာ အချင်းချင်း အငြင်းအခုန်မလုပ်ဘဲ လွတ်လပ်ရေး ရရှိဖို့အတွက် လိုအပ်တဲ့ ဖွဲ့စည်းပုံ အခြေခံဥပဒေကို ရေးဆွဲ ပြဋ္ဌာန်းသွားရန် လိုအပ်ချက်အရ ဒီဖွဲ့စည်းပုံ အခြေခံဥပဒေကိုလည်း နယ်စပ်ဒေသ စုံစမ်းရေးကော်မတီ (FACE) ရဲ့ အကြံပေးချက်အတိုင်း ယာယီ ဖွဲ့စည်းပုံအခြေခံဥပဒေကိုသာ ရေးဆွဲပြီး လွတ်လပ်ရေး ရရှိပြီးနောက် ဖွဲ့စည်းပုံ အခြေခံဥပဒေ အသစ်တဖန် ရေးကြတာပေါ့လို့ ပြောခဲ့ကြတဲ့အတွက် တိုင်းရင်းသားခေါင်းဆောင်များ က အလျှော့ပေးလိုက်ရတယ်လို့ တောင်ကြီးဦးထွန်းမြင့်က ရေးသားခဲ့ပါတယ်။            ၁၉၄၇ စက်တင်ဘာလ (၁၅) ရက်နေ့မှ (၂၄) ရက်နေ့အထိ ကျင်းပခဲ့တဲ့ တိုင်းပြုပြည်ပြု လွှတ်တော် တတိယအစည်းအဝေးမှာ ၁၉၄၇ ဖွဲ့စည်းပုံ အခြေခံဥပဒေကို အတည်ပြု ပြဋ္ဌာန်းနိုင်ခဲ့ပါတယ်။ ဒါပေမဲ့ အဲဒီ့ အတိုင်း တိုင်းပြုပြည်ပြုလွှတ်တော်က ပြဋ္ဌာန်းလိုက်တဲ့ ဖွဲ့စည်းပုံ အခြေခံဥပဒေဟာ ပင်လုံစာချုပ်ကနေ လမ်းလွဲ သွေဖည်သွားရုံတင်မကဘူး၊ ၁၉၄၇ မေလမှာ ကျင်းပခဲ့တဲ့ ဖဆပလ ပြင်ဆင်မှု ပဏာမ ညီလာခံမှာ ဗိုလ်ချုပ်အောင်ဆန်း တင်သွင်းခဲ့တဲ့ ပြည်ထောင်စု ဖွဲ့စည်းပုံ အခြေခံဥပဒေနဲ့လည်း မိုးနဲ့ မြေပမာ အများကြီး ကွာခြားသွားခဲ့တာကို တွေ့ရပါတယ်။ ဘာဖြစ်လို့ ဒါတွေ ဒီလိုဖြစ်သွားခဲ့ရသလဲ။ ဘာကြောင့် ဘာတွေမှားခဲ့ တယ်ဆိုတာ ကျနော်တို့ ယနေ့အထိ အချင်းချင်း ငြင်းခုန်နေကြဆဲပဲ ဖြစ်ပါတယ်။ နှုတ်စကားနဲ့ လွှတ်တော် ထဲမှာ ငြင်းခုန်တာ မပြီးခင် စစ်အာဏာသိမ်းမှုနဲ့လည်း ကြုံခဲ့ရပြီ။ နှစ်ပေါင်း (၇၀) ကြာပြီဖြစ်တဲ့ ပြည်တွင်းစစ် နဲ့လည်း ကြုံခဲ့ရပါပြီ။            သမိုင်းမှာ ဘယ်လိုအမှားတွေပဲ ရှိပါစေ၊ ဘာတွေ ဘယ်လိုဖြစ်ခဲ့ပါစေ၊ ယနေ့ နွေဦးတော်လှန်ရေး ကနေ စပြီး မှားယွင်းမှု အားလုံးကို ကျနော်တို့ ပြင်ဆင်သွားကြရမယ်။ ပြင်ဆင်မယ်၊ ပြုပြင်မယ်။ သမိုင်းကို အကောင်းဆုံး အသစ် ဖန်တီးကြရမယ်။ ဒါကြောင့် ဒီနှစ် ကျင်းပတဲ့ အာဇာနည်နေ့ဟာ ပိုပြီးတော့ လေးနက် တယ်။ ပိုပြီး ထူးခြားတယ်။ တန်ဖိုးလည်း ကြီးပါတယ်။ ဘာဖြစ်လို့လဲဆိုတော့ ဗိုလ်ချုပ်အောင်ဆန်းနဲ့ အာဇာနည်ခေါင်းဆောင်ကြီးများ လုပ်ကြံခြင်းခံခဲ့ရလို့ တိုင်းပြုပြည်ပြုလွှတ်တော်မှာ အပြီးအစီး မဆောင်ရွက် နိုင်ခဲ့တဲ့ ပြည်ထောင်စု တည်ဆောက်ရေးလုပ်ငန်းတွေကို ဒီနွေဦးတော်လှန်ရေးမှာ ကျနော်တို့တတွေ ဆက် လက် ဆောင်ရွက်ခွင့် ရရှိတဲ့အတွက်ပဲ ဖြစ်ပါတယ်။            နွေဦးတော်လှန်ရေးမှာ ပြည်ထောင်စု တည်ဆောက်ရေးလုပ်ငန်းကို ဆောင်ရွက်နိုင်ဖို့ ကျနော်တို့ ဖက်ဒရယ် ဒီမိုကရေစီ ပဋိညာဉ်ကို ထုတ်ပြန်ခဲ့ပါတယ်။ ဖက်ဒရယ် ဒီမိုကရေစီ ပဋိညာဉ်ကို ကို အခြေခံပြီး ပင်လုံစာချုပ်၊ ပင်လုံကတိကဝတ်နှင့် ပင်လုံစိတ်ဓာတ်တို့ကို ပြန်လည်ဖော်ထုတ်ပြီး အကောင်အထည် ဖော်ဖို့ ကြိုးပမ်းနေပါတယ်။ ဗိုလ်ချုပ်အောင်ဆန်းကိုယ်တိုင် လုပ်ကြံခြင်းခံခဲ့ရလို့ သူကိုယ်တိုင် အဆုံးအထိ မတက် ရောက်နိုင်ခဲ့တဲ့ တိုင်းပြုပြည်ပြုလွှတ်တော်ကဲ့သို့သော တိုင်းပြုပြည်ပြုညီလာခံကြီးတရပ်ကို ပြန်လည်ခေါ်ယူ ကျင်းပပြီး အနာဂတ် ဖက်ဒရယ် ဒီမိုကရေစီ ပြည်ထောင်စု ဖွဲ့စည်းပုံ အခြေခံဥပဒေ တရပ်ကို အကောင်းဆုံး ရေးဆွဲ ပြဋ္ဌာန်းဖို့ ဖက်ဒရယ် ဒီမိုကရေစီ ပဋိညာဉ်မှာပါတဲ့ လမ်းပြမြေပုံအတိုင်း ကျနော်တို့ ပြင်ဆင်နေပါတယ်။            ဒါတင်မကဘူး၊ CRPH၊ NUG နှင့် NUCC တို့ ပူးပေါင်းပြီး အသွင်ကူးပြောင်းရေးကာလ ဖွဲ့စည်းပုံ အခြေခံ ဥပဒေတရပ်ကိုလည်း အမြန်ဆုံး ရေးဆွဲပြဋ္ဌာန်းဖို့ ကော်မတီတရပ် ဖွဲ့စည်းပြီး ပြင်ဆင်မှု အမျိုးမျိုး ပြုလုပ်နေ ပါတယ်။ ဒါတွေဟာ ဗိုလ်ချုပ်အောင်ဆန်းနှင့် အာဇာနည်ခေါင်းဆောင်ကြီးများ လုပ်ကြံခံခဲ့ရလို့ သူတို့ကိုယ်တိုင် ပြီးပြတ်အောင် ဆောင်ရွက်နိုင်ခြင်း မရှိခဲ့တဲ့ ပြည်ထောင်စု တည်ဆောက်ရေးလုပ်ငန်းကို သမိုင်းပေး တာဝန် အဖြစ် ဒီနွေဦးတော်လှန်ရေးမှာ ကျနော်တို့ ဆက်လက် တာဝန်ယူ ထမ်းဆောင်နေခြင်းပဲ ဖြစ်ပါတယ်။ဒါကြောင့် နိဂုံးချုပ်အနေနဲ့ ကျနော်ပြောချင်တာက ဗိုလ်ချုပ်အောင်ဆန်းနှင့် အာဇာနည်ခေါင်းဆောင် ကြီးများကို အမြင့်မြတ်ဆုံးသော နည်းလမ်းဖြင့် အောက်မေ့ သတိရခြင်းဟာ သူတို့ စတင်ဆောင်ရွက်ပြီး ယနေ့ အထိ မပြီးစီးသေးတဲ့ ဖက်ဒရယ် ပြည်ထောင်စု တည်ဆောက်ရေးလုပ်ငန်းကို အပြီးအစီး ဆောင်ရွက်ခြင်းပဲ ဖြစ်ပါတယ်။ ဒါကြောင့် ဒီပြည်ထောင်စုကြီးကို ဗိုလ်ချုပ်အောင်ဆန်းနှင့် အာဇာနည်ခေါင်းဆောင်ကြီးများ မျှော် မှန်းခဲ့တဲ့အတိုင်း စစ်မှန်သော ဖက်ဒရယ် ဒီမိုကရေစီ ပြည်ထောင်စုစနစ်ဖြင့် အမြန်ဆုံး တည်ဆောက်ကြဖို့ (၇၅) နှစ်မြောက် အာဇာနည်နေ့မှာ သန္နိဋ္ဌာန်အသစ် ပြုကြရအောင်လို့ တိုက်တွန်းရင်း နိဂုံးချုပ်အပ်ပါတယ်။-       အရေးတော်ပုံ အောင်ရမည်။-       အရေးတော်ပုံ အောင်နေပြီ။ ဒေါက်တာလျန်မှုန်းဆာခေါင်းပြည်ထောင်စုဝန်ကြီးဖက်ဒရယ်ပြည်ထောင်စုရေးရာဝန်ကြီးဌာနအမျိုးသားညီညွတ်ရေးအစိုးရနှင့်သဘာပတိအဖွဲ့ဝင် ကြားကာလ ချင်းအမျိုးသားအတိုင်ပင်ခံကောင်စီ